من هنا و هناك ،، - نادي الهلال السعودي - شبكة الزعيم

هلالي معالي · #1 24/07/2011, 12:11 PM

السلام عليكم و رحمة الله و بركاته

بسم الله الرحمن الرحيم

كيفكم يا مجلساويه و كيف الصيفية السامجة ذي معكم

اليوم موضوع ماله نقطه محدده مجرد سواليف سوف اسردها عليكم يا قرآئي الاعزاء

والله مدري ليه تذكرت موضوع الجن ذاك الي جتنا من وراه بلاوي زرقا على ما قالوا

والله دخلت الموضوع اليوم قعدت اقرا الردود و اكتشفت اني انا و الشعب منسمين صدق

ياهي ايام بصراحه لو ترجع كآنت ونآصه اقص عليكم قصص و كذا و تقولون لي قصص مليانه ارانب و افجر لكم كم صاروخ و كذا

لكن الصدق ينقال انا مسؤول فقط عن القصص الي قلتها انا و ما لي شغل بكلام الاعضاء

و على الطاري اذكر اني قلت لكم بدخل عرقه و بصور و من هالكلام ( هياط )

بالفعل دخلت عرقه الين مليت دخلته يمكن 7 مرات و صورت وحده من هالرحلات المليئه بالضحك

مستشفى عرقه سابقاً يمكن مسكون لكن الحين ما فيه شي اذا بتروح بتكتم نفسك من هالغبار و بتخوف نفسك على غير سنع

انا اكثر شي اعجبني في عرقه الكتابات الي جوا

صدق تخليك تحب الشعب السعودي على هالتنسيم اذا مكان مسكون و فيه جن تسوون كذا

علشان كذا ما استغربت حملة ابو فنيلة و سروال الي اقل ما يقال عنها سمآجه و تفاهه

بعضهم يقول ليه يوقفونا الدوريات وش حنا مسوين يكفي انك طالع في مكان عام بملابس داخليه

و بصراحه انا ودي اعرف وش يحسون فيه يعني نكته في البلاك بيري و قالو حملة و صدقو الوراعين و طلعو بفنيلة و سروال انتم بثياب مدري شلون متحملينكم هالمره بملابس داخليه

و على طاري البلاك بيري والله مصخت هالنكت ركبة سودا و فنيلة و سروال و مدري ايش يبون يورون للعالم ان الشعب السعودي فيه علاقة طريفه و فكاهيه بين الشباب و البنات < لا يا شيخ قل والله

لكن تدرون من هو اكبر مستفيد من البلاك بيري ؟

( مرور الرياض )

عارف بتقولون وش يحس به ذا المهبول فصل فتره و رجع شآطح

لكن فيه حقين الهياط و التفحيط و راعين المشاكل و الي يسوون فيها موكب سيارات باور رينجر الي برتقالي مطفي و اخضر مدري ايش و جنوط قوس قزح الي تسد النفس بصراحه ما صارات سياره ناقصه انتل و ريموت

المهم هم يبون يخققون الشعب و يحط البن حق البلاك بيري في الصور و المقاطع و على السياره بعضهم بعض المرور يضيفونهم و هم معروفين يسوون توجيه تركي الاول او ماك الركا و اماكن القرف ذي و يقولك الساعه و مين بيجي يسوي عرض فني مهاري ينافس كين بلوك على عروض افلام الاكشن

طبعاً المرور اذكياء والله يغير النك حقه كل اسبوعين و يتابع اخبارهم اول باول و اذا قالو توجيه تحرك المرور و راحو للمكان يسوون تفتيش و معهم سطحات و خذ لك تكفى و الله يخليك و مدري ايش

بصراحه يلومني في المرور

قبل كم سنه كذا كان فيه شي عند الاطفال و عند كل الناس اسمه " هواية "

الي يقولك سباحه و الي يقولك كوره و الي يقولك رسم الحين رح اسأل اي واحد قله وش هواياتك تقضي وقتك في ايش انت يقولك و بكل اختصار و حماس Call of duty

انا كنت مدمن على هاللعبه لكن خلاص الاشياء الي زي كذا لها وقت و تروح حالياً ما فيه اي احد من عمر 9 سنين الى 35 الا و يلعب هاللعبه انا كنت العب مع ناس اسمع صوت عيالهم جنبهم يقول باب ابي العب يقوله موته موته

والله ما امزح و الا الحين يلعبون صار الوضع كلها الكترونيات على اللابتوب و السوني و بس

تقوله تعال اطلع اليوم نروح نتمشى و كذا او اي شي يقولك جو كئيب و دوريات و هيئه و مدري ايش و كلام فاضي

تطلع انواع التصريفات لكن بالنسبه لي دايماً اذا جيت اطلع من البيت اقول يا ليت اليوم يوقفني مرور ولا شي

صدق وناسه تطقطق عليهم لكن تجيهم باسلوب الي ما عنده اسلوب الله يعينه

اذكر مره في طريق تركي الاول كان فيه تفتيش و جاني حق الدوريه و قال الرخصه و الاستماره عطيته و قالي الحزام وينه يا خالد لفيت و اشرت على الحزام و قلت هذا هو

قال تستهبل انت ؟ قلت لا والله ليه استهبل انت قلتلي وين الحزام قلتلك هذا هو قال طيب ليه ما تربطه ، قلت ما يجي قدي

