نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - مبروك للمجلس 3-1 ( تصاميم

R D H · #2 22/08/2008, 10:32 AM

السلام عليكم

أسمع البعض يطرح فكرة أننا نلعب مباراة ثالثه معهم ..!

أحب أٌقوله .. من جدك أنت ؟

لو لعبنا ضد المجلس 100 مره ..

رح يهزمونا مئة مره ..

لأن فريقنا طريقة لعبه جدا عقيمه ..

بالشوط الأول .. كان الفريق مشتت جداً وبطيء ..

وصار اللي كنت متخوف منه وهو .. ترك المساحات الواسعه امام الدفاع ..

فأصبح هنـاك فراغ كبير للخصم أمام منطقة الـ 18 .. وقدروا يسووا اللي يبون ..

بالشوط الأول الهجـوم ماكان مرتب .. وماكنا نعتمد على طريقه معينه باللعب ..

بعكس فريق المجلس .. كانوا يعتمدون على اللعب الجماعي وتوزيع اللعب على الأطراف ..

وطبعا ساعدهم في ذلك تباعد المسافات بين لاعبي خط المسافات .. وكذلك الفجوه الكبيره بين خط الدفاع .. ومايسمى بـ ( خط الوسط )

والوسط كان مشتت .. لا هو اللي يهاجم .. ولا هو اللي يدافع ..

وعبدالرحمن صراحة ماقصر .. كان يحاول بالهجوم لحاله ..

لكن مافي احد معه ..

كان يمسك الكوره ويحاول ينقزها من فوق المدافعين . لكن ..

ياأما المدافعين يقطعوها منه بأيديهم .. او يحشرونه 3 مدافعين وياخذونه منهم ..

مافي أي مسانده للهجوم ..

المسانده من الوسط تتوقف فجأه ..

ماعندنا أسلوب لعب مثلهم ..

ماكنا نفتح اللعب لبعض ..

كنا ساكتين .. سآيلنت .. وكان التفاهم منعدم تماماً لأننا يمكن اول مره نلعب مع بعض .. بعكس لعيبة المجلس العام .. اللي عرفت أغلب أسماءهم من مناداة لعيبتهم لبعض ..

دليل أنهم دايماً يلعبون مع بعض ومندمجين ..

طبعا بالنسبه للهدفين اللي جو بالشوط الأول .. أنا أتحمل جزء من المسؤوليه .. كان بإمكاني أمسكها ..

لكن قسسسم بالله ياعبدالرحمن .. ويشهد الله على كلامي ..

أن ببداية المباراه صديت أحد الكرات بطريقة خاطئه ( الكوره ضقعت أحد أصابعي بشكل عامودي )

وربي إنها إلى الأأن منتفخه ومورمه وصار لونها أزرق .

وعلشان كذا ماتمكنت من أني أمسك أي كورهـ ..

لو تلاحظ كل الكرات كنت فقط أكتفي بإبعادها عن المرمى دون أن أمسكها ..

حتى الكرات الخفيفه ماكنت امسكها على مرحله وحده .. لازم مرحلتين ..

وربي هذا اللي غـابني ومضيق صدري ..

أن اهدافهم كلها تعتبر سهله وكان بإمكاني أصدها لولاً الألم الفظيع اللي بأصبع اللي مامكني أمسك أي كوره طوال المباراه بشكل جيد ..

..

بين الشوطين ..

قعدنا نتكلم واتفقنا أنه لازم نكثف خط الوسط علشان نمسك اللعب ..

واتفقنا على اللعب بخطة .. 4 - 3 - 1

وطبعا بمهاجم واحد اللي هو الدحمي ( الهلالي 11 )

ووصيت المحاور الدفاعيه أنهم يقفلون المساحات اللي امام مدافعينا علشان مانسمح لهم بأن ياخذوا راحتهم ..

بدأ الشوط الثاني ..

وبدأت معنوياتنا تنزل بشكل واضح لما شفنا المهزله اللي بوسط الملعب ..

الوضع أزداد سوء عن الشوط الأول ..

على الاقل بالشوط الاول كان الفريق بدون وسط .. لكن كان فيه هجوم يساند عبدالرحمن ..

