هلو هلو .. تسمحو لي ادخل في نقاشكم المحتدم ..

طبعا احب اولا اعلن ميولي لنظرة بسيط حتى وان كنت اوافق بنسبه معينه نظرة ناصر وهواوي الزعيم وباقي الشباب ..

قبل لا ندخل في السليم اولا بتكلم من ناحية سوق مدربين او بشكل عام المدربين والمفاضله مابينهم .. الكل هنا ومن العام الماضي انتقدوا رانييري على اشياء عديده .. لكن ممكن العام الماضي كانت الأمور ينظر لها على ان الفريق جاي من درجه ثانيه وبالتالي معذور .. لكن هالموسم لأ والف لأ .. لأننا اليوفي باختصار ..

ممكن رانييري له عيوبه .. لكن اتمنى ننظر لباقي المدربين من جميع النواحي ..

مثلا اذا بينيتيز عجبكم من ناحية انه ابدع في مباراة السيتيزن ومن قبل ايضا فيه مباريات عديده ابدع فيها ومدرب له شهرته .. ايضا فيه له زاويه اخرى .. انه خلال 4 مواسم يعتبر ضعيف محليا .. والضعف ماكان فقط في فوارق مواجهاته مع الأنديه الكبيره .. بل حتى مع الصغيره ..

بينيتيز خلال مواسمه مع الليفر كانت عيوبه .. بداية الموسم .. دائما يبدأ الموسم بأخطاء .. وبفلسفه زائده .. وبتشكيله غير ثابته .. ولما تعدي مرحلة الذهاب تحصل الفريق يرجع الى رشده ..

طبعا انا موقاعد افضل رافا على رانييري .. او ادافع عن رانييري من جهه اخرى .. لكن اتمنى ماتكون نظرتنا دائما نحو التوجه الاعلامي .. لأن زي مافيه لاعبين انظلمو بسبب الاعلام .. ايضا هناك مدربين ماتوفقوا اعلاميا .. او ماحصلوا لهم ادوات وانديه تساعدهم على البروز ..

مثال بسيط .. مالفرق بين ديشان ومورينيو .. الاثنين وصلوا الى نهائي التشامبيونز .. في موسم ابدعوا فيه .. ديشان صارت له ظروف في النهائي .. فاز مورينيو .. مورينيو صارت يترزز عند كل صحفي ويسخر على الرايح والجاي .. الكل رفع من اسم مورينيو .. وديشان ظل محله .. فقط لأنه الاعلام ماركز عليه ولا اعطاه اي اهتمام .. واعتقد انتو عندكم درايه اكبر بقدرات ديشان لما هبط الفريق ..

رانييري اشوف مشكلته الاكبر بانه اذا حصل سكواد جيد يحتار في المفاضله مابينهم ومايعرف يقرر ايش اللي يبغاه منهم ..

مثلا في الموسم الماضي .. استخدم اكثر شئ 4 4 2 والـ 4 3 3 .. وكان نشيط جدا من الناحيه الهجوميه على الرغم من انه يعاني من ضعف وغيابات عديده في خط الدفاع .. لكن كانت عنده جرأه في توجيهاته للفريق .. والاهم الفريق كان يمتلك روح غير عاديه ..

هالموسم .. نشوف انه اختياراته غريبه ومفاجئه .. واخص بالذكر هنا مباراة باتي واللي عمله في خط المحور ..

هل السبب سوق الانتقالات ؟ جائز ..

اذكر لما كان في فالنسيا .. طلب لاعبين جيدين جدا .. واخص هنا ستيفانو فيوري .. ولكن لأسباب غير منطقيه ماستقر الفريق.. وماستفاد من قدرات لاعبيه .. وتدهورت مستويات اللاعبين ومستوى النادي ..

ممكن في فالنسيا مانجح .. بسبب عدم معرفته بمتطلبات الليقا مثلا وماعرف يخار لاعبين يساعدوه ..

لكن هو عنده خبره بالكره الايطاليه .. والموسم الماضي قدم مستوى جيد رغما عن انه كان يعاني من اصابات عديده كما اسلفت ..

هنا اعتقد في مسؤوليه على اللاعبين .. يعني لما تقولو لي ديل بييرو طلع من المباراه الاخيره وهو يضحك .. ولاكان فيه شئ مؤثر .. بسبب فقدان ثقتهم في رانييري ..

باقول لكم هالشئ قمه في الخطأ .. اولا ديل بييرو معرفو لاعب خلوق وملتزم . لكن عنيد في اشياء عديده .. ومن سنوات عديده وكل مدرب يجي اليوفي يحطه في الاحتياط ويستعمل اياه اسلوب زي ماتقولو يخلي اللاعب يجوع للعب وينرفزه بشكل يخليه ينزل يفجر طاقاته في الملعب ..

