To the hilal team come here please ابيكم تشوفون وش حال جمهور الهلال الحين بعد المباراه - نادي الهلال السعودي - شبكة الزعيم

انا افداك ياهلال · #1 15/06/2011, 11:35 PM

السلام عليكم ورحمه الله وبركاته

بالبدايه انا مو متعود انزل مواضيع او اكتب بموضوع ..

لكن بعد اللي شفته اليوم يا ناس مالي وجه اطلع , ومالي غيركم افضفض لكم وتمنياتي القويه للاداره انها تشاهد الموضوع واللاعبين ..

ما بحللل او بشخص الوضع او المشكله , انا كجمهور هلالي عاشق للازرق , بتكلم عن حالي وحال الملايين غيري على امل انهم يحسون فينا ..

اطلب من كل شخص داخل البيت الهلالي يغادر اذا مو مقدر الشعار , اذا مو حاس بالجمهور , اذا ما تهمه مصلحه الهلال او فوزه
اذا لما يدخل الملعب بيسحب رجوله وبيستعرض مهاراته , اذا اللاعب ما يستميت عالكوره ..

ترى وربي تعبنا , وانا عني تعبت بقوه , اذا غيري من الجمهور بارد وما يتاثر اقول ما شاء الله عليك بس انا اتاثر
صح ما توصل للدموع , لكن اتعب نفسيا وصحيا وجسديا , وربي بعد كل مباراه يخسر فيه الهلال يوم كامل لا نوم ولا اكل ولا شرب ..
احد يجي يشوف عيوني بعد يومين , اضمن لك جفون سود وعيون حمر من قل النوم ومن ضيقه الصدر ..

عشان مين , عشان اشباه لعيبه داخل الملعب , نحضر بالملعب نصبر عالزحمه ونتحمل كل شي عشان الهلال ولخاطره ..
ومثل ما كتبت بنكي كاتب انا فدى للهلال , بس هل الهلال فدى لي !!
هل الهلال ولعيبته مستعدين يضحون داخل الملعب , ابي لاعب يحس تكفون , ابي لاعب عنده ذمه وضمير ..

عندنا لعيبه وجهاز اداري وفني احسن من غيرنا , ومع ذلك نشوف غيرنا احسن منا بالمباريات القويه ..
النصر اذا لعب معنا بالكديش اللي فيه وباسوا حالاته يحرجنا , الاهلي هالموسم 3 مباريات ما فزنا عليه !!
النصر برضه مع الاتحاد ذهاب واياب وهو ناقص يتعادل , الاتحاد ضعيف الا بالمباريات الحاسمه والقويه ..
نشوفه قدام الاهلي عشان الديربي وش يسوي , نشوفه قدام الهلال وش يسوي ..
كل الافرقه اذا بتلعب مباراه حاسمه بغض النظر عن امكانياتها , تلاقي الروح هي من تغلب ..

الهلال لحاله ما يخسر امام الفرق الضعيفه , لكن قدام القويه ما نشوفه ابدا ..

هل اللاعب الخفي بالهلال انتهى !

هل زمن القاده والكبار زي سامي كيف كان حماسه بالملعب واحساسه بالجمهور ما بنشوف زي كذا مره ثانيه !!

ليه كذا وربي تعبنا بكل موسم لازم نطلع زعلانين , وسبحان الله زعلنا ما يجي الا على اخر الموسم !

ما ابي دوري ما ابي ولي العهد خلاص طفشنا منها , نبي اسيا نبي كاس الملك ..
الى متى وحنا كجمهور راح نعاني مع فريقنا بكل موسم , انا مع الهلال لكل حالااته , بس معليه مو بكل موسم اتعب نفسيا لدرجه صحتي تتدهور !
اذا جماهير انديه ثانيه متعوده لا حنا جماهير الهلال ما تعودنا , تعودنا فريقنا ما يزعلنا الا بالشديد القوي ..
وتعودنا اداره فريقنا تحس فينا وتلبي مطالبنا ..

رئيس الهلال اتمنى لو كان يقرى موضوعي , تتذكر مقابلتك بنهايه اول موسم لك !
انا اتذكر انك وعدتنا بنشوف الهلال باحلى حله , وعدتنا ما نشوف شي يزعلنا بالهلال , وعدتنا بان خسارتنا امام ام صلال بتكون الاخيره , املتنا باسيا وبكل موسم نامل فيها ويخيب املنا ..

مع احترامي لك واحترامي للي قدمته , لكن الهلال ما تغير كثير عن حالاته السابقه , اقل شي اول ما كنا ننهزم بالاتحاد بالشكل هذا ..
اعترف بالانجازات بمساله الاستثمارات والتغييرات باللوائح وغيرها ,
لكن وش الجديد بانجازاتنا داخل الملعب !
دوري وكاس ولي العهد ! ما نبيها اذا على حساب بطولات ما اخذناها , بكل موسم تتكلم بان هدفنا اسيا وتركيزنا منصب على هالبطوله , وبالاخير نخرج بطريقه مخزيه ..

يا ناس الروح الهلاليه داخل الملعب انعدمت وربي ما صرت اشوفها بالذات هالموسم ..
يمكن الموسم الاسثنائي بالنسبه للهلال اللي فات , كان حلو , ومع ذلك خسرنا نهائي قدام الاتحاد ..

هالموسم يا جماعه الهلال غير , وربي ما فيه مباراه كنت مقتنع بالمستوى الا مباريات معدوده , تنعد عالاصابع حتى ..
وكانت قدام فرق اغلبها فرق ضعيفه , وباقي المباريات نفوز بمستوى سئ ..

