انا اتسرئت يرقاله
ياعيال ان فيني مرُ(يعني ضيقه) من سالفه صارت لى اليوم مابعد كملت الاثناعشر ساعه
قلت عاد مالي الا انى اقولها للعيال في المنتدى عشان شيئين
الاول|عشان ابرد حرتي من السارق
الثانيه عشان تبحنحون جيوبكم(تقطون لي)اشتري مسجل جديد
السالفه
اسمعوا ورجاءا سكرو جوالاتكم عشان ماتشوشون علينا
اليوم انا في امان الله طالع ابروح الدوام (طبعا كنت متأخر)الساعه تسع وخمسه واربعين دقيقه بالضبط
طالع مع باب البيت ولابس الشماغ والعقال ومعي في كاسي الحليب زي العادة سيارتي جنب الباب المهم لما سكرت باب البيت وابروح لسيارتي
اناظر
وواناظر
الا اشوف في السياره حقتي واحد (مب انا)
اتمقل زين
الرجال ماجاب خبري
وفي لحظه
شفت القزازه حقت الباب الوراني مكسوره
طبعا عرفت ان المساله فيها سرقه
(طبعا الكلام اللي فوق كله كان في ثواني معدوده)
المهم
وانا اللي افتح باب السياره حقتي
واشوف ولد في عمر 18او 17
يوم اني مسكت في فنيلته
ولا هو اللي
يرافس
ويرافس
ويرافس
طبعا من قوه المشاجره اللي في لحظات
انشقت فنيلته من يدي وقدر ينحاش مع الباب الثاني للسياره
وهو اللي
يركض
وانا اللي وراه
درقن درقن
ودرقن درقن
تقل سباق سلق
وافسخ النعال (تكرمون)
ويطيح الشماغ والعقال
وتروح الترسيمه حقت الدوام
ومن شارع لشارع
ومن براحه لبراحه
ومن مخربه لمجربه
وانواع تشقق الرجلين
وبيني وبينكم
كنت في الاول قريب من الولد
يوم بدت رجلي تتشقق والحصى يسوي فيها العمايل من تحت
وانواع الدمان
الى اني بدى في الاخير يبعد عني
وبيني وبينكم
يوم اني مشيت سبرنت خمسمية متر بديت افح واتعب
والولد خايف ويسرع (بيني وبينكم الخوف هو اللي خلاه يتعداني ولا بحس بالحصى والشارع)
وحنا نتلاحق انا وياه
قابلت حقين اللي يشيلون الزبايل(تكرمون)
واصيح لهم وانا اركض
امسكوه
حرامي
ولا احد معبرني
وانواع اللعن والشتايم وانا الحقه
واقوله وقف
وقف
ياحرامي
ياللي فيك مافيك
الرجال ماعنده مقزز
نهايتوه
اني لحقته ولا امداني عليه
والولد زي ماقلتلكم شباب ومعصقل وطويل تقل كنه عمود كهرباء
اللي يشوف هالمواصفات في طريقه الله لايهينه يبلغ عليه
لانه سرق مسجلي حق السياره قيمته حوالي 5000
اللي يشوف مسجل في الحراج ولا في التشليح( هوندا 2000 مقلوبه 2003 واحد بكاش)
ترى لون الهوندا فضي (وش دخل اللون)
(واحد مصدق ان احد الاعضاء بيلقاه)اللي بيلقى المسجل ابعطيه هديه قيمتها سبع الاف ريال(شكلكم تقولون ورى ماتشتري واحد جديد وتحط الالفين في جيبك,,لوووول)
عاد بعد ماتعبت من لحقته رجعت لسيارتي وشلتها ورحت ادوره في الشوارع طبعا احتماليه لقوته 10% بس بغيت اقنع نفسي عشان مااجي في الليل وتقعد تحاسبني
ولا يجي واحد ويقول
وراك ماسويت كذا
او كان سويت كذا
مجرد ابراء للذمه رحت ادور بالسياره
المهم من الخبر
انا صحيح ضاق صدري على المسجل ورحت زينت القزازه بميه وخمسين (قيمت اشتراك في الانتر نت 3 شهور مفتوح)
بس اللي قاهرني اكثر
ان هالحرامي كان بين يديني ولا قدرت اتمكن منه (شي يقهر صح ((لوني ماشفته كان احسن))
الشي الثاني ان السبرنت اللي خذته انا وياه راح هباء منثورا وتجرحت رجلي على الفاضي
الشي الثالث والمضحك ان شباشبه ومفكاته عندي في السياره الا الحين (اللي يعرفه يجي ياخذها ويعطيهياه)
الشي الرابع ان الولد باين عليه من شكله ان حالته الاجتماعيه والماديه كويسه ( الولد ابيض مقبول الوجه ..شبشبه قيمته حوالي 30 ريال بنطلونه جينز جيد فانيته مقبوله جدا ومسكين شقيتها له))


