فيّو و معناتها !!! - نادي الهلال السعودي - شبكة الزعيم

الفيروسه الزرقاء · #1 25/08/2011, 08:16 AM

العالم تغيرت ونضجت ! إلا أنا لازلت متهوره ومطفوقه كعاداتي الكريمه

!
لا يعجبني العجب ولا الصيام في رجب!!
الشياطين متربطة في رمضان إلا شيطاني!
ماتحلى لي ادوج في شوارع الرياض إلا بـ رمضان!! مايحلى لي أقدم ع وظائف وازعجهم إلا بـ رمضان!
كأن شيطاني ينتعش في رمضان!! تجيني أفكار مشاريع واحضر محاضرات في رمضان!!
العالم تصلي وتصوم وانا اتنقل بملفي من مكان لـ مكان

!

سواقنا تمنى من خالص قلبه أني اتوظف

حسيت مسببه له أزمه في كل رمضان لاجت الساعة 8 ونص دقيت عليه شغل سيارة ! وادوج انا وياه مارجع إلا 12 الظهر ومرات ومرات ارجع قبل الظهر ع حسب النفسيه لكن لاصرت مروقه اعرفوا اني ماسكه اليمين بـ طريق الملك فهد واطالع العماير واخليه يوقف ع اي مكان وانزل اقدم

مع ان مادري بهالعمارة شنو فيها

، لكن أسال عندكم قسم نسائي واحط السي في

ومرات يقولون لي خذيها معك الله لايهينك لا صار عندنا قسم نسائي! أو شاغل وظيفي دقينا عليك

!!!

ماعلينا ، هـ الموضوع عباره عن فضفضه

! راح افضفض واشمر عن ساعدي واقولكم إن وضعي ماتغير عقب ماتخرجت ! لازلت فيّو الباحثه عن وظيفة والراغبه في الابتعاث

راح اتطرق لكم عن سوالف صارت لي لكن بقول لكم أي احد بيزعل والا بيأخذ الموضوع بحساسية " بـ الذات المقيمين

" فـ بليز اعتبرو هـ الموضوع سعودي بحت

!! ويتكلم عن السعودة

هاللي اسمع فيها ولا قد شفتها

!!! المهم ياريت تعذروني

:: فاشلة في العمل

::

قدر الله ودقت ع شركة عالمية قالوا تعالي يـ أنسه عندك مقابلة ! قلت الله فله رحت لهم وخربطت كم كلمه

وقالوا راح نخليك تدريب لمدة 3 شهور ثم نوقع العقد معك ! لكن ترى فتره التدريب بتاخذين 2500 !! قلت اوكي ماعندي مانع في احتمال بعد الفتره تزودونها قالوا أفا عليك اكيد بس انتي شدي الهمه !
شديت الهمه وكانت ذيك الايام فله

جد جد كانت وناسه صح ان ماعندي مدير سعودي

المدير التنفيذي بريطاني ! ومدير المباشر لي أردني ! وفريق عملي كان فيه مصاريا وارادنيين وكلهم باش مهندسين

وفيه بنات سعوديات لكن جد كانت وناسه وفله وسعة صدر

! كان الجو بينا متبادل بـ الاحترام

!
وأنا في مكتبي كنت اسمع صوت المدير الاردني يصارخ ع الموظفين

وهات سب

!! شوي الا ويدق ع فيّو تعالي !! قلت طيب اجي وانا متوتره ومرعوبه كل خوفي انه يصارخ ع

! لكن القي مديري محترم مايصارخ ولا لقى خطأ ع قال يابنتي يابنتي! ركزي عدل وسوي هيك وهيك ! بـ الاختصار ماقد عصب ع ؟ و ع رغم انه ماقد عصب ع وكان محترم الااني ماهضمته

ليش !
لأنه ياخذ راتب 40 الف

وهو مايشتغل ! الصراحه تنقال كل شغله معطيه زميلتي " سكرتيرته " لدرجه حتى يعطيها اشغال لبيته ! دقي ع مشرف الصيانه وخليه يطلع لبيتي يضبط في حاجات تحتاج لـ صيانه !
معليش هذا مو نطاق الشغل ليه تقول لـ سكرتيرتك ! فيه شغلات كثيره له يفوض سكرتيرته فيها

!
الحمدلله اني مو سكرتيرته ، الله يصبرك يـ فلانه

أوكي الاردني يأخذ 40 الف

تعالوا شوفي البريطاني ! هـ البريطاني إلا ماشوفه إلا اذا فيه مشكله شايدة والا اجتماع المداراء جاء كم راتبه 95 ألف

ليه ليه !! علشانه بريطاني

!!
تدرون مدير الموارد البشرية السعودي كم ياخذ 10 ألف ! مو حرام مدير حاله مثل حال الاجنبي " أقصد المقيم

" يأخذ 10 الف قلت يمكن ماعنده خبره !
أنا ملقوفه ! فرحت لأت صاحبتي تشتغل في الموارد بشريه دخلنا انا وياها ع سيستم وشفنا البلاوي

اللي تضيق الصدر ! مدير مواردنا عنده خبره أكثر من 10 سنوات هو شايب!! ويأخذ 10 ألف !! وذالك الاردني أوه سوري الخليجي " سمعت انهم يعاملون معاملة الخليجي

" يأخذ 40 الف وهو ماعنده إلا 3سنوات خبره في دبي !!
ليه طيب مو حرام !! وتقولون ليه ماتشتغلون في القطاع الخاص !

ماعلينا خل اكمل لكم وش صار ع

انتهت فترة التدريب قالو هاه فيّو نوقع العقد ، قلت ماعندي مانع لكن كم

قالوا ع نفس الراتب :bigeye: قلت نعم ! لكن انتو قايلي لي انكم راح تزودوني ! قالوا لا راح نزودك لا جلستي سنة عندنا .. قلت ايه يصير خير

رحت اشاور نفسي ! قالت ميسو هيه فيّو اتركيك منهم بس وتعالي عندي ! رواتبنا احلى واحسن لا وبتفلينها معي

قلت و الله فكره مو شينه ! اروح اصبح ع وجه بنت عمي أفضل من ذيك الشركة لكن جد بفقد صديقي

!
منهو صديقي ! هذا سلمكم الله مهندس الكمبيوترات في الشركة ! هندي الجنسية

" عيالنا متخرجين بكالوريس حاسب وفيه دبلوم ولاتوظفوا

" ماعلينا طيب و ع نياته

! يجيك يصلح الكمبيوتر ويفضفض لك عن مديره وش يسوي فيه

! بـ العربي وسيع صدر

وماعندها مانع يخلص كل وقته ويعلمك ع البرنامج

! جد جد فيه شغلات كثيره تعلمتها منه !

تركت الشركة ورحت لـ ميسو

!

