ارحمنا يا ( معلم ) كالديرون - نادي الهلال السعودي - شبكة الزعيم

أبونسيم الهلالي · #1 20/03/2011, 11:55 PM

بسم الله الرحمن الرحيم
السلام عليكم ورحمة الله وبركاته
اولا : مبرووك لجميع الهلاليين نقطة التعادل مع الاتحاد .
ثانياً : يا اخوان يمكن الكل لاحظ معي العك الكروي اللي قاعد يسويه مدربنا القدير كالديرون من مباراه لأخرى ، يعني بالله فريق مثل الهلال متصدر الدوري ويلعب في ارضه وبين جماهيره ويدور على التعادل من خلال خلطة ( المعلم ) كالديرون العقيمه ، وكأني بهذا الكالديرون يقول للاعبيه العبوا على التعادل واخروا اللعب قد ماتقدروا .
بالله يا اخوان هذا مدرب ؟
في كل مباراه يفاجأنا ( المعلم ) كالديرون بلخبطه جديده في طريقة اللعب ، وفي كل مباراه يضع جمهور الهلال ايديهم على قلوبهم خوفاً من ضياع نتيجة المباراه .
في مباراة الليله مع الاتحاد لعب ( المعلم ) كالديرون بلاعب محور واحد ومن امامه اربع لاعبين وسط ومهاجم واحد ، وكان يوكل لمحمد الشلهوب مساندة خالد عزيز في خط المحور ، بالله عليكم ياناس الشلهوب يلعب محور ؟
الشلهوب ذو الجسم النحيل والبنيه الجسمانيه الضعيفه يلعب محور ويتصدى للاعبي الاتحاد ذوو الاجسام الطويله والبنيه الجسديه القويه ، وكأني بـ ( المعلم ) كالديرون يريد قتل موهبة الشلهوب .
طيب مايخالف لاعب الشوط الاول بالطريقه العقيمه هذي وتبدأ الشوط الثاني بنفس الطريقه ؟
ياخي والله فلسفة مدربين مالها اي داعي ، والله العظيم احنا كجمهور شايفين الغلط من وراء الشاشات وشايفين ان طريقتك يا ( معلم ) كالديرون لاتوحي انك مدرب محترف .
كان من الأحرى من ( المعلم ) كالديرون في الشوط الثاني انه يغير طريقة لعبه العقيمه وهو يلعب في ارضه وبين جماهيره ويقوم بتغيير عبدالعزيز الدوسري ( السيء ) في المباراه واحمد الفريدي ( البارد ) من وجهة نظري ويقوم بالزج باللاعبين أحمد علي ومحمد القرني ، فالأول يستطيع خلخلة دفاع الاتحاد اللي كان مرتاح طوال فترات المباراه ويحرر ياسر من كماشة الدفاع الاتحادي ، والثاني ( القرني ) يستطيع اراحة خالد عزيز وتحرير الشلهوب والتفرغ لصناعة اللعب بدلاً من القيام بادوار دفاعيه بالنسبه للشلهوب .
لا اعلم ماذا كان ينتظر ( المعلم ) كالديرون في المباراه وهو يرى المدرب المنافس يقوم باللعب بثلاث مهاجمين ويريد خطف نتيجة المباراه ، ويقوم بالتغيير الاول في الدقيقه 75 تقريباً والتغيير الثاني يقوم باشراك شافي الدوسري >> وش يبي منه ، ويترك الشلهوب يصارع لاعبي الاتحاد وكأنه مصمم على قتل موهبة الشلهوب .
عموماً اتمنى من الجهاز الاداري تنبيه المدرب والحد من تخبطاته التي ربما تفقد الهلال من المحافظه على لقب الدوري .
آآسف على الاطاله ،، ودمتم بزعامه .

هلالي طرازه نادر · #2 21/03/2011, 12:32 AM

كالديرون يظل مدرب كبير ويظل بشر يخطئ ويصيب وإن شاء الله يكون من حسن إلى أحسن

bret1234 · #3 21/03/2011, 12:33 AM

كالديرون مدرب جدا كبير

وبائذن اللة يحقق اكبر واكثر الأنجازات

مع الهلال

داق لطمة · #4 21/03/2011, 12:34 AM

أكبر خطأ من كالدي انه مانزل احمد علي من بداية المباراة المفروض يخلي ياسر بدكة الاحتياط ويخليه يلعب بنهاية المباراة ماهو من اولها شووفوا اول ما نزل احمد علي بغا يجيب قول وحرك الهجوم لكن هااردلك ماهو مبروك التعادل

No E7tkak H · #5 21/03/2011, 12:34 AM

::
المعلم كالديرون خلاك متصدر الدوري بفارق جيد عن اقرب منافسيك المعلم كالديرون اهلك الى نهائي الكأس
المعلم كالديرون قاعد يلعب مباريات قوية كل بعد اربعه ايام وفوق هذا كلة مو راضين فيه
كيف يريد التعادل وهو قاعد يلعب بمهاجمين كالدي مدرب كبير ومناسب للهلال
الحين كالديرون راح يسوي لك انجاز ويحقق الدوري لك
بدون ولا هزيمة وفوق كذا مو عاجبكم
الله يعيــــــــــــــن

الكاسر ياسر الآسـر · #6 21/03/2011, 12:34 AM

مباراه اليوم كانت تكتيكيه بحته اخوي كاتب الموضوع

فنيــاً كالديرون عرف يتعامل مع المباراه خصوصا في ظل خطوره الفريق الاتحادي

الاتحاد غير النصر اخوي الله يحفظك ...

