نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

حتى ظلالي هلالي · #7 25/09/2008, 12:06 AM

أنا منذ مبطي ماسكهـ نفسي ما ابي ارد

لاني اذا رديت بجيب العيد

وبولع حريقة بالي نظرهـ للحين على النظرهـ القديمهـ

وقولهـ انهم مايدبرون فيها شيء

الحين غالبيهـ نظرة الناس وش هي ..!!
ان البنت مايصلح تناظر كورهـ لانها ماتناسب طبيعة البنت ..
يعني ان البنت ناعمهـ ومدري ايش
والكورة فيها خشونهـ

طيب الحين انا قلت لكم اني بلعب ..!!

انا اناظر المباراة بالتلفزيون (فقط)
يعني كل الوضع الي اصير فيهـ
اجلس على الكنبهـ واذا تسحمت قمت واقفهـ

واذا جاء هدف تصفيق وصراخ

واذا فزنا نفس الوضع ..
واذا خسرنا ادخل الغرفهـ ولا اكلم احد لمده لاتقل عن يوم أو اثنين

واذا قدام النصر تآصل اسبوع

لان عندي الوالد نصراوي ويجلس في حلقي اذا فازوا

وتآصل اني اغيب عن المدرسهـ عشان مايتشمتون فيني

^^^
هذا الوضع كلهـ وش فيهـ خشونهـ ..!!
وش فيهـ شيء يخالف طبيعهـ البنت ..!!
ليهـ يقال مسترجلهـ ..!! وهذا الي تسويهـ ..!!

المجتمع والناس
هذي نظرتهم
للحين يعيشون التخلف

بيجيني احد وبيقول الحين صاروا الي مايبون البنت تشوف الكورهـ متخلفين ..!!
أنا اقول لهـ مو مسألة تخلف
بس تخلف بالنظرهـ القاصرهـ هذي

الي مستحيل تتغير في الناس

مع ان الوضع مثل ماشرحتهـ ماينقص من طبيعة البنت ابدا ابدا

طيب الحين ليه يقولون كذا عن البنت وماتبعة الكورهـ

مو كافي ان العيال مافيهـ شيء ممنوع عنهم .. كل شيء يشوفونهـ عادي ماتشكل على الناس هذي ..
بس اذا دخلت البنت بالسالفهـ ينقلب الموضوع وكان الي تشوفهـ شيء عيب أو حرام ..

مع انهـ لا هو عيب ولا حتى حرام ..

اذا في نظر الناس انهـ عيب ..
فأنا عندي قاعدهـ بحياتي اذا الشيء ماحرمهـ الله ورسولهـ وعاجبني .. اسويهـ ..
وآخر ما افكر فيهـ الناس .. لان كل واحد وعندهـ قناعات وأفكار وعادات وتقاليد
أنا مو مجبورهـ امشي على هواهم

أنا كمان عندي قناعات وما أرضى احد يتدخل فيها ويحاول يمشيني على كيفهـ

الله عطاني عقل افكر فيهـ
ودلني على الحرام والحلال ..
وهذا الي اطبقهـ بس ..
أما مسألة .. عيب .. الناس وش بتقول .. هذي مو عاداتنا .. هذا مو طبعنا ..
ممسوح من القائمه عندي ..

الناس وكلامهم مايعطونكـ لا خيرهم ولا يكفون عنكـ شرهم ..

أما مسألة متابعهـ الدوريات الأوربيهـ
فأعتقد ان الي تتابع الدوريات الاوربيهـ هي الي تفهم بالكورهـ اكثر

لانها تدور على المتعهـ والفن باللعب

وسالفة منتخب ايطاليا

ليهـ هم بس اشكال..؟!
تنكر ان منتخب ايطاليا منتخب ذوق وفن ولعب ..؟!
تنطرب معاهم اذا لعبوا

واتوقع كاس العالم الاخيرهـ مو الاشكال بس الي جابتهـا

لو الاشكال هي الي تجيب الكؤوس والبطولات
كان تحصل كل فريق أو منتخب بيآخذ ملكـ جمال الدولهـ ويحطهـ لاعب