داومت واول دوام لي جابت فيه العيد

! عد اليوم الاولى ع خير وعدت الايام ع خير

لين ماصارت لي مشكلة مع مشرفتي

أنا جني وجنوني احد يصارخ علي والا يتدخل في شغلي ويقولي فلانه وينك فيه ! فلانه تعالي هنا !
معليش انا كبيره وعاقله وفاهمه ! اسوي شغلي مثل ماهو

! لكن ماحب احد يكلمني بطريقه استصغار !! ولفت انتباه !!

المهم ماتحملت الجلسه عند ميسو وطلعت ! لكن ماطلعت لـ حالي

جريت ميسو معي وصديقتي اللي تعرفت عليها

جد شعرت بشعور سيء

كاني جايه ومخربه ع ميسو

ميسو جلست سنتين في سلام ! فجاءة يوم وصلت فيّو وقلبت الدنيا فوق تحت

!
شهرين صار المكان يعم بـ فوضى و السبب أنا

!!

المهم .. لاحد الان ما عندي خبره سنة

ولا ارتحت في بيئة عمل

مدري مزاجي غريب

!
يوم كنت يالشركة كنت مستانسة ع مديري الخليجي

لكن كان العيب قلة الراتب

يضيق صدري ليه انا اخذ آقل منهم وهم أعلى

.. وعند ميسو بالرغم ان فيه ميسو

إلا اني مارتحت

يمكن لان مشرفتي بنت وانا ماتحمل بنت اجنبيه أوه سوري مقيمة ! تصارخ علي

# ملاحظه ! وزير العمل الحين أنت صاجنا في هـ الحملات تبونا نشتغل بائعين ! وعمال !! و أجانب صايرين مدراء

!!
لاحد يجي ويقول و الله شبابنا مو كفو !!! ماهم قد المسؤولية !! مايتحملون الشغل !!!
بـ العكس يتحملون الشغل ، يومي كنت في ذيك الشركة كان في الاستقبال

سعودي وراتبه 1500 !! قسم بالله يضيق صدري اذا شفته مع انه جالس يشتغل مو عيب! لكن لاني اشوف اجانب يشتغلون في مناصب هم مو مو اهل لها

! هـ الموظف يداوم قبل الداوم بساعة ! ولا يطلع الا اخر واحد ! تقول كانه فراش مو ريسبشن

و ذوليك الاجانب تلاقيهم يغيبون ولا يخصم من راتبهم

!!

:: يـ ليل ما اطولك

وين ماطقها عوجه ::

اول ماتخرجت من الجامعه ! صجيت امي يمه ابي اكمل ماستر

! قالت امي من زين معدلك أنتِ فاشله في الدراسه يـ الله تخرجتي

!
قلت يايمه ترى البلى مو فيني

في اللي درسوني ! أتحدى احد قد درسه شمسي

وإلا ثناء ولا رسب/ رسبت

هذولاء لابد يعطون بصمات للطلاب والطالبات !

لكن ماما ماقتنعت وحاطه ببالها أني فاشله! فجلست الح عليها فسكتتني وقالت أنتظري لين يزن مايخلص وتروحين انتي وياه

..

أنتظرنا إلى الاخ مايخلص من الثانوية ! يوم خلص اخونا واشوف امي تختبص في اوراق واقولها يمه الوعد ! الوعد !! أنا بروح معه يايمه

!
قالت شنو !! مافيه تروحين معه لحالك

أنتِ مهبوله وهو اهبل تروحون وتدوجون هناك !! مافيه !

قلت يمه ماضر فلانه راحت مع اخوها وانفتح رزقها كملت ماستر وتزوجت هناك والان تحضر دكتوراه ، لكن قالت أمي تقارنينها فيك! هذيك عين العقل رزينه وثقيله مو مطفوقه

و الله مشكله! اذا امي لازالت تظن اني مطفوقه !! طب شنو اسوي لك حتى تقتنعين اني عقلت

أكره مالي نظرتها لي تناظرني أني لازلت طفله!! ماما تراني كبيره

!! مو بزر لكن الله يهديها ماقتنعت

حاولت تسكتني و قالت قدمي ع موازي وادرسي ماستر ! قلت الموازي مايقبلوني

انا معدلي مقبول

وهم اقل شي جيد

! قالت لا وتبين تكملين ماستر أنتي مو مال دراسة ! عقلك فاضي!! شوفي لك اي شيء

!!

أنا ماتحملت كلام امي

! صايره تجرح فيني

، قلت محد راح يعدل مزاجي إلا شلتي

وادق ع البنات وجتمعنا في اقرب مكان ، اقترحوا ع اني اروح لـ جمعية حقوق الانسان

قالو فيّو ترى و الله يتبنونك ويساعدونك

قلت جد قالوا ابد روحي قدمي ! تؤكلت ع الله وقلت ماراح اسكت والله لا اشتكي ! شنو هذا لاني ماخذه مقبول الكل يحتقرني

لي تعاملوني ع اني فاشله ! لا جامعات فتحت ابوابها لي ولا وظائف رحبت فيني بسبب معدلي

!!
المهم رحت لـ حقوق الانسان

و استقبلتني سوريه ، قلت لها انا متخرجه ولا لقيت لي مكان يضفني وقصيت لها قصتي الطويله

!
صدمتني بكلامها قالت جيبي لي ادله وبراهين انك قدمتي ع كذا مكان ولا قبوك بسبب معدلك ، قلت كيف اجيب لك !!
هـ الاوراق كل التقديمات عن طريق النت أو انا اروح بنفسي واعطيهم ملفي !
قالت لا لازم دليل انهم ماقبلولك ! قلت بعطيك رقم سجلي وسوي سيرش ع مزاجك

بتشوفين مافيه مكان إلا وقدمت عليه !!

قلت اوكي .. اكتبي سجلك وخطابك وراح ننظر في امرك ! كتبت الخطاب واخذت رقم عليه وإلا يومك ماردوا لي خبر
حتى جمعية حقوق الانسان ما انصفتني

شكلهم ماعملوني ع اني إنسانه

!!!

