نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

هلالي الظهران · #36 06/10/2007, 12:07 AM

تيتي تيتي زي مارحتي جيتي

ذات ليل وبينما الناس قيام وانا راقد.. حتى اذا انجلى الليل استيقظت ورقد الناس..فبقيت بوضع الاسيقاظ والقيام والناس بعضهم نيام وبعضهم رقاد.. وبينما ان على هذا الحال من الوسوسة سمعت صوتاً يشدو بأجمل الالحان " لقد أطربت الدار بمن زارها فرحا فاهلا واهلا بأهل الجود والكرزي "

كان هذا الصوت المغرد لجاري وهو ينبعث من الدهليز المشترك بين شقتي وشقة جار الهنا في عمارة العزوبيه.. بالمناسبه جاري هذا يسكن مع اخاه الذي هو جاري ايضاً

..

جاري هذا صاحب الصوت المغرد- الله يشافيه - عنده اضطرابات عقليه

.. يعني جسمه جسم رجل وعقله عقل طفل.. وهو فترات يغيب وفترات يأتي لأخاه ليقطن شقته ويشاركه فيها..

خُطف عقلي وهمت منكباً سارحاً مع جاري وهو يردد رائعته: " لقد اطربت الدار بمن..... " .. يا ألله كم أحسدك ياعادل.. وكم أغار منك.. آآه ياعادل ما أحظظك.. أكبر همك لعبتك.. وأصغر همك ايضا لعبتك.. وقمة سعادتك كمان لعبتك.. وحزنك يمتزج ويتمخض حين لاتجد من يشاركك لعبتك..

( ^
^
لابوك لابو لعبتك

<< محاوله أدبيه فاشله لاستثارة المعاطف وتهييج الشواعر

)

بالرغم من ان عادل يحمل تفكير طفولي الاّ انه سنايدي ويفعل ماتطلبه منه.. فهو يعمل مايعمله الاخرون من حوله.. على سبيل المثال.. في ثاني او ثالث ليلة من رمضان كنت رايح لصلاة التراويح وصادفت عادل وسالني وين رايح؟ قلتله بنروح نصلي التراويح وأخذته معي..

والله وصلينا العشاء والتراويح والوتر وعادل يصلي جنبي.. وماشاء الله المسجد شبه ممتلئ.. وكان الامام الله يجزيه بالخير قد تحمس وأطال بالدعاء واكثر من الالحاح باجابة الدعاء واسهب وردد كثيرا بعد كل دعاء جملة " ربنا نحن عبيدك فانظر لنا فنحن من المنتظرين" ..

الشاهد.. بعد نهاية الصلاه مباشره اشار عادل باصبعه على الجمع الغفير وقال: الحين هذول كلهم من المنتظرين؟! فارتسمت على محياي ابتسامه وأطرقت برأسي للأعلى والأسفل ايمائةً عن الايجاب.. ثم سكتُّ قليلا وتفرست ملامح وجهه لعلني ارى ردة فعل فلم أجد.. فقلت محاولا استمالته للحديث: فهل انت من المنتظرين؟
أنّكب عادلٌ من سؤالي وأسرع قائلاً: والله مدري وش اقول لكن ابنتظر معكم ماعندي مشكله بس انتم وش تنتظرون؟!

فأطلقت تنهيدة عميقه حتى كادت سعابيلي أن تتطاير وأردفت قائلاً: حنا ننتظر الجنه ياعادل وندعي الله مايدخلنا النار.. وسرعان مااكتست الحماسة وجه أخينا عادل وقال بكلمات تخر لها الجبال الرواسي: أجل سجل عندك واحد ينتظر الجنه

..

الله يسعدك ياعادل.. أحسبك ولياً والله حسيبك ومولاك.. على طاري التراويح يااخوان ليه نشوف المساجد بأول رمضان مليانه وكل مامر يوم نقص العدد؟! استغفر الله بس وكأن الصلاة مثل الشطرنج كل يوم ينقص لاعب وفي النهاية مايفوز الا الملك اللي هو الامام وكم واحد معاه!

مهوب بس في الصلاة الا بعد في القراءه وبقية العبادات.. تشوف الناس متحمسه أول كم يوم وعقبها يخقون!! حتى هالضعيف عادل يجي للصلاه بس اذا شاف المبزره برا يلعبون بالطراطيع والشروخ راح يلعب معهم!

من جد يالربع كل واحد يربي عياله واخوانه زين ولااقضبوهم لايؤذون خلق الله.. والله انه شي يرفع الضغط ماتدري تركز بالصلاه ولاتقط مع هالمبزره في هواشهم ومطاردهم! ياخي اذا ماعرفت تسنع ولدك وتخليه يصلي لاتجيبه المسجد يزعج خلق الله في صلاتهم.. واذا قفلت مع الامام وعطى اهاليهم كلمتين في العظم.. وماصدقت على الله يهدى المسجد وبديت تخش جو في الصلاة ماتدري الا وصاروخ مفرقع يخليك تفز من مكانك.. اعنبوا ابو ابليس اقضبوا عيالكم ولا والله ثم والله لأشرشحكم في المنتدى

..