أنا بقول لكـ اني اشجع ايطاليا

وروما

ومع الاسطورهـ توتي

لكن تتوقع عشان شكلهـ ..!!
لو عشان شكلهـ كان من يوم اعتزل دولي تركت تشجيع ايطاليا

وتابعة روما بس

ومسألة اللاعبين منتهين منها
دايم هذا النقاش عنهـ .. تعبنا بس ما احد يقتنع

طيب لو اقول لكـ أن أنا
الدعيع

وخالد عزيز

طارق التائب

تفاريس

سامي

الشلهوب

......الخ
يعني تتوقع اني اتابع الهلال عشانهم

لو عشانهم كان يوم راح تفاريس ماطقيت خبر للهلال
ويوم اعتزل سامي نفس الوضع

الناس بتوقع اني معجبهـ بأشكال
لكن هالاشخاص مو اشكال

هذولاء لعب

وقولة ليهـ مافيه صورة لرضا تكر

يعني بديهياً وبدون تفكير
أنا هلالية أحط صورة ابو تكر ليهـ

وش يعنيني بالموضوع ..!!

إقتباس


	لو شخص يتابع كرة قدم نسائية ... وتجي وحدة مزيونه تشوت بلنتي وتضيعه انا شخصيا ... بقول يفداك القول والعارضه ... ليتني حارس واخليكي تسجلينها

طيب هنا ليهـ ماتناظرون لأنفسكم قبل تتكلمون

المشكله تقولها صريحهـ
وحنا تتهموننا اننا نقول كذا ونسوي كذا
وهذا كلهـ ماصار اصلا

مجرد انكم مع نظرة المجتمع قال البنت عيب تناظر
خلاص عيب

طيب يعني حلال عليكـ تقول كذا وتسوي كذا اذا المباراة فيها بنت
وحنا حرام علينا .. !!
مع اننا ماقلناها
بس مجرد ضرب مثل

بعلق على رد هو الي اجبرني اني ارد على الموضوع

إقتباس


	أما .. الكورة .. أحسهم ما يفرقون بين الحارس و لحاق الكور

لا انا اقول مايفرقون بين اللاعب والجمهور
وش رايك فيها ذي ..!!

أعتقد مو لهالدرجهـ ..
أنا اعرف بنات كذا مثل ماقلت مايفرقون

بس تدري مين ..!!
هذولاء بنات بحياتهم ماقد شافوا مباراة إلا بالصدفهـ
يعني مثلا جالسهـ وابوها يشوف مباراة ومضطرهـ تجلس معاهـ
فتشوف وهي ماتدري وش السالفهـ

أما تجي تقول لي ان بنت متابعهـ وتعرف الاخبار أول بأول ماتفرق
فأعتقد مو لهالدرجهـ الاستخفاف

إقتباس


	بأقوله حتى في كندا البنات ما يفهمون في الكورة و الشباب يعلقون عليهم في هذه الأشياء

طيب واذا في كندا كذا البنات ..!!
يعني عشان أجانب لازم نكون زيهم ..!!

طيب ممكن البنات الي انت شفتهم مايفهمون بالكورهـ
بس فيهـ بنات ماشفتهم يفهمون فيها ..
يعني نفس الوضع عندنا فيهـ وفيهـ ..

أتحداكـ تحصل دولهـ بالعالم يكونون مهوسين بالكورهـ وكل بنات هالدولهـ مالهم فيها ..

إقتباس


	أحس اللي تتابع كورة مسترجلة شويتين

اصابع يدكـ ماهي سوى

وأنا شرحت لكـ كيف وضع المتابعهـ
ما اعتقد فيهـ استرجال ابد

إلا اذا التصفيق والصراخ صار للعيال فهذا شيء ثاني

..
..

اتوقع اني شطحت وااااااااااجد

وكأني كاتبهـ موضوع جديد مو رد

بس العذر والسموحهـ ورده
أنا قايلهـ من الاول ماني رادهـ لاني اذا تكلمت مابسكت
بس مجبر اخاك لابطل