[ يوميات رمضانية "10" ] الكاتبة المميزة بلو كادي .. يومها راح بالمزرعة .. وسالفة طبخات النت ..يوميات مشوقة - نادي الهلال السعودي - شبكة الزعيم

المنتدى الاستشاري · #1 11/08/2011, 06:36 AM

فكرة : سندريلا الهلال
إعداد : فَيْلَـسُــ زَمَانَهُ ـــوفْ
تصميم : plastic

السلام عليكم ورحمة الله وبركاته ,,
مبارك عليكم الشهر
واعاده الله علينا سنين عديدة واعواما مديدة
وكل عام وانتم بخير ,,

▌ ▌|[ـΞـ يوميات رمضانية 1432 ـΞ]|▐ ▐

في سلسلة تعودنا على اللقاء بكم
حملتنا اشواقنا إليكم ودفعتنا رغباتنا لكم
عادت سلسلة يوميات رمضانية في كل
عام اعتدنا على لقائكم وهانحن نجدد
التواصل بكم مع وقفات مع اعضاء
برزوا واستحقوا الوقوف معنا
هم هنا ليسردوا لنا تفاصيل
يومهم مع الشهر الفضيل

۞ ❤

أهلا وسهلا بكم اعزائنا الكرام
دعونا نرحب وإياكم سوية
بضيفنا لليوم ,, العاشر
الكاتبة المتميزة ..:
..❤{ بلو كادي }❤..
لكي تقوم بسرد تفاصيل يومها مع الشهر الفضيل

ماهو رمضان بالنسبه لك ..؟

رمضان بالنسبة لي ولكل مسلم على وجه الارض
يختلف تماماً عن باقي الشهور فهو شهر الخير والبركه
وكذا احس في اجوآئه وناسه مو طبيعيه الناس دايم مجتمعه

واكثر مايوسع صدري ان لما اصير راجعه من مكان الساعه ثنتين باليل وإلا ثلاث الشوارع حيه والبقالات مفتوحه والناس كثيرين
موب باقي الشهور الشوارع تروع بذا الوقت

صعب صعب جداً وصفه روعته لاتوصف

اسأل الله العظيم ان يعيده علينا
وعلى الأمة الٍإسلامية أعواماً عديدة وأزمنة مديده في حيآة سعيده

برنامجك اليومي في رمضان ؟

اصلي الفجر وأقعد أقرأ قرآن لمايجيني النوم واذا خلصت النصاب اللي محددته
افتح النت شوي شغل ربع ساعه
بعدين انوم لماالظهر

واقوم اصلي واقعد اقرا قرآن شوي لما يجيني النوم وانوم لصلاة العصر

وبعدها ادور طبخه من النت

وانزل للمطبخ مع امي وخواتي واشوف وش عندهم واوريهم وش عندي

واقعد اقلق امي يمه وش لون احط هاذا يمه ماعندنا هاذا يمه كم احط

ودايم مااطبخ واتوهق وتصير نص المقادير موب عندنا

وبعدها تعصب امي على بثارتي وأسئلتي واني اطبخ بدون مااشوف المقادير

وتاخذ الطبخه وتكملها

وتقول روحي بس افرشي السماط وصلحي الفيمتو والاشياء هاذي

ونفطر بوقت الاذان وبعدين الاكل الاكل يكون بعد صلاة المغرب
ولما يأذن العشا اروح اصليها واصلي التراويح
وبعدين اقعد في الصاله مع خواتي لما يجونا

او اروح مكان اقضي شغله وارجع
وبعدين اتسحر واصلي الفجر وانوم
والنت طبعا يكون شغال عندي اغلب الوقت بالجوال

