هلا وغلا اخوي ( المغيري 1412 )
والله يخوك انا مستقعد لذا الموضوع <<< الين يتثبت

بس اخونا الغالي ( هلالي غير <<< وين طار !!! )
نعطيكم سالفة جديدة <<< مستلم السواليف

مرة من المراريت <<< على وزن واحد من الوحاحيد
طلعنا لشمال تلك الديرة على اساس نبي نغير جو ونشوي !! <<< مسوين في الثمامة
>>> عاد انا مسوي ادل المنطقة !!

يالله حركنا ... قالوا قدام <<< ترى الشباب على اي موضوع كل كلامهم قدام مايعرفون التهوين !!
المهم وصلنا لمنطقة من جد شي بطل <<< عاد انا مسوي اني أدل وترى المنطقة اللي رحنا لها اول مرة اطبها ..
الشباب كل واحدن فاغر الفاه <<< ماشافو خير
انا جالس اقول لهم <<< مسوي مرشد سياحي ... هذه المنطقة تبعد عن العاصمة 80 كم من ناحية الشمال وقد كانت مركزا مهما في الحروب الصليبية ... فقد كانت هنا قلعة (بطرس) ...

مالقيت الاجوال في وجهي ... قال يازينك وانت ساكت
انا هونت وقلت يا ولد الظاهر في خيانة !!! لاني شفت خمس شباب يتفقون علي ...
>>> كل طلعة لازم نسوي جرية بواحد او اثنين ...

المهم الموضوع موب هنا ...
تغدينا وعينا خير ...

الان مسكت غلط مع الشباب الا يلعبون بلوت !!! <<< انا ذي اللعبة بالذات بيني وبينها مشاكل ليوم المشاكل !!!
قمت اقول ياشباب والله انها بايخة وشينة ...

قاموا كلهم بصوت واحد قالوا عندك لعبة غيرها !!!
>>> ذا السؤال ادوره من زمان ( ناوي نية شينة !!! ) ... قلت اكيد نلعب لعبة الغمزة !!!
اللي يعرفها زين !!! والا مايعرفها نشرح له ( تستاهلون ترى اللعبة تقضي على الممل والطفش بنسبة 100 % )

الان تلعب اللعبة بشرط ان يكون عدد اللاعبين من 4 وفوووووق
على فرض ان اللعبة بها 4 اشخاص لتوصيل الفكرة
نقوم ونقص اربع اوراق صغيرة متشابهة الحجم يرسم بكل منها عين على ان تكون احدى العيون مزركشة
يعني مثلا تقوم تظبط الرموش او تكتب ذكريات <<< سلامات ... لا ممنوع الكتابة او تمييز الورق !!!

نقوم نوزع الورق على هاذولي الاربع اشخاص ... كل واحد يشوف ورقته ويسكرها ويحتفظ بها ...
طبعا هنا لازم يكون في قوة ملاحظة وسرعة بديهة وذيابة <<< الدلخ بتروح عليه

الان الشخص اللي معاه الغمزة بيحاول يسوي انه يناظر في باقي الاشخاص على اساس انه موب معه الغمزة ..
واللي موب معاه الغمزة بيسوي ان الغمزة معه <<< كل الدعوة تمويه في تمويه ...
لازم انت تكون مصحصح ميتن بالمية لان في نهاية اللعبة في احكام تثلج الصدر <<< اللي شايل على احد يسويها!!

طبعن اللي معه الغمزة يغمز لاي شخص بشرط ان الباقين مثلا يكونوا غافلين ...
اللي ينغمز له هو حر يقدر ينزل ورقته وقت الغمزة او يتأخر فيها <<< لعانة

في النهاية بيبقى واحد مافي احد غمز له !!! الان هو لازم يعرف الغمزة مع من ؟
اذا طلع جوابه صح يقوم بالحكم على صاحب الغمزة ...
واذا جوابه غلط يقوم اللي قال عنه ان الغمزة معه ( الشخص الخطأ ) بالحكم على الشخص اللي قال الغمزة معي ..

عاد عقبها شف انواع الاحكام كل شي مسموح ....
لكن الاشياء اللي تمس الحياء العام وقبلها الدين مرفوضة تماما ....
انا والله ودي اكمل القصة ...
لكن في دلخ من هالسلنتح اللي عندي قافطتته الشرطة ولا معاه اثبات في السيارة ...
خلني بروح افزع له وبرجع اكمل لكم القصة ...

السموحة لي رجعة ان شاء الله ...