السؤال اللي بقوله ...تتوقعون ليش مثل هذا يضطر الى السرقه..وسرقه ماذا!!! سرقه اشياء لاتستاهل مخاطرها ؟؟(ابغى جواب يعيال كل واحد حسب رايه)

أول شي العوض ولا القطيعة00,,واذاكانت على المسجل الامرهين00,,يفداك وانااخوك00,,

والشي الاهم ان السبب وراء قيام شباب يعودللفراغ00,,اللذي يعيشة غالبية الشباب00,,

ولاتنسى التربية00,,ودورالاسرة والمجتمع00في منع وقوع مثل تلك الحالات00,,

تحياتي يالغالي000والله يحفظ شبابنا00,,

[c]اقول الله يخلف عليك وانا متعشم فيك يوم الجمعه تروح للعراق تفك بين امريكا والعراق
طلعت من جنبها بزر يهبل فيك

شموخ اسمح لي طلعت ما انت قدها طلعت خكري الزفلت يجرح رجلينك
ما توقعت هذا الشي...ولا مسوي شامي يشرب حليب على الصبح

اقول يالغالي ليش ما تنشاف والا هذا على شان المسجل
واذا على المسجل وما معك دراهمه ترى الكنز مستعد <<ابد ما وهق الكنز


صمت العيون™ [/c]

شموخ الله يعوضك خير عن اللي انسرق والحمد لله انها جت على المسجل بس!!! مو كل السياره!!! والمسجل بداله مسجل!! مو شرط بخمس الاف!!! اشتر واحد من هذولي العاديات التقليد
اهم شي عندك شريط يشتغل واذان تسمع

إقتباس اليوم انا في امان الله طالع ابروح الدوام (طبعا كنت متأخر)الساعه تسع وخمسه واربعين دقيقه بالضبط

احييك على ها الأنضباطيه

إقتباس طالع مع باب البيت

ماادري فيه مكان ثاني ممكن تطلع معه بيت جيرانكم مثلا

إقتباس يوم اني مشيت سبرنت خمسمية متر بديت افح واتعب

نفس المشكله يعاني منها الهلال ضعف اللياقه

إقتباس انا صحيح ضاق صدري على المسجل ورحت زينت القزازه بميه وخمسين (قيمت اشتراك في الانتر نت 3 شهور مفتوح)

وين هالأشتراك فيه؟؟ كلهم يبيعون 3 شهور مفتوح ب 270 ريال

إقتباس السؤال اللي بقوله ...تتوقعون ليش مثل هذا يضطر الى السرقه..وسرقه ماذا!!! سرقه اشياء لاتستاهل مخاطرها ؟؟(ابغى جواب يعيال كل واحد حسب رايه)

1- ضعف الوازع الديني
2- التربية السيئه
3- اصدقاء السوء

إقتباس الاول|عشان ابرد حرتي من السارق

ولايهمك أول معصقل باشوفه في طريقي ... بألقطه مع سيقانه

إقتباس الثانيه عشان تبحنحون جيوبكم(تقطون لي)اشتري مسجل جديد

حسبت القطه على شأن تشتري لك ... شبشب

إقتباس الا اشوف في السياره حقتي واحد (مب انا)

إقتباس شفت القزازه حقت الباب الوراني مكسوره

إقتباس طبعا عرفت ان المساله فيها سرقه

لا ياشيخ ... توك تفتح ... والا مشغل بالك الحليب

إقتباس شبشبه قيمته حوالي 30 ريال

وش دراك عن قيمتها ... الأخ بياع أحذيه

إقتباس السؤال اللي بقوله ...تتوقعون ليش مثل هذا يضطر الى السرقه..وسرقه ماذا!!! سرقه اشياء لاتستاهل مخاطرها

1- البطاله
2- المخدرات




_____________________

شمــوخ ياغالي الله يعوض عليك

هلا اخوي شموخ,

وحط الف خط تحت اخوي,علىشان مايصير فيها تهديد ثاني مره,وبسيطه اهم شي طول الله عمرك انك اخذت تمرين لياقي على الصبح.

