تشكيلة فيليباو اللي ضمّها قد تكون هي الأفضل .. فيه كم عنصر غاب بسبب انقطاعهم
عن اللعب مثل تياغو ومثل مانيتش .. عاد مانيتش فيه أخبرا تقول ان بينه وبين سكولاري مشكلة !!



كل الغيابات تهون اذا تذكّرنا فيغو .. غير انه أسطورة كرويّة أيضاً قائد محنّك وخبير
من أكثر الأشياء اللي تقلق سكولاري هي سالفة القائد .. أندراده ممتاز .. بس اصاباته غيّبته
عن القائمة فضلا عن شارة القيادة .. سكولاري جرّب سيماو ولا أعجبه .. جرّب رونالدو
في كم مباراة ولكنه لاحظ ان ردة فعل رونالدو ينقصها النضج على حد تعبيره !! فـ راح دقّ
على خويّته رجينا برانداو - دكتورة علم نفس - وجابها قبل مباراة البرتغال الودّية مع اليونان
وطلب منها تحلّل شخصيات اللاعبين وتسلّم له النتائج .. آخر الأخبار تقول ان رونالدو
بـ يبقى كابتن .. ولكن ما أتوقّعها في وجود نونو غوميز .. الأكيد انّنا فاقدين خوداس لويس

فيغو كان متواجد مع الفريق في معسكرهم بالبرتغال .. وكرّمه الاتحاد البرتغالي .. وبإذن
الله راح يكون موجود بـ اليورو

كارفا فيه كم واحد تكلّم انه ممكن يآخذ الكابتنيّة .. كنت أقول هالشيء .. بس بعد تصريحه في آخر أسبوع من البريمير ان رونالدو يختفي تحت الضغط .. شلت فكرة
انه يآخذ الكابتنيّة من رأسي .. حتى لو كان من مصلحتك تقول هالكلام .. حتى لو
سئلت عن رونالدو كنت تقدر تصرّفها بطريقة مقبولة .. ياخي شف فيغو للحين ما قدّ
جاب طاري برشلونة ولا ريال مدريد بالسوء مع انهم سووا به اللي سووا به !!




أكيد التشكيلة فقدت أسماء كبيرة لها وزنها واسمها .. المعتزلين ما نقدر نردّهم
خلاص : ( الكلام على المستبعدين .. تياغو ومانيتش من خمس سنين وهم ثابتين
في الفريق كـ لاعبي دائرة .. تياغو احتياطي لـ مانيتش .. الصفة الأبرز اللي بنفقدها
هي قدرة مانيتش على دخول منطقة جزاء الخصم بـ راحة تامّة .. من أفضل اللاعبين
في العالم اللي يجيدون هـ الدور .. معوّضه بـ شكل جزئي راح يكون جواو موتينهو ..
الكابيتانو الصغير ..


هو أمل سبورتينغ القادم .. بعد ما طلع أبرز مواهب الفريق رونالدو راحوا اختاروا واحد
كفو يعطونه رقم 28 .. ولا لقوا أفضل من موتينهو .. تدرّج في الفئات السنّية مع المنتخب
.. يوم صار عمره 19 سنة .. انتقل سيء الحظّ سا بينتو من سبورتنغ ( أجل فيه أحد يصاب
بالرباط أربع مرّات في نفس الركبة ) .. واختاروا موتينهو الكابتن مكانه .. الولد رزين
وشخصيّته قياديّة .. وغير كذا الولد محبوووووب .. الموسمين الماضيات أعلى نسبة مبيعات
كانت من قمصانه



العام في يورو الشباب كان يلعب صانع لعب صريح ( رقم 10 ) .. سبحان الله .. دايم
الفرق السنّية تؤدّي ولا تفوز .. ما خلّوا شي من المتعة .. المشكلة تبقى أزليّة في الهجوم
حتّى في منتخب الشباب .. يكفي انك تعرف ان المهاجم الأساسي هو الأسطورة ألميدا
وكان شايل الكابتنيّة بعد .. أغلب الأهداف كانت من كرات ثابتة ( فاولات فيلوسو )