مدري صراحه منو اللي راح يساعدني لاوزارة عمل ساعدت ، إيه صح تذكرت ! وزارة العمل

قد رحت لهم في مبناهم الجديد " حتى القديم زرته هههه " المهم وادخل عليهم تقولون كاني انسانه مرعبه

!
اول ماشافوني كلاً قام وراح يرتز ع مكانه !! أوه وين ذاك الصوت اللي سمعته من بداية السيب !
ماعلينا يوم جيتهم قالوا ايوه اختي شنو عندك قلت ابد بقدم ع وظيفه

قالوا التقديم عن طريق الموقع الالكتروني ! " اول كانت تصريفتهم ماعندنا وظائف!! الان صارت تصريفتهم قدموا ع الموقع

"
المهم قلت قدمت ! لكن ماحد دق ع وقالي ترى فيه وظيفه شيء

فـ احتياطا جايبه اوراقي معي خلوها عندكم

! قالت هاتي خل اشوف ! قامت تتفرج في اوراقي قالت اوه أنتي !!! يـ الله ماندي شنو نسوي فيكم يابنات **** " اسم تخصصي

" مالكم وظائف !! قلت في نفسي والله المفروض اكون في مكانك

اكيد تخصصها تاريخ والا جغرافيا

!
المهم خذت اوراقي ولاحد الان مادقوا ع

.. سويت المستحيل علشان احصل ع وظيفه ولا حصلت

!

ابوي عبدالله يضبط وضعنا ! لكن أصحاب العمل يخربون!!

استانست بخبر ان الرواتب بتصير 5000 لـ المعلمات في الاهليه

مع ان اول كنت ضد فكرة التوظيف في مدرسة لكن 5000 وانتهي الساعه 1 بـ الكثير يابلاش تهبل ولافيه دوام ايام الاجازات بصير اعطل مع المدارس واو جد جد وناسه

تحمست ورحت اقدم ع كل مدارس اللي حولين بيتنا ! وانا اروح اعطيهم سي في قالوا لو سمحتي احنا مكتفين اداريات! قلت طب مايخالف اصير معلمة رياض اطفال

ماعندي مانع اقابل بزارين! قالت لا صار عندنا شاغر بندق عليك

!!
حسيت اني متحطمه ! حتى المدارس اللي كنت مافكر اقدم عليها ، رفضوني

! فرحت دقيت ع صحباتي وعلمتهم بالسالفه وحده من صحباتي قالت لي لا تفرحين ياحلوة ! اختي مدرسة في اهليه تم تفنيشها! قلت افا ليش قالو ابد من صدر القرار كثير ماجددو عقودهم و السبب مايبون يزودون رواتبهم

قلت الحين مستكثرين علينا هـ 5000 الف

! ليه طيب ! قالت شتسوين في اصحاب العمل !!!

فيّو و مشروع!

عندي وحده من خالتي اقلقتني!! ورا ماتفتحين مشروع ! قلت خالتي ! بـ الله شنو افتح مشغل قالت ايه قلت مليون بـ الميه بيخسر !! قالت ابد بينجح وخلي التسويق ع

!
قلت لها خالتو انا مو ميولي مشاغل ! ان فتحت بفتح مقهى انترنت وكاريوكي

! طبت في بطني هالمشروع بيخسر فكري بمشروع عدل ! جلست اقلب يمين يسار شنو افتح ماحصلت شيء !
مع الايام ، دقت ع خالتي قالت وش صار فكرتي بمشروع ! قلت لا بعدين لحظه من وين بجيب راس المال ! ع بالك ان جامعتي لا تخرجت تعطينا فلوس وتقول افتحو مشاريع !! قالت لا تخافين فيه صندوق المئوية لكن جيبي لك مشروع قلت فكرت بس مالقيت الا اللي قلت لك عليه

قالت اجل شوفي بقابل وحده من صديقاتي هي سيدة اعمال ! خالتي قالت سيدة اعمال والا ماقالت قلت ماتبيي اتوظف عندها

قالت يالغبيه ! ركزي انتي بتقابلينها وتستفيدين من خبرتها مو تتوظفين عندها

! المهم قابلت هـ السيدة
ماشاء الله عليها سيده اعمال بس مو بـ السعودية!! في دبي

! تقول فتحت مشروع صناعة احذية في السعودية لكن فشل و السبب التجار خربو عليها

غير كذا مره من مرات جت تروح لمصنعها جت الهيئه ومنعتها

ممنوع تدخلين المصنع! طب حلالها بتديره لا ممنوع ! فضطرت تقفل مصنعها وراحت وفتحته في دبي و ماشاء الله عليها ع كلامها تقول انها نجحت هناك ولها 6 سنوات

..

أنا صراحه مادري خالتي وراها طايره فيها

! طب ياخالتو هي في دبي

إلا اذا تبيني اهاجر واروح دبي ماعندي مانع إلا هذي الساعه المباركة لكن اقنعي امي

المهم ! أنا ابي فكرة لـ مشروعي فقلت ورا ما استفيد من خبرة اخواني الزعماء

اكيد اكيد عندهم افكار عظيمة! يساعدوني ! اكيد بينا واحد تاجر يقدر يفيدني في خبرته

!
صراحه انا بديت اقلبها في راسي و افكر فيها بجديه ! دام مافيه آمل اني اتوظف

! ولا فيه آمل اني اكمل ماستر ورأ ماشوف عمري و ادخل مجال التجارة

صح ان تجارنا مرعبين

لكن ان شاء الله اقدر انافس

مع ان عندي احساس ان حظي رديء ! ما فلحت ولا في مجال

..
إلا صار اسمي مشؤوم ويجلب الحظ الرديء صح يـ مجود

:: من فيّو إلى فهد !! ::

أسيرووووه أنت شنو مسوي في اخوي

منتداك شنو حاط فيه ، اخوي اللي مايحب الزعيم فكر ياخذ يوزري علشان منتداك

!!

ياحلوين جاني اخوي في رمضان قالي فيّو اذكر عندك يوزر في الزعيم قلت ايه ليش ! قال تكفين عطيني ياه

قلت نعم ! ويوزرك وين راح ! قال نسيت الباس وسويت استعاده ولاوصل ع ايميلي

! قلت طب شنو تبي قال ابي المنتدى العالمية اكوس منتدى في الزعيم

! قلت ووش تبي هناك " فاتحه تحقيق " قال ابد نقاش هناك حماس وفله تكفين عطيتي يوزرك ! قلت العالم كلها تدري ان الفيروسه بنت ع اخر زمن بتخليني ولد

قال مايخالف ! مافيها شيء !
المهم رفضت طلبه

وجلست افكر بيني وبين نفسي قلت الله لو أنا فهد ! مو فيّو شنو راح يصير فيني وااااااااااو شغلات كثيره بتتغير

و بيصير فيه اثارة

!