وتعيش وتاكل غيرهاان شا ءالله.

إقتباس اسمعوا ورجاءا سكرو جوالاتكم عشان ماتشوشون علينا

حتى البياجر طفيناها حشى داخلين حرب

إقتباس طالع مع باب البيت ولابس الشماغ والعقال ومعي في كاسي الحليب

اجل اخذت لك تعسيله وانت تحمى السياره حليب مع هالصبح

إقتباس سكرت باب البيت وابروح لسيارتي اناظر وواناظر

ماشاء الله عليك ياابنى نزرك سته على سته متكلش لا سمك ولا بيض

إقتباس الا اشوف في السياره حقتي واحد (مب انا)

ههههههههاى هذا النقتف اللى يعطونك ا يها بعد ماتصور

إقتباس شفت القزازه حقت الباب الوراني مكسوره

اصلنا سيارتك مافيها قزاز ياخوى من قال لك ان معك سياره انا خابرك الصبح تركب هالسياره وتفل الشراع وتشوف اتجاه الريح حشى تايتنك



ابغى جواب يعيال كل واحد حسب رايه)
زى ماقالوا
البطاله - والمخدرات - وضعف الوازع الدينى :sad:

الحمد لله على السلامه
وانا واعوذ بالله من كلمة انا
اعتقد ان مسجل سيارته برضوه خربان عشان كذا بياخذ مسجلك
والحمد لله على السلامه

مساء الورررررررررررررررررررررررررررررررررررررررررررررررررررررررررررررد


أولاً أشوى اللي مهوب موترك اللي منسرق ;)

ثانيا :: ركزوا معاي بهالمصطلحات العجيبة هذي اللي أطلقها أخونا شموخ ===>>

وانا اللي وراه ===>>> درقن درقن ===>>> ودرقن درقن ===>>> تقل سباق سلق

عرف درقن ؟؟

عرف سلق ؟؟

عرف تقل ؟؟

بأنتظار الأجابة ياشموووووووووووووخ

أغششه ؟؟ السلق : هونوع من الحباري

هلااا وغلااا أخوي شمووووووووووخ ...

يامااال فرقااا العين الحين العيل يفرك من يدك ... أجل شلووون لو إنه أبو شنب ... وإلا أحد العرااابجه وش تسوي ... كاااالعااادة تناااادي الأبضااااي خربوووط ..

<<<<<< اللي فوق ماااعليك منه ....


اللي يخلي مثل هالعيل وغيره يسرقووووووون مسجلك ومسجلاااات غيرك ...

هو الفقر ... حتى لو كااان يلبس أحلى الملاااابس ... وش يضمن لك إنه مااااهو بسااارقهااا متل مسجلك ...
هذااا أولن ...

أماااا ثاااانين .. التربية ( والله يااافيه آباااء مااايدري لو كااان ولده يبااات بواااادي الغضااا )))
يعني ماااا عندك أحد .. الشوااارع تربيهم ... بالاضااافة الى اهماااال متطلباااتهم ...وجميع مستلزمااات الولد ( يعني بخيل ::: أي : قنيطي جلدة الله لايوريك )) ..

أماااا ثااالثن .... العطاااالة والبطااااالة والفرااااااغ سمهاااا اللي تبي ... الوااحد مااايدري وش يسوي ثااانوية وخلصهااا ... وجااامعة ومو راااضية تقبله ... يعني مثل قولت يااا الطيب اسرق .... اشحذ ... ******* <<< عيت تنكتب يقولون مشفرة ... المهم دبر نفسك .... لا تمووووت جووووووووع .. شاااب مثلك ويموت من الجوووووووع .... ويروح الولد ومعه ملفه العلاااااق الأخضر .... ومع الملف تطلعااات أسرة .... وأمنيااات فتى ( أبوك ياااالتعبير ))... المهم من داائرة الى داااائرة ....ولا يحصل شيء ....ويطفش ويقوووول يااا ولد ( السعودة ) ماااشي سوقهااا اليومين ... ويالله ويبدى الروتين من جديد يصحى بدري ويخم الملف آنف الكر ومعه ( التطلعااات ) أعلاااااه ....
وخوذي يااااشركة ولا تهوني يااامؤسسة .... وكلهم الخبرة الله لايهينك .... تيب منين يجيب لهم خبرة ...
ويروووح يدووووج بالشوااارع ... ويشيل همووووووم الدنياااا ... ونظرااات العاااالم له ( كااانه مسوي جريمة ) ولك الله على الالقاااب اللي يتوجونه بهااا ( السربوووووووووتي ,, الداااشر // الصااايع ... الخ )) ...

