نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

S U L A I M A N · #15 21/04/2008, 05:45 AM

إقتباس

الرسالة الأصلية كتبت بواسطة ابو طـــــلال


	الاخ الغالي سليمان .. المعروف ( بالسلمي ) تصدق سبقتني .. ومن سبق لبق .. حلال عليك هالردود الوصف اللى ذكرته دائما اشوف حرمة .. ومعها طفل .. على قولتك انا اترك كل شي وأقعد اتابع تصرفات اصحاب السيارات .. بعضهم والله مايكلف عمره ويهز راسه بالرفض ..؟ مايقدر حاجتها .. ولا عازتها .. تفكيرة بس انها ماتقرب للسيارة .. وكنها تبي تاكله .. بس والله ياسليمان أهل الخير واجد .. شوف عيني وبنفس الإشارة .. ناس تتأخر عن التحرك بالسيارة علشان يمدون ماتجود به انفسهم للفقيرة الضعيفة ... الحرمة انا مااقدر اتخيل انها تكذب .. او انها تحتال ... الإحتيال وهي طالعة بهالشكل ومعها طفل .. حتى لو إحتالت علي .. انا مسامحها وحلال عليها على هالوقفة تحت الشمس الحارة اللى ماترحم .. او في أيام الشتاء وشدة برودت الجو عاد بالرياض .. وتلقى معها ( بزر ) ابو سنتين او سنة .. ويجيك واحد يقول لاتعطونهم هذولا حرامية .. وتلقاه يزين دش بيتهم ويبخشش البنغالي بعشرين وهو التصليح بخمسه ... بعض الناس حطهم عند الترزز ودورهم عند ( الإنزراق ) بس مااخفيك اخوي سليمان .. بعض المتسولين انا شخصياً ابلغ عنهم .. وماارتاح إلا وهو مقبوض عليهم .. وطالما انك من هالحي .. انت تعرف طريق الأمير متعب بن عبد العزيز .. دائما كنت ألاحظ مجموعة من الشباب ( اكرر شباب ) متعافين .. وينزلون بسيارات ويجيني يشحد .. يقول انا ( يماني ) وماعندي شي .. والوجه يتكرر دايم .. يعني بالشهر مره او مرتين .. وبعدين وجه ( إجرامي ) وانا القاهم في الصباح الباكر .. دوامي يكون 10 .. الصباح والقاهم بشارعنا .. بصراحه ماهمني نصبهم كثر ماهمني خوفي على هالبيوت والمحارم والجيران .. حسيت انه في أي لحظه يجتمع اثنين ثلاثه ويقتحمون منزل .. او لاسمح الله يتعدون على الحريم الآمنات في بيوتهم وازواجهم او اولادهم بالمدارس والعمل .. بلغت أكثر من مره .. ومره بسيارتي حديت واحد وركب للشرطه .. واحد باكستاني نفس الشي .. جاني يقول ابي اي شي أكله .. ابي فلوس .. طلبت الشرطه وانا اللى ركبته بنفسي .. مثل هالشبان اللى يقدر يعمل ويجي بوقت وفتره هي فتره غياب الرجال في البيوت تخليني اتصرف هالتصرف .. واتمنى الجميع ينتبه لهم .. أخي سوليمان .. شاكر لك طرح هالموضوع الإنساني .. وسلملي على الإمام اللى ينفخ على الفقير وكأنه مايعرف الآية الكريمه اللى تقول ( واما السائل فلا تنهر ) .. وللأسف بعض اصحاب هذه المهنه لانها اصبحت مهنه .. لايقومون بها حتى بشكل سليم .. كإمام مسجد .. يصلي بالناس فرضين والباقي لبنغالي ويعطيه المقسوم .. =========== قفلة ... مبروك البطوله .. كاس ولي العهد .. والدوري وعقبال كاس الملك .. بس وش رايك بالخمسه حقت المجلس العام .. راحت حرتها ؟؟ تبون خمسه ثانيه هع هع هع يوم شفت ستة الشباب على الأهلي .. حنيت نلعب معكم ..