المهم .... سوري ع الاطالة ! لكن هذي فضفضة

.. مواصله ولا عندي شغله

و الموضوع ماحطيته في مسودة ! ابد من العقل إلى الكيبورد

فلا لقيتو كلام مو مرتب والا مأكله كم حرف مشوها لي

لا تستقعدون

---> ماتقصد صدى

أوه نسيت

!
كل عام وانتم بخير يالغالين

ورمضان ينعاد علينا وعليكم

ومرة وحده من العايدين

ميسو

، باركي لي اخير نزلت هالموضوع لووو

ووول

الايقونات ماتشتغل الحظ عاثر ! السيرفر عنده خبر بأن فيّو بتنزل موضوع فتعطل

لاحول حظي كل ماهنا ويتردىء

Rise and Fall

سي يا

فيّو

الماسه الزرقاء · #2 25/08/2011, 08:46 AM

يا لبى بنت عمي التويترية وطلتها ... انورت الشبكة كلهااا .. قلوب من بيتنا لبيتكم ^ـــ^
ومن الفيس بوك لتويترك :p

الفيروسه الزرقاء · #3 25/08/2011, 09:00 AM

^
^
^
وه بس فديتك

يالبى قلبك

ماحد متحملني إلا انتي

لوووووووووو

وووووووووول

خبرك عتيق طايحه في قوقل بلس

اذا عندك وقت تعالي فيس تايم

خل اصبح ع وجهك و إلاتدرين لا تجين لا تجين

يومك بيصير مشؤوم

سي يا بنت عمو

فيّو

كلنا للازرق · #4 25/08/2011, 09:09 AM

فيو الله يكتب لك الخير ان شاء الله والرزق بيد الله يبسطه لمن يشاء
الحمد لله على كل حال اوما بخصوص الشركات والله بدو ايامهم ذي تمام مراقبه من الوزاره وحركات تبردالقلب والمدارس الله يعين بس سواء اهليه او حكوميه والله الكل تعب منها اما انا مستغرب شي وغير مؤيد فيه الى وهي المستشفيات الاهليه وتوظيف النساء في الاستقبال والله شي يقهر وحده مسكينه ماتلاقي اي شي تحرجها وتحطها بوظيفة استقبال < رجال > شي يقهر من زود لقافتي مره سئلت وحده موظفه محطوطه استقبال قلت لك اهل اب اخوان وقعدت ساكته المهم مدري وش فسرت سؤالي لها يمكن اني استهزء فيها او انا عيب المهم طلعت للدكتور ورجعت بعد نصف ساعه ابي ايصال عندها لاني دفعت نقد انا وطلبو مني الايصال للاشاعه المهم رجعت لها وانا خايف قلت يمكن مفسره كلامي استهزاء طلبت الايصال قالت اخوي احمد ربك ان لك اب واخوان وان فيكم رجال قلت الحمد لله وانا بنت ناس بس لقمة العيش خلتني هنا . والله شي يقهر محدوده على الوظيفه وحطوها استقبال وغيرها الوظيفه الى حدها لاكن حمد لله على كل حال اوما المشروع اشوف انه افضل حل لكم ومن ناحية راس المال اغلب الناس بدو من لاشيي بس اغلبكم يتعايب بعض الاشياء بالبيع والشراء فيها وخاصة النساء .
الاسواق كثيره والمجال مفتوح للجميع ودولتنا حريصه على عقيدتها وتطبيق الشريعه الاسلاميه .
وسلام عليكم

هـــلالـــي صـــميـم · #5 25/08/2011, 09:31 AM

الله يعينك بسسس!

بصراحة الي شدني بالموضوع انك تبين تكملي ماستر لكن القوانين ما تسمح هذا يدل انه عندك طموح !

بس فيه شي غريب جدا..

إقتباس


	يـ الله ماندي شنو نسوي فيكم يابنات **** " اسم تخصصي

غريب والله يعني خايفة تذكري تخصصك ولا مستحية...؟؟

موج الخليج الأزرق · #6 25/08/2011, 10:26 AM

صراحة قصتك مؤثرة

واضح ان عندك طموح قوي جدآ ولكن للاسف لم يحصل النصيب الى الآن

اعجبني اصرارك وصبرك
غيرك من اول مرة تحطم
ماشاء الله عليك

اختي في مجالات كثير ممكن تعملين فيها وتكسبين ذهب
مثلآ فكرة خالتك ( المشغل )
والله ياهو يطلع مكسب غير طبيعي ومع الاسف اغلب المشاغل ارباحها للأجانب

وفيه افكار كثير بس ماتحضرني .. جيبي ورقة وقلم واكتبي افكار المشاريع اللي تتوقعين تفيد واٍسألي اهل الخبرة في نفس التخصص
حاولي تأخذين دورة حاسب بتفيدك كثير في التوظيف

والله يوفقك اختي

ولا تنسين المثل اللي يقول ( كل تأخيره وفيها خيرة )

ربما القادم اجمل بإذن الله

هلالي من ارض اليمن · #7 25/08/2011, 01:42 PM

اهلا زميلتنا المناضلة فيو

نور المجلس العام .. وكل عام وانت بخير

فقط من باب الاستقعاد حسب تعبيرك ..يفترض أن يكون العنوان ( فيو ومعاناتها ) وليس ( فيو ومعناتها )

هنالك معلومة قد تفيدك .. المعدل الجامعي مهم في التقدم للدراسات العليا .. بينما الوظيفة لا تعتمد على المعدل بقدر ما تعتمد على المقابلة الشخصية .

معلومة أخرى .. في عالم القطاع الخاص هنالك مصالح فقط بدون اي اعتبارات اخرى .. ببساطة هنالك رجل اعمال يريد ان يستثمر امواله باعلى ربحية وباقل تكاليف .. لذلك اعتقد من الجميل ان يتفهم المتقدمين لوظائف القطاع الخاص ذلك .. هذه القاعدة تجدينها في كل قطاعات الاعمال الخاصة بالعالم .. لذلك اقترح عليك ان تتقدمي بعقلية شخص لديه مؤهلات يبحث من خلالها عن وظيفة وليس بعقلية شخص يرغب ان توظفه الحكومة بالقطاع الخاص .

اذا توظفتي .. اهتمي بعملك فقط .. متابعتك للآخرين والاستفسار عنهم وعن رواتبهم .. أمر غير مرغوب في اي شركة قطاع خاص .. وافضل طريقة بالنسبة لهم هو التخلص منك واحضار بديل يركز في عمله .

لا تمنحي مساحة من وقت عملك للسوالف مع الاخرين .. حتى اذا لم يكن لديك عمل .. فاشغلي نفسك في اطار مكتبك .. ولا تبرري حديثك مع الآخرين بأنه لا يوجد لديك عمل ! .. كأنك تريدين أن تقولي بطريقة غير مباشرة : امنحوني عمل ! .. مديرك في هذه الحالة سوف يفكر عكس تفكيرك وهو : طالما ليس لديك عمل .. فلماذا يبقي عليك في قسمه ؟

من لديه مشكلة مع التوجيهات والتعليمات والأوامر .. فالأفضل له البحث عن عمل حكومي أو عمل مشروع خاص .. ليس هنالك صاحب عمل او الاشخاص الذين وكلهم ( المدراء ) في ادارة اعماله ممن يرغبون في التعامل مع موظف بلقب ( شيخ ) .

