نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - «¤¶`صاحب القلم الساخر /هلالي الظهران .. ضيفاً على حياة @ نت `¶¤»

الـمـشـاغـب · #22 09/11/2007, 11:30 PM

إقتباس


	ضيفنــا المتألق صاحب البسمه والقلم الساخر هو .. / «¤¶`هــلالي الظـهـران `¶¤»

يا هلا والله وغلا بالساخر المسخرة هلالي الظهران

أخييييراً جيت؟ اشتقنالك واشتقنا لمواضيعك يا شيخ يا مسخرة

إقتباس


	قلت: بس يبه أنت تحب البنات.. لاتفهمني غلط بس اذكر انك وصيتني قبل أسافر المره الماضيه وقلت.." اذا ودك تتقن اللغه تعرف على بنيه ترطن انجليزي وبترجع بلبل"

ــههههههههههههههههــ

أذكر مرة فتحت جهاز خويي اللي كنت أظنه عاقل وما كان موجود .. وما دريت إلا بنافذة تطلع لي .. أثرها حق

برنامج السكاي بي اللي ما كنت أعرفه .. المهم تلقفت بما أني أنا وخويي واحد .. ورديت على نافذة المحادثة ..

طلعت بنت أجنبية

بربرت معها شوي بالإنجليزي شي أفهمه وشي أمشيه لها

طبعاً كان كل شي كتابة بس ... بس حسيت بثقة وحسيت أني انقلش مان

عشان كذا نويت أشبكها وأطقطق

عليها بس عشان أتعلم انجليزي مو عشان شي ثاني صدقني

سألتها وين ساكنة ووين تدرس وكم بوي فريند معها

وأشياء كثيرة ... لحد ما وصلت إلى السؤال عن شكلها

ولون عيونها وشعرها

يوم وصلت لهالأسئلة الأخيرة خفت إنها تعتبرها لقافة مني وتحذف خويي اللي تحسبني هو

ما دريت إلا وهي ترسل لي ملف .. وتقول لي اقبل شف صورتي

يلعن أم الفلة يا حسام

... لو كنت أدري أن بناتهم كذا كان قلت لها من بداية الكلام : تطلعين معي؟

المهم استقبلت الصورة .. وليتني ما استقبلت

قسم بالله حرام أقول انها بنت

هذي لا بنت ولا ولد .. لا لا .. هذي مو آدمية أبد ... هذي غوريلا .. حمارة القايلة .. مسخ .. لو أقول عنها ما أقول

ما راح أوفي حقها من البشاعة قسم بالله

لا ومن زود الثقة تسألني عن رأيي في الصورة

طبعاً قلت لها .. مو حلوة .. كنت أبي أقول بشعة بس والله ما عرفت معناها

أرسلت لي صورة ثانية أقل بشاعة من الأولى .. بس تبقى بشعة ..!!

ما يحتاج أقول وش سويت بعدها

طبعاً قفلت البرنامج على طول وقلت .. أبوها لغة وأبوها بنات أجنبيات

إقتباس


	وان الحينا في مناقشته بدأ باستخدام طلاسم كأن يقول:" وجد في مكتباتهم العامه بين مؤلفاتهم بون شاسع ولمخطوطاتهم مطايفات متناقضات بنسخٍ متقطعات وخرومات في الافكار....." (سامحني أستاذ خالد والله اني احبك )..

فعلاً بعض مدرسين الدين من زود حماسهم .. يجيبون كلام مو مقنع أبداً ..

مثل ما ذكرت أنت .. أذكر مدرس عندنا كان بخامس ابتدائي .. يقول أن اللي يحارب الكفار دفاعاً عن وطنه

ما يعتبر شهيد .. لا بد يدافع عن الاسلام..

أذكر أني قلت له .. ولكنه يدافع عن أرضه يا أستاذ .!! قال لي : الأرض لله وليست للبشر ..!!!

إقتباس


	كان نهار لابس بنطلون اخضر وفانيله صفراء.. وصادفنا وردتين ملكعتين.. قامت وحده منهم لبسته كاب أحمر والثانيه قالت: أنت الحين مشروع اشاره ناجح (ههههه الله ياخذ ابليسها ذبه في الثمانيات )..

ــههههههههههههههههههههههههههههههههههــ

والله في التسعينات بعد

الله يهدينا وياك يالداشر

إقتباس


	عقبها علمني ان الرقم السري مغطى بطبقه لازم أكشطها:p

ــهههههههههههههههههههههههــ

أموووووت في الدلاخة يا ناس

داشر ودلخ وجحلط .. مدري وشلون تركب فيك يا عمر؟

إقتباس


	ياخي اعنبوا ثقالة دمك واعنبوا اللي علمك ترقم يا السطل.. أجل بامريكا ويسمع خالد عبدالرحمن

ياخي وش فيك على الرجال؟ محمل الأغنية من النت تراه

بس والله ضحكت ضحك على هالمقطع الله يسعدك ذكرني بموقف قديم

إقتباس


	وانقفل معه بوجهي اخر أمل بالاقلاع

هم اللي خسروك أخوي عمر مو أنت اللي خسرتهم

الاقلاع سجلت فيه ومدري متى فعلوني .. لأني سجلت عشان أحمل من عندهم فيلم كارتون بعد ما سويت بحث

في قوقل وحصلته عندهم

رجعت لهم بعد مدة مدري ليه .. ولقيته تفعل .. بس ما كتبت فيه ولا رد .. وبعد فترة طويلة جاني صديق بالماسنجر

وطلب موضوع زاحف عشان يفعلون له .. تذكرت أن عندي يوزر وعطيته اياه وقلت له اطلب تغيير الاسم عشان ما ابلش

بك إذا تخرفنت وشوهت سمعتي فوق ما هي مشوهة

عاد مدري عنه الحين تغير ولا ما تغير .. ما همني ..!!