لكن رانييري الاحظه هو اكثر مدرب أأمن بقدرات ديل بييرو واعطاه امان بشكل اكبر من ناحية اللعب بشكل اساسي .. بالتالي من الخطأ انه يتم جحد المدرب مثلا ويفقدو الثقه فيه ..

ممكن المدرب عنده اخطاء فنيه وايضا في بعض طرقه في التعامل مع اللاعبين في حجرات الملابس .. لكن وبالذات لاعبين اليوفي الحاليين اعتقد من المفترض يكونو اكثر نضوج ووفاء لأي شخص يدربهم فقط لسبب واحد .. اليوفي فوق كل شئ واللاعبين الا نزلوا للدرجه الثانيه اكثر درايه بالشئ الا اقصده ..

الانتقالات .. اولا موجي خلوه على جنب .. لأنه من زمان ينتقد الفريق من هالناحيه .. والكل يعرف لعانة موجي في هالشغلات ..

لكن خلنا ناخذها حبه حبه .. اكيدال لاعب صغير جاي من السويد .. بولسين لاعب خبره جاي من الليقا .. ميلبرق لاعب خبره جاي من البريمير ..

فيه فوارق فنيه بين كل دوري .. حتى لو اللاعب ابداع مستواه .. لكن يحتاج فترة تأقلم .. منها للغه .. ومنها حتى في طبيعة الدوري وصعوبته ..

مثلا .. اوفالوسي كان من بين خلنا نقول افضل 10 قلوب دفاع مثلا في الكالتشيو .. او من بين الأظهره الجيده جدا .. لكن الى الآن ماتأقلم على طريقة لعب الليقا والنتيجه مستواه اضعف من المؤمل عليه ..

جيوفنكو ودي تشيلي وماركيزيو وكنيزفيتش واماوري .. حالاتهم مختلفه .. فيه اللي عنده امكانيات وطموح وتنقصه التجربه والثقه مثل اولاد مدرستكم .. وفيه مثل اماوري اللي يحتاج يتعود برضو على جو اللعب في اليوفي .. مسألة انك تلبس شعار اليوفي ترى موسهله .. وبرضو طريقة اللعب مختلفه عن باليرمو ..

اماوري عندكم مثله وماتحتاجوه على كلام موجي مثلا .. طيب تريزيقيه اصيب .. وماتدرو وش تخبئ الظروف مستقبلا .. اماوري تدعيم قوي للنادي لكن شريطة انه رانييري يعرف يستفيد منه او لا ..

هل رانييري اطلق مدرب .. لأ .. لكن هالمدرب يعيش ضغط من زمان بسبب المقارنات بينه وبين غيره من المدربين .. حتى ليبي لما رجع لتدريب ايطاليا اذكر قريت خبر اوتصريح مادري .. مفاده انه رانييري بيرتاح اكثر الحين ..

حتى مشاكله مع تياقو مثلا لها تأثير .. واصلا من تسلم رانييري مهام التدريب نشوف في صفقات تجي للنادي ومايتم الاستفاده منها .. وعلى سبيل المثال الميرون ..

قبل فتره قريت لك ياناصر جمله انه مالديني قال .. اليوفي هو الوحيد الا يمشي صفقاته على هوا المدرب .. بس اللي اشوفه في هالموسمين يجو لاعبين المدرب مايقتنع بهم ابد .. هل البلا من اختيارات المدرب الحالي ؟ او الاداره الحاليه ماتجيب خبر لراي المدرب الحالي ؟

رانييري .. يحتاج ثقه وايمان بقدراته من اللاعبين والاداره .. برضو لازم يستقر على تشكيله وفكر اوضح .. ويبدأ يقيم قدرات لاعبينه بشكل اعمق ..

كقدرات كامنه ممكن عندكم فريق بطل .. بس يحتاج شخص يعرف يطلع قدرات اللاعبين .. لكن برضو ارتفاع معدل الاعمار عند بعض اللاعبين .. ومقارنة مثلا بالانتر .. اعتقد اليوفي نوعا ما اضعف في الزاد البشري .. هاالشئ يأثر في الفريق وفي مسيرته طول الموسم .. بالتالي اعتقد لازم تكون جماهير اليوفي اكثر صبر ومنطقيه حول ظروف النادي الا بدات من موسمين وانه صعب الرجوع بسرعه كبيره الى حالة النادي السابقه ..

كثرت كلام صح وش اسوي اسهي عن نفسي ههههههه .. باي باي ادري الباب يوسع جمل