لا ادري ما قوانين المشاريع الخاصة للمرأة ! .. لأنك تقولين انها قد تمنع من دخول مصنعها وخلافه .. لذلك ليس لدي ما يفيد حول هذا الأمر .

من الخطأ ان يجتمع اقرباء من الدرجة الأولى في مكان عمل مشترك .. وعادة الشركات الخاصة لا تقبل ذلك .. لأن ذلك قد يسبب الكثير من الاحراجات .

ختاما الله يعوض ميسو خير .. ونتمنى لك التوفيق ،،،

حروف الغلا · #8 25/08/2011, 02:16 PM

هلا و غلا بفيو <<< كان ودي احط قلوب و ورد لكن الله ما راد

مثل ما قال مشرفنا هلالي من أرض اليمن ، الماستر يشترط فيه معدل معين

يعني شيلي الفكرة من راسك

و ركزي ع الوظيفة و المشاريع

فيه موقع بالنت فيه افكار حلوة للمشاريع

بطرش لك الرابط ع الخاص

و المشغل فكرة حلوة بس محتاج في البداية صرف وااايد

ع التجهيزات و الموظفين و الاجهزة

الله يوفقك و يسهل امورك

تذكرت فيو

اذا كنتي تعرفين تسوين مشغولات يدوية

بامكانك تسوين لها دعاية او تبعيها عن طريق النت

او

اذا عندك هواية الطبخ

بامكانك تسوين حلويات و تخلين حد يسوي لك دعاية و تبيعيها بين اهلك و معارفك و بعدها للعالم الخارجي

و انا اعرف صبابا شغالين بالسالفة

او

وحدة من صديقاتي اشترت ماكياج لماركة معينة بالجملة

و صارت تبعيها على معارفها و زميلات العمل

الهلالي دائماً · #9 25/08/2011, 02:47 PM

هلا وغلا فيو ومنوره المجلس استشاريتنا (

)

>> لا بغينا نجيب الفيسات جبناها

وبصراحة مدري وش اقول موضوع يقطع نياط القلب ويقهر

وماشاء الله عليك صبوره ومكافحة واهم شي ما تيئسين ..
وان شاء الله تفرج في القريب العاجل ..

ونصيحه من اخوك عليك بالدعاء صدقيني باذن الله يجيك الفرج من الله عز وجل
وحاولي انك تكوني متفائلة .. لان الانسان غلباً الشيء اللي يتوقعه هو اللي يصير
فانت تفائلي وتوقعي انت بتلقين وظيفة على المرتبة الثالثه عشر

وعلى قولتهم ما تفكر فيه سوف تحصل عليه ض1

شكرا فيو على الاطلالة الجميلة والله يوفقك وييسر امرك ..
وابد من اليوم بدور مشروع واذا لقيت ندخل فيه شراكه ففتي ففتي

وفقك الله دائماً .

قرقاص · #10 25/08/2011, 03:19 PM

هلا وغلا بالفيروسة

>>>> عارف ان الفيسات ماتطلع بس شي نفسي لازم احطها

يالله الى الحين ماتوظفتي !!! وأنا اللي اقول تركت منصب الأستشارية عشان تتفرغ لعملها !!

قسم بالله قهر ! كلمة صرت أرددها بين كل حكاية من حكاياتك !!! بلدنا فيها خير كثير يوسعنا ويوسع كثير من ضيوفنا المقيمين !! وفوق هذا كله راس الهرم في حكومتنا خادم الحرمين الشريفين الملك عبدالله ماقصر ! والتفكير في العاطلين والعاطلات من أبنائه وبناته لايغيب عن باله !! أصدر الكثير من القرارات بهذا الخصوص ! أمر بصرف راتب شهري لهم حتى يتوظفون ! امر بزيادة رواتب معلمي معلمات المدارس الأهلية وتحمل صندوق الموارد البشرية نصف الراتب !! أمر بقصر العمل في محلات الملابس النسائية على النساء ! وغيره الكثير !!!! لكن البلا في تجارنا ورجال الأعمال !! كثير منهم مافيه خير لبلده !! وهم كالنخلة العوجاء خيرها لغيرها !! لايهمهم الا زيادة أرصدتهم ! أما المساهمة مع الدولة في توظيف الشباب والشابات السعوديين ! وتخفيض نسبة البطالة وتدوير المال السعودي في البلد وعدم خروجه منها فلا يخصهم !!!

مايقهرني شي كثر اللي يجيب شخص عربي يحمل جنسية أمريكية أوبريطانية ويوظفه براتب عالي !! رغم وجود من يفوقه كفاءة ومهارة من أبناء البلد !!

أعرف زميل كان يشتغل معنا في المستشفى من جنسية عربية وراتبه لا يتعدى 6 الاف ريال استقال وهاجر لكندا وبعد خمس سنوات عاد بجنسة كندية وتوظف في نفس المكان براتب يفوق 20 الف ريال !! مالذي استفاده العمل من جنسيته !! نفس الشخص ونفس الكفاءة! الذي زاد هو تكلفة العمل بسبب جنسيته !!

أحيي فيك اختي الفيروسة مثابرتك وعدم يأسك رغم كل هذه المعوقات !! وأتمنى لك التوفيق والله يرزقك باحدى ثلاث

وظيفه محترمه ! أو زوج ابن حلال ! أو بعثه ! ولو حصل كلهن مع بعض خير وبركه

ســـــ SMN2002 ـليمان · #11 25/08/2011, 03:51 PM

وعليكم السلام ورحمة الله وبركاتة
والله حي اختنا فيوووو
وين يالقاااطعة 
اقووول شكلي اوظفك انا
بس فيه مشكلة كبييييييره اعلمك بها بعدين
والله ذبحنا القطاااع الخاااص بتقديره
الاجنبي وتصغيره للسعووودي
ذبحوونا الاجاااانب اموووووت قهر
اذا شفتهم على سيارات فخمة
وبالاسواق يشتري بلا حساااب
وحنا قااااعدين ندفها دف للاخر الشهر
فيه مشروع طيب سجلي بمنتدى عالم حواء
او منتدى كويتيات
شووفي الشغل السنع والتجارة الالكترونية
او جيبي ايفوناااات من برا من موقع الظاهر تعرفينه
القطعه بالكثير اسبوعين وهي عندك
صراحة واحد من الشباب طايح في هالسالفة
يجيب ويببع على محلات الجوال
انتي بيعي على معارفك ومعارف معارفك وهكذا
وفيه بعد شغلة العطورات ممتازة
يمكن هالافكار ما تعجبتس بس مشغلة وقت

ولاتنسي الدعاء ثم الدعاء
والله يوفقك
اقول ما فيه حرب الذكاء بين العيال والبنات

واشوى انك يووم جيتي جبتي اختنا الماسة
بس من جد وشوله تخبرين عليهاااا

على العمووم عودا حميدا
وكل عااام وانتن لله اقرب
وتقبل الله منا ومنكم صالح الاعمال

I B R A H E M · #12 25/08/2011, 07:01 PM

في الحقيقة و الواقع يوم شفت أسم فيروسة قلت

أيوه الشبكة تهكرت و رجعنا خمس سنين ورا

شئ جميل أن الناس ما تقطع ..

