هلا والله اخوي البروفسور ..
يقولون انك قديم واجد في الشبكة ..
لكن انا والله ما دريت <<< طيب طالع بتاريخ التسجيل ..
ولكم باك يا صاح .. وحياك الله مجددا معنا ..
<<< اضافة كلمة " مجددا " تمت بحسب التعديل السابع في سلوم القبايل للمادة 17 تقسيم خ من الباب الاول والمعنون بـ " وشلون ترحب بالضيف " ..

موضوع رائع وافادني الصراحة كثير ..
وخصوصا الاخ الحبيب خليف المقرود والهزاني العاشق ..
وفيه بيت استوقفني بصراحة ..

إقتباس له ريق .. أحلى من حليب الجزالا ................و أحلى من السكر .. إلى جا من الشرق

مشاكل الهزاني خراب الله يكفانا الشر ..


نجي لإضافتي انا ..
هذي السالفة علمني بها جدي الله يرحمه ..
قال لي مرة : عبيط .. تبيني اقول لك سالفة ..
انا : لا ما ابي ..
جدي : يا ولد عيب عليك .. اسمع السالفة ..
انا : طيب هات اشوف ..
جدي : ايييييييييييه يا ولدي ...
انا : ايييييييييييه يا جدي ..
وبعدين بدأ جدي يسرد السالفة كاملة .. وهي صارت من حدود 100 سنة في منطقة نجد ..


خلف .. و .. نمر
فارسين شهمين وذيبين من ذيابة جماعتهم ..
تربوا سوى من صغرهم .. وتوطدت علاقتهم الين صاروا اكثر من اخوان ..
وكانت لهم رحلات صيد وقنيص تطول احيانا لأشهر ..
وغير كذا وسيعين صدر وجلستهم ما تنمل ..
وكان الرابط المشترك بينهم ان كل واحد هو وحيد اهله ..

مرت ايامهم وحياتهم بدون مشاكل ..
الين جاء اليوم اللي كان مضطر فيه خلف انه يسافر لحاله ولا عطى نمر خبر بالسبب ..
افتقدوه بالقبيلة وسألوا عنه ولا لقوه ولا دروا عنه وين راح ..
الوحيد اللي كان يعرف وين راح هو ابو خلف ..ومع كذا كان يتظاهر بعدم المعرفة ..

كان ابو خلف مرسل ولده في شيء يبيه يجيبه ..لكن القدر كان اسرع ..
وتوفى ابو خلف قبل لا يرجع خلف ..

رجع خلف ونمر برى القبيلة في مقناص له ..خلف رجع ومعه حرمتين ..
الحرمتين هذول يصيرون اخته وزوجة ابوه اللي كان ماخذها من قبيلة ثانية ..
تفاجأ بخبر وفاة ابوه ..وكان يبي يرجع الحرمة وبنتها لخوالها ..
لكن اضطر انه يترك عمته تكمل العدة في بيت امه ..

بعد رجعة نمر من المقناص ..واول ما اخذ خبر ان خلف رجع ..
راح يزوره ويتحمد له بالسلامة ويعرف وش سبب هالغيبة ..
سبقته عينه على اخت خلف ..ثم انه غض بصره لكن بعد ما تولع ..
ودائما الاولين يحذرون من النظرة وخصوصا لا جات من شاعر ..
لأن مشاعره ارق من غيره وبسرعة ما يتهيض ..
ونمر هذا قلبه خضر <<< المصطلح المحترم للشخص الخروف ..
يعني قلبه زي هذا بس اخضر ..
المهم ان الرجال تولع بها ..وزاد ولعه بها يوم عرف انها اخت خلف ..
قال عز الله انها بنت رجال واخت رجال ..

حاول انه يتركد شوي ويصير ثقيل ..
بس يوم درى انها بترجع هي وامها لخوالها بعد العدة ..
ما صار عنده صبر ابد ..وراح من وقته وكلم خلف في الزواج منها ..
قال خلف الساعة المباركة .. بس لازم نسألها وانت عارف ..
راح سألها ورفضت .. لأنها تبي ولد من اولاد خالها ..
رجع خلف لنمر وقال له ما لنا نصيب في مناسبتك ..
ولا يشهد الله اني ودي بها ..
طلع نمر وقال هالابيات ..


أن العيون التي في طرفها حور
.............................ودت عيال الحمايل في خبر كان
يا أعدل الناس إلا في معاملتي
.............................ماهـوب حـق تولـعـنا وتـنـسـانا
لاتحسبن المجد تمر أنت آكله
.............................لن تبلغ الـمجد لين يـجـيك ماجانا
اذا رأيت نيوب الليث بارزة
.............................وحـدتـك الايـام .. دورنا وتلقانا




بصراحة السالفة من راسي .. والقصيدة كاتبها من جوالي لها سنة فيه
بس والله ما اتذكر سوالف من اللي تبون ..
والشرهة بصراحة ماهيب على الشياب .. لأنهم ما خلوا علينا قاصر في كثر هالسوالف والدندرة ..
الشرهة والله علينا احنا اللي نترك سواليف الشياب ونقعد نرسل ونستقبل بالبلوتوث ..fficeffice" />

والله اني اتذكر اكثر من مرة قالوا لي اجلس مع جدك خذ منه واسمع ..
قدامك خبرة 100 سنة يعطيك اياها بسالفة ..وانا اقول لاحقين ع السواليف ..
لكن يوم توفى .. ندمت على كل لحظة ما جلستها معه وانا كنت اقدر عليها :cry :
رحمة الله عليه ..


شكرا لك مرة ثانية اخوي البروفسور ..
و لا تاخذها على محمل الجد هاه ..
والشكر لكل من اضاف اضافة رائعة في هذا الموضوع ..
وستكونلي عودة مع نصبة اخرى اقصد سالفة اخرى ..



.