الأول :ـ
من ناحية الخطة والتشكيله جيده ولكن تحتاج لشوي شغل في بعض اللاعبين مثل الزوري يحتاج لزيادة لياقة وزيادة كنترول والخثران يبيله شوي حديد والباقين ما قصرو عمر الغامدي ما قصر بس يبيله شوي ضبط أعصاب أحس أنه يلعب معصب .

الثاني :ـ
التبديلات خاصة في الشوط الثاني للهلال ما شاء الله مثيرة وفي وقتها واللي طبو ما قصرو بس محتاجين لهالتغيير ومجبورين عليه لأن ياسر والتايب والصويلح أنتهت اللياقة ولو جلسو شوي كان حشر أمنا الحزم والله ما نشوف باب الحزم بس جات التغييرات بناش نشيطة والحمد لله قدرنا نوقف زحف الحزم .

الثالث :ـ
الإنسجام موجود ولله الحمد لكن ضعف البنية الجسمانية بين اللاعبين تؤثر في هذا الإنسجام وكذلك ضعف قليل في التكتيك خاصة في الوسط قد يسبب الضياع في الشخصية الهلالية المعهوده لأن الهلال معروف باللعب في الوسط يعني لو يجي أجنبي في النص مثل رودريقو والا كماتشو متحرك كان والله ما يردنا أحد بس اللي الموجودين في النص قليلين لياقة والا فيهم البركه ولله الحمد .

الرابع :ـ
الحمد لله اللي طلعهم والله أني ماسك قلبي لا يجي كرت ثاني للتايب والا القحطاني والصويلح ينصابون ونخسرهم الله يستر لأن اللياقة عندهم تنتهي وتسبب لنا الضغط من الفريق الخصم وأتمنى إشراك بعضهم في الشوط الثاني .

الخامس :ـ
أنا بقدم نصائح للاعبين :ـ
الدعيع :ـ أرجو مضاعفة التمارين لأن التمارين تخلي اللاعب أقوى وأجرأ في اللعب وانتبه لنفسك يا دعيع لأن لاعبين الخصم بدو يتسابقون على التسجيل في مرماك ولهم الشرف فحاول تطلع خبرتك كلها في هالسنتين .
تفاريس :ـ ما قصرت لو غلطت .
المفرج :ـ لو هالكلام اللي جاك جاللاعب غيرك كان " مات " والا جاه حاله هستيرية ولكن أكثر الكلام اللي يجيك بسبب أنك تترك المهاجم الخصم يثبت الكوره قدامك واذا ثبتها قدر يتحداك ويسحب بك ولو أنك إذا جاتك الكوره تشيلها هي واللاعب سوى كان ما قامو يستهترون بك اللاعبين ويجيبون لك الكلام أنت في موضع دفاع يعني إذا عدت الكورة لا يعدي الزول . كذا تطلع أحسن لاعب والله يوفقك وما قصرت في الحزم لأنك أول بأول تشيل وذا جاتك كوره عاليه حاول أنك تطلعها برى الملعب لا تحاول تثبت لأنك في هذي الحالة خسران اللي قدامك يمكن يلقطها .
الخثران :ـ مسكك للكوره بشكل مطول وتفكيرك من تعطيها يمكن يضر الفريق وبعض الباصات عندك ضعيفه ممكن يلقطها اللاعب في أي وقت فحاول التركيز في الباص والتغطيه علشان ما يصير المحضور والا الباقي ما شاء الله عليك الله يوفقك .
الزوري :ـ ما قصرت بس عندك الكنترول والسبرنت ماش أحس أنه يبيلك شوي تمرينات مطوله علشان خانتك أهم خانه في الوقت الراهن والفرق تحاول تركز عليها الأضهره . وأعرف أنه لما يعدي المهاجم من الضهير أعرف أن هذي أخطر كوره فإياني وإياك يعدي أي مهاجم يرفع الكورة ترى هذا اللي طلعنا قدام الإتحاد بهدفين في الدوري ألعام الماضي لما رفع الكورة مره من عند الخثران ومره من عند العنقري الله يذكره بالخير جات منها أهداف الكاس .
الغنام :ـ بصراحه مستواك متطور والله يوفقك لأني ما شفت منك ولا غلطه في المباراة الأخيرة وأعرف أن خانتك أهم خانه فلابد من التمارين والتقويه .
الغامدي :ـ ياخي هد أعصابك وأنا كلما أشوفك عند هالنصراويين أقول " جا ماكاليللي " أقهرهم بك وماشاء الله لعبك فيه كل الرجوله بس لا تعصب ويتشتت تركيزك على المباراة لأنك أنت الشريان الأوسط للهلال ولما تتعب يتعب الفريق كله معك ولما تلعب الملعب كله يلعب معك يا بو فهد .
التايب :ـ يا عمري أنت وبس لو معك واحد يراكض كان شفنا الإبداعات بس اللي حولك طافين الله يستر واللياقة عندك يبيلها شوي خاصة الشوط الثاني لو تحاول توزع طاقتك على الشوطين كان ياكلك حبه حبه .
القحطاني :ـ عاشو القحاطين " أبو قمري " كل شي منك حلو ويسلم عليك محمد بن سالم بم محمد القحطاني ويقول حبه على الخشم .
الصويلح :ـ أربشهم ربش وخلهم يعرفون من أنت وما قصرت بس الشوته الأخيره والمهمة يبيلها شوي تمرين .
المبارك والموري والعنبر الله يبيض وجيهك وما قصرتو كفيتو ووفيتو .
تحياتي للجميع والمدرب هو كل شي .