بعد الله ..
مالنا غيركم ولا لكم غيرنا يابو عبدالله .. ونعرف اخلاصكم وتعرفون اخلاصنا .. بس بعد يابوعبدالله انتم لاتقسون علينا .. مازعلنا وحنا ننهزم من العين ولا راح نزعل من أي خسارة واي بطولة نخرج منها لطالما قدمتوا المستوى اللي يليق فيكم ويليق بالزعيم .. لإننا نعرف ان الكرة فوز وخسارة .

وان كنتم تقسون علينا بتواضع الاداء احياناً لآثار نفسيه وضغوط وامور فنية .. فبعضنا من آثار نفسيه وخصوصاً بعد أي خروج او خسارة ماقدمتوا فيها كل ماعندكم يقسوا عليكم لكنه من حب لكم وعشم . شرهة العاشق كبيره يابوعبدالله فلا تلومنا ..

ولما نهدأ وتهدون .. تأكد يابوعبدالله اننا معكم نفكر في إعادة الفريق لمكانته الحقيقه ونؤازره من كبواته . نجتمع وياكم على حب الزعيم وعشقة والاخلاص له .. وهدفنا وهدفكم واحد .

وابشر يابوعبدالله .. كلمتك لها تقدير خاص وكلامك عين العقل .. ولها كثير الأثر في التخفيف علينا وحتى على بقية اللاعبين مما حصل .. وثقتنا فيكم مالها حدود ..

ومحتاجين مثل هالتواصل يابوعبدالله كثير متى ماسمح لك ولكل اللاعبين الوقت .. اجعلوا التواصل بينا يخفي اي امور سلبية .

وان كنت في يوم قلت بطريقتك انا احبكم .. فاحنا كل يوم نقول واحنا نموت فيك وفي كل الهلاليين معك