السلام عليكم ورحمة الله وبركاته
هارد لكم الهزيمة
هارد لكم الروح الي مو راضية تجي ولا تطلع
هارد لكم المدرب الجبان
ماتعودت اكتب بعد هزيمة ولا انتقد بعد كارثة لأني اعرف ان الكورة فوز وخسارة حتى لو كانت كارثية
بس من 2002 بعد كل خروج هلالي من اسيا وبعد كل هزيمة كارثية اتذكر اجيال هلالية سابقة وخصوصاً محتريفينا الأجانب

وأسأل نفسي الى متي الغطرسة الجماهيرية الي عندنا ما نرضى الا بلاعب عالمي او اوربي
مع انه اسيا الهلال ماجت فيهم تدرون كيف جت اسيا للهلال والنصر ولاتحاد
بقولكم بكلمتين بس
( عرب وبرازيل )

كيف ؟
أنا اقولكم

نبي من هالنوعية هذي ...
هالنوعية هي الي جابت اسيا بعد توفيق الله ...
هالنوعية يبين فيهم الخير ...
هالنوعية مواطنين نعتبرهم ...
بل اكثر نعتبرهم إخواننا ...
من الهلال ...
العيادي الحمروني
سعيد شيبة
بصير صلاح الدين
احمد بهجا
فوزي الرويسي
طارق التايب
بشار عبدالله
جاسم الهويدي
مع انه بعضهم ماحققوا اسيا مثل التايب
بس كان التايب لحالة كان يلعب
-----------
من الأندية الثانية ...
كماتشو ( الاتحاد )
هشام بوشروان ( الاتحاد )
عماد الحوسني ( الرياض ـ الاهلي)
عبد الحق العريف (الاهلي)
بدر المطوع ( النصر )
موسى صايب ( النصر )
القطري محمد العنزي ( النصر )
خالد بدره ( الاهلي )
زياية ( الاتحاد حالياً )
وايضاً فيه لاعبين ماحققوا اسيا مثل عبد الحق العريف بس شفتوا كيف كان يلعب واليد الوحدة ماتصفق
--------------
جميع الاعبين المذكورة أسمائهم ليسوا محترفين أوربيين وليسوا عالميين
بل لاعبين عرب
الهلال والاتحاد والنصر حققوا بطولات اسيا
اللاعبين العرب مايجونك كل يوم زوجتي مو عاجبها الجو
زوجتي تبي تولد
زوجتي مو عاجبها العادات والتقاليد
اللاعب اوربي ولا يناسبه اجوائنا مرة حر مرة عجاج
لاحظوا جميع اللاعبين المذكورين اعلاه اما خليجي ولا من شمال افريقيا
يعني مافيه مصري
عماد متعب
احمد علي
حسام غالي
كلهم فشلوا مادري ليه عشان كذا ابعد عن الشر وغني له بالرغم من محمد بركات الاهلي نجح بس واحد يعتبر حالة شاذة
------------------
سأتكلم عن محترفين الهلال ونقطة بالصميم ولن أتكلم عن اللاعبين العرب للأندية الاخرى

كانوا لاعبيننا العرب والسعوديين يشاركون بالموسم الواحد البطولات التالية ( داخل و خارج المملكة )
الدوري
كأس الاتحاد السعودي ( كاس الامير فيصل حاليا) كانوا يشاركون بالاساسيين
كأس ولي العهد
كأس الخليج للأندية
دوري ابطال اسيا ابطال الدوري او ابطال الكأس وحدة منهم
كأس السوبر الآسيوي اذا أخذ وحدة من الآسيوية المذكورة اعلاه
بطولة العرب ابطال الدوري او الكأس

احيانا يمر موسم ع الهلال يلعب البطولات المحلية أعلاة ويلعب بطولة خليجية للأندية وبطولة آسيوية وبطولة عربية
محد قال إرهاق محد قال الجدول مزحوم محد قال تداخل بطولات
من غير المنتخب ومشاركاته بالنسبة للسعوديين اسيا وخليج وعرب وتصفيات كاس عالم ولا كان الهلال اذا كان مستواه زفت ياخذون 6 لاعبين واحيانا يوصلون 11 لاعب( بسكم دلع ) ياجيلنا الحالي

للتاريخ فقط ...
بصير صلاح الدين الله يذكرة بالخير لعب بنادي الهلال بأخلاص ( وتقريباً جميع اللاعبين العرب لعبوا بأخلاص )
بس بصير من الهلال إلى الدوري الاسباني مع فالنسيا << فقط للتاريخ