لكن بالشوط الثاني .. لا فيه وسط يقفل المساحات .. ويهاجم .. ولا فيه وسط يساند بالهجوم

عبدالرحمن كان بلحاله قدام .. محاصر مابين 4 مدافعين مقفلين عليه ..

والله أنه ماقصر أبدا عبدالرحمن .. وكلكم شفتوا أمس أنه ماكان فيه مسانده له ..

يادوب كانت توصله الكرات العاليه من الخلف .. يستلمها ويحضن ويلف يبي يهاجم .. يلاقي 4 مهاجمين مطبقين عليه .. ومافي احد يسانده أو يفتح له على الأطراف ..

هذا غير أن وضع الدفاع أزداد سوءاً

أنعدمت اللياقه تقريبا ..

وازدادت المسخره ..

والمهزله ..

لعيبة المجلس العام .. كلهم رشاقه ولياقه وأناقه ومهارهـ ..

مااتوقعتهم كذا ..

ومن المستحيل على فريق مثلنا أنه يقدر على هزيمتهم أو الوقوف في وجههم ..

بصراحة .. أفحمونها بأداءهم ..

أكثر 4 عجبوني هم : الدحمي ( كان يبذل قصارى جهده بالهجوم .. لكن مافيه مسانده .. وفيه تقفيل دفاعي أليم من الخصم )

أيوب ( ماشاء الله عليه رجل ممتازهـ .. وهدف صراحة قنبله ..)

ديل بييرو ( بصراحة ماقصرت وسويت اللي عليك وزياده )

زيزووو ( بصراحة أكثر واحد حسيت أن لعبه قتالي .. يقاتل على الكوره ويحمس الفريق .. ويحاول يغطي المساحات بالوسط .. لكن لحاله طبعا مايقدر يسوي شي )

طبعا مايهونون الباقيين

احنا على المستوى الفردي كنا كويسين

لكن على المستوى الجماعي .. كنا صفر ع الشمال ..

المستوى الفردي للاعب ممكن يخدمك لما تكون قدام الخصم مان تو مان ..

ولعيبتنا تميزوا نوعا ما بهالنقطه ..

لكن عمره المستوى الفردي بينفعك علشان تفوز ..

ومارح نقدر بمستوى الفرد لأي لاعب .. أنه يوقف لعيبة الخصم وهم يلعبون بطريقة جماعيه ..

مناوله .. مناولتين ... تسحيبه تسحيبتين .. تلقاهم وصلوا للمرمى ..

والسبب في ذلك .. انهم وجدوا مساحات كبيره يرتعوا فيها ..

عالعموم ..

خيرها بغيرها

وبصراحه ماكنت أتوقع ان المجلس يكون بهالمستوى بقيادة العملاق ماجد مقبل

لكن إن شاء الله .. لنا لقاءات ثانيه ... مو شرط كرة قدم ..

ممكن بلاي ستيشن .. يمكن نفلح ضدكم

صحيح خسرنا المباراه .. بس عوضنا الهزيمه بكسب شوفتكم والله ..

طبعا شعور مختلف لما تكون رايح تقابل ناس عمرك ماشفتهم .. مجرد بس تكلمهم بالمنتدى ..

تلقى الواحد يتخيل وهو بالطريق .. ياترى شلون خشة الهلالي 11

بصراحه أتفاجأت في البعض ..

تفاجأت بالهلالي 11 .. يوم جا يسلم عليا ويقولي انا الهلالي 11 .. حسيت انه رسمي ووسيم

ولا ماجد مقبل .. خشيت مزاجي من اسلوبك << يحتك يبي يوقع عقد

<< اطلع براااااا

بس أبستفسر عن كم لاعب .. والعضو اللي يكون هو المقصود يقول انه هو علشان اعرفه ..

..

بعد المباراه جو اثنين سلموا عليا .. واحد ضخم شوي ولابس شماغ وعقال .. والثاني طويل ووسيم شوي

.. وكانوا مبتسمين لي ابتسامه مريحه

.. لكن من الغبنه بعد المباراه نسيت أسألهم عن نكاتهم ..

ياريت لو قرأوا سطري .. يعلموني من هم ؟

..

فيه واحد كان لابس قبل مانبدأ اللعب .. زي روما الإيطالي ..

وهو تقريبا أول واحد سلمت عليه من أول ماجيت وعرفني عليه أسير الزعيم ..