ما اوافقك فيما قلت عن المدرب ...

وانت حر برأيــك

آحتآجك · #7 21/03/2011, 12:36 AM

الحمدلله على كل حااال.

وان شاء الله القاادم احلى واجممممل .

مستحيل مدرب مايخطي الالكل يخطي ويسسوي ويعمل ...الخ

دعواتكم للازرق.

تحيتي

1ابو ابراهيم · #8 21/03/2011, 12:42 AM

بصراحه بهذا المستوى المتوسط

ما اتوقع نسوي شيئ في اسيا

المدرب قرائته ضعيفه و الله يستر في الجاي

فنووون الزعيم · #9 21/03/2011, 12:42 AM

إقتباس

الرسالة الأصلية كتبت بواسطة الكاسر ياسر الآسـر


	مباراه اليوم كانت تكتيكيه بحته اخوي كاتب الموضوع فنيــاً كالديرون عرف يتعامل مع المباراه خصوصا في ظل خطوره الفريق الاتحادي الاتحاد غير النصر اخوي الله يحفظك ... ما اوافقك فيما قلت عن المدرب ... وانت حر برأيــك

انــــآآآآآ مع راي اخووووي بالضضبط ...

جمجوووم..} · #10 21/03/2011, 12:43 AM

وش رايك تروح تدرب الهلال أحسن ؟؟.

إنت جالس في بيتك تتقهوى وتبي كل شي على كيفك ..

كالديرون مدرب ( رائع) ما خسر مع الهلال ولا مباراة محلياً ..

ترى الرؤية الفنيّة صعب إنك تحلّها أو تحللها ..

ما قصر كالديرون وننتظر منّه المزيد وبـ التوفيق للفريق باقي المباريات .,.

ќ н α ι є ď ~ · #11 21/03/2011, 12:45 AM

من وجهه نظري طبعاً كالديرون بطل حتى في تغيراته ،

صحيح تجيه بعض الأخطاء ولكن لانحمله كلها ولاننسى اللاعبين لهم دور أكبر في أرضيه الملعب ،

والله يكتب اللي فيه خير لش هلالنـآ ،

ابو اسعد الهلالي · #12 21/03/2011, 12:46 AM

كالديرون يظل مدرب كبير ويظل بشر يخطئ ويصيب وإن شاء الله يكون من حسن إلى أحسن

dr.dre · #13 21/03/2011, 12:47 AM

بغض النظر عن تصدر الدوري وعن كل شي الشوط الأول أسوء شوط شفته للهلال من أكثر من سنتين

ما فيه ولا فرصه حقيقيه ولا جمله تكتيكيه كله تخبيص في تخبيص .

فاطس بالهلال · #14 21/03/2011, 12:47 AM

السلام عليكم أنا اسأل ليه ملعب ولي يسار

teva4ever · #15 21/03/2011, 12:48 AM

إقتباس


	ياخي والله فلسفة مدربين مالها اي داعي ، والله العظيم احنا كجمهور شايفين الغلط من وراء الشاشات وشايفين ان طريقتك يا ( معلم ) كالديرون لاتوحي انك مدرب محترف .

معليش يالغالي ياليت تجاوبني بدون اي اهانه لك

من انت علشان تقيم كالديرون ؟

هل انهزمت في الدوري مع كالديرون ؟

هل انت شايف مباراه غير اللي شفناها ؟

ماتدري انه الاتحاد لاعب بـ 3 محاور ... وظهيرين يسار ويمين ؟

السعيد - تكر - المولد - الرهيب
الصقري - كريري - مناف - باولو
نونو
زيايه

تشوف كم مدافع انت ؟

مافيه الا نونو وزيايه والله برشلونا بيتعب مع هالدفاع

لكن شف الهلال يوم مدرب الاتحاد سحب الصقري ومناف وفتح الملعب للهلال

هدفين لاحمد علي كانوا شبه محققين

بلنتي لويلي لم يحتسب

وش تبي اكثر من كذا في ظل غياب افضل لاعبي الهلال ... " رادوي "

وزد على كذا عزوز الدوسري مرتبك

انت من نوع الجمهور مع احترامي لك اللي يهمك شكل الفريق اكثر من الاداء

انا وش يفيدني لو العب حتى بـ 4-3-3 ... ومافيه اداء

اشوف من موضوعك انه اللي قهرك انه الشلوب محور

ياخي من عندك لاعب مثل رادوي دفاعيا وهجوميا ... لاتطفي النور وتقول لي القرني

تحياتي