مانبي لاعب عالمي
مانبي لاعب اوربي
مانبي لاعب عندة فكر بس يحب الفلوس
مانبي لاعب له سمعة بس شايب
ولكم بروماريو النصر عبرة ولكم بجيوفاني الهلال عبرة ولكم بببيتو الاتحاد عبرة ولكم بالعالميين بالدوري القطري عبرة
ممكن واحد ينجح اثنين ينجحون بس مو كلهم بتصدف معك وينجح حتى لو كان مسي

بيجي بعضكم بيقول كم اسم اوربي نجح ويقول مو شرط عربي وحنا نبي لاعب عالمي

أنا اقول مايحتاج تعددون ويلهامسون ورادوي يكفون ويكفي نجاحهم
بس مو شرط كل الأوربيين رادوي ولا ويلهامسون

نبي لاعب عربي منا وفينا يفهمنا ونفهمة يتأقلم معنا من اول يوم

اقل شي لاعبين اثنين عربيين
ويكون الإضافة لاعب برازيلي

للتاريخ ...
النصر وهو النصر على دجته جاب اسيا والسوبر الآسيوي بلاعبين عرب لا احد يقول سكويتشوف تابعوا اللاعب القطري محمد العنزي كيف كان يحرث الملعب ولا سكويتشوف لانه عالمي مجدوة وهو ماجاب الا هدف من صناعة العنزي من كرة ميته
على عز النصر ايام ماجد ما جابوها وكانوا يتلزخون بالخمسة


كلمة ...
( شكرًا رادوي انت الاوربي الوحيد الي أحسك رجال ماقد سمعته قال زوجتي ماقد قال حر ماقد قال عجاج بس للأسف الحلو مايكمل كلن يدور عليك زلة من لجان ولاعبين بس اقدر اقول انت الاوربي الوحيد الرجل بمعنى الكلمة )

ويلهامسون
شكرًا ابدعت ولن تساعدنا الأصداف مرة اخرى ويجي اوربي مثلك وينجح بس عيبك انك دايم زوجتك تفرض عليك قرارتها ودايم مشاكل وحنا الي نأكلها


اخبار تقول الهلال بيجيب تيم كاهل ولا دروجبا ولا لاعب كوري <<< غاليين مو مضمون تأقلمهم وبالاخير شيبان

اذا لابد من عالمي أنا افضل مدرب عالمي زي قريتتس
وياليت يرجعون قريتس بأي طريقة حتى لو بقيمته نخلص فلوس المحترفين الأجانب ونقعد على محتريفنا وبدل رادوي الي طفشوه نجيب لاعب مغربي او تونسي او جزائري مميز
شوفوا الاتحاد رجع ديمتري وش سووا
لا احد يقولي كندينيو رجعناه وفشل وبلاتشي رجعناه وفشل
الفرق بينهم وبين ديمتري انه رجع ولقا نفس اللعيبه بالأسماء مع اختلاف بسيط
اما كندنيو وبلاتشي رجعوا بعد مده طويلة جدا وكان الفشل
وقريتس نفس ديمتري من ناحية الاسماء
واذا لم نستطع ارجاعه
مارتن أونيل ممتاز جدا لو تم التعاقد

ولاعبين عرب وبرازيليين مو مهم مشهورين ولا عالميين ويكون واحد منهم مهاجم مثل سيرجيو وزيايية ع الاقل


لا احد يقول متناقض

بس اذا مصممين على لاعب عالمي
اقترح رونالدنينهو فقط
اولا برازيلي
ثانيا عالمي <<< حسب الطلب
ثالثا مع نيفيز وأكيد بيسأله قبل لا يجي عن الأجواء هنا ونيفيز ماراح يقصر
رابعا ماتعدى 30 سنه عمره
خامساًً مستواه بالدوري البرازيلي جيد جداً
سادساً ماراح يرجع لأوروبا
سابعاً غير دولي
ثامناً ماراح يكون غالي مثل الاوروبي
مع انه ما افضل عالمي بس اذا لابد من هالشي اتوقع رونالدينهو افضل من دروجبا وكاهل وراؤول والكوري الي إشاعات الصيف تدور حولهم

شطحة ...
سامي <<<< كأني أشوف فيك جوارديولا

أخيرا

كل ما ذكر أعلاة وجهة نظر ارجو ان نتناقش بإحترام
لا احد يقول رح خلك رئيس ورح ادفلكحلك مدرب ولا يقول نادي أبوك
فقط ..

لان الذكرى ولو حلوة
طواريها تهد الحيل

أنا اتذكر كل هزيمة موجعه كيف كان الهلال سابقاً وقت الظروف الصعبة يظهر
الان العكس تماماً

لكم ودي واحترامي