كانوا اثنين جنب بعض .. واحد بزي روما والثاني بثوب وشماغ ..

ياريت لو قرأوا سطري .. يعلموني من هم ؟

..

فيه لاعب معنا سمين شوي .. ورقمه 37 ..

ياريت لو قرأ سطري .. يعلمني من هو ؟

..

فيه لاعب معنا .. كان على ماأذكر لابس فانيلة الهلال ورقم 14 على ظهره ( التايب )

وبنهاية المباراه كان يجي يتكي عندي بمنطقة الجزاء .. ويقعد نص قعده على الأرض ..

ياريت لو قرأ سطري .. يعلمني من هو ؟

..

بـه لاعب بفريق المجلس العام .. اللي احكيت انا وياه بالشوط الثاني احتكاك قوي .. وللحين يدي توجعني منه

سألته بعد المباراه عن نكه .. وقالي ياه .. بس من الغبنه نسيته

ياريت لو قرأ سطري .. يعلمني من هو ؟

وأسفين لو جاك شي من الاحتكاك .. حسيت انك رحت فيها من الصدمه .. وانا حسيت أن رجلي طالعه مكان يدي

..

فيه لاعب من المجلس العام .. كنت قاعد أنا وأخوياي بالقرب منه قبل بداية المباراه .

وهو كان سامع سواليفنا يوم نتكلم عن مصر وعن القطار

أنا بالأول ماكنت اعرف انك مع المجلس .

بس بعدها شفتك تلعب معهم بالمباراه ..

ياريت لو قرأ سطري .. يعلمني من هو ؟

..

فيه لاعب من فريق العالميه ... قالي قبل المباراه : ورا ماجبت كؤوسك معك ؟

ماأذكر هل أنا سألته عن نكه أم لا ؟

لكني نسيت كل شي عقب المباراه

أنا الأن أهدئ

ياريت لو قرأ سطري .. يعلمني من هو ؟

..

فيه لاعب من المجلس .. كان شعره طويل وحاط ربطة سوده ..

وكان متفلت بالجهه اليمين .. وأنواع التسحيب ماشاء الله عليه ..

لو قرأ سطري .. ياريت يعلمنا بإسمه ؟

..

هذول اللي أذكرهم تقريبا ..

وبصراحه افتقدت ناصر ( سكرو )

غريبه ماجا ؟

كنت انتظر سيسوكو العالميه كي ينقذ مايمكن إنقاذ من المذبحه اللي بوسط الملعب ..

بالنهايه

ألف مبرووك للمجلس العام

ويشهد الله أنك فناااانييين

ولعبكم مميز ..

ولما كنت اهايط انا والتلفزيون الملون ..

ماكنا ندري انو مستواكم كذا ولا حتى كنا ندري انو مستوى العالميه كده ..

هاردلك للعالميه ..

وإن شاء الله لنا لقاء ثاني .. وبنصككم .. وبنخلي عسيريه نفسها تسوي لنا تصاميم وتقلب عليكم

شكراً من القـلب ..

لمن كان سبباً بعد الله في تجمعناً أمس ورؤية الوجيه الطيبه ..

رؤيتكم .. تكفينا عن مليون مباراة

<< ترا جاد

ايه هين

شكراً أسير الزعيم على كل شيء فعلته

شكراً مستر جول ..

أنت ماقصرت .

رضا الناس غاية لاتدركـ ..

وشي طبيعي نبرر هزيمتنا بأنك كنت تغش ..

بس تحكيمك كويس وجاملتنا مره .. وجاملتهم مرات

مشكور

..

برآيفت ماجد مقبل ..:

أنتظر مني رساله خاصه خلال الأيام القادمه .. بما أنك مدرب الفريق .. سأعلن عن تحدي بين فريقكم .. وبين فريقي الخاص .. لكن عندمـا أجد الوقت والمكان المناسبين .. وأنسق مع الشباب ..

..

ادعوولي أصبعي يخف بسرعه .. قسم بالله منتفخ ومزرق وحالته حاله .. ذوبت كيسين بازلاء مجمده عليه ..

دمتم بوود

قفله :

العـالميـه .. لاتحزنِ .. لم يضع شيء .. لأنه لم يكن شيء لديك