إقتباس


	وحاولي انك تكوني متفائلة .. لان الانسان غلباً الشيء اللي يتوقعه هو اللي يصير فانت تفائلي وتوقعي انت بتلقين وظيفة على المرتبة الثالثه عشر

ترا بأرسل عليك عثمان

الفيروسه الزرقاء · #13 26/08/2011, 12:58 AM

هلا و الله بـ كلنا للازرق

تشتغل في استقبال أفضل من أنها تشتغل " مندوبة مبيعات "

، ع الاقل في الاستقبال مكان عام ! و محد يقدر يقولها شيء ولو احد اعتداء عليها لا قدر الله كم زر ونادي السيكورتي

! لكن البلى في مندوبة مبيعات

تركب السيارة مع سواق الشركة!! وتروح لمكان ماتدري عنه الا بس اسم !! كل شيء غامض ، المخاطر فيها مرتفعه !! احياناً لا كلمت احد وقالت له انا فلانه من شركة الفلانية يا عطاك كم كلام يسم البدن!!! أو هلا ورحب فيك وتغزل !!!
مندوبة المبيعات هذي ماعتبرها وظيفة !! مسنغلين المرأة فيها بشكل مو طبيعي

بـ النسبه لـ البيع بالاسواق كم مره شفت محل نسائي يبيع فساتين ومغلق ! اول سؤال اسالهم اياه كيف الوضع عندكم ! يجاوبون احنا مرتاحين لكن المحلات اللي بالخارج ماتخلينا بحالنا! يرسلون لنا ناس وياخذون تصاميمنا !!
حسيت من كلامها إنه حتى التجار الملابس النسائيه! مايبون الحريم يدخلون في هالمجال !!
مصيبه ياريتهم سعودين كان اقول بيرحمونهم

!! لكن للاسف اجانب وصاروا تجار

خلها ع ربك بس و الله يعين و يسهل الأمور .. شرفتني بردك الجميل

هلا بـ هـــلالـــي صـــميـم

بـ العكس ماني مستحيه لكن كتبتها من باب الإثاره ! بعدين مايحتاج اقول شنو قسمي الكل عارف شنو غير كذا "الفطين" راح يعرف التخصص إذا قرا الموضوع " عدل "

ثانكس ع ردك

هلا بـ موج الخليج الأزرق

ما حبيت فكرة المشاغل ! عندنا مشاغل بـ الهبل ! واذا اشتهر مشغل قاموا طلعوا عليه إشاعة مثلاً " لا تروحون لهالمشغل ترا موظفاته يصورون ويجرونكم

" يـ اكره هـ الاشاعة اذا انقلت ع مشغل !! جد مجتمع النسائي مجتمع سخيف

!!
غير كذا المشغل و انا اختك يبيلها مسؤولية ! مراقبة هـ الموظفات وشغلهم !! جد جد مرة متعب

وأنا إنسانه مابي اراقب 5 موظفات !! يـ الله اتحمل مسؤولية نفسي وكم نفر

..

إقتباس


	وفيه افكار كثير بس ماتحضرني .. جيبي ورقة وقلم واكتبي افكار المشاريع اللي تتوقعين تفيد واٍسألي اهل الخبرة في نفس التخصص حاولي تأخذين دورة حاسب بتفيدك كثير في التوظيف

مصيبة أفكاري غريبه ! مالقيت أحد مسويها

وإلا كان طبيت عليهم وقمت اسالهم واستفسر حتى اتحمس واسوي دراسة الجدوى

!!
بـ النسبه لـ الحاسب عندي شهادة

ماساعدتني في التوظيف!!

إقتباس


	ولا تنسين المثل اللي يقول ( كل تأخيره وفيها خيرة )

يارب تكون خيره

يسلمو يالغالي ع ردك الحلو و استمتع بـ السوالف معك

هلا بـ إبن اليمن

لا خيو فيّو ومعناتها :p / ! شنو معناة فيّو غير الحظ رديء

أي نو اني بلعت حرف ! لكن غض البصر

إقتباس


	هنالك معلومة قد تفيدك .. المعدل الجامعي مهم في التقدم للدراسات العليا .. بينما الوظيفة لا تعتمد على المعدل بقدر ما تعتمد على المقابلة الشخصية .

و الله المعدل مهم في كل مكان ! ع أساسه تدخل الترشيح

! ويب المقابلة مهمه لكن مو بكل سهولة يصلحون لك مقابلة!! كذا مكان تقدم السي في ولا يصلحون لك مقابلة !!
تدري يـ إبن اليمن ان لي 3 سنوات متخرجه ولا قد سويت انترفيو إلا 5 مرات بس !! وكل في هـ الخمس مرات لابد يسالوني سؤالين ! ليه معدلك مو كويس رغم ان مبين لنا انك شاطره ! ليه لك كم سنة متخرجة ولا توظفتي !!
ادري انهم يحاولون يستفزوني لكن امسك نفسي

شسوي مضطره لاني ابي اتوظف

!

إقتباس


	توظفتي .. اهتمي بعملك فقط .. متابعتك للآخرين والاستفسار عنهم وعن رواتبهم .. أمر غير مرغوب في اي شركة قطاع خاص .. وافضل طريقة بالنسبة لهم هو التخلص منك واحضار بديل يركز في عمله

قبل لا تدرب ! ماكنت مهتمه بـ المادة ! كنت اقول ابي خبرة لكن مجرد ماتميت اسبوعين قلت ليه أخذ اقل منهم وانا اداوم من 9-6 !! كل الشغل علي و هم مايشتغلون !!
حتى موظفينا ماكانوا يشتغلون لا دروا انك جديده جوك فلانه ممكن مساعدة ! واساعد واساعد لين اخر اسبوع طفح الكيل ! قلت آسفه ماسوي إلا شغلي وبس ! ليه اساعد غيري ! صح انهم كبار ويحق لهم احترمهم ولا ارفض لهم طلب لكن فيه مثل يقول " إذا كان حبيبك عسل لا تلحسه كله "

الموظفين ماينعطون " فيس" لاشافوا فيه ناس تتبادر بـ العمل ومتحمسه استغلوها !!

