13/08/2012, 02:45 PM
|
| محرر اخبار رابطة مانشستر سيتي | | تاريخ التسجيل: 03/08/2011 المكان: حيث أتنفس !!!
مشاركات: 797
| |
بسم الله الرحمن الرحيم
نجي نتكلم عن المبارة و استحملوني يا شباب الرد بيكون شوي طووويل وممل للبعض
بتكلم فنيا عن مبارة امس و الخطة اللي لعب فيه المانشيو <<< وش عنده الشنيف
الفريق لعب او بالاحرى المدرب لعب بالطريقة اللي حاول انه يطبقها في المعسكر
اللي هي 3-5-2
بتواجد 3 قلووب دفاع زباليتا و كومباني و سافيتش ثابتين لا يتحركون من متطقتهم ابدا
امام 5 لاعبين وسط
محورين دي يونغ ثابت و يايا توريه متحرك و له الحرية في التحرك في جميع ارجاء الملعب
على الاطراف يتواجد كورلوف على اليسار و ملينر على اليمين زي ما هو واضح بالصورة
و خلف المهاجمين يتواجد نصري يتحرك مرة يمين و مرة يسار و مرة بالعمق و يوزع كور و يتبادل ادوار مع يايا يعني يايا يصر مرة هو صانع اللعب و خلف المهاجمين و نصري يصير محور متحرك
في الهجوم الثنائي تيفيز و اغويرو
اغويرو يتحرك قليل على الطراف و للورااء و يصير بينهم مداورة
الخطة 3-5-2 حلوة هجوميا
لانك قادر تنوع اللعب سواء من الاطراف او من العمق او بالتسديد و استغلال القادمين من الخلف
شكل الفريق اذا كان يهجم راح يصير كذا
يعني ثلاثي الدفاع يبقى في منطقته ويا المحور و ما يتقدمون يصيرون عند الدائرة
اما التوزيع الهجومي لــ باقي اللاعبين بيصير كذا
كورلوف و ملينر على الاطراف قريبين من الركنية لاستقبال الكور و من ثما لعب العرضيات و شفنا البارح احد الاقوال جت من عرضية كورلوف
يعني في المبارة البارح شفنا كورلوف و ملينر يوزعون 30 عرضية و الرقم ذا عالي بالمسبة لفريقنا على الاقل
صحيح ما جاء منها الا قووول واحد لكنها ايضا تسببت بطريقة غير مباشرة بالهدف الاول حق التعديل
الكورة كانت عرضية من ملينر و ارتدت من الدفاع و استغلها يايا توريه
الاسلوب الهجومي للفريق بيكون الاعتماد على العرضيات و اللعب من العمق و اللعب بمثلثات بين لاعبي الهجوم
يعني بنشوف لعب مثلثات بين نصري و كرولوف و اغويرو او يايا و ملينر و تيفيز
او يايا و اغويرو و تيفيز او اغويرو و تيفيز و نصري و هلما جرا في الكرات العرضية يستفيد الفريق من الكرة بأي حالة سواء ان لعبت مباشرة او راح يتحصل الفريق على الكرة الثانية لما ترتد من الدفاعات
لوجود لا يقل عن خمسة لاعبين في منطقة جزاء الخصم
طبعا اذا اكتمل شكل الفريق راح تتطبق الخطة بشكل افضل و ارووع من اللي شفناه امس
اما في الحالة الدفاعية
خطة 3-5-2
بتصير كذا
بيتراجع كورولف و ملينر او من راح يقوم بدورهم للوراء ليقوم بدور الاظهرة و بتصير الخطة تقريبا
5-2-2-1
بحيث ان اللي يدافعون تقريبا 7 لاعبين
بحيث ان كومباني يصير قشاش و زباليتا على اليمين و سافيتش على اليسار
و الاظهرة يغطون اجنحة الخصم بمساندة قلوب الدفاع المتحركين بإستثناء كومباني اللي بيكون قشاش
اما منطقة العمق بصير فيها محورين دي يونغ و يايا توريه و بيتقفل العمق بشرط ان المحاور ما تترك مساحة ابدا بينها و بين قلوب الدفاع
و كلنا شفنا كيف ان اهداف تشلسي جت من منطقة العمق خصوصا القووول الاول لما تحرك راميرز بكل حرية في العمق و ما لقى احد يضايقه
نصري و اغويرو دورهم يضغطون على محاور الخصم بحيث انه ما يبني الهجمة بكل راحة و يحاولون تعطيل هجماتهم
و تيفيز دوره انه يمسك معه اكثر من مدافع في الخلف و لا يخليهم يتقدمون الى الامام عشان تقل الناحية العددية للخصم
بإختصار خطة 3-5-2 خطة ممتاز بشرط وحيد
ان اللاعبين يتشربونها بشكل كبير خصوصا دفاعيا و يطبقونها بكل حذافيرها
لكن اللي قاعدين نشووف من خلال مبارة امس و المباريات الاستعدادية ان
الدفاع مو قادر يطبقها بشكل صحيح الى الان
و استمرار المدرب في تطبيقها سلاح ذو حدين
يمكن تنجح معه بشرط اللاعبين يتعاونون معه او يفشل و يخسر الفريق عدد من النقاط
خصوصا لما تواجه فرق سريعه تلعب المرتدة بشكل سريع
اتمنى اني وفقت في نقل وجهة نظري و اذا تبون نتناقش حولها اطرحوا وجهة نظركم الوضع بحري ..... |