الله يذكر أيام الاختبارات بالخير 
والمواقف كثيرة وبعضها طريف والبعض الآخر حزين
من المواقف الطريفة .. هذا عام 1416 << شايب كنت اختبر اولى ثانوي وكانت المدرسة مستأجرة .. يعني الله بالخير قديمة جدا لدرجة ان نفس المدير متخرج منها المهم كنا نختبر في قاعة كبيرة .. والأمور ماشية تمام ولله الحمد
والأمطار برى تضرب بقوة .. ومانسمع الا صوت قوي .. جدار المدرسة طاح 
وتصير حوسة مابعدها حوسة .. طبعا الثلاث صفوف اللي بالأخير هجوا مدري وين راحوا وبعد عدة لخبطة وحوسة قرروا انهم يكملون الاختبار .. تخيل تختبر والشارع وراك وفيه طلاب مخلصين الاختبار ويدورون بسياراتهم برى وفيه بزران من حقين الابتدائية متجمهرين وانواع الضحك علينا بعد ماخف المطر طبعا عاد من بكرة حطوا شبك بدل الجدار المنهد بس بصراحة موقف قوي ما أنساه 
......
وهذا موقف ثاني .. عقب التخرج بامتياز من الثانوية وأيام ماكنت بالجامعة << دافور جاني واحد من اصدقاء اخوي وقال ابيك تدرسني .. هو يدرس في الكلية التقنية ..
وقعدت ادرسه طوال ليلة الاختبار حتى الصبح وهو دلخ مايفهم شي آخر شي قال لي شرايك تدخل بدالي الاختبار واعطيك الفين ريال!!!
قلت طيب << بعد السعبله بس كيف الوضع وهل فيه من المدرسين يعرفون خشتك .. قال كلهم مايعرفوني ماعدا مدرس الرياضيات .. وهي نفس المادة اللي بدخل اختبرها بداله
قلت اوكى بالعادة مدرس المادة مايراقب في اليوم اللي فيها الاختبار لنفس مادته
ورحت وقعدت بالقاعه ووزعوا الاوراق وحليت والامور ماشيه تمام
المهم ويدخل مدرس المادة يقول فيه احد يبي يستفسر عن شي او حاجة زي كذا وقعد يدور بين الطاولات ويبين للطلاب بعض الاسئلة
وانا اقول وش فيه طول ورى مايطلع المهم كان فيه مراقبين اثنين غير مدرس المادة اللي يعرفه خويي ...
ويجي مدرس المادة ويقول للمراقبين اطلعوا انا اللي بستلم الاوراق من الطلاب
وقتها قعدت ارجف قلت بس رحنا وطي المهم قلت خلني ما اسلم الورقه الا اذا قام معي اكثر من طالب عشان مع الزحمة مايدقق
وشفت مجموعة من الطلاب قاموا يسلمون اوراقهم وقمت معهم ومشيت الى ان وصلت الى نص المسافة بين مقعدي والمدرس
وهو شافني وقال انتظر مكانك شوي الين اخلص الطلاب اللي عندي
وقتها ماكنت اقدر ارجع الى مكاني لاني خلاص صرت بالنص على مرأي ومسمع من الكل عاد وقتها قلت انه خلاص يبي يكفشني .. لكن ابي اسلمه الورقه واذا قال مو انت مسكت الباب وهجيت وخل خويي يسقط ماعلي منه .. طبعا استلمت الف ريال مقدما المهم قال لي تعال ورحت له وقال وش اسمك وقلت له الاسم وقال وقع هنا .. ووقعت وطلعت من عنده وانا ما استوعبت شي وطلعت لخويي عند الباب وعلمته السالفه وماصدق .. قال شكلك ساحر ....
اعذروني على الإطالة
تحياتي