ماهي اكلتك ومشروبك المفضل في رمضان ؟

امم الأكله لقيمات امي

والمشروب ماتفرق معي بس دايم نسوي فيمتو معها او تانج برتقال

متى اول مره صمت فيها . واذا عندك مواقف مع الصيام اذكرها ؟

يوووه اول مره صمت فيها وانا باولى إبتدائي

طبعاً صيام خربوطي نوعاً ما

اللي اصوم من اذان العصر

وعلى ثاني او ثالث الظاهر صرت اصوم صيام صدقي

وبدون لف ولادوران بسم الله علي

موقف لاينسى حصل لك بـ رمضان..؟

مره اختي المتزوجة كانت عندنا قاعده وتعبانه
المهم لما يجي زوجها لبيتنا كان صعب عليها تروح تفتح
فانا اروح افتح الباب وانحاش

وهو ينتظر دقيقتين ويدخل

<< طبعاً اذا ماكان فيه اخوي الصغير

المهم ذاك اليوم كان بيجينا وكان يكلم اختي
المهم ان الرجال يحسب ان زوجته هي اللي بتفتح

مادرى انها انا

انا بعادتي درعمت وفتحت

وانا كاني اسمع صوته قريب
بس اقول لا يابنت إن شاء الله انه فاتح الدريشه << لانه كان قاعد يكلم

المهم فتحته واشوف الا العم يدفه

يحسبني اختي

لانه قالت لها بفتح الباب ذا الفاهيه ذي

المهم انه هو يدف الباب وانا انحاش

الرجال كان يكلم بالجوال مو يم احد ودخل وانا اركض

والتفت ورى لينه كذا احس دقته ام الركب

وفجأة الا واتكرفع عند الدرج حق الباب الداخلي

المهم هو مسكيين رجع وطلع برا البيت
وانا ماادري اصيح ولا اضحك

وجت اختي وقالت وش ذا

وتقعد تفطس من الضحك على شكلي

المهم دخل رجلها وقال الله يهديك ورى ماعلمتيني ان اختك هي اللي بتدخل

مسيكينه تبهذلت وطاحت ورحمتها مسيكينه

وعقبها قلت لاختي حسبي الله على بليسك توبه افتح لذا الفاهي

وطبعاً شكلي كان حدث ولا حرج

كيف نظامكم واجوائكم في رمضان ونظامكم بالفطور والعشاء والسحور.؟

نظامنا ياطويلين العمر

إذا اذن المغرب اغلب شي يصير على سفرتنا قهوه وتمر وقشطة ابوي

وحلا اللي هو لقيمات او جبنيه
والاشياء هاذي
وطبعاً يصير كميتها قليله عشان يتعشون

وبعد صلاة المغرب على الساعه سبع سبع ونص نحط العشاء
اللي هو الكل الاكل << حسيت انه شسمه

امم الاشياء اللي دايم تكون فيه سمبوسة+ شوربه
والباقي

واي طبق احنا وخواتي نسويه ساندويتشات او صينيه او اي شي
عموماً ماتكون اكثر من طبقين
+ مرق ابوي

هل ترى اختلاف بـ رمضان في السنين الماضيه عن السنوات الاخيره واذا نعم وش الاشياء الي افتقدتها.؟

لاطبعاً غييير وبدرجة كبييره
فقدت جريش جدة جيرانا ام حمد الله يذكرها بالخير

فقدت جمعة بيت جدتي لما ماتت الله يرحمها << والله ياكانت ايام حلوة فيه

عزيمة جدتي الله يرحمها كانت تسويها كل ليلة سبعه وعشرين

الحين صاروا يوزعون اشياء العزيمة على الفقراء

وفقدت طبعاً اكل الجيران اللي كان يتوزع بيننا

أجمل رمضان عشته حتى الآن , متى ولماذا ؟

اجمل رمضان يمكن قبل ثلاث سنوات او اربع

كان مررره حلو

يمكن لان خالتي صامته عندنا

<< هاذي مسافره رجلها يدرس برا يمكن لها سبع سنين
وكان فله وطلعات كذا << استغفر الله الله لايشغلنا الا بطاعته

رسالة في هذا الشهر المبارك .. لمن تبعث بها وماذا تقول فيها ؟

ابعثها لكل من قرا الإستضافه

ان رمضان فرصه ماتجي الامرة وحده بالسنه

حرام يضيع بمسلسلات وخرابيط
وليش ماتكثر المسلسلات الا برمضان ..؟؟!!
يحطون عشرين الف مسلسل بالقناة الوحده

