بسم الله الرحمن الرحيم

سعد بن جدلان

الموضوع ومافيه انا من عشاق السمي سعد بن جدلان الاكلبي , بل من المتيمين في شعره, ولايهون السمي الثاني سعد بن علوش اللي برضه يعشق بن جدلان , وهو وبدون اي مجامله المعجزه في الشعر النبطي مع احترامي للجميييييييع وهذا بشهادة الكل..

كيف لا والكل يعرف قصيدته المشهوره اللي بدون نقط ::
مع الهم والوسواس والسهر والولال

ادله هموم الصدر والصدر مادله

ادله هموم الصدر والحال هو الحال

وصار الهم مدهالهالصدر ودهله

احاول على حلو الحلى وهو ما حال

وحاول ودار الحول وعمله عمله

سهوم الوساع السود لا هل الهوى سلال

لا سلهم سحى سلهامه سهوم مرسله

هو اللؤلؤ والدرهم وهو راس المال

ملا ملك له لولوه لا حلال له

ولا ننسى القصيده المكونه من خمس ابيات فيها من الحكم الشيء الكثير::

ودنا بالطيب بس الدهر جحاد طيب............ كل ما تخلص مع الناس كنك تغشها
يدك لامدت وفا لا تحرى وش تجيب......... كان جاتك سالمة حب يدك وخشها
كل ما شبيت نار المحبة مع حبيب ........... قام يسحل في مشاهيبها ويرشها
وكل ما واجهتلك في الزمن وجه غريب....... مثل ما قال المثل دام تمشي مشها
وذمة مهيب تنقال للحق المصيب ........... جعل قشاش الحطب لا سرح يقتشها

فانا بهذا الموضوع احاول ان اجمع بقدر المستطاع اجمل قصائده مع ايقاني باني لا استطيع , لان الشاعر وباختصار تحس انه في كل قصيده يتحدى نفسه ويجيب احسن من اللي قبلها وتنلحس ..

فيه قصيده اعجبتني ولها قصه وانا جبتها لكم ::

القصــة : هي ان سعد بن جدلان الاكلبي ..
جاي في يوم من الأيام يخطب عند ناس من القوم وبعد ما بغى يشوف البنت والبنت بغت تشوفه
وإذا هم يتقابلون بالصدفه في حوش البيت وكانت البنت تبي تشوفه قبل انه يشوفها بس الصدف
كانت اكبر من كل شيء وتقابلوا وجه لوجه واذا بالبنت تشوف سعد بن جدلان يعرج ومعاه عكاز
بسبب العكاز اللي معاه ووكأن البنت ماكانت متأكده من انه يعرج بس في الاخير اتضح غير ذلك
وبعدها قبلت فيه بس تعجيز ابوها حال بينه وبينها في الشروط اللي طلبها منه ...

وفي الاخير كتب هذي القصيدة وهذي هي بين اياديكم ::

اتمنى ان تنال إعجابكم ..





ياللي على شان معكازي تبين لـي=رجلي على حالها وانا على حالـي

والكسر ما هوب في رجلي علي كلي=وانت السبب في الغرابيل اول وتالي

تكفي مراسيلنا العجلات يـا خلـي=عن مخذ الاخبار والا شوف الازوالي

قلبي وقلبك توصل لك وترسل لـي =والله انها اشد من موجات الارسالي

ردن سلامي عليك وجن وقالن لـي=انك ترحب وانا في خاطرك غالـي

ليت الغرابيل جتني من عـدو لـي=إن ما تقاضيت والا بيتقاضـى لـي

لكن من واحـد ذكـره غنـاة لـي=ما زلت احبه,, وابا احبه ولا ابالـي

لامر طـرق بخدراتـه سـلام لـي=كنه يسلـم علـي بصوتـه العالـي

خلوني اسج عن موضوعه احسن لي=والا الغلا,, والله ان يبطي هو غالي




كما لا انسى قصيدته المعروفه (ون بن جدلان من لايعاً لاعه)
http://www.nzfalqlm.com/k1.wma







ولاتفوتكم هذه القصيده::


أصحاب طنش تعش و إيزي عادي شباب
يا لعنبو من حسب منهم خليل وفي

و الله ان سبع الفواسق فوق وجه التراب
أطهر من سهومٍ لا تنّطح و لا تنقضي

اللب ما يطبع إلا في قلوب اللباب
و هزمة عدوٍ مبين و لا عدوٍ خفي


وذي بعد رووووووعه::
زاومني الهاجوس ملعون أبو الأهـل
يقول البيوت العصم و يـاك و ياهـا
لا عيّنت كلمة قلت يضرب بها المثـل
لقينـا وراهـا كلمـة كنهـا إياهـا
ما تنجح مدارس فلسفة علم في جهل
و العربان ما كلٍ يقدر يكسب رضاهـا
يحاول قدر الإمكان يعني على الأقـل
يدخل في مفاهيم العرب يكسب اصغاها

