|
عيد !!
السلام عليكم ، و كل عام و أنتم بخير .
أبو صالح : مع السلامة ، تبون شيء ؟!
أم صالح : سلامتك ، الله يعينك .
طلع ابو صالح من البيت و راح لمحله ، أبو صالح عنده محل خضار ، و عنده 3 بنات و ولدين .
أبو صالح : السلام عليكم ، صبحك الله بالخير أبو راشد .
أبو راشد : و عليكم السلام و الرحمة ، يالله إن تصبحه بالعافية .
فتح أبو صالح المحل و سحب الكرسي و جلس ..
لكن أبو صالح ما هو على عادته !!
أبو صالح سرحان و يفكر و يوقفون الزبائن عنده و يقلبون الخضار و يمشون ما حاكاهم !!
أبو راشد صار يتابع أبو صالح و شافه في عالم ثاني و ما بين وقت و وقت يتنهد !
سحب أبو راشد الكرسي و جلس جنب أبو صالح
أبو راشد : أبو صالح !
ما رد أبو صالح !!
أبو راشد : أبو صالح !!
أبو صالح : هاه ! سم ! تناديني ؟!
أبو راشد : أناديك ؟! الناس كلها سمعتني !
أبو صالح : ما عليه أبو راشد ، خلها على ربك
أبو راشد : سلامات أبو صالح ! عسى ما شر .
أبو صالح : سلامتك أبو راشد ، أنت أخو ما عنك غطاء ، والله إني ما أدري وش أسوي بالعيال ؟!
يبون فلوس للعيد و انت شايف السوق كيف .
أبو راشد : هونها يارجال و تهون ، أنا عندي قرشين مستغني عنهم خذهم و متى ما توفرت رجعهم ، والله يحللك و يبيحك .
أبو صالح : ما تقصر يا أبو صالح ، لكن أخاف أثقل عليك .
أبو راشد : أبو صالح أنت خابر أنا الله ما رزقني عيال و ما عندي مصاريف .
أبو صالح : الله يرزقك يا ابو راشد قل آمين
أبو راشد : آمين الله يجزاك خير ، و تراها ما هي من الزكاة
أبو صالح : الله يطمن بالك ، بس كانها قريبة أبو راشد ودي بها الحين
أبو راشد : سم يا ابو صالح .
ما صدق أبو صالح و قفل دكانه و رجع بدري يعطي عياله هالقرشين ، و في رجعته للبيت و يقطع شارع بيته صدمته سيارة شاب مراهق و طاح أبو صالح .
نزل الشاب خايف و قوم أبو صالح و قال له عسى ما جاك شيء .
أبو صالح : يا ولدي جت سليمة هالمرة لكن أرواح الناس ما هي لعبة ارفق و انا أبوك .
الشاب : كم تبي يا عم ؟!
أبو صالح و هو على الأرض يناظر فوق وجه الشاب المستهتر ، طلع الشاب ربطة فلوس فئة 500 و سحب منها من دون عد و رماها في حضن ابو صالح و تركه على الارض و ركب سيارته و مشى .
من منا قال لنفسه باكون أفضل من العيد الماضي و بافرح معي عائلة فقيرة ؟!
من منا قال لنفسه باكون أفضل من العيد الماضي و بازور هالسنة دار الأيتام بشوية هدايا أو دار المسنين ؟!
يقول من جرب هذا أن للعيد طعم آخر وقتها .
شكراً لكل من أرسل يهنئ و لكل من تساءل عن الغياب .
من القلب أشكركم و أخص من هم مداومون على الإرسال منذ سنوات دون انقطاع ، فلهم شكري و تقديري و دعواتي بأعياد قادمة مع أحبتهم كلها فرح و سعادة و سرور .
 | 