وبما أني جالس أشرشح فيه شي ثاني باط كبدي

.. الحين ليه ماتحلى دوريات الكوره الا برمضان؟! ماقلت لحد يلعب.. العبوا بس بعقل واذا قسمتوا دقوا علي أجي واكملكم مهيب مشكله

لكن فيه ناس يروح رمضان كله وهو مطامر من ملعب لملعب ومن دوره للثانيه وكأن رمضان ماخلق الا لعب الكوره!

فيه واحد يحكيني عن شباب انه من زود الطناخة اللي فيهم يلعبون مباراه كامله بعد الفجر.. وعقب المباراه كل واحد يصكها نومه الى المغرب.. هذا ان كان صحى!

طيب اتركوا معي هالمطافيق على جنب.. على الاقل اسمها رياضه وفي حالهم ومامنهم مضره..البلا والله في هاللي مضيعين وقتهم بالمسلسلات.. تخيلوا ياجماعه واحد يقولي رمضان هالسنه طفش مافيه مسلسلات حلوه الا اثنين! ياألله لهالدرجه صرنا نتملل من رمضان ونقطع الوقت فيه بالمسلسلات!!!

طيب تبون تعرضون مسلسلات مافيه مشكله اعرضوا بس ياخي لاتقطعون علينا كل شوي بمقطع (<<واحد يتابع الاعلانات

) ..لا وأبشركم فيه فنانين الحين بدأوا الاستعداد لرمضان القادم وتجهيز أعمالهم (<<قويه صح

)..

لا يالربع.. جد والله انتبهوا لانفسكم ولعيالكم.. تصدقون صاروا بعض الصغار مايروحون صلاة التراويح علشان مايفوتهم شي من باب الحاره!حتى عادل هالضعيف جاني هاك اليوم يقول: ارجاتش بالله ومحمد رسول الله ياعين أبوي!

وكل الناس عند عادل صاروا عين ابوه.. قلتله وش بعد ياعين أبوي؟
قال: جميله في قلوبنا

مسكت اخوه على جنب وقلتله ياخي حرام عليك مايصير تارك الادمي كذا اخبره كان يصلي التراويح والحين خاق مع جميله..
قال: ياخي والله تعبت اراكض وراه وهالمبزره مخربين عقله.. بعدين اسكت بس ماتدري وش مسوي هاك الليله.. يسترسل اخوه: استغلني هاك اليوم وخلاني ارقد واخذ بكت السجاير ودخنه كله.. يوم جيت اصحيه قام وحاط يده على راسه ويقول: آآه مصدع .. قلتله وش فيك؟
قال: لا ولاشي بس شفتهم يزينون كذا بالفيلم حق أمس

.. يقول اخوه: والله احترت مدري أفهمه انه يصير كذا اذا قرقع مهوب اذا دخن والا اهزئه

..

على طاري الدخان.. والله انا انسان مايرفع ضغطي الا اللي مايمديه يمضغ التمره الا وهو شاب الزقاره يقاله خرمان ومايقدر يستحمل! ويا كم وكم تلاقطت مع ناس اذا افطرنا بمطعم على هالشغله.. اعنبوا ابليسك مسوي حشاش اطلع دخن برا ولاتقعد تعجعج علينا

.. انا انسان مااداني الدخان وخصوصا في حالتين اذا جيت آكل او أجرك

.. يااخوان والله يخربون ابو مندوب جوي

..

وعلى طاري فطور رمضان بالمطاعم.. والله ياني استانس اذا افطرت بمطعم على شارع رئيسي وخصوصا شارع الظهران.. لانك تشوف سباق راليات يبطي شوماخر وباخشب وربعهم يسوون نصه

..

طيب يابني ادم وش يضرك اذا اذن وانت بالطريق تفطر على تمره وبتوصل البيت ان شاء الله وعلى مهلك وبتدب في النعمه حتى تقول للحمار ياخاله

.. هذا كله كوم والهواش اللي يصير عند المطاعم كوم ثاني.. تقول كأنهم سنين ماكلوا ! الحين بس عرفت ليه يوم يجيبون صور عن اخواننا في الصومال والنيجر مايحن قلبي؟!
والله من الملاقط اللي تشوفه قبل المغرب ماتشوف اخواننا يتهاوشون عليه وهم تمر عليهم ايام بدون ماياكلوا!! صدقوني لو تبونا نحرر القدس جوعوا ربعنا وعلموهم ان الفطور هناك بس لازم يذبحون اليهود وابشروا

..