تغنينا بالخمسه والله يلعن اليوم اللي فزنا فيه 5 عليهم اذا بنتغنى فيها حتى وحنا خسرانيين ..
ياليت نفوز خمس مباريات كل مباراه هدف واحد ولا افوز مباراه وحده ومن بعدها انهزم 3 مرات واتعادل مرتين ..

الله يرحم ايامك يا كوزمين , اقل شي قدرت تفوز على الاتحاد بارضه , وقدرت تفوز عليهم ذهاب واياب بوجود نور ..

نور اللي هالموسم صاير عقدتنا , بعد ما كان ما ينفس قدام الهلال صار هو الفارق مع الاتحاد , واصبح مستحيل اننا نفوز عليهم بوجود نور ..
نور يا جماعه لاعب واحد يشغل فريق باكمله ! ليه ما عندنا زي هالاعب ! لاعب يلعب وهو مريض عشان فريقه ويكون افضل لاعب المباراه وبعدها يدخل العنايه المركزه ..
لاعب الموسم هذا كان سئ , لكن يعرف متى يفرح جمهوره , ويعرف متى يضحي عشانهم ..
لعيبتنا يلعبون وهم مصابين وينكبني بهدف ! وش ابيه فيه هذا لا يلعب احسن لي ..

ما ابي اتغنى فيه هالاعب لكرهي له , لكن حبيت اعطيكم مثال للاعب اللي يخلص للشعار ويضحي ويحرث الملعب حرث عشان يفرح جمهوره ..
الايام القديمه كنت اشوف هالشي , لكن مع لعيبتنا الحاليين اغلبهم جايين عشان الفلوس وقاعدين عشان الفلوس ..
للاسف ما حسيت منهم اي تضحيه طوال الموسم , ما حسيت منهم اي تقدير لمشاعر الجماهير ..

حسووووا فينا تكفوووون , وربي اليوم ناوي اخلص المباراه اطلع افلها يوم ربوع عشان بكره اذاكر لاختباري السبت ..
لكن من وين لك اذاكر , من وين لك اطلع , من وين لك اوسع صدري , وانا اشوف فريقي يخسر بنتيجه مخزيه قدام الاتحاد ..

حتى اختباراتي بسبه الهلال ما صرت احل فيها , ضحينا بوقتنا وبمستقبلنا وبصحتنا قدام هاللعيبه ..
عاد حسوووا فينا وابي اشوف واحد فيكم وده يفرحنا ..

وربي تعبت والله يعيني على نفسي وعلى النوم لاني عارف انه طول الوقت بجلس افكر بالمباراه وما بنام ..

وانا متاكد مو حالي بس , هذا حال ملايين غيري ..

ولحد يقولي اللعيبه قدموا اللي عليهم او لا تذكر السلبيات بس او يجيني واحد بارد يتفسلسف علي يقولي وسع صدرك ..
اوسع صدري اذا فريقي فايز ايه , لكن فريقي مستواه زي الزفت ولعيبه ما قدروا ولا حسوا فيني ما اتحمل انا هالوضع ..
ولحد ياملني بمباراه الاياب , لاني المدرب معطينا لمحه من فكره ووش راح يسوي , لكن ادعي رابي تنتهي بتعادل اقل شي ..
احس بسبه هالهلال بطيح بالابر عشان اهدى بعد كل مباراه يرفعون فيها ضغطي ..

انا ذكرت السلبيات عشان نتفاداها , وعشان ينتبهون لها ادارتنا ولعيبتنا , هذا اذا دخلوا وقروا مواضيعنا وردودنا ..
ولحد ينتقدني على اسلوبي لاني كاتب وانا على اعصابي ما تفلت مني كلمه غلط , فاعذروني لو الاسلوب مو ذاك الزود ..
انا قلت اللي بقلبي , وعشقي للهلال من اول ما عرفت الدنيا وعرفت من انا , وراح يستمر للابد ..

عشان كذا تكفون نبي لعيبه تحس , نبي مدرب شجاع , ما نبي مجامله لاي نجم على حساب غيره , نبي قائد بالملعب ..
مطالبنا واضحه ونادي بامكانيات الهلال يقدر يلبيها , بس هل فيه ناس يهمها تلبي مطالبنا ..

قلتوا اصبروا نهايه الموسم بعدين تكلموا , هذا حنا تكلمنا بعد ما انتهى الموسم بالنسبه لنا ..
المهاجم الاجنبي اختياره كان فاشل , والمدرب اختياره كان افشل ..

احصائيه لمن يهمه امر الهلال : اخر 14 مباراه مع الاتحاد خسرنا 9 , وفزنا 2 ..
معقوله صرنا زي النصر عقدتنا الهلال ! صار عقدتنا الاتحاد !!

بالنهايه اعتذر منكم للجمهور عالاطاله , و الكلام اللي بقلبي كثير , وتعبت ومن لي غيركم كجمهور حاله من حالي اشكي له ..

واسال الله ان يعيني ويعينكم اذا هذا مستوى فريقنا ..

والله يوفق الهلال بالموسم الجاي ويكون قد الطموحات , والاداره اذا ما عندها غير كذا , تعطي الفرصه لغيرها يقدم ويخدم ..
لانك تطلع وانت حاصل على بطولتين بالموسم وخمس بطولات بالمحصله احسن من انك تكمل المده وما تقدم الشي المامول منك او شي جديد ..
وقصدي بالمامول كاس اسيا , وكاس الملك ..

لان بصراحه مو بس اللعيبه تتحمل النتيجه , كل اللي بداخل النادي من , فنيين واداريين يتحملون هالمسخره اللي صار عليها الهلال ..

سبحانك اللهم وبحمدك , استغفرك واتوب اليك ..

تحياتي واحترامي للجميع ,,