بداية أبارك للأخوة الليبراليين في المجلس العام بمناسبة عيد رأس السنة وبإذن الله تكون السنة الجديدة سنة خير وبركة ولبرلة ولا عزاء للرجعية والإنغلاق
خلونا ندخل بالموضوع بسرعة قبل ما ينشب لنا الطالباني مرسال عاد وش يفكنا منه صكوك التكفير عنده جاهزة وعلى قفى من يشيل
الزبدة .. في هذي الساعة المتأخرة وبينما العالم هجود رقود وأنا لحالي الهم مسهرني أتقلب وأتبطح وأتسدح أبي أنام بدون جدوى تذكرت الأيام الخوالي في المجلس وأصدقائي الجحلط اللي اختفوا وانشغلوا بدنياهم ومستقبلهم الله يوفقهم ويأخذهم أخذ عزيز مقتدر إلى جنة الخلد بعد ما يفطسون
طرت لي فكرة توثيق ذكرياتي وبداياتي بالمجلس في هذا الموضوع وبالطبع الموضوع ما يكتمل إلا بمشاركاتكم وذكرياتكم هنا ..
بدايتي :
بدايتي في المجلس العام كانت في أواخر 2006 وكانت فترة تألقي في 2007 وبدأ يدحدر مستواي من 2008 حتى اختفيت في 2011 .. نعم بيني وبين ياسر القحطاني علاقة طردية أذكر أول ما بدأت مشاركتي في المجلس قادماً من قسمي السابق منتدى الجمهور , كان فيه مشكلة كبيرة بين الهلالي الثقفي وربعه , وبين الأخوان المسلمين في المنتدى أنا مثل أي شاب سعودي لازم أتلقف لذلك كنت أقرأ الردود والأخذ والرد فأخذت تصوّر إن أعضاء المجلس ينقسمون إلى قسمين لا ثالث لهما : 1- قسم الانحلاليين بقيادة الأب الروحي أبو ريمان 2- قسم الإسلاميين بقيادة الأب الروحي القاضي
لذلك ولأني كنت من المغرر بهم سابقاً من مدرسي التوعية الإسلامية بالمدرسة اعتبرت ان المسألة بين الإسلام والكفر لذلك قررت خوض المعركة ونصرة الأخوان المسلمين , والظاهر إني جبت العيد والحمد لله إني نسيت ردودي .. بس اللي أذكره إن ( الهنوووف ) أرسلت لي بالخاص معصبة وودها تهاوش وجاية تسألني عن قصدي من أحد الردود .. فعشان أثبت على المبدأ رديت عليها رد خلاها تحقد علي فترة طويلة
بدأت أخوض غمار المجلس وأشارك فيه بعد ما أصنف كل عضو وأوزعه على الطائفتين أول شخص تعرفت عليه كان ( كلي هلالي ) أضافني بالماسنجر وتعارفنا وارتحت له رغم إنه ما كان ينتمي لا لطائفة الانحلاليين ولا للإسلاميين كان مذبذب بينهم لا إلى هؤلاء ولا إلى هؤلاء .. اقترح علي كلي هلالي إنه يشبكني مع ( هامور البورصة ) .. وافقت بعد تردد لأن هامور البورصة نصفه منحل ونصفه الآخر إسلامي طبعاً أنا الحين أوصف لكم شعوري واعتقادي ذيك الفترة مش حقيقة أخلاقهم وإلا الأعضاء يكرمون على الانحلال وسوء الأخلاق ..
