حضرت مباراة امس واتمنى من ادارة ملعب الدمام الإهتمام !! - نادي الهلال السعودي - شبكة الزعيم

هجمه مرتدة · #1 31/08/2013, 01:42 PM

السلام عليكم ورحمة الله وبركاته

كيف الحال يازعماء ومبروكين الفوز امس ..

انا كنت حاضر امس المباراه وللأمانه انا ماراح اعتب على اللاعبين اذا مالعبوا تمام رغم انهم ماكانوا سيئين
ما راح اعتب لأني كنت بالملعب وكنت حاس بالجو .. حضرت للملعب قبل ساعه ونص من ابتداء المباراه وبالقوه لقيت مكان جنب المنصه .. وامتلى قسم الهلال تماماً مع بداية المباراه وفيه هلاليين كثير مالقوا مكان فـ راحوا لقسم جماهير الإتفاق ..

عموماً امس الجو رطوووووووووووووووووبه الى ابعد الحدوووووود يعني لما وصلت ما امداني جلست 5 دقايق الا وماشاء الله سبحت وانا جالس ههههه عموماً كله يهون للزعيم .. لذلك نعذر اللاعبين لأن هذا وحنا جالسين فما بالكم وهو يركضون في الملعب ويبذلون جهد كبير

عتبي على الإتحاد السعودي وادارة الملعب عدم توفير كفتريات كثير ! الي سمعت مافيه الا 2
طلعت بين الشوطين ابغى اشرب مويه للأمانه كنت عطشااااااان جداً مع ذا الجو الباريسي ! واروح الكفتريا الي تبعد من بوابة المدرج الي انا فيه بـ 4 بوابات والقى ذيك الزحمه بدون تنظيم واذا تبي توصل لشباك الكفتريا لازم تدف خلق الله وفيه اطفال وسط الزحمه !
عموماً قدرنا الله ووصلنا للشباك واقول عطني مويه يقول مافيه ! طيب كولا يقول مافيه ! قلت وش فيه قال فيه فطيرة لوزين !

ومشيت للكفتريا البعيييييده ونفس الزحمه ووصلت ونفس الحكي لوزين !

بعض البوابات فيها برادات قلنا يلا عالأقل نبرد على كبودنا شوي الا واغلب البرادات مويه حاره !

يعني وش هالخدمات ! لو الجو حار فقط كان تحملنا لكن رطوبه ياجماعه رطوووبه

نتمنى تقديم الخدمات الي توفر الأريحيه للجمهور الحاضر وتوفير اكبر عدد ممكن من المياه بالكفتريا او السماح عالأقل للباعه المتجولين بالمدرجات .. بدال مانتمرمط !

طبعاً انا ما اروي سالفتي انا بس ! هذا الي صار للجمهور كله !

نقاط من المباراه :

* اشكر الرابطه امس صراحه كانت اهازيجها حماسيه وهذا المفروض من زمان

* واشكر الجمهور الكبيييييييييييير الشرقاوي عالحضور والتفااااعل مع الرابطه واعجبتني حركة الزلزال هز الملعب هز

* فيه ناس مالقت كراسي كالعاده فـ جلسوا على الدرج والي كان واقف والي راح لقسم الإتفاق

اعتذر عن عدم تنسيق الموضوع بس مالي بالتنسيق وهالأمور هههه .

موفقين يارب

جاسم الباسم · #2 31/08/2013, 01:46 PM

ايه والله انك صادق انا طلعت في الشوط الثاني والدقيقه 78 ابي اشرب مويه مافيه الا فطيره لوزين ونا يوم كنت امشي وجي عند الكفتريا ماعرف انطق اسمه ههه جيت قلت وش عندك قال عتدي فطيره لوزين وعصير ربيع مثلج قسم بالله حاله مشكور صاحب الموضوع

rf_20041 · #3 31/08/2013, 01:58 PM

يارجال مايتعدل الوضع الين مايفصلون الاتحاد السعودي عن نظام حكومه ويصير قطاع خاص مستقل بعدها اطلب غير كذا ماراح يتغير شيء

زعيم قصيباء · #4 31/08/2013, 02:19 PM

لا ويمكن فطيره لوزين بالتمر هههههههههههههههههههههههه حال ملاعبنااا وتنظيمها مضحك مبكي

ع العموووم ما قصرتوو ع الحضور والتفاعل رغم الاداء السيء وحاله الجوو.. ألف ششكررر لككم

هلاليه زي القمر · #5 31/08/2013, 02:51 PM

صراحه صراحه عيب دوله مثل المملكه هذي ملاعبها مافيها أي تطور ملاعب تم انشائها من عشرات السنين ومافكروا حتى يعدلونها ويقولون الجمهورمايحظر!!