إبن اليمن .. شي يرفع الضغط وينرفز!! أنت يـ بنت البلد ما انصفتي ! وغيرك تلاقينه اجنبي! عنده راتب اضعاف راتبك غير البدلات " سكن - مواصلات ألخ " وهو مايستحقها جد بس لانه اجنبي عطوه هـ المميزات واحنا باخلين علينا في 5000 !!

إقتباس


	من لديه مشكلة مع التوجيهات والتعليمات والأوامر .. فالأفضل له البحث عن عمل حكومي أو عمل مشروع خاص .. ليس هنالك صاحب عمل او الاشخاص الذين وكلهم ( المدراء ) في ادارة اعماله ممن يرغبون في التعامل مع موظف بلقب ( شيخ ) .

ما عندنا مشكلنا ابد في تلقي الاوامر ! بـ العكس نستانس لاقالو فلانه سوي هـ الشغله ! واو يثق فيني مديري عطاني هـ المهمه اسويها !
مشكلة مو هنا يـ إبن اليمن ! المشكلة لما يجيك شخص " ما يحترمك! " و يحب " القوسب "
أنا جربت المدراء الاجانب " رجال / نساء " لكن لقيت الرجال أفضل و اكفى ليه لانه يحترم ! صح يزف موظفين ويعطيهم كلام وسب وشتم ! لكن لما يكلم " البنت " يكلم بـ إحترام ! ولا يهتم للقيل و القال ! انتي غلطتي في كذا صلحي كذا ! وهـ الشيء ماعندي فيه مشكلة بـ العكس ماقصر " فهمني وعلمني خطاي " لكن المشكلة في " عدم الاحترام و نقل الكلام " !!

إبن اليمن ماتوقع نوب إنك راح تفهمني

! لان ماحد يحس بـ النار " الا اللي واطيها

" يمكن يفهمون وجهة نظري السعوديين / السعوديات اللي جربوا يكون مدرائهم اجانب!!

إقتباس


	من الخطأ ان يجتمع اقرباء من الدرجة الأولى في مكان عمل مشترك .. وعادة الشركات الخاصة لا تقبل ذلك .. لأن ذلك قد يسبب الكثير من الاحراجات

" عادة الشركات لا تقبل ذالك " لول إبن اليمن نص شركاتنا السعودية تلاقي فيها " اجانب " وكل واحد " جايب ربعه وجماعته " !!!

عموماً في سؤال يخطر ببالي أنت متوظف في السعودية

!!

إقتباس


	ختاما الله يعوض ميسو خير .. ونتمنى لك التوفيق ،،،

لا تخاف ع ميسو

هي معتبرتني " منقذتها "

.. الله يسهل أمرها ويوفقها في الدنيا والاخره

سويت لها جو اكشن هناك

و وضحت لها صوره ناس " كانت منخدعه فيهم "

ثانكس ع ردك

هلا بـ حروف الغلا

لووووو

ووووووول

اعتبريني استلمت بوكيت وردك

يسلمو يالغلا ع مساعدتك وماقصرتي ! لكن انا مو مجالي شغالات يدوية !! تقدرين تقولين ما اهتم فيها

.

إقتباس


	وحدة من صديقاتي اشترت ماكياج لماركة معينة بالجملة و صارت تبعيها على معارفها و زميلات العمل

قد شفت ناس يسوون هـ الشغالات لكن ماحب اكون مسوقه

أشيل بضاعتي من مكان لـ مكان ووريها خلق الله

! لا وانصب بكم نصبه واقول يهبل ويخقق الخ !! ماعرف انها هـ الشيء

يسلمو يالغلا ع ردك وتواجدك

هلا و الله و غلا بـ مجود

لووووووووووووووو

ووووووووووووول

يعجبني فيك إنك إنسان مكافح ! ماقلت احط الفيسات ومتى ماطلعت طلعت

لا رحت وابتكرت طريقه حتى تخليها تطلع

..

إقتباس


	ونصيحه من اخوك عليك بالدعاء صدقيني باذن الله يجيك الفرج من الله عز وجل وحاولي انك تكوني متفائلة .. لان الانسان غلباً الشيء اللي يتوقعه هو اللي يصير فانت تفائلي وتوقعي انت بتلقين وظيفة على المرتبة الثالثه عشر وعلى قولتهم ما تفكر فيه سوف تحصل عليه ض1

صح لسانك ! لكن راح احاول أني اكون " متفائله " و افكر بـ ان غداً سوف يكون الاجمل

..
مجود الله يسمع منك واحصل وظيفه ع مرتبة 13 ! أقسم بـ الله اذا توظفت ع هالمرتبة أبشر بـ الفيفتي فيفتي

ولمدة 3 شهور هههههههههههههههههه ---->> كانها تتعامل مع مكتب توظيف

إقتباس


	وابد من اليوم بدور مشروع واذا لقيت ندخل فيه شراكه ففتي ففتي

يسلمو ماتقصر و الله يامجود

، و ابد انت تامر امر لك مني اذا نجحنا في مشروعنا مانفك الشراكة ابد

ثانكس ع ردك اللي يوسع الصدر و يعطني الآمل

!! الله يحفظك و يوفقك

هلا و الله و غلا بـ قرقاصوه

شفت شلون و انا اختك

ع قولة راشد " ما بنكسر صابر لو فرصتي تمضي و الحظ لو عاثر بصنع انا حظي

! "

ملكنا ما قصر ساعدنا كثير ! لكن المصيبه في هـ الوزراء اللي ينفذون الاوامر ع مزاجهم

!! أجل رواتب العاطلين خلوها السنة الجاية !!
لا ووزير العمل تفاجى بأن فيه مليون عاطل وعاطله يبحثون عن العمل ! بدري توك تستوعب !!
شركات ودوائر حكومية متروسه " أجانب " ليش ليش ؟ ورأ ما يسوون لهم ترحيل وبلا عوده !
هم شافوا النعمه وياريتهم وقفوا لا طمعوا جابوا اهلهم وربعهم ووظفهم وتوسطو لهم !
أول كنت اقول الواسطه بس الوظائف الحكومية ! الحين صارت الواسطة حتى في القطاع الخاص

!!

إقتباس


	لكن البلا في تجارنا ورجال الأعمال !! كثير منهم مافيه خير لبلده !! وهم كالنخلة العوجاء خيرها لغيرها !! لايهمهم الا زيادة أرصدتهم ! أما المساهمة مع الدولة في توظيف الشباب والشابات السعوديين ! وتخفيض نسبة البطالة وتدوير المال السعودي في البلد وعدم خروجه منها فلا يخصهم !!!

اقسم بـ الله جبتها ع الجرح

خيرنا لـ غيرنا !! يستكثرون علينا " 5000 " وهم ياخذون اضعاف هـ الخمسة !! يبونا نتوظف " عمال " و هـ الوظيفه من المفترض انها تكون لهم !! ويخلون الوظائف " الادارية " لـ ابناء الشعب!!!