واحنا كمسلمين المفروض نبعد بهالشهر عن الاشياء اللي كذا << هو المفروض بكل الشهور بس الواحد يكون احرص على رمضان

يعني ماتلاحظون إنه إستقصاد لنا وتصيد
بدال الوقت حق المسلسلات لونقعد نقرا قران كان خلصنا جزء اوثنين بالراحة

وابي اذكر بشي
عن أبي هريرة رضي الله عنه، قال‏:‏
قال رسول الله صلى الله عليه وسلم ‏:‏ ((‏‏قال الله عز وجل‏:‏ كل عمل ابن آدم له إلا الصيام، فإنه لي وأنا أجزي به‏
والصيام جُنة فإذا كان يوم صوم أحدكم فلا يرفث ولا يصخب، فإن سابه أحد أو قاتله، فليقل‏:‏ إني صائم‏.‏ والذي نفس محمد بيده لخُلوفم الصائم أطيب عند الله من ريح المسك‏))
‏‏وان للصائم فرحتان يفرحهما‏:‏
((إذا أفطر فرح بفطره، وإذا لقي ربه فرح بصومه‏‏)) ‏-متفق عليه‏- وهذا لفظ رواية البخاري‏
وفي رواية له‏:‏ يترك طعامه، وشرابه، وشهوته، من أجلي، الصيام لي وأنا أجزي به، والحسنة بعشر أمثالها‏
فيااخواني وخواتي رمضآن فرصه في السنة شهر واحد فلنغتنمها

هل تحب تصلي في المسجد القريب من بيتكم او تحب التغيير
ومن القاريء الذي تحرص على الصلاه خلفه في رمضان؟
أجمل رمضان عشته حتى الآن , متى ولماذا ؟

اصلاً موب على كيفي

ومااحب اصلي القيام الاعند إمام مسجدنا << تراويح وعشاء نادرآ مااروح
بس التهجد بالعشر الاواخر

عايلته الكثيري بس مدري وش اسمه

نبي صوره تلتقطها لنا من يومك الرمضاني المجال مفتوح لك..؟

هذي بمزرعة جدي

الماء والخضرة وانا الوجه الحسن

رحنا له اليوم، انواع الكرف وكل ابو شئ

بس اهم شئء ونااسه مرره

اليوميات الرمضانية :~

تسحرت الساعه ثلاث
وطبعاً عقبها قعدنا في الصاله ننتظر الأذان << آحلفي

ويوم اذن صليت وقعدت اقرا قرآن
ثم فتحت النت شوي
ثم نمت على سبع ونص الصباح
وقمت الساعه وحده ونص تقريباً
صليت الظهر وقعدت افرفر بالنت شوي
وادور بالبيت واقومهم واخرشهم

ويوم اذن العصر صليت
وعلى الساعه خمس العصر طلعنا من بيتنا متوجهين لمزرعة جدي بمحافظة الخرج

وصلناها مدري متى بس كانت فيه شمس

واذن وافطرنا الفطور الاول اللي هو كان عباره عن تمر وفيمتو وقهوه ومويه وجبنية وبس

وبعدين على الساعة 8 الليل حطينا عشا الرجال
(حنا طبعاً مساعدات خفيفه ولا بالاصل الحريم حطوه )>> بس نبي تفلسف عليكم شوي

وبعدها حطينا عشانا
وتعشينا حنا ياالحريم والبنات

وطبعاً بما أنها كانت جمعه فاكيد بيكون مالذ وطاب من الاكل والصياني وخرابيط وكذا

وبعدين صلينا التراويح وقعدنا نتقهوى
وعلى الساعه ١١او ١١:٣٠ بالليل طلعنا من المزرعة

>> لظروف الشغل اللي عند ابوي

والحين حنا بالطريق راجعين واكتب لكم

كل شكر موصول

للمبدعة الكاتبة --|" بلو كادي "|--

وإنتظرونا غدا مع عضو تحرير مجلة عالم الزعماء الأستاذ :-
۞~~| هلالي كايدكم |~~ ۞

حروف الغلا · #2 11/08/2011, 07:07 AM

لي عودة بعد قليل

......................................

