نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

Hictar · #5 14/07/2008, 10:56 PM

شف يا عزيزي أنت وأبوطلال

فضايح ما نبي

خلوها مستوره ولا كأن شئ صاير

بقولكم عن بدايتي بالموقع :

أنا إنسان خلقه أكره شئ إسمه ( منتدى )
دايما أسجل بمنتديات والحد الأقصى اللي وصلت له ( أسبوعين )

تجيني غلقه من المواضيع اللي أقراها !!
لو تعرفون كيف وصلت للزعيم ( راح تقولون هذا مندس )

بالبدايه كنت أدخل ( منتدى العالمي ) علشان أضحك
جد جد ( أعضاء منتدى العالمي ) متخلفين
أنا شفت ناس متخلفه بس مثلهم ما شفت بصراحه
ما أدري ( يسكرون ) قبل ما يدخلون النت !!!
يكتبون أمور غريبه والمشكله يصدقونها السبايك الباقين !!!

تفوز أسبانيا على هولندا ( يكون السبب الهلال )

دخلت أحد المواضيع وكان فيه رابط ينقل عن موقع الزعيم
دخلت موقع الزعيم وأعجبني صراحه
سجلت فيه ولا إنقبلت !!!

طبعا ما أعرف شئ إسمه ( تفعيل ) لأني ما أدري وش هي المنتديات أساساً

كل ما دخلت أنزل تحت علشان أشوف ( مربع الرد مفتوح أو لا )

هنا تقدر تقول عني ( سبيكه أنا راضي )

بيوم الجمعه وكانت المباراه النهائيه بين ( الهلال والإتحاد ) على كاس الملك واللي إنهزم فيها الهلال 2-1
أذكر بوقت الظهر داخل وكلي حماس مع المباراه بشوف المواضيع
وانا أشوف الردود ( وألقى المربع مفتوح للرد )

ما أدري وش كتبت بس أتوقع إني سويت تجربه علشان أشوف ردي

بعد ثلاث شهور من التسجيل تفعلت

بعد الهزيمه النكراء والمستوى النايم من لاعبين الهلال كان لابد من الرد عليهم بالتسفيل وكتبت موضوع أبين فيه أخطاء ( باكيتا ) بحكم إني ناقد فني

ما أنصح أحد يشوفه ( لأني تشرشحت )

وكان بأحد الردود شطحه أليمه مازلت أتذكرها
قالي واحد ( مواصل من عام 1413هـ أنت تدخل شات .... ( ما أدري وش إسمه )

قلت بنفسي يا ولد خلك من المواضيع وشرشح مع الناس اللي تشرشح

وكل ردودي بالجمهور تريقه وشرشحه
يعني لما أشوف عضو يبي يجيب ( لاعب مثل ريكلمي ) للهلال
أقوله شكلك تلعب بلي ستيشن كثير إنت
تجمع نقاط وتشتري لاعب !!!!

من العضوات اللي كنت أحارشها دايما ( شذى )

اللي أذكره من المواضيع اللي كتبتها بقسم الجمهور
4 مواضيع
2 فاشله وواحد محذوف وواحد هو اللي أحس إنه يجي منه
لحد ما عقلت وجيت للمجلس العام