قصيدة للشاعر سعد المطيري
******
يابنت ياللي صافي القلب بعتيه *** سبة كلامٍ صار عندي مذمة
هد الغرام وهد حبٍ بنــــــيتيه *** لوتجمعين سنين محدٍ يلمـــه
قلتي كلام وعارفه ويش تاليه *** عذرك غشيمة والغشيمة مطمه
غرك حلاك وزين محدٍ يضاهيه *** وانك على ماقيل عندي مهمه
كنتي امل طفلٍ من سنين بانـــيه *** شافك حياته وانزح بعض همه
حطك غلا احساسه وروعة معانيه *** واستاذن عروقه وخلاك دمه
عشتي معاه وكل شي خذيــــتيه *** وقسمك معاك وماخذه زود قسمه
محدٍ لحقك بلوم والا مشاريــــه *** دام الطفل راضي على بنت عمه
اطفال كنّا والجفا ماندانــــــــيه *** واليا زعل واحد..هذا يشيل همه
كثرة شقاوتنا مع الهم تمحــــيه *** ياطيبنا نسوى لنا شعب وامــــه
اسرق قصيد الحب وانتي تغنيّه *** مجرم قصيد وماحلى فيك جرمه
تعالي نتذكر من الحب ماضيه *** حبٍ تعلىّ فوق قمرا ونجمـــــه
استشهد بموقف ولانيب ناسيه *** قلتي سؤال وجبت لك فيه حســمه
كنتي خجوله يوم قلبي سألتيه *** طفله أسألت والطفل جاوب وأتمه
قلتي من اغلى إنسان عندك وتغليه *** رد بثقة...ثم قال ماغيرها امه
وانتي من الغيره سؤالك تعيديه *** وعاد الجواب امه..بصوتٍ وهمه
وقلتي انا..واشر على القلب ثانيه *** وقمتي ورديتي على الرد بسمه
ومر الزمن والحب باقي معانيه *** وانا دعاني داعي الحلم يمــــــّه
خذتني الغربه على حلم بانـــــيه *** حلمي الوطن..لابد يوم وأخدمه
ورجعت ضابط دعوة امه تراعيه *** تدعي له الله لاينسيه عزمــــه
وتحقق الحلم وبقى بس تالـــــيه *** حلم الطفوله..ماحلى ان قيل حلمه
نشدت عنها قالو الناس لـــــبيّه *** صارت عروسة واهنّي من تضمه
وجيتك خطيب وقربك اليوم شاريه *** حلمي وحلمك ..باقيٍ له متمه
قالو لها شرطٍ تبا منك تـــــــوفيه *** قالو تقول البيت ماياسع امـــه
ضحكت من قلبي وانا اقول ياهيه *** قولو لها...ردي ترى بس كلمه
رد الطفل يوم انك انتي سألتيه *** هو نفس ذاك الرد جدهّ وقدمه
قولو لها كل شي يمكن يسويه *** الا يبيع امه علشان حرمـــــه
