أهلين شبابين وشبابات وشبابات المجلس

يا الله انك تحيي هالربع

يا طوال العمر والشوارب والأظافر

أنا لا أجيد المقدمات.. ولذلك أباخش في القصيدة على طول
>> وش عنده خلف مشعان؟


التفاصيل التالية حدثت قبل نيف من الزمن ومبطي :
قالوا لي أصدقاء السوء حبايب قلبي يوجد بالانترنت موقع(ن) يسمى فيس بوك Facebook
هالموقع من خلاله تقدر تلقى أخوياك الذين غربهم الوقت عني وأقسموا إني يجب أن اشترك به
طبعا اشتركت به

بداية القصة نصبة طبعا

كل ما في السالفة انه جتني دعوة على الايميل تدعوني للاشتراك في هالموقع وانا ما كذبت خبر
ولا أخفيكم بأني لقيت التسثير من اخوياي اللي انقطعت عنهم من زمان .. ومع كل صديق ألقاه تمطر دمعة من عيني
وأكيد في لحظة بتجي بيجف دمعي المهم تبون الصراحة والا بنت عمها فيفي؟ الصراحة تقول
ان 0.01 % من اللي في الموقع هو إعادة علاقات منقطعة زي اللي صار لي مع 3 من اخوياي
>> كل هالدموع وآخرتها 3 بس
المهم السؤال الـ 100 % الباقية وش يسوون؟
>> بالله بالحساب ذا ما اصلح نصراوي؟

من خلال بحثي في الموسوعة العالمية الدولية للمصطلحات الغير مهذبة ووجدت ان الكلمة الأنسب:
تميلح وتشبيك

خلوني أشرح لكم وش اللي يصير

كل واحد من الزقرت والزقرتات ينشأ له ملف شخصي
وفي الملف كل يحط صوره ويتميلح!!


البنات المحتشمات مرة يحطن صور جوالاتهن

المحتشمات نص ونص: صور ايديهن وارجولهن

الداجات: صور وجيههن وشعورهن بس مقصقصة

أنا أتكلم عن بنات سعوديات

الوحدة مضيفة لبروفايلها مئة ولد والبنات والعيال أنواع التميلح

وفي ليلة من ليالي البكيرية الليلاء اجتمعنا أنا ومجموعة من أصدقاء السوء اللي فيهم شوية خير
اجتمعنا للنقاش
ومن برنامج النقاش اننا ندخل بروفايلات العالم ونقرا التعليقات


خلوني انقل لكم بعض التعليقة الماصلة:

woooow ya loooli yaddek marrrrra cute
القراءة العربية: واااو يا لولي يدك مرررررا كيوت

الترجمة:
واااو: يا للهول
يا لولي: نداء للبنت المؤنثة << أهم شي انها مؤنثة
يدك: يدك
مرررررا: جدا جدا
كيوت: مؤثرة


woooow enti marrrra wooooow
وااااو انتي مرررررا وااااااو

الترجمة:
وااااو: اوف
انتي مرررا وااااااو: تميلح صريح


وغيرها

هذي من أكثر التعليقات المؤدبة

عاد حنا جت ببالنا خطة شيطانية
وقررنا بعد المباحثات الكبيرة اننا نسوي قروب بالفيس بوك وسميناه:

واااااو مررررا فيس بوك

وكان الهدف من القروب الذب على العالم
وحطينا القوانين التالية

• توظع صور غبية لا يوجد فيها أي نوع من الإثارة (صورة صحن فول - صورة جوال اريكسون القديم)
• يجب على الردود أن تكون ماصلة جدا وألا تحتوي على أي شكل من خفة الدم
• يبدأ كل رد بكل (واااو)
• تكتب الردود بالعربية احتراما للي ما يعرفون يقرون عربي مؤنجلز

وكانت النتيجة انضمام شعب كامل للقروب
وكانت التعليقات ماصلة ولله الحمد

إلا واحد من شباب الفيس البوك الـ وااو
دخل وقفط عندنا خطأ إملائي في القوانين وقام يهزئ يقول:
يقول توظع تنكتب بالـ ض ما تنكتب بالـ ظ

حنا أذهلنا هالشخص.. فشنينا هجوم كاسح عليه من باب المصالة

(وااااو انتا مررررررا شاطر في الإملاء)

(وااااو انتا مررررررا تعرف الألفابيت)

(وااااو انتا مرررررا لماح)

كانت النتيجة انه ما عاد طب القروب


الحمد لله اني طلعت من الفيس بوك محتفظا بسمعتي

بعد ما اكلنا لحوم المماليح

لكن سؤالي العجيب:

متى يجي اليوم اللي ينتهي فيه التميلح في وطننا المعطاء؟ >> لازم السؤال يصير بالفصيح


ثانكس <-- لزوم فكرة الموضوع

خلاص انتهى الموضوع الهادف والفيسات الكثيرة