نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

ابو طـــــلال · #1 15/12/2007, 05:34 AM

اعضاء منتدى الزعيم الكرام

تحية طيبة وبعد .....

مالكم بالطويله ...... واللى يدور تنسيق عندي ترى مهوب لاقي ...

اسرع واحد يكتب موضوع ......... واسرع واحد يرد ..... واسرع واحد يوقف .. واسرع واحد يرفع عنه التوقيف

طلعت برائه

المهم ...

المثل يقول : كل اللى يعجبك ... والبس اللى يعجب الناس ...

اتوقع هالمثل واضح .. لأن الاكل يدخل البطن ومااحد يدريبه ... اللبس كلن يشوفه ...

طبعا مجتمعنا والكل يعلم محافظ ... له رائيه المخالف بالاكل الجديد .. ( همبرقر مثلا )

.. واللبس الجديد ( جينز المشقق مع الركبه )

.. وحتى الأغاني الجديده ( بحبك ياحـــمــ ؟؟ )

شيبانا الله يخليهم لنا .. ويطول لنا بااعمارهم ... اول ماتدخل عليه يناظرك من فوق لتحت .. تقول يبي يخطبك ...

واي مظهر خاطيء من وجهة نظره .. او تصرف غير محسوب .. تكون انت ( سالفة المجلس ) ..

عاد الشيبان .. ماعندهم غير سوالف :: (شباب هالوقت )...( واسرائيل) ...(والعماله البنغاليه) ..

هذي القضايا اللى تطرح وتناقش دائما في مجالس شيباننا الكرام .... وانا طاير بالعجه معهم .. اايد .. واستنكر معهم ... المهم نطلع من ذيك الليله بسلام بس .( اعطيهم جوهم )

انا والله ماالوم بعض الشيبان من تصرفات شباب هالوقت .. مثلا ,,قل الدبره .. صب القهوه ... توجيب الضيف واحترامه ... الرد المناسب للي اكبر منك امام الضيوف ...

مثلا واحد يصب قهوه باليمين ويمد الفنجال باليسار ؟؟ ويقول خذ !! حتى ( سم ) مايعرفها

تذكرت الشايب اللى صب له واحد شاب ( خكري )باليمين ومد الفنجال باليسار .. قاله الشايب : .. يسارك يمينك .. ويمينك يسارك .. قال : طيب تعرف تقول بطة بطتنا بطت بطن بطتكم ؟؟( قلها خمس مرات )

المهم =========

واحد ثاني رايح عزاء .. وابوهم مصدوم وهو لابس جينز ومربص شعره بالجل ؟؟ ويقول .. بعد هو حمار مايشوف قبل مايقطع الشارع ؟؟

<<<<<<< تراها نكته مهيب صدق

صحيح شباب الوقت صاروا (يفتون) = ( يحوفونه ) يعني ماهرين بالكمبيوتر .. يتكلمون لغات ... وهم صغار اذكي من صغار قبل ... صاروا يبخصون كل شي بالتكنلوجيا

بس فيه اللى اهم من هالامور بكثير .... امور المرجله والسنع ... هذي مايتعلمها من كمبيوتر .. ولا من دورات ... مايبخصها الا من فطره وحرص الوالدين من الصغر ... على غرس هالشي

الشخصية القيادية ... والمراجل ... والشهامه .. كل هالصفات امور لايمكن اخذها بالممارسه والدراسه .. هي من الله قبل كل شي طبعا... ثم التربيه... وتصرفات الوالدين قدامه وغرس هالصفات فيه .. والعود على أول ركزه

تعلم من ابوك واخوك الكبير ........

علم اخوك الصغير وابناءك اللى تعلمته من ابوك واخوك الاكبر منك ....

وصل الرساله اللى اخذتها من فوق .. لتحت ... لاتوقف عندك وتكون انت السبب في ظهور اجيال ماصخه للأسف !!

========================= انتهي

سالفة السرسري نمرة واستماره جايه بالطريق مانسيتها :

لي عم من القصيم جاي قبل مده ( طازه يعني ) وهالعم انا احبه حيل وامون عليه ويمون علي ....
وانا عمري مالبست خاتم

حتى الساعه ماالبسها .. كذا من ربي

عرفت انه جاي من القصيم رحت اسلم عليه .. وانا لابس هالخاتم .. وثوب لون اصفر .. ومالبست شماغ ( مفرع ) ومتشبب ( طالع ماشالله وش حليلي )

الثوب الله حق كان طويل وقماشه قطني ..

انا سلمت عليه ولاحظت نظراته لي

...... يوم انتصفنا بالجلسه وخلصنا سلامات وتهلي .. قالي وش ذا يابو طلال ؟؟ قلت وشو ياعم ( وانا داري انه بيذب )

قال وش هالخاتم .. وهالثوب الاصفر الطويل ... وهالشعر اللى لاطسه زيت زيتون غادن تقول راس هندي ؟؟؟

قلت وش نسوي ياعم نبي نغير ونتشبب ... ( والله البلشه)

قالي سجل عندك ( سرسري نمرة واستماره ) على هاللبس

ياحبيلك يابو محمد ... ياعميمي

من هنا فكرت ... اني انزل موضوع ... عن القيم والأعراف والمراجل ... هل اندثرت او مازالت ؟؟ او قلت ... ننتظر اراء ومشاركة الجميع .... حتى البنات ....

وعلى طاري البنات ... عجوزي الغاليه تقول واكيد كلكم تعرفون هالشي وتقدرون تسالون من امهاتكم او من جداتكم

: اول البنت اللى ماتزوجت ماتقعد مع حريم متزوجات ... تروح فوق .. تدخل غرفه ...... الحين ... البنت تسال الضيفه .. ماخبرتيلي عريس لي ياخاله ها ها ها ها <<< خير ؟!!

تقبلوا تحيات اخوكم الصغير ابو طلال