إنتبه يا أميرنا المحبوب شبيه الريح , هرماش بيشتكونه على البلديه ! - نادي الهلال السعودي - شبكة الزعيم

مشكلني حبك يانواف · #1 19/07/2011, 10:24 PM

السلام عليكم ,,

حيا الله الزعماء كل ن بإسمه واحداً تلو الآخر يعلم الله إني إحبكم في الله .

* اول ما سمعنا بخبر تعاقد الهلال مع عادل هرماش اللآعب الكبير من ناحيتي فرحت لانه صغير وعربي مغربي ولنا تاريخ ناجح مع إخواننا المغاربه, ورجله قويه , وبنيه الجسمانيه صلبه ,
لكن يجب أن تعلم الإداره وتنبه على ابو هرماش انه ما يسجل في بعض الفرق المعينه , لأن وبكل صراحه كلها صاروخين في إخواننا الفقراوييين من بعيد ثم بيروحون يشكون عليه البلديه يقولون يمزع بيبانا كسر الدرايش ,,
مثل سالفه الهيئه ,,,

* تونا مبتسمين من صفقه ابو هرماش الا شبيه الريح يقول جاكم الإعصار ما شي يعيقه وجاب لنا يوسف العربي يكفي ان اسمه يوسف < لبيه يبو يعقوب , لاعب في الصندوق مايعرف الا طراخ في الشبك بربسه مافيه ملينا من البربسات يا جماعه لنا ثلاث مواسم نبربس في منطقه الصندوق ,

مافيه الا ابو شلهوب اللي يشوت من برا المنطقه يا حبي لرجيلاته ,,

*باقي لنا الفرج وهو رأس حربه ثاني وتشوف العجب العجاب بتشوف الزعيم على اصوله بتشوف هجوم مبطيييييييييييين ما شفناه في الهلال ,,

• على مر أعوام وزمن مضى الهلال كان يلعب برأسين حربه يا محترفين خطيرين يا محترف واحد ومعه محلي اخطر ,,,وأستمتع يا عم باللعب ,

واللي يذكر أيام لقب ( جن الملاعب ) يتذكر هجوم الهلال زين كان لازم الهلال يجي فيه هدف عشان يفوز ,,,
• ماكان فيه الا بطوله وحده اللي حققها الهلال آسيويا من غير اجانب هجوم وهي الأولى أمام الإستقلال إن ماخاب ضني

المدرب وما أدراك ما المدرب يا جماعه الخير أي مدرب ببيجينا لم يسبق له أن درب في منطقه الخليج بشكل عام والسعوديه بشكل خاص راح ينجح مع الهلال ,,,

لان الهلال لديه امكانات لعيبه غير طبيعيه , وإداره عظيمه ,
لكن الموت ان جبت لك واحد سبق ان جاء في الخليج وتعلم الخباثه بكل صراحه وتعرف له على اعضاء شرف شروا اللي هج قبل فتره , فأبشر بالغثاء والعناء والتعب والشك , باكيتا يوم جاء ما احد يعرفه قبله بلاتشي قبله هانجيم , وكوزمين اللي لخبط اوراق الأنديه الثانيه معد لهم حيله قالو هذا ماله حل الا اللي انتم خابرين ,, ونفذوها ,

لكن كالديرون جاء وشفتو وش سوا الفريق كان يلعب على اطلال جيريتس ولا كان علوم ,,

أجل الشلهوب محور دفاعي يا كالديرون حسبي الله على بليسك أنتا منتا صاحي ههههه الله يوفقك في حياتك يا كالديرون هذا حقك علينا نحن كزعماء لن ننسى من سبق ان تعاملنا معهم ,

•
• يا كثر اللي يدافعون عن ياسر ومن حقهم صراحه تعلقو فيه يوم كان في قمه مستواه بس هذي الكوره يا تأدي مهامك صح يا تروح عليك الخانه , , ,

النادي ما يوقف على سين من اللعيبه فلذلك حاولو تأجلو دفاع عنه حتى يرجع لمستواه وانا ودي انه يرجع لمستواه كان لاعب خطير لكن تغير الوضع وطاح في صبغ السكسوكه والدعايات رايقه دعايتهم هههه ,
الله يرجعك مستواك يا ابو عبدالعزيز

• عيسى طلق المحياء والله ان راح بندعي له وياحظ اللي بيروح لهم , وان جلس آزرناه والله ما ودي يروح بس من يحب عيسى صدقوني يتمناله ان ينتقل من الهلال كي لا يموت صبراً في دكه البدلاء ,

• غريبه اشوف باقي الأنديه للحين مسبطه ولا لها تحركات من ناحيه التعاقدات ضنكم بدايه تصريفه جديده بدل الدوري ضعيف ضنكم بيقولون اللعيبه خلصو هههههه

•
بعض الردود تخليك تضحك ليش يتعاقدون مع فلان ماراح اشجع الهلال الموسم الجاي < تكفى سو خير وإعدل عن قرارك يا حضره الريس ,,

شكرا لحسن قرائتكم مجرد وجهات نظر بسيطه حبيت تشاركوني فيه وانتظر ردودكم وتراني كتبتها بالعاميه كي تصل لقلوبكم قبل عيونكم ,,,

شكرا لكم ,,

اخوكم عبدالعزيز