بااااك

هلا و غلا بأختي الصغيرة

اشتقت لك يا حلوة

الله يحفظ الوالدة لكم و يعينها ع طبخاتك

استمتعت بيومك بين الخضرة و الجمال

ملامح يوسفيه.. · #3 11/08/2011, 07:18 AM

لي باك

....................................

باك

استمتعت بيومياتك يابت

هههههه انتي مثلي العصر اصحى واحوس عند امي بالمطبخ

بس والله تطلع طبخات معي رهيببببه
وياكلونها<<مدري تنوكل مجامله ولاطعمها زين

بس تأكدي من المقادير قبل

طيب ليش ماعزمتينا لمزرعة جدك

اجي وافطر معكم ونستانس يالبنات

بس صراحه روووعه
الله يديمها عليكم من جمعه ووناسه

موقفك مع زوج اختك هههههههههههههههههههه ذكرني بموقفي انا بعد مع زوج اختي

حسيت انه فاهي فتح الباب والاخو بيسلم يحسبني وحده من خواته<<والله فاهي ههههه وفعلن انحشت وانا اركض وازلق واطيح ذيك الطيحه

استمتعت بيومياتك

الدانا الهلالية · #4 11/08/2011, 07:30 AM

يوميات رائعة وحلوة

واللي لفت نظري ما يكون على السفرة أكثر من طبقين <<< شيء حلو

يعطيكم العافية على الفكرة والإعداد
وشكراً لـ بلو كادي

5jel · #5 11/08/2011, 07:30 AM

يً حبيلك يً بلوكآدي

الشهر مبآرك عليك

بصرآحه موقف لآ يحسد عليه

ههههههههه مآلقو الآ أنتي تفتحين البآب

لآ بس مسويه يعنني تسآعدين أختك بمآ أنهآ تعبآنه

والله يً فطسست ضحك عليك

وشكرآ لك

اللؤلؤة البيضاء · #6 11/08/2011, 08:33 AM

صَبآح الخير

آجل تكرفستي

أختك و رجلهآ كلهم فآهين

إقتباس


	يمكن لان خالتي صامته عندنا

صَدقتي ونآسه لمآ يجي آحد و يجلس ببيتكم يعطي البيت جو
و بعضهم إذآ رآح ينفقد ..
بحكم آن آغلب قرآيبي مو بالمدينة اللي حنآ فيهآ , نشتآقلهم
و نستآنس بجيتهم

بلو كآدي , مشكوره ع اليوميآت الحلوة ,

تركي السلماني · #7 11/08/2011, 11:14 AM

ألحين بلو كادي إمرأة

قسماً مادريت ألا دحين

على العموم استمتعنا باليوميات و آسف على قصر الرد تعبان حدي توي جاي من الجامعة آخر اختبار

ان شاء الله اجيب الـ +A

بالتوفيق لك يارب

HooO 20OooH · #8 11/08/2011, 01:15 PM

هلا والله بـ بلو كادي
ماشاء الله يوميات رائعه
ماقصرتوا ربي يعافيكم

ســـــ SMN2002 ـليمان · #9 11/08/2011, 01:59 PM

وعليكم السلام ورحمة الله وبركاتة
يووميااات رائعة
والمووقف ههههههه
طيب ليه انتن يالبنات زووج خوواتكن تستحن منه فوووووق اللزوووم
صح هو ماهو محرم لك بس
على الاقل يوووم تفتحين الباب له
طبعا من دوون مصاافحه
تسلمين عليه او تردين السلام
هذا زووج اختس يا مال الغنيمة
بس دايما اردد الحيااااء هو زينة البنت

والله يجزاك كل خير على الرسالة
والله يحفظك ويسعدك
والله يحفظ جمعتكم

طاقم العمل شكرا لكم

مستر بيسو · #10 11/08/2011, 05:57 PM

لي بآك

> يبي يقلد

بآك

يوميـآت رآئعـه آستمتعنآإ بهآ ..
بس آلمشكله آلآعضاء يومياتهم متشابهه

™ṂṒḤĂṂṂĂĐ · #11 11/08/2011, 08:34 PM

من افضل اليوميات اللي قرأتها ,, استمتعت فيها بصراحة

شكلك ما عندك ما عند جدتي بالطبخ

< دُعابة يا جماعة لا احد يصدق

. . . !