عاد صراحه اذا بنتكلم بنتعب قنوات فاشله كل القنوات تطورت من مذيعين ومراسلين واخراج وتحليل فما بالك بملاعب يلا الله يعين

اهني اهل قطر ملاعب على مستوى وهذا وماعندهم جمهور قنوات رياضيه تضاهي القنوات العالميه ماشاءالله عليهم الله لا يغير عليهم

عموما ما قصرتوا كنتم جمهور والا اروع وهذا واجبكم اتجاه ناديكم كلها كم مباراة في الشرقيه

يعطيك العافيه

20عاشق الكنق20 · #6 31/08/2013, 02:56 PM

وبعدين ما شربت ماء
ههههههههههههههههههههههههههههه

الله يعين

هجمه مرتدة · #7 31/08/2013, 03:17 PM

حياكم الله جميع .. وبإنتظار مباراة زعمينا مع النهضه وبرضو مع الفتح راح نروح الأحساء لعيون زعيمنا ..

FAISAL AL7RBY · #8 31/08/2013, 03:22 PM

لست اول من يشتكي ولا الاخير

سبق و ان خرج رئيس رعاية الشباب في لقاء تلفزيون و وعد بـ تحسين مستوى الخدمات في الملاعب

ولكن انت تعرف ان وعود المسؤولين دائما تذهب في مهب الريح

mh1533 · #9 31/08/2013, 03:24 PM

إقتباس

الرسالة الأصلية كتبت بواسطة زعيم قصيباء


	لا ويمكن فطيره لوزين بالتمر هههههههههههههههههههههههه حال ملاعبنااا وتنظيمها مضحك مبكي ع العموووم ما قصرتوو ع الحضور والتفاعل رغم الاداء السيء وحاله الجوو.. ألف ششكررر لككم

ههههههههههههههههههههههههههههه

اي والله صادق

fabri_4 · #10 31/08/2013, 03:30 PM

ياخي وفر مطاعم محترمة بالملعب كذا تضمن حضور جماهيري كبير.
وعاد جمهورنا لازم يحضر قبل المباراة اقل شيء ساعتين حتى يحصل مكان مناسب
الملاعب عندنا سيئة ياليت يكون فيه إهتمام اكبر من كذا

بنو هلال · #11 31/08/2013, 05:29 PM

اللعب في المنطقة الشرقية غير صالح في الصيف
رطوووووووووووبة عجيبة
المفروض الدوري يبدأ في أكتوبر وينتهي في أبريل أعتقد سبعة أشهر كافية جدا

عشقي ازرق وابيض · #12 31/08/2013, 05:40 PM

بصراحه البارح حضرت وكانت الرابطة حماس

بس فيه واحد من الجمهور هلالي معه لائحة وكاتب عليها هلالي سامي بالانقلش

المهم جاء احد رجال الأمن حقين الملعب وأخذها منه ابعرف ليش أخذها ما ادري ايش السبب

بصراحه قهرني وكان ينفخ على المشجع الهلالي

ASTON MARTEN · #13 31/08/2013, 05:49 PM

أي والله صدقت بكل حرف وانا من الناس الي بالملعب كنت الجو باريسي من جد هههههههههههه مطر بدون سحب بس انا امنت نفسي شريت مويه واجد من الساعه 6 واخذتها معي بس من جد في ناس تلوم وهم ماحسوا بالاجواء الي كنا فيها والله لو مكاين وقفت من الرطوبه ... اشكرك ع الموضوع

fahad al.hilaly · #14 31/08/2013, 06:01 PM

يا فشيلتنا بس مويه على الأقل !!!!!!!!!!!!!!!!!!!

T4MiM · #15 31/08/2013, 06:37 PM

حتى انا والله,
طلعت بين الشوطين ابي مويه وزحمه وقلق وبالاخير مافي شي