|| superclasico || away || فالديز يُبقي امل مدريد قائماً || " Gracias, Valdés " - نادي الهلال السعودي - شبكة الزعيم

HIERRO 4 · #11 30/08/2012, 06:43 AM

الحمدلله على كل شيء, اللي صار شيء كبير وما حصل ابد .. دايم الفريق يبعد عنه الضغوط في ظل كان هو الفريق الأقل حظوظاً .. دايم ما يكون الفريق في وضع افضل من هالناحية خصوصاً ضد برشلونة .. هالشيء تكرّر فـ مباراة الاياب والفريق ما استفاد من هالعامل .. لكن تعثّر خيتافي كان ايجابي وردة فعله قويّه جدّاً على المجموعة كاملة .. الفريق كان مُقنع تماماً وكان يمشي بطريقة معينه وبنهج معيّن وبسلاسة بالإنتقال من الوضع الدفاعي للهجومي بإسلوب جديد ..
اللي حصل من مورينهو من توظيف لـ لاعبين ومن نقله كبيره فـ موضوع الحاجز النفسي و الإخفاق الرهيب بالدوري والدروب بالمستوى وتحديداً على أعمدة الفريق (( أوزيل / رونالدو )) كان دور فعّال جدّاً بهالمُباراة إنُّهم يستخلصون كل مافي طاقتهُم من قُدرات لـ مثل هالمُباريات .. تحتاج كل الأدوات الفعاله انك تقوم بـهالاسلوب الجديد .. وإنّك تتعامل مع الضعف الواضح في متوسط دفاع برشلونة بطريقة جديده .. بطريقة تلخمك انت كمُتابع لـ مدريد ..
برشلونة في جميع اللقاءات يلعب بـ دفاع مُتقدم .. هذي نقطة ركز عليها مورينهو بشكل كبير جدّاً .. إنّك تربط دور كريستيانو بدور هيقوين بـ تفكيك الدفاع وإستغلال الباص الطويل .. أوّلاً كان سبب رئيسي فـ الهدفين والطرد أيضاً .. وكان مصدر خطورة واضح على برشلونة وعلى العقم والبُطئ اللي صاير بين بيكي وماسكيرانو ومافيه أي كامستري بالموضُوع ! وهذي نقطة كبيره مُهمّه استغلها مورينهو أتم إستغلال .. مسألة إنّك تضيف كريستيانو للعمق الهجُومي لك وتقلّل من مهامّه على الطرف ! برضو هذي نقطة قويّه تحسب لـ مورينهو ! كنّا محتاجين هالكم الهجومي فـ الوسط الضعيف لـ برشلونة من ناحية الدفاع ..
غير كذا فيه نقطة دايم ننبّه عليها وهي الجُهد المبذول فـ إفتكاك الكورة ضد برشلونة وإسترجاع الكورة لصالحك وفُقدانها بسهولة .. هذي كانت لحالها مُشكلة عظمى .. أولاً إستهلاك للجهد البدني لـ لاعبينك .. ثانياً عدم القدرة على بناء هجمة مُنظمة ! ..هذي اشياء كارثيّه كانت ضد برشلونة وكانت تسبب مشاكل كبيرة للريال .. وتعدم اهم نقطة لريـال مدريد تفوّق بها وتطوّر بهالناحية وهي " السيطرة // المُرتدّة " كل هذي فقدناها ضد برشلونة .. ببساطة لأن الريـال يضيع جهده فـ افتكاك الكورة والتسليم الخاطئ للخصم بـ سهولة أيضاً !!
أشياء مُميزه كانت بالمُباراة تواجد (( مارسيلو )) ! كان إستثنائي بشكل كبير ! يارجُل هذا ما يدفي الدكّه أبداً وإقحام كوينتراو بدلاً عنه .. هذي النقطة بالذات مُستحيل تدخل مخّك كـ متابع لـ ريـال مدريد .. كانت من اقوى الجهات وأجمل الثنائيات اللي حصلت بعد روبيرتو كارلوس وزيدان ! مارسيلو عمل شغل كبير مع كريستيانو وقدرات هجوميه خارقه ودفاعيّاً أيضاً ! الشيء المُميّز الثاني تواجد سامي خضيره .. اللاعب هذا ما يُقنع أي مُشجّع فالعالم تحس إن دوره بسيط جدّاً مُجرد مراكض فـ الملعب .. لكن بكل مُباراة ضد برشلونة هذا الشخص يلخمك ويجبرك على إنّك تحس بقيمته ..