موتينهو في مباراة اليونان الأخيرة لعب جناح أيمن يوم أصيب سيماو .. مرونته شي ممتاز
بس موقعه الأصلي واللي بيلعب فيه في اليورو .. محور هجومي


فيلوسو أيضاً ممتاز .. امكانيّاته تحكي عنه .. جوكر .. محور دفاعي وهجومي .. زيّ ما
ذكرت انه لعب سنتر دفاعي مكان بولقا يوم أصيب أوّل الموسم .. قد لعب ظهير أيسر بعد
توزيع كور .. كرات ثابتة .. ما عليه الولد .. بـ يبقى احتياطي أكيد .. مستواه في مباراة جورجيا
ما عجبني .. تنقطع منه الكورة ويتركها ولا يحاول يسترجعها .. إذا كان قصده إنّ المباراة ودّية
فـ هذي مصيبة !!



من أوّل مباراة له عاش الفرحة معنا في هـ اليورو بـ يكون كلة السر هو وكارفالهو
في كأس العالم لعبنا بدون أندراده اللي كان يسترجع لياقته معنا .. مييرا ما قصّر .. بس ولو
تحط يدك على قلبك .. كيف اذا صرت مضطر تلعّب برونو ألفيش عاد ؟! :/ الحين ما عاد
تفقد الا دور أندراده القيادي .. بيبي لاعب مندفع واصاباته كاثرة هاليومين .. على الله يصمل معنا
هالبطولة .. بيبي وكارفا سناتر ومييرا بديلهم .. والفيش يغسّل المواعين .. ميغيل مستواه
وصل للقاع ورجع يرتفع تدريجيّا .. بس ما وصل للتوب .. ولا هوب أجدر من بوسينغوا
بالخانة .. الباك اليسار نار أي واحد ولا جنّة كانييرا .



هذي أحد مشاكل الفريق .. ريكاردو مستواه هالموسم ولا بريال مع بيتيس
وفي المقابل كيم مجتهد ومسوي اللي ما ينتسوّى مع بنفيكا .. ساتر فضايح
دفاعهم اللي كلّ يوم شكل .. يكفيني اللي سواه في الديربي في نصف نهائي الكأس ..
تمنّيت يكون فيه أكثر من مباراة ودّية نجرّب فيها كيم .. خصوصاً ان ريكاردو مكوّش
في أغلب مبارايات التصفيات .. زيّ ما اخترنا جوريجيا نجرّب الخطط الهجوميّة
عليهم . كان المفروض نختار في قوّي يختبر دفاعنا وحراستنا .. بس يبدو ان
سكولاري فضّل اراحة اللاعبين .



في تدريب أمس لعّب كيم مع الفريق الأساسي ,, ونطل ريكاردو في الرديف !! ممكن
أشياء غير محسوبة تنكب عفشك .. مقتنع ان كيم مستواه أفضل هالموسم .. بس وش
هالالهام اللي ينزل عليك في التدريبات فجأة !! .. ريكاردو زعلان .. وفيليباو يعرف
كيف يضبط الأمور


في المناورة امس لعب الفريق الأساسي نفسه اللي لعب قدّام جورجيا باستثناء ريكاردو
اللي نقل للرديف .. الغريب ان الرديف فازوا 3-2 .. والأغرب ان المهاجمين
الاحتياطيين هم اللي سجّلوا الأهداف .. بوستيغا والميدا .. ومهاجمنا الأساسي عساه
يصحى قريب