إقتباس


	أعرف زميل كان يشتغل معنا في المستشفى من جنسية عربية وراتبه لا يتعدى 6 الاف ريال استقال وهاجر لكندا وبعد خمس سنوات عاد بجنسة كندية وتوظف في نفس المكان براتب يفوق 20 الف ريال !! مالذي استفاده العمل من جنسيته !! نفس الشخص ونفس الكفاءة! الذي زاد هو تكلفة العمل بسبب جنسيته !!

أه يـ القهر

بس لان جنسيته اجنبيه !!! كثير ياخوي اعرف " تخلو " عن جنسياتهم السعودية واخذو "جنسية امريكيه " وصار راتبهم يصفق

إقتباس


	أحيي فيك اختي الفيروسة مثابرتك وعدم يأسك رغم كل هذه المعوقات !! وأتمنى لك التوفيق والله يرزقك باحدى ثلاث وظيفه محترمه ! أو زوج ابن حلال ! أو بعثه ! ولو حصل كلهن مع بعض خير وبركه

لوووووووووووو

وووووووووووووول

تسلم قرقاصوه ما تقصر و الله يحقق امنياتك

ويرزقك من حيث لا تحتسب

جد ثانكس ع ردك و فضفضتك قسم بـ الله ان ردك حسسني ان فيه احد " حاس " بمعناتي

يسلمو و الله يوفقك و يسعدك

هلا و الله و غلا بـ سمن

آه جبتها ع الجرح ! صادق تحصل عندهم بدلات وسيارات كشخه و اللي يقهرك شنو يستفيدون من ممتلكات الشركة !
ذاك اليوم خلص حبر طابعتي سويت طلب وارسلته لـ غدارة المشتريات ! العادة ما يطول الطلب ابد خلال يومين يكون موجود عندك ! لكن طول ماوصل حبري فرحت اتصلت عليهم قالو احنا ارسلناه لمديرك المباشر شيكي معه ! قلت طيب واروح لمديري واساله قالي اووه انا اخذت الحبر وعطيته بنتي !!! كانت محتاجه له ؟! انا انصدمت ماحبيت اقول هيه تراه مو ملك مو بفلوسك وراك تاخذه ! فقلت طب شنو اسوي قال ابد عملي طلب باسمي وخوذيه لك !!! رجعت مره ثانيه وسويت طلب باسمه !
بس جد شنو هذا لانه ملك للشركة تستخدمه استخدام شخصي! اقسم بـ الله لو كان سعودي كان ع طول عطاني ياه والا بلاش عطاني ياه اذا شاف الكمية مخلصه عند ادارة المشتريات ، راح لـ جرير وشراء حبر لـ الشركة!!! مو يستخدم ممتلكاتها

إقتباس


	شووفي الشغل السنع والتجارة الالكترونية او جيبي ايفوناااات من برا من موقع الظاهر تعرفينه القطعه بالكثير اسبوعين وهي عندك صراحة واحد من الشباب طايح في هالسالفة يجيب ويببع على محلات الجوال انتي بيعي على معارفك ومعارف معارفك وهكذا وفيه بعد شغلة العطورات ممتازة يمكن هالافكار ما تعجبتس بس مشغلة وقت

و الله فكرتك مو شينه ولا جت حتى ببالي

يسلمو على هـ الفكره الحلوه ! اجيب ايفونات واي باد وابيعهم ع العالم ! لكن تتوقع كم بتكون نسبه ربحي ؟ 10% !!

إقتباس


	اقول ما فيه حرب الذكاء بين العيال والبنات

لووووووووووووووو

وووووووووووووووووول

خلصنا حروبات نحن نعيش في عالم السلام

يسلمو يالغالي ع ردك وتفاعلك و الله يحفظك و يوفقك

لحظه ! كاني اشوف في توقيعك ابطال الديجتال

اشتقت لهالانمي

ثانكس يا اخوي ، وماوصيك سلمني ع زوجتك وبناتك

الله يحفظهم و يخليهم لك

هلا و غلا بـ I B R A H E M

لووووووووووووووووو

وووووووووووووووووووول

الشبكة تهركت

!!
يا حليلك و الله

الا ما قلت لي منهو عثمان

---> ملقوفه!!

ثانكس ع ردك و تواجدك

لـ الجميع

!

ثانكس ع ردودكم و تفاعلكم و ماقصرتوا

، إن شاء الله ربي يحقق امنياتنا و يسهل امورنا

بـ التوفيق لكم و الله يحفظكم !

سي يا

فيّو

هــلالـ2002ـــي · #14 26/08/2011, 03:25 AM

ياعماااار يا الفيروسه انت الى دا الواتي حيــــــه

الي كبرك تقاعدن وانت تدورين وظااااايف .

بس بصراحه شخصتي الحااااال تشخيصا دقيقا تستحقين عليه التقييم a+

With best wishes you luck

الهنوووف · #15 26/08/2011, 07:35 AM

هلا والله بـ فيووو

عاش من شاقك وسلامي لـ ميسوو

لما قريت معاناتك تحطمت وخليتني ما افكر بالبحث عن الوظيفه

تدرين خلي معاناه البحث ع جنب \المشكله بـ الناس الي يحسبون الوظايف عند الباب ومانبيها
بسؤالهم الغبي ورا ماتتوظفين ؟ّ! والا مافكرتي تتوظفين اعتقد عارفين الوضع فـ ليه الفلسفه

وكله كوم ولاقالوا يوه اجل وراك دارسه جامعه اذا ماتوظفتي او مابتتوظفين

يالله ان شاء الله يجي قرار بمنع المقيمين من القطاعات الخاصه اذا هم بيوقفون بوجه عيال البلد خصوصا اذا نفس الشهادات
وبعد ان شاء الله بيجي اليوم نصير مديرات

و نقول
ضاقت فلما استحكمت حلقاتهافرجت وكنت أظنها لا تفرج

ونصيحه
اسعي للوظيفه بس لاتخلينها همك وشغلك الشاغل \ حاولي تبحثين عن البدائل
واذا معزمين ع شركه انت وماجد تراني شريك ثالث والا خلوني المديره

عن نفسي مرره ودي بـ التجاره وخصوصا الالكترونيه
بس مدري ماعندي افكار
بس احس تبي تخطيط وافكار مبتكره ومختلفه عن البقيه حتى الواحد ينجح

\

/
ان شاء الله تبشرينا قريب بـ الوظيفه الي ترضيك
والله يكتب لك الخير وكل تاخيره باذن الله تكون خيره لك

واهم شي لاتنسي الدعاء

الهنوووف
كانت
هنا
ورحلت