الزبدة من كل هالكلام .. أن الموقع هذا ما جاز لي أبد .. أحس أن كل واحد فيهم يستخف دمه ويبي يطلع دمه خفيف

حتى لو كان العكس..!! ما أقول أن ما فيه أقلام تجبرك على الاستمتاع بقراءة ما تكتب .. بالعكس ..لكني أقصد أنك

وأنت تدخل هناك وتقرأ بعض الردود تحس أنك داخل مسرحية سامجة تجيب لك الغثا

إقتباس


	يبدأ الاستلكاع والنصبه الأزليه ان مالهم يوزرات بالشبكه لكنهم متابعين فقط .. بالمناسبه أعتذر لأي شخص انصك ببلوك خلال دقيقتين ..

يا كثر ما يغثك هاللي يستلكع

كنت مثلك أستخدم البلوك .. بس الحين اكتشفت طريقة جديدة

جربتها مرة واحدة .. بس حسيت بالذنب وتراجعت عنها مؤقتاً

الطريقة هي أنك تحط إيميل الشخص المستلكع على التوبيك .. وتكتب : " إيميل أضيفوه وإن ندمتم فأنا المسؤول "

بعدها بتجيه الإضافات من كل حدب وصوب على أساس أنهم مضيفين بنت

وبهالطريقة بيكره الساعة اللي أضافك ويمكن يحقد عليك .. بعدها صكه بلوك أو بكيفك

إقتباس


	ولا أجد حرجاً أن اقول انه من خلال بعض الاصدقاء في الشبكه جاني عرض من أحد الملاحق الاسبوعيه لاحد الصحف السعوديه بالكتابه معهم

ما شاء الله .. بس ليه ما قبلت؟

بس غريبة طلعت صحيفة سعودية؟

كنت متوقع أن العرض بيجيك من احدى المجلات الأوربية المتخصصة مثل ****

<<< تم حجب اسم المجلة من قبل مدينة الملك عبدالعزيز

إقتباس


	ومن هذا الباب تواجهت خلال احد الجلسات مع زميلي الجامعه..صاحب الابتسامه الدائمه والروح المرحه المطوع "المشاغب"

بكل أمانة .. هلالي الظهران " الداشر" من الشخصيات اللي أفتخر بالتعرف إليها من عالم النت ..

كنت أظن أني بأشوف داشر طعس قدامي .. لكن تفاجأت بشخصية عمر خارج النت ..!!

رجل بمعنى الكلمة .. خلوق .. هادئ .. يقدر الشخص اللي أمامه .. صريح .. جريء .. صفات كثيرة أعجبتني فيه

وأحببت أن أقول بعضها ..

صح أن المدح في الوجه مذمة .. لكن لازم أقولها في وجهه عشان يدري أني أمدحه ولا وشو له أمدح فيه؟

مثل ربعنا اللي ما يعطون الشخص حقه إلا بعد ما يطس ويموت ثم يقعدون يبكون عليه ويجيبون فيه معلقات المدح

الزبدة : تراي مدحتك يا عمر .. لا تنسى تمدحني بردك

<< وربي أمزح ياللي تصدقون على الريحة

إقتباس


	ختاماً.. أعلم اني أطلت كثيرا وأكثرت من الغث ومالا يفيد فالعذر والسموحه منكم واستروا ماواجهتم .. بالتوفيق للجميع..

بالعكس يا عمر .. والله حلقتك من أجمل الحلقات وأروعها .. قرأت كل حرف فيها واستمتعت بدون مجاملة ..

وبصراحة .. أعتذر ان كان ردي طويل حيل .. والله كنت أبي أقتبس شوي وأرد رد خفيف .. بس ما دريت إلا وكل

شوي يجيني كلام وأكتبه الله يخسك

الله يعطيك العافية أخوي أبو سباستيان .. ونتمنى رجعتك القوية للمنتدى

----------------

فل ستوب .

قرأت الردود وأعجبني رد وأحب أن أعلق على على سطر واحد منه.. وهو رد أخت الجميع الهنوووف :

إقتباس


	بس ماحب الجـراة في بعض المواقف >>>>لازم اذم شوي

أصفق لهذا السطر من اليوم لين بكرة وأرفع لصاحبته علم أزرق

بعض التجاوزات تحصل من أي عضو مهما كان .. أنا أو عمر أو الهنوووف أو ماجد مقبل أو أي شخص يكتب ..

ما فيه أحد معصوم من الخطأ ..!!

لكن المشكلة في البعض .. أنه اذا حصّل شطحة من المشاغب أو أي شخص آخر يقوم بالرد عليه .. ( وهذا شيء طيب )..

لكن إذا حصّل شطحة من شخص معين حتى وإن تكررت شطحاته .. يقوم يمدح موضوعه ويشكره على كتاباته ويبدي

اعجابه بهذا الشخص ويتغاضى عن شطحاته

نقدر نقول عن هذا غير المنصف أنه يعاني من مرض نفسي أو انفصام في الشخصية؟

أكرر اعجابي برد الهنوووف .. وما أقصد من اعجابي توريطها مع عمر .. بالعكس عمر صدره وسيع وما يزعل من

أي كلمة يعرف أن صاحبها ما قالها عن حسد أو غيرة وإنما قالها من باب الصراحة وعدم المجاملة