وموقف محرج بصراحة .. واهنيك على الاخت المفهية

الف شكر لك على اليوميات الخفيفة اللطيفة ..

والشكر موصول الى القائم على هذا اللقاء

تحياتي للجميع .

خـيـالـيـه · #12 11/08/2011, 09:48 PM

وعليكم السلآم ورحمة الله وبركآته ..

بلو خآآدي ..

لبى آنتي يا شيخة آنتي وفهآآوتس ..

آجل تمطرسين بالمطبخ ..

يآآخزيآآه بس .. تلعبين على آهلتس ..
شكله كل يوم سيآآرة آسعآف عند بآب بيتكم ..

كل مره تشيل وآحد من آهلتس ..

حلو التكرفس عند البآآب ..

كل يوم آفتحي البآآب لرجل آختس وخلينآآ نضحك ..

يوميآت حلوة وممتعة ..
نورتينآ كثير ..

تحيآآتي لك ..

كل الشكر لـ:

إقتباس


	فكرة : سندريلا الهلال إعداد : فَيْلَـسُــ زَمَانَهُ ـــوفْ تصميم : plastic

بلو كادي · #13 12/08/2011, 12:43 AM

هلا وغلاحروف دايم منورتني
آمين ويحفظ لكم اميمتكم هين عاد مايستغنون عن طبخآتي

تشتاق لك العافيه يابعد تسبدي

ملاامح الدلع سابقاً

ههههههه سبحان الله نفسي
خن نسوي إضراب عن خواتنا فاضين ماورانا الا رجالهم نفتح لهم البيبان

آمين

خلاص اذا جيتي الرياض علمينا نمرك >>اهم شي قررت ان ساكنه بالقصيم

والله يسعدك دايم يالجميله

الحياة حلوه منور او منوره

بس نقول منور

العفو ومايقصرون اهل المجلس بسم الله عليهم

خجل
اووووه خجيل هنا اسفرت وانورت

ما نيب قايله عقبال دبجتس لاني احبسس

اللؤلؤه صباحك كادي

لا هي مو عندنا ببيتنا كانت ببيتها بس بسم الله عليها تعرفين كان تروح لجدي تقريباً يوميا
وتسنتر هناك ونجي حنا والبنات ونفلها

تركي السليماني

مششكور عالرد يكفي دخولك الله يفرح قلبك بك بـ+A

لي عودة مع باقي الردود إن شاء الله

>>ياشين الدخول بالجوال

S.SAM · #14 12/08/2011, 12:55 AM

اهلا بالقوه.. ض1 صبآآحك خير..

ما شاء الله الفهاوه ملازمتك بكل شي.. ض1

والاكل الي تلعبي فيه.. ض1 المفروض محد ياكله غيرك.. ض1

اهم شي الكرفسه.. ض1 موقيف اليم صرااحه.. ض1

شكرا لمن خلف الكواليس.. ق1

بالتوفيق جميعا.. ق1

حاتم · #15 12/08/2011, 01:09 AM

هلا فيك بلو كادي
يوميات راائعة وخاصة في المزرعة وتغير الأجواء
تستاهلين ما حصل لك من فهاوتك راايحة تفتحين الباب

هذه انتم بنات اليومين لا طبخ ولا ما يحزنون وانتم طبخت سارقين الطبخة ولا تضبطونها
وبالأخير مشكوورة لكـ ولكل من ساهم بهذه اللقاء من نشر واعداد