لـ لحظات .. خلونا نرجع لـ فرحته بالهدف هذي لحالها شعر راسك يُوقف ! , عن البربسة والكلام الفاضي .. صحيح هيقوين ضيّع فُرص بالهبل من قدومه للريـال وفالمُباريات الحساسة دايم يكون له شيء غريب فالمُباراة من إضاعة الفُرص .. لكن نكُون واقعيّين شوي ؟ قليل من مُهاجمين العالم يقدر يتمركز بـ مثل ما تمركز هيقوين بأكثر الفُرص .. طيب نفترض تواجد بانزيما بيقدر يخلق مساحات وإعطاء حلول للباص؟ وإنّه يفضّي لنفسه أماكن تساعده على الانفراد ؟ إستحالة !
نوعيّة هيقوين جميلة جدّاً .. صحيح ما نشوفها الا ضد الفرق الصغيره .. وأهدافه السلسة والسهلة تجي ضد اسبانيول وطقّتها .. بس نعطيه حقّه قبل الفرصه كيف يتمركز وكيف يخلق لنفسه مساحة فاضيه ويعطي لـ الوسط حلول إضافيّه فـ إنّه يفيدك بالباص !! هذي نقطة مُهمّة قبل تعاتبه على الفُرصه شف كيف يسحب نفسه للمكان الفاضي .. نعمة

, نعمة

..

بعيد عن كونه همجي .. بعيد عن كونه يصدم .. بعيد عن كونه يترك مخّه ويجي يلعب .. مسألة إنّه يكون بدفاعك هذا لحاله شيء بطل .. يعطيك إنطباع إنه مستحيل فـ الافتكاك ينكبك ! وجوده خلنا نعطيه وصف أكبر هو (( هيبه )) لدفاعك .. أنا منب من النوع اللي يفخّم الشخص وبالعكس كنت من مُده بسيطه أسب فالشخص أعلاه .. أحد قال بلنتي " قوميز " ؟ .. وجوده مفيد ومهم كثير بدفاعنا .. مُختلف عن مدافعين العالم له طريقته الخاصه ونهجه الخاص فـ مسألة الإفتكاك أو التغيطة تشمل (( الدلاخة و الذكاء )) .. مبدأ يا اللقط الكورة أو أعدمك مبدأ جميل ضد برشلونة

.. حد من خطورة لاعبين كثير ,, ترجع لـ لقطة الهدف الثالث لـ برشلونة هدف تشافي بالأخص ! دراما غباء مُتحرّك يحمله " البيول " .. فرضاً شفنا مكانه " بيبي " أنا أجزم إن الصنادح مُمكن يُصاب بـ فتاق

.. يعطيك العافية يا الأقرع

!!

أحد يشوف اللي أشوفه ؟ مُشكلة كبيره فـ إيكر مع الفاولات .. وعنده مشكلة كبيره فـ صفه الحيطة ! ومشكلة كبيره برضو فـ إعداد وتكوين العدد بالجدار الدفاعي وإختياره للاعبين .. عجيب جدّاً اللي شفته اليوم ! إيكر وبهالخبره الكبيره .. دايماً ما يخطي فـ مباريات مهمّه وكبيره فـ مسألة الفاولات المضادّه ! يمكن ما أحد يعجبه الكلام لكن ذا واضح وصار أي فاول يدينّا على عيونّا ! وبس نناظر بـ هالحيطة !
أحد هالأخطاء فـ التشامبيونز ضد يوفنتوس و مُباراة تأهلك كـ أوّل للمجموعة وتبعدك عن مواجهة الفرق القويّه ..

http://www.youtube.com/watch?v=FcJE3...eature=related

تابع معي الدقيقة " 1:52 " .. خطأ تافه جدّاً وبديهي لأي حارس إنّه بيصف الحيطة بجهه معينه و وإهتمام الحارس بيكون بجهته الخاصّه به .. لكن تخيّل معي إن الخصم يوفنتوس والمنفّذ " ديل بييرو " قاتله يا إيكر !

http://www.youtube.com/watch?v=wQwPLuMhAc8

وهنا مُباراة مهمّه ضد فياريال بنهاية الدوري وتسبب بإن الفارق يكون +4 ! بعيد عن إن الفاول كان شرعي أو لا .. كاسياس عنده مُشكلة فـ الفاولات والأمثلة كثيره .. مثل جنينهو وغيره من مسافات بعيده .. أنا اللي أشوف هالشيء ولا أنتم شايفين هالشيء برضو !! مُصيبه ..

ألف مبروك فانز مدريد .. هاردلك فانز برشلونة .. والله يطوّل بعمر تيتو ههههههههههههههههههه .. إلاّ قبل أختم تحيّه " سوبر مو " ونقولك الكلاسيكو القادمه تقديمه عندك بإذن الله

..