أبو طلّّّو

.. هلا والله ومرحبا .. الساعه المباركه الي شفناك فيها .. عاد تصدق .. يوم نزلت الموضوع ومن بكرى أقول وين أبو طلال ذا ورى مايرد :$ .. وماخيبت ضني فيك

.. ولا يهونون البقيه عاد .. الكل فيه الخير والبركه .. بس حلو توقيعك

أجل سبقتك

هالموضوع يابو طلال ناوي اكتبه من شهر يمكن بس كل مره أقول بكرى بكرى لين جلّّست نفسي على الكمبيوتر وكتبت هالخرابيش والحمد لله يبدو ان الأغلبيه متقفه معي حول هالقضيه وهذا ان دل على شيء يدل على القلوب البيضاء الي يمتلكها أصحاب هالبوزرات ..

أبو طلال فيه ناس واجدين فيه الخير والبركه الحمد لله وهالشي هو الي راحمنا الحمد لله .. لكن زي ماقلت انت بعض الناس مايكلف نفسه يناظر بهالي جاي يسأل عن ريال واحد !! طيب عطه ياخي ليش القعاطه !! .. زي ماقلت يابو طلال انت فيه بعض الناس فعلا تتاخر بالتحريك علشان تلحق على هالعجيّّز وتعطيه من ريال .. عاد تصدق يابو طلال .. مره واقف قدامي فان فيه كذا بنت راكبات .. يوم حركت السيارات وقف هالفان وطلعت وحده من البنات يدها من الدريشه ونادت هالعجيّّّز وعطها شي خلى هالعجيز تناظر الفلوس حتى وهي راجعه للرصيف !! الله يجزاها خير هالبنت انا يوم وقف السواق بصراحة غثيته بالبواري :$ .. لكن يوم شفت الموقف كان ودي أقول لهم آسف ماكنت ادري ! .. هذا مثال لطيبة القلب يابو طلال ..

سالفة هالي يبخل على فقير بكم ريال ويبخشش بنقالي قريح بعشرين ريال وشغل اليد ماياخذ ولا خمس ريال .. هالشي كثيييير يصير وداااايم .. واحد يبخشش راعي مطعم باقي ريالين من الطلب وقال له خلها معك ويضحك معه ولا يشتري من البقاله ويبقى ريال ويقول للهندي خله معك ووو ! طيب يا أخي الكريم لازم هالمسكين يصير يشتغل بمطعم او بقاله علشان حظرتك ماتقول له انه نصاب !! ياخي هالي بالمطعم او البقاله يستلم فلوس لا وزودن على كذا تحصله يوديها لبلده بعد ! يعطي حلال عليه حرام على هالشايب الي معيي تعطيه ريال واحد او حتى تناظره عين بعين وتقول له الله كريم ! ..

أما سالفة هاليمانيه فـ ياكثرهم بهالمساجد والاشارات وكل جخر سبحان الله .. تشوفه يشيل سياره ماعنده مشكله من النشاط بس مايشتغل .. هذا الظاهر لنا .. ويمكن تحصله يشتغل بمكان لكن الطمع الي ذبح قلوب بعض عيال آدم .. المكان الي تقوله بصراحة ماعرفته زين .. طريق متعب كبير شوي ويمكن الي تقوله ما امر من عنده واجد .. لكن جزاك الله ألف خير على الي تسويه صراحة .. فعلا هذا الي مفروض نسويه في حال شفنا بعض المتسولين والي نشوفهم شباب وممكن يشتغلون ! .. واحد يجيك عمره بالعشرينات وجايك يقول أبي فلوس ! مع انه مهب سعودي علشان نقول يستحي يشتغل ولا اي شي ومستحيل يصير سعودي لأن السعودي طبيعي بيشتغل بأي مكان ولا يشحذ الناس .. بس يجيك من جنسيه غير سعوديه ويشحذ الناس ومادري ايش وهو مهب بدولته علشان نقول يستحي .. لا والمشكله انه ياكثر الي من جنسيته يشتغلون بامور كثيره .. ممكن يسأل هذا ولا ذاك اذا عنده شغل او يشتغل صبي عنده ولا يسأل الناس ! ..