وانا حاولت اجمع القصايد قدر المستطاع وهاهي بين يديكم ::



ياوليفي دمعكم في غيابي ردّ لي = وأدري انّ دمعتك خوفٍ عليّ ومن غلاي

أنت ممرضني وأشوف المرض فيكم وفيّ = الهبوب البارده منّك هبّت في حشاي

والله انّ كبدي عليكم عراويها أضميّ = والمشارب غير هرجتك ماتقطع ضماي

كيف تستغرب بطاي ومجييّ يوم أجيّ = منك اجيك أبدون رأيٍ وأروح ابدون رأي

ليلي أسهر به والا جاء النهار أشلى شوّي = مرتٍ أشلى ومرٍ يعاودني بلاي

وأنت سبّة كلّ شي ولا داويت شيّ = كيف ياقادر على داي ماتقدر دواي

بعد ما شتتوّ الفكر وأخليتو يديّ = كثرت أعلوم الشماميت وأفرحتو عداي

مابعد جاني من يوم التقو بي والديّ = ولابعد مرّ المحبين منّ حوّاء وجاي

لوّ خبر به حيّ يبكي على فقدان حيّ = كان يمدي من عرفني يشاركني عزاي

جعل يسقى يوم كان الهوى ماغير غيّ = فأول الرحله مثل مبتداك ومبتداي

======================:-

مل قلبٍ من هوى الخدرات عيّا = باقيّ له من هو خلّه بقايا

لابغيت أسجّ من سمح المحيّا = شفت من وصفه على غيره حلايا

فز قلبي وانتبه عقب النسيّا = وانحرف فكري وجارن الكوايا

راح يشرفني على نور الثريّا = لين وردني على حوض المنايا

وانّ بغيت أجيه وصله ماتهيّا = صارو العربان من دونه حمايا

ياوليفي لاتسويبي كذيّا = الخطايا لاتلحقها خطايا

مايبور بصاحبه عقب البغيّا = كود ناسٍ مالها بالله عنايا

كلّ شيٍ أعمله كود الجفيّا = الجفا يزعل وسيعين النهايا

====================:-


ياعيون اللي على المرقب تعلاّ = مايرب الا المراقيب الطوالا

طرتّك منها غثاء البال يتجلاّ = نعسٍ مابينها بيضٍ تلالا

تذهل إلّي في جواهرها تحلاّ = واهني من ذاق من ريقك زلالا

لا وجاه الله ومنّ زكّى وصلاّ = مانبيك الاّ على السنّه حلالا

مايرّد الجوع شخبٍ في المفلاّ = ولا يخضّ السعن من ذوده هجالا

أنت غالي ياوليفي لا تغلاّ = يثبت الليّ بيننا ايامٍ طوالا

واللهّ انّي ميسٍ من وصلك الاّ = فزعةٍ من ربنا جلّ وتعالا

أدخل الضولات من شان أتسلاّ = كود جرح القلب يبرى ويتشالا

والمجنّب من الأوادم مايخلاّ = لاسلم من شرّ ذولا ..جوه ذولا

=================:-

ويش أسوي ياعيون الوحش عنق الغزال = لاحصل طاريك يفتح على قلبي أرواق

لي ثلاث سنين بين الحقيقه والخيال = وأخر اشهر ذالسنّه تكمل الرابع غلاق

شبه وضحاّ فالمخاضير زاويها الحيال = من غلاها عند أهلها تبارى ماتساق

تيهّت من صغرها بين ثنتينٍ هجال = مهتويها راعيّ البل وعاشقها عشاق

عنديّ إنّك ماخذٍ تاج ربّات الجمال = سلموّك الحسن من باب صنعاء للعراق

=================:-

ياعيون مرقبٍ فعل الجداير = في صعانين الطوال المستديره

صاحبك يعطي على شوفك بشاير = ديرةٍ منتو بها ماهي بديره

من خذا منكم خفيّات السراير = والله انّ يبطي ولعكم في ضميره

لبةٍ بين المعنّق والزراير = مثل شمس الصبح قدّام السفيره

ويتفرشها من الخمري ستاير = ذيل شقراّ شعشعت قدم المغيره

جوهرة قارون غالية التجاير = أشهد انّك بهجة العمر الكبيره

واحدٍ حضّك مع حضّه يساير = شايفٍ القدر فالعشر الأخيره

