أقيمت اليوم مباراة ديربي أسبانيا بين الريال والبرشا على ملعب سانتياغو برنابيو ملعب الريال ..
بداية المباراة كانت جس نبض من الفريقين مع إرتباك في لعيبة البرشا ، وفي الدقيقة 4 شات رونالدو وطلعت برا على يسار بونانو ورد عليه إكسافي على طول وشات من بعيد فوق العارضة ، وأستمر اللعب مع أفضلية للبرشا وتراجع غريب للريال ، وفي الدقيقة 8 جت هجمة للبرشا قادها لويس أنريكي وعطاها لكلويفرت وشاتها بقوه وصدها إيكر كاسياس وطلعت ركنية ، وأنطلق زيدان من نص الملعب وعطاها فيجو على اليمين وتعرّض لعرقلة من الأرجنتيني سورين وجا روبيرتو كارلوس يشوت الفاول وشاتها بقوه وصقعت كلويفرت ، وفي الدقيقة 13 خذ ( المطفوق ) بويول كرت أصفر بعد ما شلخ رونالدو ، وبعد ذا الكرت بشوي رفع ميكاليلي الكورة ومررها راؤول براسه لرونالدو وكسر التسلل وانفرد وحطها قوية على يسار بونانو كهدف أول في الدقيقة 15 ، وأستلم الريال اللعب بعد هدف رونالدو ، وشات زيدان كورة من بعيد وجت سهله لبونانو ، وبعدها على طول خذ ( المعوّق ) ميشيل سالجادو كرت أصفر بعد ما كسر أوفر مارس ، وفي الدقيقة 25 جا فاول لأنريكي على زاوية الثمانطعش بعد ما تعرّض لخشونه من زيدان ..................................... >>> أنقطعت الصورة ولا أدري وين راحت الكورة المهم ما جت هدف ، وبعد ما رجعت الصورة خذ أنريكي كرت أصفر بعد ما أشترك بقوة مع هيليجيرا في الدقيقة 27 ، وفي الدقيقة 31 تفنن ( المعوّق ) سالجادو وأنقطعت الكورة منه وراحت لأوفر مارس ورفعها على راس كلويفرت وصقعها بقوة بس صدّها كاسياس ورجعت لأنريكي وشاتها بقوة في الباب كهدف تعادل ، وكانت الجهه اليمين للريال شاااارع يلعب فيه أوفر مارس على كيفه >>> أنا ودّي أعرف إلى متى يلعب سالجادو أساسي مع الريال ؟؟ ، وفي الدقيقة 35 صقع زيدان بويول ( المطفوق ) بكوعة وجا شوي إحتكاك بين اللاعبين ولا خذ زيدان ولا كرت ، وأستمر اللعب وخذ فرانك دي بوير كرت أصفر في الدقيقة 38 بعد ما كسر راؤول من ورى ، ومرر راؤول الكورة لروبيرتو كارلوس ومثّل على الحكم وخذ أصفر >>> أنا خفت أحسبها بلنتي ، ومرر أنريكي الكورة لجابري من ورى المدافعين وحطها في الباب كهدف ثاني بس يا قهر ما أمداني أفرح صار الهدف تسلل ، وقبل ما ينتهي الشوط رفع ( المعوّق ) سالجادو الكورة على راس رونالدو اللي مايعرف يطقّ بالراس وحطها فوق العارضة .. وأنتهى الشوط الأول ..
في الشوط الثاني نزلوا الفريقين بدون أي تغيير ، وفي الدقيقة الأولى رفع جابري الكورة من الجهة اليسرى وثبّتها كلويفرت على صدره وشاتها مقصية بس جت سهله لكاسياس ، وشات مندييتا كورة لافه وهو على راس الثمانطعش بس طلعت برا ، المهم كانت ذا الدقايق كلها للبرشا وكان ماسك اللعب بس بدون خطوره ، وفي الدقيقة 16 خذ هيليجيرا كرت أصفر بعد ما أشترك مع مندييتا ، بعد ذا الكرت شات سالجادو كورة من بعيد مسكها بونانو بسهوله ، وفي الدقيقة 21 خذ زيدان كرت أصفر بعد ما كسر موتا البرازيلي من ورى ، وأستمر اللعب بأفضلية البرشا اللي بدت مع بداية الشوط الثاني ، وفي الدقيقة 26 خذ مندييتا كرت أصفر بعد ما أشترك مع رونالدو وكسره من ورى ، وغيّر ديلبوسكي التغيير الأول وطلّع كونسيساو ونزّل جوتي ، وفي الدقيقة 32 كاد كلويفرت ينفرد بس إنه تلخبط في الكورة وقطعها هيليجيرا ، وأنطلق فيجو من وسط الملعب وأخترق دفاع اللبرشا وواجه بونانو وشاتها في رجليه وراحت ركنيه ، وغيّر أنتيتش وطلّع أنريكي وهو زعلان ما ودّه يطلع ونزّل ريكويلمي ، وفي الدقيقة 35 من ضربة ركنية رفعها فيجو وضربها رونالدو على غير العاده وصقعت العارضه ونزلت وخلصها الدفاع ، وغيّر أنتيتش التغيير الثاني وطلّع مندييتا ونزّل جيرارد ومن أول كورة لجيرارد خذ كرت أصفر بعد ما لمس الكورة بيده ، وفي الدقيقة 42 خذ ( المعوّق ) سالجادو الكرت الأصفر الثاني وأنطرد من المباراة بعد ما كسر أوفر مارس ، وفي الدقيقة 46 خذ سورين كرت أصفر بعد ما عرقل فيجو ، وشات زيدان في الدقيقة 47 كورة قويه وصدها بونانو وراحت ضربه ركنيه وأنتهت المباراة بهذي النتيجه 1 / 1 وطبعاّ هذي النتيجه ما ترضي جماهير الريال ..

نقاط من المباراة :
** زيدان كان يستاهل الكرت الأحمر بس ما عندك حكم ..
** رونالدو وأنريكي سجلوا في فرقهم السابقه ..
** أثبت سالجادو أنه يلعب بالواسطه (( الله يخلّي بنت الرئيس )) ..
** كانت المباراة مشدوده أكثر من اللازم ..
** فيجو وراؤول كانوا من أسوأ لاعبين الريال مع لاعب الواسطه سالجادو ..
** إكسافي كان أفضل لعيبة البرشا ..