نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

هلالي وشقاوي · #1 03/12/2007, 04:09 PM

وشلونكم عساكم طيبين والله من زمان عنكم لاحد يقول وراك مختفي وماعاد تكتب ترى بسطره

=====>>

والله ماحد درى عني عارف .

" المهم "

بقول لكم موقف صار لي طبعا أنا تلقفت يعني مثلي مثل أي شاب سعودي مافيه فرق

لاحد يقول انه موب ملقوف ولا يحب الإشراف

طبعا أنا ساكن في شقه والعماره اللي انا فيها فيها 16 شقه ======>> مستانس الإيجار رخيص

قبل أربع ايام وانا زي العادة ابي انام قالت لي زوجتي انها تسمع اصوات غريبه قلت لها انا كيف الحال بس لاتوسوسين مافيه شي . وكملتها نومه وهي طبعا تعرفون البنات خوافات وجلست تحاول تتسمع ، أخوي اللي أكبر مني طبعا ساكن في نفس العمارة ، اجتمعوا الاهل عند الوالده الله يطول في عمرها

ويشفيها قولوا آمين ، قالت لهم زوجتي انها تسمع اصوات غريبه انقزت مثل الاسد اللي شايف له

دجاجه فيها انفلونزا زوجة اخوي وقالت ايه هذا جارنا الشقه اللي بجنبنا أنا سمعته يضرب زوجته والظاهر اخت زوجته او اخته ويقول لها كم مره انا قلت لك لاتكلمين بالجوال وش الانتظارات هاذي

انتي متعرفه على احد ومن الخرابيط هاذي يعني الرجال فيه مرض الشك .
طبعا زوجة اخوي ماسذب عليهم ابد

طبعا الكل صدق السالفه وبما فيهم انا يوم قالت لي زوجتي صدقت وقلت يمكن كل شي جائز

البارح طلعت وقلت خل أحمي السيارة دائم الأهل يخلصون اغراضهم ثم ينزلون لي نزلت زوجتي طبعا خايفه وتقول لي أول ماركبت ياخي شف جارنا هذا ماغير يضرب زوجته اسمع الصراخ وكانت مره مرتاعه . طبعا قلت لازم اسوي عمل بطولي وانقذ الزوجه شوفوا وش صار أو تقدر تقول اول خطوات اللقافة .

1 ـ نزلت من السيارة وقعدت عند بابه اسمع الصوت الا صوت صراخه

قلت ياولد لازم انقذ الزوجه ضربت الجرس وعلقت عليه شوي ثم انحشت اركض قلت على الاقل يبي يوقف شوي ثم يرجع يكمل عليها بس على الاقل يبي يحس انه في أحد سمعه . الخطه مع الاسف لم تنجح

. لاحياة لمن تنادي .

2ـ قلت ياولد للحين الصراخ مالك الا تاخذ احتياطاتك وتطق الباب لين يفتح لك وآخذ سكين خضره توني مقطع فيها تفاح واحطها في جيبي واجلس اطق عليه الباب ومازال فيه اصوات داخل البيت طبعا اصوات غريبه شوي . المهم فتح ابو الشباب قلت في نفسي لو اقول له وش فيك على زوجتك اكيد يبي يقول لي وش دخلك " عاد انا جالس اتخيل يطلع رشاش او مسدس ويرميني

"
المهم طلع عليه سروال قصير وفنيله علاقي صفراء ومكشر وحواجبه معقده قال نعم . " ترى انا ماخفت لأن معي سكينه الخضره "
قلت له سلامات اسمع اصوات غريبه عسى مافيكم شي ترى انا اشتغل في الهلال الأحمر وعندي واسطه في مستشفى الشميسي على بالي افزع .
ضحك هو وقال اقلط خل نعطيك فنجال واعلمك وش السالفه اي والله نبيك تفزع جلست في المجلس

والرجال دخل وتأخر علي وانا اقول في نفسي اللحين وشلون اصفقه هذا اكبر مني جسم وبعدين شكله شراني

وتلعب فيني الوساويس وانا اطلع السكين واحطها تحت المركى ==> موب عاقل رامبوا

المهم الاصوات مازالت فيه شوي شوي بديت اميز الصوت

وشو ذا

ياإلاهي انه صوت ببغاء

دخل الرجال ومعه القهوه ومعه الببغاء وفعلا اللبغاء ماغير يصارخ تقل حرمه استغربت وانثبرت في

مكاني وصار لون وجهي فوشي من الفشيلة تقهويت عند الرجال وطلعت مثل الذئيب وانا امسك زوجتي واكفخها وقلت لها تراني اقدر اجيب مسدس واقتل انا مايهمني ==> أسد في البيت نعامة في الحروب
طلع الصوت اللي عنده ببغاء طبعا هي ماصدقتني .

الخلاصه :

انتبه في يوم من الايام تصدق سواليف البنات ترى لو السالفه تافه تصير عندهم وش كبرها
اترك اللقافه تراها أحيان موب زينه وحاول تتجنبها وعود نفسك على كذا .
الاشراف يعتبر نوع من انواع اللقافه وأكثر مانشوف اللي يشرفون لاصار حادث وكم من نفس ماتت او تأخرت حالته الاسعافيه بسبب الإشراف .
أخيرا تتوقعون جارنا حصل سكينة الخضره اللي نسيتها تحت المركى