جعل أبو من لامني حمر المناير = في محبّة واحدٍ مالي بغيره

=================:-

الا واعيون موحشِ مابعد لزم = عدا كلّ صقارٍ بشبكه ولا لزمه

على القلب نارٍ ولعّت في قرى حزم = وحطوّ عليها من دقاق الحطب حزمه

يقاويك بن جدلان فالصبر والعزم = لكن حبّك الصافي تغلّب على عزمه

تراني دخيلك ياوليفي من الهزم = تموت الغزو ولا يقولون منهزمه

===================:-

ياإليّ ليا جيت شيٍ تكمل أوصافه = وإلّي بلا أياك ماتهواه الأخلاقي

ترى صوابي لجا وابطيت بسعافه = يامنجّح الكيّ لاتلحق على الباقي

عامين والحال من فرقاك ملاّفه = لوف أشهب الال عشبٍ نبته أدقاقي

كمّ ليلةٍ من سببك العين ذرّافه = من غيبة الشمس لين الصبح ينساقي

ياعين حرٍ على العسرات مشرافه = عيطٍ لحاليحها تصعب على الراقي

والعنق عنق أدميّ عاود لميلافه = متذيّرٍ عقب ما أروّح ريح تفّاقي

مالك من الجسم غير المتن وأردافه = زاويه خصرٍ عليه الشبر متلاقي

لفيتني لفّ سيرٍ فوق حذاّفه = وصرفتني من هوى تلعات الأعناقي

فأدخل على امّك وأبوك من التزلافه = تبتنّي بالعذاب وتقطع أرزاقي

البرق لجا المشعّف زوّد أشعافه = وأنا مشعّف غرامك وأنت برّاقي

====================:-

ياتلّ قلبي تلّ غربٍ ربع سانيه = ماعيّن منه غير العراقي براس أرشاه

على أبو دليقٍ فوق دمث النحر كاسيه = حمار وبياضٍ يشبه النوّ من منشاه

أتشعشع أخلوم البدر لافرقّه بيديه = يشادي الضباب اليا تعدى القمر غطّاه

على عود موزٍ جاريّ الما مع ساقيه = وزدٍ على زمّة نباته قراحٍ ماه

الا واعيون الليّ كشف برقه راعيه = يتلّ السبوق وقام راع الولع يشعاه

الا يارسولي بلغّه ماقدرت أجيه = سلملي عليه وخذّ سلامه وعطنياه

لاقالو تحبّه قلت ماعادني بأبيه = وأنا أشفق له أشفا من سقيم المرض لدواه

أقويّ عزومي كنّ معاد عندي فيه = وأنا والله انّي مونسٍ البلا وأكناه

عروق الحشى ماتنبت الاّ على طاريه = تنامى على قربه وتهجر على فرقاه

فترى من يعذل مولعٍ من هوى غاليه = مثل من يحاول يعدل السيل من منحاه

فأنا شفت ناسٍ صلحوّ فالهوى تشويه = لا عيّن وليفه مخلصٍ كلّ يومٍ جاه

لوّ انّ الهوى ذالنوع محدٍ تعذّب فيه = الكل أهتنى فالحبّ حتى الطلي والشاه

==================:-

شعاني حمامٍ فوق روس النوامي خلج = تغنّي على روس النعانيع منسجمه

الاحيه من فرقاك يابو خدودٍ بلج = عسى لايم الميلاف عقرود ابو نجمه

محبتك حطّة في محاني ضلوعي فلج = كما فلج سيلٍ الواديٍ ضكتّه عجمه

==================:-

يالجّ صدري مثل لجّة حيام الطرش = على عيلمٍ فالقيظ ميرادها فرزه

على الليّ بحبّه بارشِ الضماير برش = وحبّه بصندوق الضماير طبع حرزه

حياتي بدونك يالغضي ماتساوي قرش = تكلّم على المكشوف فالنيّة الجرزه

محبّة نظيفين الظماير نظاف الفرش = مايحتاج فيها لاتخفيّ ولا برزه

عسى دعوتي يفتح لها الله باب العرش = يعاقب عبادٍ ماعرفنا لها خرزه

====================:-

ياصاحبي شوفتك عقب التشافيق = تحيي ضميرٍ دنا منه اليباسي

من لامني جعل تفجاه التفافيق = والكلّ منهم محقق ومتواسي

بقصيرات العدن روس الصناديق = عكف الأصابع رهيفات الكراسي

