نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

هلالي الظهران · #1 28/09/2007, 02:11 AM

عليكم السلام والرحمة والاكرام..مبارك عليكم شهر الصيام والقيام وأعادهم عليكم عاما بعد عام.. وأدام الله عليكم نعمة السلم والاسلام..

بعد التحية والسلام.. وعظيم الاشتياق ولقيا الصحب الكرام.. وتوفيرا للدندرة وكثر الكلام.. فأقول والله الهادي الى سواء السلام:

محدثكم.. اللي هو انا واعوذ بالله من كلمة أنا(<<بدت الدندره

).. كان براسي موال أبكتب عنه بس صراحه كنت سالي وحاير من كثر ماهوجست بالحاير.. ناظرت الساعه ابشوف الزمان بس قلت ياولد احدن مع خله ويناظر الساعه؟!

وربعنا بالمجلس يستاهلون

.. تمقلت بالمكان.. دورت مكان لموضوعي.. تخيلت الموضوع بجانب استضافة الخفاش الاسود.. تعوذت من نفسي ومن ابليس مع انه مربط وطيرت الموال

..

يا الربع داخلن عليكم لحد يلوم او يعاير لأني بصراحه مخطط أعيد مع اهلي.. يمكن بعد العيد يحلها الف حلال.. بس هل تتوقعون اني اذا فتحت صفحه جديده أبقفلها؟!

طبعا هذا عشم ابليس في الجنه .. بالمناسبه ياعيال.. الله يزوج كل واحدن فيكم بعدد كلمة "عليكم" بالبارجراف الاول .. رحمه وادام واسلام ومبارك

..

المهم.. كنت أسولف مع واحد من الشباب.. يقول: وش زود الربع عنك ورا ماتجمع قصيصك ومقالاتك وتزود عليهم شوي وتجمعهم في كتاب والطباعه والنشر علي والربح بالنص

..

اعنبوا ابليسه مو بصاحي! وعلى باله بيفسحون الكتاب! اصلا لو انه وصلهم شرط ان نصه ينحذف قضايا أمن دوله ونصه الثاني قضايا اداب

..

الشاهد ان الرجال متحمس بالحيل ويبي اسم للكتاب.. عاد اخترت "التاريخ يقص شعره كاريه"

.. وش رايكم؟ كان ودي بدال "كاريه" يصير "فراوله"

وبما انه ماصدر من الكتاب الا عنوانه

.. خلينا نعنون به هالخنبقه.. يا اخوان التاريخ يقص شعره كاريه طيب عرفنا.. بس متى؟! أكيد لما يكتبه أمثالي

..

يا الربع هالخنبقه هي جزء اخر من هرطقه بس باختلاف بسيط.. بالاول كنت اكتب التاريخ على ذمة ابو رشيد وابو صالح واخوياهم لكن الحين رمضان كريم وبحطها بذمتي .. بالمناسبه فقرات الموضوع منفصله وان كان بينها رابط زمني ..وبحاول انزلها على قدر المستطاع وبأسرع وقت

..

بالمناسبه.. ماذكر اعلاه هو مايسمى بالمقدمه << يسمع بها

..
[/COLOR]