اعتقد ياجماعة الربع ان الثنيان لازم يرتاح شوي فهو بذل مجهود خرافي في النخبة خلوه يرتاح او هو وده يرتاح علشان يسوي ريستارت لجسمه ويرجع قدام النصر ...لانك لوتسأل اي نصراوي من ودك مايلعب من الهلال في مباراتكم في المربع كان اجمعوا انه الثنيان فابويعقوب ثروة يجب المحافظه عليها والاقتصاد فيها حتى لاتنضب فالثنيان يحب الهلال يمكن اكثر من نفسه اسألوني والدليل آخر مبارة في النخبة مع الصفاقسي آخر الدقائق شوفوا من راح يجيب الكورة يوم يصفر الحكم على خطأ وانا احلف ان لمبة الزيت مولعة عنده بس العشق للهلال يسوي اكثر .
انا ياخوفي لو انهزم الهلال من الاتحاد (شر برا وبعيد ) كان بعض الكتاب يبي يستلم الثنيان بالحش
... الكابتن العجوز يترك الزعيم كالعادة في اهم المباريات ...
.... هل الثنيان انسان مادي بعد مكافأت النخبة يفضل الراحة بطريقته ..
..... من يوقف الثنيان عند حده و هل هذا جزاء المعروف .....
..... الثنيان يخرج فريقه من كأس ولي العهد بعجرفته .....
طبعاً كل اللي قريتوا بعض الكتابات التي نتوقع كتابتها وذلك لعدة اسباب :
1- لأن الثنيان راد بكل الجرائد والقنوات الفضائية يعني مايصرح والدليل السقا في الاوربيت .
2- بعض الكتاب وده يشتهر فيدوّر على أشهر لاعب يحش به علشان تنهال الردود عليه ويتكلم الناس به وشار اليه هذا اللي سب الثنيان والله انه كاتب رهيب , مع ان هالكاتب يمكن اول مره يكتب والدليل : ارجعوا الى جريدة الوطن في عددها الثالث او الرابع وااله اني ناسي لانه آخر عدد قريته وحلفت مااقرا هالجريده ليش؟ تسألوني ليش . لأن فيه مستصحف كاتب مقال عن الثنيان وخذ حش ..العجوز .. انتهى هذا اللاعب.. ومن هالخرابيط المشكلة ان الكاتب هالمقال أجنبي . عجبي
3- فيه بعض الكتاب حاسدين الثنيان على المكافأت وراتب الاحتراف يعني قروشه وهو كبير بالسن يقولون هذا اللاعب انتهى ليش مايفتح المجال للشباب الصغار مع انه من المعلوم لديكم ان لاعب الخبرة ضروري جداً لقيادته وتوجيهاته في الملعب باعتبار ان المدرب خرطي لايهش ولاينش مثل الله لايعطيه عافيه (كابوس) قصدي (كامبوس) لو لله ثم الثنيان في الدوري هالسنة وطبعا ولايهونون الباقين الا( تركي الفاولات) كان الهلال بجنب الوحده في ترتيب المنطقة الدافئه على مايقولون مع انه دافئه بالصيف
نرجع لضرورة وجود لاعب الخبرة في الفريق كم فعل روجيه ميلا في كأس العالم 90 مع منتخبه الكاميرون يوم يلعب بحسبة الكولمبيين وقبلهم الارجنتينيين لان احساس الاعبين بوجود لاعب الخبره المفكر اللي يعرف كيف يضغط المنافس ويعرف طرق الفوز السهل دون فلسفة فمثلاً لو ان فريق(أ) لعب امام فريق (ب)المتكتل دفاعياً كيف يسجل فريق (أ) لنفترض ان في فريق (أ) لاعب خبره مفكر على دكة الاحتياط والسبب قناعةالمدرب . وتفرق بين لاعب خبره مفكرولاعب خبره دبشه ليس لاعب الخبره بالسن فقط ولكن بالسن والمخ على ماقال حماده امام (المخ والعضلات). نرجع لموضوعنا فريق (ا) وفريق (ب) وش كنا نقول ..ايه تذكرت
فقبل أن يدخل لاعب الخبره للملعب في فريق (أ) يعرف او سيعرف داخل الملعب كيف يسجل فريقه هدف لان بدخوله يوجه ذا ويتفاهم مع هذا ويبعث روح جديده للاعبين يعني كن المباراة عند لاعبين فريق(أ) توه باديه بعد دخول لاعب الخبره أو كن عيال مضيعين ابوهم نعم ابوهم لاتضحك والدليل : مباراة الهلال والاتحاد القطري في كأس الخليج الأخيره يوم عجزوا لاعبين الهلال يسجلون قول يوم دخل لاعب الخبره المفكر في فريق (أ) ..آسف قصدي الثنيان الملعب بكل سهوله لقط كوره من العمق وسبب بلنتي لانه كانوا لاعبين الهلال يعتمدون قبل دخوله على الشوت ير المتقن من خارج منطقة الجزاء و العرضيات الطويله وتجد الرؤوس الصلعاء لها بالمرصاد قصدي سعود فتح وعادل خميس ومحمود آدم الثلاثي الكوماندز. وضاع البلنتي مو مهم .
وأيضاً مباراة السعوديه والصين نهائيات كأس العالم 96 يوم المنتخب مهزوم باثنين ودخل الثنيان ولقى اللاعبين ابوهم وعرفوا يفوزون.
وصحيح ان الثنيان يخطيء بتركه الفريق في عدة مرات ولكن هذا طبعه الشكوى لله
فالزين مايكمل والكامل سبحانه .
آسف على الاطاله ..... الزبده لالالالالالالالالالالا والف لا ,لاتنسوا الثنيان ولا تسوا تاريخه من أجل تخلف عن معسكر أو طلب اجازة فهو ماقصر بعد اجازته الطويله عاد ورد على كل من حش به.
وبعدها اتخذ الثنيان منحى آخر مع الصحافة فقاطعهم فهو ليس بحاجة شهرة واضواء وكأن بلسان حاله يقول : الميدان ياحميدان والخسران الصحافة .
فأختم بأن تتركوا الثنيان بحاله وأعطوه راحة على قد مايبي خارج الملعب لانكم لن تندموا لان سيرد لكم الدين وأكثر في الملعب فلاتقسوا عليه فهو روح الهلال القديمة التي يسقيها لكل لاعب ناشيء وكل مشجع صغير.
وياليت الثنيان ظهر متأخراً لوجدته الآن يلعب في اعرق الاندية الاوربية .
واشهد الله اني احبك يايوسف في الله والله يحفظك من كل شر واخوانك لاعبين الزعيم.
وكل من يحب الزعيم ...........آمـــــــــــــيــــن .
سبحانك رب العزة عما يصفون وسلام على المرسلين والحمد لله رب العالمين
[IMG]http://www.alzaeem.com/album/album1/12.jpg[/IMG
سبحانك رب العزة عما يصفون وسلام على المرسلين والحمد لله رب العالمين