هذا اللي مخوف سكولاري .. يقول " حنا ينقصنا الشيء اللي يخليك تفوز بالبطولات
( شخصيّة البطل زي ما يسمونها ) بس أعتقد اننا نقدر نتغلّب على هالشيء اذا قدرنا
نسجل من الفرص اللي تسنح لنا .. نعاني كثييير من تضييع الفرص " وأنا أقول
للأسف فقدنا حتّى المهاجم اللي يتحرك مب يسجّل بس .. باوليتا كان يفتح فراغات
لزملائه .. كان يصنع .. نونو ما يتحرّك ولا يحاول .. الله يهديه بس



شيئين أشوف الشباب دايم يتكلّمون فيها .. ماريو غوميز اللاعب الألماني أصوله
أسبانيّة وليست برتغاليّة .. أمّه ألمانيّة وأبوه أسباني .. أما ليساندرو لوبيز قد لعب مع
المنتخب الأرجنتيني ولا عاد يمديك تجنّسه !!




أوّل ما جا ما كان مرتاح خصوصاً بسبّة خلافه مع فيغو .. الرجّال حبّ جوّ البرتغال
وجوّ اليورو هناك ومع وصوله للنهائي لأول مرة في تاريخ البرتغال جدّد سنتين ..
ومع مرور الوقت صار حبّه للبرتغال يكبر .. الحين صار أول واحد يصف عشان
النشيد الوطني .. يقول " تحقيق اليورو مع البرتغال بـ يكون اجازي الأبرز في
مسيرتي !! وأقوى من فوزي بـ كأس العالم مع البرازيل !! " .. تقريبا هذي آخر
بطولة له مع المنتخب .. عاد هو يعرف كيف يشحذ همم لاعبينه في الأوضاع
العاديّة .. كيف في آخر بطولاته مع البرتغال !!



التشكيلة الأمثل

؟؟؟؟؟
فيريرا --- كارفا --- بيبي --- بوسينغوا
بوتي
-------- موتينهو
ديكو--
رونالدو ------------------------ سيماو
غوميز


الاحياط كل لاعب يقول الزود عندي .. ولو إن أفضل مباراة لعبها المنتخب في
لتصفيات كانت مباراة فنلدنا يوم لعب مييرا محور مع فيلوسو .. كان أداءهم خرافي
ذيك المباراة .. فيه فرق بـ تحتاج انك تلعب بـ مييرا قدّامهم في المحور .. مثل ما قدر
يرجّع لنا نص الملعب يوم طبّ في مباراة ايطاليا .. لولا ان الوقت مب وقت
اختراعات كان قلت أبيه أساسي !!


نقطة أخيرة



بينتو دا كوستا .. أحد صانعي الرياضة البرتغاليّة الحديثة .. رئيس بورتو من 83
ومن يوم جاء وبورتو من حسن إلى أحسن .. عام 97 شمّوا ريحة تلاعب بالنتائج من
داكوستا وصديقه جواو لوريرو رئيس بوافيشتا .. وضبّطوا وضعهم الشباب وجمّدوا
القضيّة .. قريب اكتشفوا انه كان فيه تلاعبات في دوري 2003-2004 ولنفس
الفرق !!


فتحوا ملف القضيّة مرّة ثانية وطلبوا من الاتخاد الاوروبي يساعدهم في التحقيق ..
الحكم النهائي كان بـ خصم نقاط من بورتو ومنعه من المشاركة في الابطال وهبوط
النادي العريق ( قطب بورتو الآخر ) بوافيشتا للدرجة الثانية وغرامات ماليّة ..
والأهم هو ايقاف داكوستا سنتين عن العمل الرياضي وجواو لوريرو 4 سنوات !!






كل هالفضايح تذكّرنا علطول بفضيحة الكالتشيو بولي وكيف ايطاليا قدرت تحقّق
كأس العالم مع ذيك الفضيحة .. أتمنّى هالنقطة كون ايجابيّة لنا .. ونحقّق البطولة






يوووه ما بغيت أخلص .. كنت ناوي أشقّر على جيراننا في المجموعة .. بس
بأخليها لوقت ثاني رأفةً بكم

بالتوفيق للبردقان