المهم .. تعرفت على هالإثنين وزادت العلاقة بيننا وبدؤوا يعلموني بأسرار المجلس واتفقنا نؤسس أول حزب مستقل .. وأسميناه ( قروب دفني وأدفك ) .. كان القروب لا إسلامي ولا انحلالي .. كان ساخر وفكاهي واكتسب في ذيك الفترة شعبية لا بأس بها .. وبدأنا نزيد من أعضاء حزبنا وبدأ الإسلاميين والانحلاليين في التقهقر
أقول بلا كلام فاضي وخلونا نبدأ في فصفصة الذكريات مع الأعضاء , نقول بسم الله مع كبيرنا الذي علمنا السحر :
القاضي
أتذكر أول رسالة تشجيعية من الأب الروحي لحزب الأخوان المسلمين ( القاضي ) , كان لها الأثر الكبير في نفسي وقرأتها أكثر من مرة , كيف لا ورمز من رموز المنتدى يرسل لي أنا العضو الجديد اللي توني بحفاظتي ما مداني أثبت نفسي؟
بعدها زادت علاقتي بالقاضي .. حتى تجرأ في يوم من الأيام ورقمني في رسالة خاصة بصراحة كنت فرحان جداً بثقة أبوعبدالله .. لكن بنفس الوقت كنت خايف لأن توي فطفوط صغير السن طيشاني وهذا عمره كبر جدي يالله حسن الخاتمة حاولت أجرئ نفسي وأطمنها إن هذا عراب الحركة الإسلامية بالمنتدى ماله داعي الخوف .. بس الشيطان يخوفني ويذكرني بالقساوسة اللي ممسوكين في قضايا مش ولا بد
المهم قررت قبل أتصل عليه أضيفه بالمسن وأختبره << سامحني يا أبوعبدالله بس حنا عيال ناس ولازم نختبر الشياب قبل ما نخاويهم الحمدلله نجح الاختبار ووصلنا للجوال .. وكما قالوا سابقاً : نظرة فابتسامة فموعد فلقاء .. وفعلاً تم اللقاء ووالله أبوعبدالله من الأشخاص اللي أعتز بمعرفتهم في المنتدى , رجل رزين وخلوق ويقدر الحياة الزوجية مشتاقين والله يا أبو عبدالله
أبوريمان
قلت لكم سابقاً إن أبوريمان كان في نظري الأب الروحي لحزب الانحلال .. لذلك كنت أكرهه كره إيمانا للمدرب دول ! أول موقف أتذكره لأبوريمان هو لما (كلي هلالي) نزل موضوع أو رد ذكر فيه إنه عاطل مش موظف .. فوصلت له رسالة خاصة من أبوريمان يطلب منه مؤهلاته ورقمه حتى يحاول يساعده في وظيفة !!
طبعاً كلي هلالي ما ذكر في رده إنه يبي وظيفة , هو فقط ذكر معلومة إن عاطل وما توقع توصل له هالرسالة .. المهم جاني كلي هلالي يعلمني بالسالفة فقلت له أرسل له رقمك يمكن تحصل وظيفة وش بيضرك.. لكن كلي هلالي كان متردد فما ردّ .. أرسل بعدها أبوريمان رقمه لكلي هلالي .. وهنا بغى ينجلط الولد من الرعب اللي جاه حاولت أشجعه يتصل عليه بس للأسف كان كلي هلالي خواف قلت له يا ولد اتصل عليه أهم شي الوظيفة ولا بد من تضحيات لكنه ما اقتنع وانتهى الموضوع على كذا !
من هالموقف بدأت أعيد النظر في حكمي السابق على أبوريمان .. وخاصة بعد ما شفت ردود ومواضيع أبوريمان كانت كلها تحث على الأخلاق والدين وفيها من الحكمة الشيء الكثير ! بعدها صرت ( أتودد ) لأبوريمان وأصبحنا أصدقاء .. ما أذكر بداية علاقتي معه بس بكل أمانة كان رجل مواقف الله يذكره بالخير أتذكر موقف معه .. كان موعد زواجه يتضارب مع استعداداتي للزواج فاتصلت عليه أعتذر منه على عدم حضور زواجه .. فنشب في حلقي إلا أرسل له رقم حسابي البنكي ليرسل عانية زواجي فاعتذرت منه وأقسم علي .. وأنا بصراحة كنت مشتهي أرسل بس مستحي فأرسلت له بعد ما قال اعتبرها سلف يعننه أقنعني آآهـ وينك يا أبو ريمان .. الحساب من بعدك يشكي
إلى هنا نتوقف للنوم .. وفي الردود القادمة بإذن الله أذكر ما تجود به الذاكرة الضعيفة من ذكريات مع بقية الأعضاء مثل ماجد مقبل وليوميسي وبقية الأعضاء والعضوات
في أغلب وقتي مع التقنيات الجديدة و العالم التنقي لم أسمع أحد يعيد ويزيد و يتمسك بالماضي الا أثنين مشجع نصراوي أو اعلامي نصراوي و عضو بالمجلس العام ..
إقتباس
خلونا ندخل بالموضوع بسرعة قبل ما ينشب لنا الطالباني مرسال عاد وش يفكنا منه صكوك التكفير عنده جاهزة وعلى قفى من يشيل
نحتاج الى محكمة قضائية بالمجلس العام .. ولو تم ذالك سوف أشكوك يا سلطان بتهم القذف و الطعن ..
نجي للجد : فوائد تحريم الاسلام للتصوير هو عدم أيقاظ الماضي و التحسف عليه .. فعندما يرحل شخص بموت أو رحيل او حتى زعل أو يمكن حتى تدلع فعندما تكون له صورة بجوالك او ببيتك تراه و تتحسف و تنقهر و تكره يومك و تنسلى حياتك و تتمسك بالماضي و التحسف عليه و الأسواء من ذالك أن هذا يجعلك لا ترى الحاضر ..الحاضر الجميل بوضوح ... لهذا أن كنت تريد أن ترى جمال الحاضر و أن تعيش يومك فأنسى الماضي و أمسح صورته ..