قال لا يا شيخ ، قلت والله ما ارتاح و انا اسوق اذا ربطت الحزام قام ياخذ و يعطي معي و ضحك و قال رح الله يستر عليك

طبعاً هالسناريو ما طلع كذا انا شفت الرجال وجهه سمح و يسلك قلت نستانس معه شوي

والله بعضهم فله و بعضهم اعوذ بالله لكن شنسوي

طبعاً اكبر شكوى ممكن تصدر من الشباب الي هي كل شي عوائل و حنا وين نروح و مدري ايش و من هالكلام

طيب انت وياه فتحوا لكم سوق لوكولايزر بالتحليه سوق مسموح فيه الشباب و مع ذلك تقعدون برا و تتميلحون و اذا جيت تتكلم معهم في شيء يقولك والله وش اسوي و وين اروح كل الاماكن عوائل و يبدى يسرد لك قصة المعاناة

و الحل معكم طيب فتحوا لكم سوق و ما تدخلونه

و حقين التفحيط يا ليت يفهمون اعلانات اكشنها و الطقه ذي الي في حلبة الريم

فتحو لكم حلبة تروح بسيارتك انت او سياراتهم هم تدخل تسوي الي تبي في المضمار حقهم و فيه عروض من كوميديين مثل فهد البتيري و ابراهيم خيرالله و طقتهم و جايبين لكم طارق العلي و قابرييل اقلاسياس < الاخير ذا فاصل موب صاحي

و مع ذلك ما عبرتوها الا وقت اكشنها بس طيب روحوا هناك و احرقو كفركم الين تقولون بس موب في التحليه و تركي الاول

الموضوع ذا طويل لو اتكلم فيه لكن بسحب عليه و بدخل بالنقطه الاخيره

الكل طبعاً عنده اخويا لكن فيه فرق بين الاخويا و الاصدقا الصديق هو الي دايم معك و يعرفك و يعرف كيف نظامك و كيف يسعدك و يوسع صدرك و من هالكلام اما الخوي باختصار هو صديق مصلحه اما لسياره او لغرض مادي او اي شي

طبعاً هالوقت فيه حركات منتشره بصراحه على الوراعين تشوف لك ورع في ثاني متوسط معه كرايسلر او تشارجر

ليه لانه جاب فوق 95 و ابوه عطاه هدية سيارة

انا ما شريت سيارتي الا علشان اخفف الضغط على السواقين و كذا علشان انا في المدرسه و خواتي في الجامعه و مدري ايش و حوووسه المهم شريت سياره في اولى ثانوي و صرت اروح فيها المشاوير القريبه مثل بقاله او مشغل لاهلي او اجيب عشا لي او للآهل او سوق قريب يعني اشياء خفيفه في الاختبارات النهائيه حقت اول ثانوي صرت اجي المدرسه بسيارتي علشان انا اختبر و ارجع سيده للبيت ما احب افطر مع اخوياي لانهم و بكل اختصار سدة نفس بعد ما شريت السياره عرفت نظامهم ، انا يوم شريت السياره ما علمت فيها احد

بس عزمني خويي لبيته و كان قريب مره من بيتنا و قلت لاهلي اذا تسمحون بروح بسيارتي لحالي قالو رح بعد عناء طويل من المناقشه

و من وقتها عرفت من هو خويي و من هو صديقي بعضهم قالو خلاص شرى سياره اكيد بيطلع معنا فيها و بيوصل فلان بيتهم و بيمر علان من بيتهم علشان نطلع سوا و نستانس

مفهوم غريب و عجيب المهم بعد ما عرفت هالنظام حقهم انا بصراحه قطعت اتصالي فيهم الا بعضهم كنت اعرف حوالي 30 واحد معي بالمدرسه لكن الحين 7 و تخب لان الاغلبيه صارو يكلموني بشكل زي ما تقول مكثف بعد ما شريت السياره

المهم في ثاني ثانوي قبل سنه صرت اطلع و اروح و اجي على كيفي خلاص غديت رجال

< مفهوم آخر حالياً في الشعب السعودي

هم عرفوا نظامي و صدقوني كنت بعض الاحيان ازهق و ابي اقضي وقتي ادق على فلان اقوله بتطلع اليوم قال لا والله اليوم ما اتوقع احد بيطلع قلت اوكيه سلام ركبت سيارتي و باخذ لفه و ارجع البيت قسم بالله شفتهم كلهم تقريباً مجتمعين في اليورومارشيه و تاكين و توني مكلمهم يقولون لا محد بيطلع سويت نفسي ما شفتهم مع اني مريت جنبهم و كلهم شافوني و شفتهم لكن مشيت عادي و دقو علي قالو تعال قلت من انت ؟

الخلاصه الا و هي الزبده اعرف من تمشي معه و مين تصادق لان الصراحه الحين ما تامن احد الدنيا مصالح و عسا الله يوفقنا جميعاً ديناً و دنيا

بس حبيت اتفلسف عليكم شوي بحكم ان النوم طار تخيلو نمت الساعه 5 و قمت الساعه 8 و الين الحين على هالحال ما اعرف ارقد

اللهم بارك لنا في شعبان و بلغنا رمضان

تحياتي للجميع

يالله ما اوصيكم ردووود ابي اصير صاحي و فاصل معكم