09/06/2012, 08:28 PM
|
| زعيــم متألــق | | تاريخ التسجيل: 01/01/2009
مشاركات: 1,323
| |
مدري ليه مستعجلين على المدرب و التعاقدات .. باقي على المعسكر ٢٠ يوم .. و لو أعلنوا التعاقد مع المدرب الآن ما راح يمسك الفريق إلا في المعسكر .. الاستعجال مب مطلوب .. و لازم يفهم الجميع إن الإدارة أحرص من أي مشجع على الفريق و أوضاعه .. لأن نجاح الفريق يعني نجاحها و فشله يعني فشلها .. أما حنا نتكلم و لا ندري وش يصير في المفاوضات و التعاقدات .. لذلك خلوهم يشتغلون و تشوفون النتايج اللي تسركم بإذن الله ..
و إذا ما فيكم صبر على المدرب تراه ما راح يخرج عن ( جيريتس ) أو ( خورخي سمباولي ) ..
كل المؤشرات تدل على ذلك ..
أما ديشامب لن يكون المدرب القادم .. و الحمدلله إنه ما راح يصير مدربنا .. مدري ليه أغلب الجمهور يبيه ..
بالنسبة لعودة جيريتس أشوف فيه مؤيدين و فيه معارضين ..
عودة جيريتس فيها إيجابيات و فيها سلبيات ..
من الإيجابيات إنه عارف الفريق و الأجواء و الأهم من هذا يعرف البطولة الآسيوية و الدور القادم و أهميتها بالنسبة للإدارة و الجمهور
بالإضافة لكل ما سبق .. الفريق كان مقدم مستوى كبير أيام جيريتس و ما في أحد ينكر الشي ذا ..
أما السلبيات هي إنه تخاف يرجع و ما ينجح و الشي ذا بعلم الغيب .. يعني ممكن يرجع و يواصل نجاحاته مع الفريق و في نفس الوقت ممكن يرجع و يفشل أو ما يصنع الفرق كما كان ..
البعض يقول خاين و ترك الفريق في وقت صعب .. الظاهر إنكم ما سمعتوا كلام بو فيصل لما قال كنا نعلم بخروج جيريتس من نهاية الموسم و طلبنا منه يكمل البطولة الآسيوية فقط .. يعني شي متفق عليه من بدري و الرجال ما ترك الفريق فجأة ..
أما خورخي سمباولي فهو حسب ما سمعنا مدرب كبير .. و قدومه نفس الشي فيه إيجابيات و فيه سلبيات ..
الإيجابيات إنه مدرب طموح و قوي شخصية و تكتيكه مميز حسب ما نسمع ..
سلبياته إنه يحتاج وقت للتعرف على الفريق و اللاعبين ..
و على فكرة البعض يظن إن قدوم مدرب جديد على المنطقة شي سهل .. و إنه يسلك مع الفريق بسرعة ..
حط نفسك محله .. تخيل إنك مدرب و رايح تدرب في منطقة جديدة و فريق جديد و ما تعرف أي شي عنهم .. كم بتحتاج من الوقت ؟؟؟!!!
لذلك كما ذكرت قدوم أحد المدربين مو شي سهل .. و يحتاج للدراسة و التأني ..
و فيه مشكلة كبيرة عند جمهورنا العزيز .. اللي هي إنهم يقيسون نجاح المدرب من عدمه بتحقيقه للبطولة الآسيوية .. يعني لو جا جيريتس و حققها بيقولون نجح و نشكر الإدارة على تعاقدهم مع جيريتس و من هالكلام .. و إذا لا قدر الله ما حققناها .. بيقولون فاشل و ليته ما رجع .. و كنا نقول لا تجيبونه ..... إلى آخره.
و نفس الكلام ينطبق على خورخي سمباولي .. لو جا و حققها بيقولون مدرب جديد و طموح و عشان كذا حققها .. و لو ما حققها بيقولون لو جا جيريتس أزين .. لأنه يعرف الفريق و اللاعبين ..
في النهاية لازم يعلم الجميع إن التوفيق بيد رب العالمين ..
الله يكتب اللي فيه الخير لهلالنا .. سواء مع جيريتس أو سمباولي ..
( بالنسبة لرأيي الشخصي : ما تفرق معي جا جيريتس أو سمباولي .. لأن كلهم مدربين كبار و في حال تم التعاقد مع أحدهم فإني أشكر الإدارة لأنها سوت اللي عليها .. و اجتهدت .. و يتبقى التوفيق من رب العالمين .. )
آسف على الإطالة و أشكر الجميع .. و أطلب منهم الصبر .. |