غير ذالك تذكر أن من رحل بموت رحل مجبر و لكن من رحل بغير موت فهو أنسان لا يهتم بك و عندما رحل قرر أن ينسائك و ينسى ماضيك المنحل وماضي دفني و دفك وماضي الهزل و السخرية ... فلا تشغل بماضي الكل فيه رحل حتى ينسائه و أنت طبعا موجود بهذا الماضي
بما اني كنت متابع بصمت في فترة تألقك يا مشآآغب .. لكني كنت مستمتع جدا في تلك الفترة بالمواضيع وأساليب الطرح والنقاشات المستعرة التي تنتهي بكل ود واحترام ...
جيل مضى .. واخر موجود ... وجيل سيأتي ... ويبقى للمجلس العام رونقه الخاص بالرغم من حالة المجلس اللا مستقرة في هذه الايام ... !!
شكراً لكم على تواجدكم فرداً فرداً وفردةً فردةً .. ولا أخفيكم إني حسيت بالورطة أولاً الذاكرة مش ولا بد .. وثانياً الوقت برضه مش ولا بد .. لكن الله يجمّل الحال ونخلص الذكريات بأقل الخساير
دوق فليد : ما كانش يتعزّ .. يالغالي أبوريمان أعلن إفلاسه من كم شهر !
حاتم : للمعلومية تراي أتكلم جد عن تصنيفي للطائفتين , كنت من المغرر بهم بحكم إني وقتها كنت شاب طايش متحمس ومندفع ..
سعودي أصيل : تشرفني متابعتك يا أبو أصيل .. لا تغيب ..
I B R A H E M : أنت يا إبراهيم يكفيك إنك من جيل التابعين حتى لو ما لحقت بالجيل الذهبي ..
marsal : أنت من بعد أبوطلال وأنت تعيش حالة من الفضاوة .. وقف لك قدام المراية وشاكس نفسك براحتك ترى الموضوع مجرد ذكريات لا أكثر وماني على طرد المقفين بمجبور .. هلالي معالي : شكراً على إكرامنا بسكوتك يا فديتك
@@almoreb@@ : حضورك يا ابن العم يضيف للموضوع الكثير , شكراً على متابعتك ..
خـيـالـيـه : بانتظار عودتك مع التوضيح عن سالفة جمس الصحن؟
محبة الرحمن : ما ودي نقارن حتى ما يحصل جدل هنا .. خلينا بالذكريات أفضل .. شكراً لحضورك ..
~SaKaB : أسماء كثيرة كانت لها بصمة , أتعبتني الذاكرة ويبدو أني هرمت .. بالنسبة لماجد حاولت أتذكر طريقة تعرفي عليه ولا زلت مضيع
سابقاً كانت هناك حرب بين الطائفتين .. طائفة الانحلال تتجمع في المواضيع الشعرية أو مواضيع الخواطر , وطائفة الإسلاميين تتجمع كعادة الحركات الإسلامية في الخفاء يعني في الرسايل الخاصة .. في أي موضوع فيه أكشن وخلاف قوي لا بد يكون فيه إنذارات أوإيقافات من المشرف (سهل) إذا كان متواجد وهو معروف عنه الشدة إلى حد الديكتاتورية , أما المشرف الثاني ( البارق ) فكان متساهل ويحاول يسدد ويقارب .. أغلب الإيقافات تكون بسبب هالحرب .. ما عدا شخص واحد حطم الأرقام القياسية في الإيقافات والمصيبة إن ما له شغل بهالحرب لا من قريب ولا بعيد .. وهو ( وليد القحطاني ) أخذ شهرة من كثرة إيقافاته اللي ما لأمها سنع
طبعاً هناك ضحايا سقطت في الحرب بين الطرفين ما لحقت عليهم مثل ( قلب الشلهوب ) وغيره , لكن أول ضحية سقطت في الحرب على ما أتذكر ( الهلالي الثقفي ) وكاد أن يسقط ضحية من طرف الإسلاميين وهو ( أبوراس ) لكن تم الاكتفاء بإنذار .. المهم كنت حاقد على الهلالي الثقفي وأنا مدري وش السالفة بس لأنه من حزب الانحلاليين كنت أحقد عليه .. إلى أن جاء يوم من الأيام وأضافني الهلالي الثقفي بالمسن .. سوّى معي مقابلة شخصية وسألني عن اسمي وعمري و و و .. طبعاً من دون ما تسألون رحت أكبّر عمري بأربع أو خمس سنوات الزبدة بدأت أفهم منه قصة إيقافه وسقوطه شهيداً في المعركة .. وحسيت إن المسألة أبسط مما تصورتها .. مجرد خلافات شخصية بسبب اختلاف وجهات النظر , وكلمة تسحب كلمة وهووبا إنذار فإيقاف ! استمرت علاقتي مع الهلالي الثقفي حتى انتهت فترة إيقافه وحسن إسلامه رجع للمنتدى وبدأت أتخلى عن مبادئي شوي .. صرت أرد بمواضيع الخواطر وأنسخ الردود من منتديات خواطرجية وألصقها في مواضيع الخواطر بالمنتدى حافظت على علاقتي بالإسلاميين مع علاقة خفية بالانحلاليين , يعني تقدرون تقولون عني ( عميل مزدوج ) ولا راح أزعل طبعاً استمرت المشاكل بين الحزبين حتى جاء يوم تهور فيه الهلالي الثقفي وهاجم فيه المشرفين وبالتالي تم إيقافه طيب الله ثراه ..