والمسيكين هاااايم على وجهه.... الا وزيك السيااارة ( شكلهااا فياااقررااا... أو دتسن )مااا قدرت أقطع عليهاااا ... تعرف الشوف شجر ....== قدر الله وصاارت سياارتك == . ا هـ .

وبهذه المناااسبة ...ألفت قصيدة .. تعزية ... ومواااساااة للأخونااا شموخ .. وولعااطل ( العيل )

عيل قزااز إكسر .. مسجل سياااارةإشلع ... شموخ بيت يطلع ... شخصية مال هو خرررررررررب ... عيل آه آه أهرب ... شموخ فنيله إقطع .. وبعدين خبر بالمنتدى نزل ...

خربوووووووووط قصيدة اكتب ...

والسلاااااااااام .....

آه ياليتني كنت هناك واشوفك تركض ومعي كاميرت الفديو

إقتباس (شي يقهر صح ((لوني ماشفته كان احسن))

بالعكس اخوي انت خليت قلبه في رجليه وماظنتي بيطب حارتكم
مرتن ثانيه بعد اللي شافه
وبيحس ان اللي سرقه هالمره خذه بجد وتعب
ماجا بسهوله

عموما من خبرتي انا خابر اللي بيسرق شي
لازم يسوي مراقبه للشي اللي بيسرقه عشان يعرف التحركات
وشكله عليمي هالولد=========> اقعد يالخبير
المفروض كان يعرف انك تتاخر عن الدوام
واحمد ربك انه خذ المسجل ماخذ السياره بكبرها
========> ماقلت لك انه عليمي

أحممممممممممد ربك"""

يوم اني مسكت في فنيلته
ولا هو اللي
يرافس
ويرافس
ويرافس
طبعا من قوه المشاجره اللي في لحظات
انشقت فنيلته من يدي وقدر ينحاش مع الباب الثاني للسياره

لوووووووووووووول
اما هذي اسمح لي اشك فيها وش ذا اللى انحاش مع الباب الثاني وانت ماسكه لاومعه المسجلD:
الله ستر بعد ماخذ الحليب حقك وطق الرسم بشماغك طبعا وهو بين ايدينكD:
لكن ماعليك ولايهمك مواصفاته واضحه مرررره انا ابجيبه لك
ذكرتني بمره المرور مسكني علشان تفتيش طبعا رخصه مو شي ثاني
والى واحد منهم بدوي رااااااااااااااااااااايح فيها انواع المالبور الاحمر ولايعرف يصف كلمتين
المهم جاءهم بلاغ الظاهر قتل او شي زي كذا
المهم هالبدوي يقولي تتحدلني اجيبه طبعا هو بمنطقه والحادث وين بعيد
وش رايك تبلغه تراه مهب سهل
لاوخويه الثاني عطاني رقم السياره المشتبه به يقول بالله دورها D:
>>طلع برا الموضوع
او اقولك عندي اقتراح بع نعاله مع المفك والعده يمكن يجيك منها شي والباقي انتظر المكافاءه

ومشكوووووووووووووور وسعت صدورنا بالموضوع عاد بشرنا اذا صار فيه تطورات

اما الاسباب من وجهت نظري اللى طبعا رايحه فيهاD:
اولا:الدشره والمراجه(للقصمان فقط)
ثانيا: الدجه(دجه الدراهم طبعا) يعني يمكن انه حاذف ترم ووقفو مكافاته او معدله اقل من اثنينD:
والتسك بالشوارع>>وش القصه
ثالثا:التفريط الزايد من الاهل والاقارب من مدنيين وعسكريين

هههههههه ,, أجل ركضت ولاقدرت تصيده

@ أما شبشبة في السيارة

@ أحسن شئ بيع الشبشب الي تقول ب30 ريال ونقصها من ال5000 واذا شفتة مرة ثانية خذ منه 4970 ريال , والا خل الشبشب في السيارة علشان ماتنسى ان هو الي سرق المسجل

@ وشلون ماقدرت عليه تقولي ماسك فنيلتة , ماتقدر تأخذ المسجل من يدة الثانية

@ أكيد كان شكلك كذا لما شفتة يسرق المسجل

@ مرة ثانية اذا صار لك مثل هذا الموقف خلك مثل هذا[Automated by GetSmile]
ومن الخوف راح يخلي المسجل .

@ أما الأسباب فهي كثيرة وفي بعض الأخوان ذكروها .