اما سالفة الإمام يابو طلال فـ هو الله يجزاه خير يجتهد .. ولكل مجتهد نصيب .. غلبا يسوي كذا مع الشباب .. يعني اذا شاف شاب يسوي كذا يكرش له ويقول له كذا .. لكن هالشايب اكيدان الامام يعرفه زين ويمكن داااايم يوقف هالوقفه علشان كذا كلمه الامام اكثر من مره ولا اهتم الشايب وبالاخير قال مالي الا أقول له يجلس .. كل شي جايز ..

يبارك فيك ابو طلال ومبروك للجميع .. وعقبال كاس الملك ياااارب ! ..

أما سالفة الخمسه فـ أبد ماعليك .. لعبنا قبل كم يوم مباارة بين الاسبان واالنجليز ومزمزنا عليهم وفزنا تسعه سبعه

.. عاد جمّّع لك كذا زقروت من المجلس ولا أي مكان .. لو تبي من نادي الهلال

وبنمزمز عليكم بعد .. لا وتراي لاعبن معهم بذيك المباراة وبلعب ضدكم لو نلعب ثانيه

أقول .. تسني فليته شوي بهالرد وصار اطول من الموضوع !!

إقتباس

الرسالة الأصلية كتبت بواسطة الكــلاسيكي


	وعليكم السلام ورحمة الله وبركاته .. هلا وغلا فيك اخي السلمي .. وعاش من شافك .. ورده ماتطرقت عليه فعلاً يستحق منا نظره متواضعه .. وان كانت الشفقه ستجعلنا نظهر مما معنا فلل ننظر بنظره شفقه وعطف .. والله اني احزن اشد الحزن على تلك المواقف التي ارى فيها شيخ او مسنه يشقون على انفسهم ويتثاقلون على الآمهم من اجل طلب لقمة عيش لابنائهم .. قال تعالي : " وأما السائل فلا تنهر " ولكن .. ألا تعتقد ان كثرة المتسولين " الكاذبين " .. احد اهم اهم اسباب امتناع الناس عن الاعطاء ! اجزم بذلك .. السلمي .. الف شكر لك ولطرحك الراقي الرائع .. ولا تحرمنا جديد قلمك .. وتقبل فائق احترامي وتقديري .. دمت بخير ورده

هلا والله عدّّّوله

.. عاشت ايامك يابعدي .. بس حلوه أخي السلمي

المشكله ياعادل ان البعض صارت قلوبهم حجر !! شايب أو عجيز هذا كبرهم .. وولا كان فيه أحد يسأل يقول أبي فلوس !! لا ابتسامه ولا الله كريم ولا حتى نظره !! .. هالشيخ أو المسنه ماوقف هالوقفه بهالشموس والحر .. الا لأنه محتاج لهالكم ريال الي تقول مهب لازم ياخذ ريال .. نصاب ! .. طيب انت عطه وماعليك منه واحتسب الاجر ! .. وتاكد انك بتستانس آخر وناسه اذا عطيته ريال واحد على الأقل ! ..

عادل .. الي يمتعون عن العطاء .. يقولون انه نصاب .. وماقال هالشي الا لكثرة المتسولين بالديره .. وهنا ألوم الجهه المسؤوله عنهم ( والله اني نسيت اسمهم من قل مانسمع بهم ! ) نلومهم على عدم التفاعل ! .. إذا جاك واحد شاب وقالك أبي فلوس .. مهب مشكله اكرش له وسو الي تبي .. لكن يجيك واحد شايب ولا عجيز وتقول نصاب ! هنا الي ماتدخل المخ .. ياخي حتى لو هو شايب عطه شوي من الي عطاك ربي وربه واحتسب الأجر ! .. بدال مااحتسبت الاجر وعطيته يمكن تكون كسبت ذنب الحين يوم انك تقول انه نصاب وانه وانه ! ..

شاكرلك عادل المرور الكريم ولاهنت يالغالي ورده