05/02/2003, 12:39 PM
|
| زعيــم متواصــل | | تاريخ التسجيل: 14/10/2002 المكان: عمري الرياض
مشاركات: 72
| |
الملكه والفيروسه والملكه الهلاليه والعنود واثير يطعسون بالثمامه
ذاك اليوم وانا قاعده بالبيت وكنت زهقانه ويطري على بالي الدباب واروح اجري اتصالاتي(تكفين يامادلين اولبرايت) مع صديقاتي واول وحده الملكه
أثيرنجد : الو،،اسلام عليكم
الملكه: وعليكم السلام..وش تبين(اسلوب)
انا: هو وش بتس ماعرفتين انا زعفرانه
الملكه: ايييه هلا تران ماعرفتس تعرفين ابو سفرجل ماخذ عقلي
انا: الله يصبرتس
ايه اهلين الملكه اسمعي حبيبتي انا ودي اروح للثمامه اطعس وش رايتس تخاويني
الملكه: والله ياليت ودي من زمان ماطعست من عقب ماعرفت ابو سفرجل وانا حالتي حاله ومنشغله عن نفسي ودي اروّح(بتشديد الواو) عن نفسي واسويلي فترة نقاهه(مهيب سهله ابو فيصل) واطلع حرتي بالتطعيس ااااااه ياوخيتي شفتي وش سوالي ابو سفرجل امس،،انا قاطعتها،،اقول الملكه خلي كلامس وفضفضتس لأبو سفرجل
الملكه : طيب خلاص دقي علي بالجوال(والله تطورت منفوحه )اذا جيتي بتطلعين عشان اتجهز اوتسي
انا: ياشين القراوى اذا تطوروا
الملكه : وش تقولين
انا: لا حبيبتي ولا شي تامرين امر
الملكه: فنكيو ،،،تشاااو
انا: تشااو
يالله خن اشوف جدتي العنود صحيح انه عجوز بس وش بهم العجز مالهم رب لازم يعوضون ايام الشباب اللي راحن عليهم
انا: الو،،،
بزر: خير وش تبين انتي
انا: (وش به الاسلوب هاليومين زاين)
حبيبي عطني جدتك العنود(اجاريه عشان اكلم العنود)
بزر: وش تبين به
انا: اباكله وش ابي به يعني رح ناده لأجي الحين واعطيك ذاك الكف اللي ينسيك جدتك
<====قويه البنت
طـوط طــوط طــوط
هين انا اوريك يالهيص الاربد
واروح اتصل على الملكه الهلاليه يالله وين رقمه مع اني مالي خلقه بس يالله بتصل عليه عشان ماتقول ليش مااتصلتوا علي وتصجنا وتزعل مع انه ماعنده ماعند جدتي بالتطعيس وتخاف تركب الدباب بعد بس الشكوى لله اسد باب بيجيب لي مشاكل واتصل عليه
انا: الو،،،
الملكه الهلاليه: مين وخيتي زعفرانه
انا: اخيرا احد عدل الاسلوب
ايه أثير نجد اجل مين(خربتها مهيب راعية اسلوب سنع )
الملكه الهلاليه : طيب وراتس معصبه وش تبين
انا: ترى اليوم بطلع انا والملكه نطعس ماودتس تطعسين معنا
الملكه الهلاليه : الا والله ودي اطعس بس مهوب رايح الا انتي والملكه
انا: وش بنا يابعدي ما اعجبناتس ان شاء الله
الملكه الهلاليه : ابد مهوب قصدي بس انتم يعني تطعيسكم مهوب اللي هو
انا: وشو وشو وش تقولين ترى انا والملكه احسن مطعسات بالشرق الاوسط وبعدين الله واكبر عليتس انتي اوجبهتس تطنزين بتطعيسنا وانتي ماهنا احد
الملكه الهلاليه : ايه هين الوعد ان شاء الله بالثمامه
انا : خلاص الوعد هناك
اقول قبل مااسكر السماعه بوجهتس عندتس رقم الفيروسه