نرجع الحين لقائد الجناح العسكري لحزب الإسلاميين وهو ( أبوراس ) أبوراس هذا شخصية غامضة حيرت العلماء والأعضاء , شخص مثقف متعلم متدين وفاهم .. لا تراه كثيراً ولكن حين يتواجد فاعلم أن هناك أكشن وإثارة البعض قال أنه عضو سابق يتخفى بعضوية أبوراس , ولكن محد عنده العلم الأكيد ! أضفته بالماسنجر حتى أعرف وش هو من لحية ؟ وبحكم إني كنت محسوب على الإسلاميين ما كان صعب إني آخذ وأعطي معه .. فاكتشفت إنه فعلاً شخصية محيرة , لكن لاحظت إنه يحاول يموّه علي ويضيّعني لما أستخدم ذكائي في لقط صفات شخصيته ! كان في بداياته حاد الأسلوب يعطيها كاش , لكنه بعدين أصبح يستخدم أسلوب أخف حدة خصوصاً بعد تقهقر حزب الانحلال بعد اختفاء العدو كان من الطبيعي اختفاء أبوراس .. لذلك عسى الله يكثر من الانحلاليين بالمنتدى عسى يرجع لنا أبوراس
نجي الآن لشخصية ماجد مقبل .. كان أبومقبل أديب المجلس العام في ذيك الفترة .. يرد على هذا وعلى هذاك , ما كان يفرق بين إسلامي ولا انحلالي ولا يهودي كان مبدؤه دع لله ما لله ولقيصر ما لقيصر ! كان شخصية محبوبة فرضت نفسها , وإن كنت في ذيك الفترة ما هضمته أول ما شفت يوزره بس بعدين بدأت أرتاح له بعد ردوده علي بمواضيعي وتشجيعه .. حتى جاء ذاك اليوم اللي كان من أجمل أيام عمري عندما رقمني ماجد للأمانة ما أذكر بالضبط هو رقمني أو إنه اتصل بي فجأة بعد ما أخذ رقمي من واحد من العيال .. الزبدة .. لما صار الاتصال أتذكر قلبي يدق يدق وعيني ترف ترف .. وروحي ترق ترق والله أتذكر كنت أكلمه وأنا أدور حول نفسي وقلبي يدق بقوة من الحياء وأطالع فوق وأنا أكلمه ثم أطالع تحت وأدور .. كان يكلمني بجرأة وكأنه متعود على هالمكالمات أما أنا الله أعلم بحالي انتهت المكالمة ثم تلتها مكالمات ومكالمات وأصبح من أعزّ أصدقائي بيني وبينه عيش وملح و ( موكا ) رغم إني مقصر معه حالياً كثير .. لكن بيعذرني أكيد خلاص تزوجت ولازم أنسى علاقاتي السابقة
يكفي لحد كذا .. نواصل لاحقاً إن شاء الله ويا ليت اللي عنده شي يذكرني فيه هنا أو بالخاص ..وبرضه لا تنسون مواقفكم وبداياتكم بالمجلس وكيفية معرفتكم فيه .. إذا ودكم طبعاً
27Likes
ديوانية الذكريات في المجلس العام ( متجدد ) ..!! 
<< سامحني يا أبوعبدالله بس حنا عيال ناس ولازم نختبر الشياب قبل ما نخاويهم 
و عندما رحل قرر أن ينسائك و ينسى ماضيك المنحل
الوضع العادي