والبلا انهم ينرفزونك معهم.. اجل هذاك اليوم بعد هوشه عظيمه ماصدقت على الله اطلع من المطعم وانا اركض بالشارع وخويي وراي بالسياره يضرب بوري ومولع الفلشر ويصورني فيديو وانا فرحاااان اركض والسمبوسه بيد والبيتزا بيد

..

يالربع والله رمضان شهر الخير ومايصير هالحكي.. الحسنات اللي نجمعها في رمضان مايجي اخر الشهر الا وحنا مطيرينها.. طيب على الاقل حاولوا تقتصدون في استخدام الحسنات وتقسطونها على طول السنه (<< لاعاد تنصح وانت تحسب تكاليف الزواج

)

على طاري رمضان شهر الخير.. الحين شلون نصدق راعين المحلات النسائيه لاقالوا رمضان شهر الخير مع انهم 24 ساعه بمحلاتهم! ماتدري اي خير هم يقصدون العباده والصلاه وكثر الاجر ولا الصدقات والقيام والتهجد

.. اعنبوا ابليسهم اكيد بيكون شهر الخير والمبيعات عندهم اضعاف.. عاد حريمنا مايقصرون راعيات واجب! يدخلون السوق يوميا.. وفوق هذا تشتري الشي اللي تبيه والشي اللي ماتبيه.. وفوق هذا وهذا يلفون كل الاسواق حتى اللي مقفل يروحون يشيكون كانهم فتحوه

.. وفوق هذا كله يطلعون انهم يطلعون مثل الحمل الوديع ومايكاسرون ابد عن قولة رمضان كريم

..

اعنبوا ابليسكم ياهالحريم .. اولا ضيعتوا وقتكم برمضان في الفراره بهالاسواق.. يعني وش يضركم لو انكم شارين اغراضكم من شعبان؟!
طيب نقول نزلت بضاعه جديده حق العيد برمضان.. اوكي اطلعي يوم يومين لكن مهوب كل يوم.. والقهر انهم لافروا السوق كله وضيعوا كم ساعه مايرجعون الا بكيس صغير

.. وياليت انهم يبونه لا بس عن قولة ان المقاس كبيراو اللون ماعجبني حتى تضمن طلعة بكره

.. والبلا في النهاية تسمع الجمله السنويه " والله بضاعتهم هالسنه شينه" .. طيب اعنبوا ابو ابو ابو ابليسكم شينه ليش تشترونها؟!

المهم فكونا من ذا الحريم لاني عصبت

.. وعودا على ذي بدء قبل ثلاثة ايام رحت للتراويح ومعي عادل.. صلينا العشاء والتراويح.. وبعد الصلاه تلفت عادل على الموجودين وسألني بنبره استفهاميه: وين المنتظرين راحوا؟ ليه صاروا قليل؟ مايبون ربي يدخلهم الجنه؟

والله مدري وش اقولك ياعادل.. واكتفيت بنظره حزينه.. ولما شعر عادل الطيب بحزني اراد ان يداعبني قائلا: اجل بقولك نكته.. قلتله: قول ياعين أبوي انت

.. قال وهو يغالب ضحكاته: نكته! طلعنا من المسجد ووصلنا البيت وعادل يعيد النكته وانا احاول استوعب.. ثمن فقعتها ضحك.. اعنبوا شيطانك ياعادل أجل تجر فيني وتقول أبقول نكته وانا جالس احتريها ثمن طلعت كلمة "نكته" بس ههههههه .. طيب ياعين أبوي انا بقولك مثل وهو .. تيتي تيتي زي مارحتي جيتي.. أظهر عادل اللامبالاه وعطاني مقفاه وبدأ بترديد رائعته " لقد اطربت الدار بمن ...." .. والله مو منك ياعادل من ربعنا اللي يدخل عليهم رمضان ويطلع وهم ماتغيروا وتيتي تيتي زي مارحتي جيتي

..

برايفت للجميع: يااخوان هالكلام اللي سبق ذكره اذكر نفسي فيه واذكركم بعد .. ورمضان بقى عليه اسبوع هالله الله فيه.. ولا تنسون حديث الرسول اللهم صلي وسلم عليه :" رغم انفه ثم رغم انفه ثم رغم انفه من ادرك رمضان ولم يغفر له" او كما قال عليه افضل الصلوات والتسليم.

=.=.=.=.=.=.=.=.=.=.=.=.=.=.=.=.=

يالربع اعتذر عن التاخير.. الله وكيلكم لي ثلاث ايام طريح الفراش بعد ان داهمتني الانفلونزا قاتلها الله.. انتظرونا بالحلقه القادمه في " ناظر بقره واحلب عنز"

أخوكم/ ابو الدرداء