=================:-

يامرحبا ياصاحبي طيّب الصحبه = يليّ تصادق مع وليفك وتوفيّ له

يالليّ كلامك من غلاك اقرح به = هرجك يوسع خاطري من شفاتي له

كنّ الكواكب فيّ محيّاك منسحبه = تلعج مقابيس الدجاء من ورى الشيله

الأحساد فرقا شملنا لافرحّ به = إللّي معوشتهم على الذلّ والحيله

================:-

انا يوم اجيّ وأمركم ياوليفي حنج = ولا وديّ أقرابك تلدّ النظر فيّه

لعبّ بيّ غرامك فالخفا لعبة الشطرنج = ليا دار لعبه بين الأعضاء السياسيه

وسبح بي غرامك سبح موج البحر فاللنجّ = غفلت وغدابي حبّك شويّه ..شوّيه

لاشفت زولك قام يدخل أعظامي بنج = أسولف مع العالم وقلبي له نحيّه

===================:-

سبحان واليك ياليلٍ سرى برقه = أراقبه والعرب في نومها غرقا

ماصدّت من شوفك الاّ الهم والحرقه = بعض الملاقا تعوّضني به الفرقا

حبٍ مع حبّ غيري ماظهر فرقه = غديتّ كنّي شفيع وحبّه الزرقا

=============:-

كمّ مفرقٍ كلّ ماجيته تعديته = اشوف خطّه ولا أقراء ويش لوحاته

ياكود مفرق رقبة العطف لاجيته = يفرض عليّ الألتفاته والتنهّاته

فيّ حشمة الليّ مصافيني وصافيته = من خلقتي ماحدٍ سوّى بيّ سواته

مايسمح البال لين أقف على بيته = وأضرم له أضرامة الزيدي على قاته


=======================:-

انا الليّ همومي صايراتٍ عليّ كدر = لوّ انها تحوّل فوق غيري فقد عقله

لامنه اشتغل موضوعها داخل الصدر = تقلّ فايزٍ وسطه فريقٍ يصفقّ له

على الصاحب الليّ مانويناه بالغدر = شفوقٍ عليّ وانا ماغير أتشفقّ له

بنا بيت حبّه فالحشا واسس الجدر = وخلاّ معاليق الضماير تخافق له

=====================:-

ياكبديّ الليّ من الحرمان منهشمه = فيها من العام نجارٍ بشاكوشه

والليّ هشمها شفاتٍ دونها حشمه = أرهى على الليّ تبي نفسي ولا أنوشه

حجزٍ يرّد الرجاوي من ورى خشمه = وأنّ رده الحجز والاّ ضاع فالطوشه

عمّر بيوتٍ على بيبانها رشمه = وبطونها بأفخم الشيراز مفروشه

=================:-

مدري متى تقدرين المشيّ يارجلي = حتى لامنّي بغيت الازم أنهجله

أمرّ راع العيون النعّس النجلي = الليّ لذا الحين وجروحي منه وجله

هرجه كما السكر الليّ في لبن هجلي = لا روّحت من نبات المكر والرجله

مدامعٍ من بشاشتها تبلّجلي = أشفي لها من لأغاره والشفق لجله

ويضفيّ على لبةٍ كالوهرّ المجلي = شقرٍ تقل من حرير الهند ينسجله

=================:-

أنا وين أبلقى يالاجاويد فاعل خير = حريصٍ على سرّ المحبين لارسلته

أناّ لوّ أبصبر عام مابان بي تأثير = وهالحين حتّى الصبر يومين ما أحتلته

أنا مثل صقارٍ تولّع بحبّ الطير = ولف قلبه فروخ الصورايم وهبلته

تولعّت في فرخٍ قضيبٍ يتلّ السير = ابيّ نظرتٍ من لفتة الحرّ وسبلته

صغيرٍ بسنّه غير عندي ماهو بصغير = يامغلاه في قلبي وياكبر منزلته

أجمعله سمان الهرج خوفٍ من التقصير = والى جيت ابشرح له كلامي تهيزلته

يجيني منّه هيبه . معزه . سحى . تقدير = اقابله عندي علم وأروح ماقلته

وفي الاخير اتمنى اني وفقت في الموضوع واتمنى من كل واحد يقولي وش ازين قصيده اعجبته وتقبلوا تحياتي,,