الملكه الهلاليه : مهوب رقمه بس هي بكبره عندي
انا: الله يعافيه وفرت علي فاتورة التليفون اليوم دقيت كثير <==قعيطيه 
طيب الوعد بالثمامه الى اللقاء
رحنا الثمامه الا نلقى ذاك الزول اللي يدور بالدباب عند العوائل يحرش البزران على اهلهم،،الزوله عليهم افكار ،،المهم مير تنطلق الفيروسه الله لايبلانا تلحق الدباب ذيك اللحقه وتناديه وحنا نناظره
مستغربين وش جاه البنت ذي ومير تقول الملكه لايهمكم انا لها وتلحقه وتمسكه ذيك المسكه وتقرى عليه مير تقعد تناقز الفيروسه الين طلع اللي به،،احمدوا ربكم لايبلاكم ترى التطعيس يسوي اكثر من كذا
المهم مير نستاجر لنا كم دباب وتقعد كل وحده تحمي الوطيس<==وش دخلها ذي
راحت الملكه وترفع مقطعه وتركب الدباب وتنطلق مليون ولا يهمه احد
مسيكينه تطلع حرته من ابو سفرجل بالتطعيس والله مارحمت الا الدباب الله يكون بعونه بس ماشاء الله عليه طعيسه
وتجي بعده الفيروسه بعد ماهدت وطلع اللي به وتمسك له ذاك الدباب اللي وش كبره وعينك ماتشوف الا الغبار ويوم جيت ابركب الا ذاك الصوت اللي كنه صوت انفجار عمارة التجاره العالميه،،يعنني سامعه الصوت ،،ونلتفت انا و الملكه الهلاليه الا نشوف الدبابين واحد راقي على الثاني والملكه ماشاء الله عليه متمسكه بدبابه ماصار له شي ابد(بن لادن ) والفيروسه ياعمري هي طايحه على الارض وانواع الالام والصراخ،،وما امدانا انا والملكه الهلاليه بنروح ننقذهم الا الكاميرات والشرطه والصحفيين والمذيعين والمذيعات وانواع القنوات حتى السودان جايه،، محاصرين الموقع(اما موقع قويه ذي ) ومير يجي واحد اظنه يتكلم انجليزي ويسأل الملكه ويرطن له بالانجليزي وهي تدربي راسه وتقوله فنكيو فنكيو(مسويه لغه وفاهمه)وفاقه خشته وتزين شوشته بعد وتتبززقدام الكاميرا والتفت للملكه الهلاليه وادوره ما ادري الا اللي واقفه قدام وحده من الكاميرات وماسكه له ذاك المذيع وتعطيه من النصب وتقعد تقول له انا اول من شاف الحادث المروع واوجه الاتهام الاول لاثير نجد
اااااااااااه ااااااااااااخ ااااااااااي<==هذا صوت الفيروسه اللي رجعت لوعيه ودريت ان مابه الا حادث مروع وحنا يالاربعه والله ماحد درى عننا
ميرانغث انا ويضيق صدري مرررره بس مهوب عشانهم عشاني خلاص منيب راكبه دباب اكيد بنودي ذي البلشه الفيروسه للمستشفى جعله الكسار ومير تجي الملكه الهلاليه للفيروسه وتقول له كله منتس يالشينه ماخليتيني اوفي بوعدي لاثير واوريه التطعيس على اصوله واقول له احمدي ربتس اصلا الله رحمتس بهاللي صار ولاكان مالس وجه تطلعين معنا مره ثانيه
وااااااااااااع آآآآآآآآي لا عاد الله عليكم ولا على تطعيسكم انتم ووجيهكم <===الفيروسه (تعاني المسكينه)
وبكذا رجعنا مكسورين الخاطر لاطعسنا ولا شي كله من اللي ياخذ ناس مايعرفون يطعسون هين ان اخذتكم مره ثانيه معي
تشا111111111و
|
الوضع العادي
