نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

الـمـشـاغـب · #10 26/03/2008, 04:20 AM

ايه يا أبوعبدالله .. تكلم يا بعدي تكلم ..

أكيد أنك شين وما عندك أسلوب جذاب عشان كذا ما لقيت فرصة

خخخخخخخخخـ

أمزح معك يا الغلا .. بالعكس كلامك عين الصواب وما حدش ينكر هالشي

لكن :

يقوله اللي ما ابتلى بحب سارة ... ولا شاف ريم في هدب العيون

معذور أخوي أبوعابد .. ما شفت شي من اللي شفناه والا ما كان قلت هالكلام

الصراحة .. هالموضوع لا بد فيه من التفلسف شوي حتى أعاكس التيار شوي

بس للأسف ما فيني حيل الحين

عموماً بأختصر الموضوع أن الخطأ خطأ .. وبما أن العلاقة معروف أنه خطأ فما يحتاج رأيي أن أقول أنها صح أو خطأ ..!

لكن يحتاج الموضوع للتفصيل شوي حتى نشوف وش السبب اللي خلانا ( واسمحوا لي أتكلم بصيغة الجمع حتى ما أحط نفسي في موقف الشخص المثالي ) ..
أرجع أقول وش السبب اللي خلانا نبتلى بهالمكالمات؟

فيه ناس ابتلوا لأنهم يبون يتلاعبون بالبنات ويتفاخرون بهالشي قدام أخوياهم أنهم مطيحين البنات ..

وفيه ناس مالهم بهالأمور بس بالصدفة جات بنت دقت عليه والشيطان شاطر وشبك بينهم .. واستمر معها على أساس أنه مثله مثل غيره لازم يكلم بنات ولو على الأقل واحدة ..

وفيه ناس ابتلوا بالحب .. وحبوا بعض عشان كذا خالفوا تيار مجتمعهم واستمروا مع بعض .. بعضهم تزوجوا وبعضهم أكلوا تبن

وفيه ناس ودهم بالبنات .. لكن ما حصلوا

يمكن منعهم الحياء .. أو عزة النفس .. أو بخلهم من الخسارة

أو أشياء أخرى ..

وفيه ناس تربيتهم والتزامهم بدينهم وصحبتهم الصالحة منعتهم من التفكير في هالأمر ,,,!!

شي طبيعي ومن الفطرة ميل الشاب للبنت .. والعكس صحيح ..!! واللي ينكر هالشي فأفضل له يراجع دكتور

متخصص حتى يتأكد من نوعيته وانتمائه

يعني مو معنى من كلم له بنت فهو داشر ومنحط وسافل .. والا على كذا أغلبنا صرنا دشير

فيه ذنوب أكبر نرتكبها .. بس ما نركز إلا على المعاكسات الهاتفية ..

فيه ناس ما تكلم بنات .. ولكنها ما تصلي ... وفيه ناس يغازلون لكن محافظين على صلاتهم ..!

أحس أني دافعت عن المغازلين بقووة

خلوني أختصر كلامي الملخبط اللي فوق وأوضح وجهة نظري :

العلاقات بلا شك خطأ .. ولا أهون من شأنها ..! كلامي فوق كان عن الموضوع وهو العلاقات الهاتفية فقط دون المقابلات

أو الخرابيط اللي بعدها ..!!

والله أن راسي دايخ وتعبان من كثر ما كتبت .. عاد أنتوا افهموا قصدي على كيفكم

خلوني أطس الحين

وأرسل الرد .. ولا أشوف أحد يناقشني لأني قسم بالله مليت من هالسواليف حسيت أني علماني من كثر ما أحاول

ما نكبر المواضيع ونحملها أكثر مما تحتمل ... مواضيع الهيئة والقضاء والفرق بين الماسنجر والخاص .. أحس أن آل زلفة لو يدري فيني بيرسل لي رسالة بالايميل ويقول : ممكن نتعرف؟