العنوان واضح


اجريت اتصال بمركز خدمة عملاء art وطلبت منهم يرسلون المندوب حق الاشتراكات وقلت لهم ابي قناة الزعيم


قالوا ابشر انت من جمهور الزعيم يجيك المندوب الى حد البيت


ماقصروا بيض الله وجههم ارسلوا المندوب الى البيت


طبعا المندوب جاي على سياره والسياره تستهلك بنزين وجايب معه قلم والقلم يستهلك حبر

يعني كل الاشياء هذي محسوبه عليك مو جاي سواد في عيونك لانه عارف انك انت بتشترك بتشترك


علشان القناه للهلال


قلطته واجيب له القهوه قلت يامرحبا والله باللي بيشغل لي قناة الزعيم


احسب ان بالحمض احد

قال مافي معلوم اس كلام

قلت اها هذا اولها

دريت ان ما بالحمض احد

طبعا تغير الاكسنت عندي علشان يستوعبني واستوعبه

طيب ياصديق انا يبغى قناة الزعيم

قال مافي مسكل (بالاكسنت الخاص فيه)

انت علسان شيل قناه زعيم لازم اشتراك في باقه اساسيه وسوي اضافه باقه زعيم ب480 واحد سنه.

قلت طيب بكم الباقه الاساسيه قال 1200 ريال يعني كلوووو مجموع 1680 ريال
قلت طيب انا يبغى زعيم بس والناس تقول ب480 ريال بس ما يبغى باقه اساسيه انا مافيه فايده باقه اساسيه انا كلوووو فايده بس زعيم


قال ناس قرقر واجد بس مافيه معلوم (نزام)

قلت اها نزام طيب يعني مافيه طريقه منا منا

قال شوف صديق يبغى زعيم لازم ادفع 1200 وبعدين ادفع 480 يعني كلووو 1680 شيل زعيم مافي يدفع هذا فلوس انتا مافي شيل زعيم



ياولد


تراني مقهويك


وانت في بيتي لا تخليني اتوطى في بطنك لا تستهطفني علشان حبي للهلال


هذي من عندي عاد

(قال وانا وش جابني على خشتي غير حبك للهلال)


غير الكلام هذا


قال مافيه

قلت لحووووول


بما انك طقيت مشوار وسويت قرقر معي واجد وتراني ادري انك انت واللي مرسلينك مستهطفيني بس ماعليه بمشيها المره هذي المره بمزاجي.


هاتها بس تراها اول مره واخر مره الكلام لك يا ابو هنود واسمعي ياجاره


الجاره اللي ابي يوصل لها الكلام(ادارة الهلال اللي نحبها)


يعني يا أداره الهلال العقد القادم تكفوووووووووووون لاتخلون العالم تستغفلنا بالشكل هذا


احسبوا حساب النقطه هذي يرحم والديكم

انا اقدر ادفع وغيري يقدر بس فيه ناس ماتقدر


يعني والله ظلم يستغلون جمهور الهلال ويمسكونه من اليد اللي توجعه يعني لو انها 480 غاليه بعد بس اهون من 1680


وسلامتكم