نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

.::.DREAM TEAM.::. · #2 12/09/2007, 12:53 PM

اول شي يعطيك العافيه Dr.RONALDO على الموضوع الرائع...

وبصريح العباره اقولها الله يلوم من يلومنا على هالخوف اللي احنا عايشين فيه والقلق على مستوى الفريق في اهـــم مشاركات الفريق في اخر ثلاث مواسم البطولة الاسيوية واللي الكل يعرف انها البوابة الوحيدة للمشاركه بكاس العالم للاندية وهذا اعتقد انه حلم كل هلالي المشاركة بها البطولة...

على الرغم كم موضوع اللي تطرقت له اخوي لكن انا بودي اتوسع بموضوع واحد او بمعنى اصح باعطيه الجزء الاكبر وهو (سالفة العقود)
والله ان لو تسأل شريطية معارض النسيم وتقول لهم شخص معاه عقد باقي لي سنه ويوقع عقد ثاني مع شركة منافسه بس هاه ترا المميزات اكثر يعني الفلوس اكثر بكثير وانا مستفيد و و و ....الخ وش راح تتوقع بيرد عليك ياحبيبي مايبيلها كلام احنا بنادي كبير ويعتبر الاول على اسيا والبطولات تتكلم خارجيا ومحليا مافيه شي اسمه احترام العقود يعني امس عقد مع هاتريك والاتصالات وبعدها تعالي ياصلة ويجي الخبر وقعنا مع موبايلي

اي منطق هذا اللي يصير بالفريق لهذه الدرجة التسيب بالفريق وصل
و اعضاء مجلس الاداره الله بالخير واللي يرفع الضغط اكثر خبر قريته قبل كم يوم بجريدة يقول ان الهلال عنده محاميين مايوقعون اي عقد ولايسوون شي الا باستشارتهم اقول كيف الحال هذي مايبيلها محامين اي واحد يجلس مع نفسه ثلاث دقائق لااكثر يعرف وش السالفة....
و اخوف ما اخاف عليه ان تبتعد الشركات الكبيرة عن مجال الاستثمار بنادي الهلال مو لانه مايحقق اهدافها التجاريه او شي لا بس لعدم الثقه فيه ومدى مصداقية الاداره مع العقود واللي طبعا تهم الشركات كثير والله يستر تكون اول هذي الشركات هي اللي اجبرتنا اننا نسوي كذا واللي هي موبايلي..

إقتباس


	ليه تتأجل مباراة الهلال والطائي إنا ناقصيين مؤجلات بالعكس هذي بتكون استعدادية للاسيوية يقولون راحة للفريق

يعني الحين صدقنا انه مو عشان سالفة العقود

إقتباس


	جوال الهلال شاطر بسجل الهدف الاول والكرت الاول والقناة لا تعليق امس عايديين مبارة الهلال والنصر صوت بس

هذولا الثنين المذكورين اعلاه ما اعتقد انهم يهموني كهلالي من الآن وصاعدا جوال الهلال اخباره اوقات المباريات ماشالله والرئيس يقول والاعب الفلاني يقول احضرو ايها الزعماء وماني عارف ايش هذا اللي جيدين فيه بس اما اخبار ييب الله مطر يعني الحين صار لازم ادخل المنتدى يوميا اشوف الاخبار او اقلها اشتري جريدة اعرف الاخبار منها بس جوال الزعيم كذا ياخذون منا على كل فاتوره 14 ريال ونسبة الهلال 25% بعد يعني خيري على غيري وناديك يناديك...

والقناه اقل مايقال عنها انها نقطة سوداء في تاريخ الزعيم روقم يامرقم واللي مايشتري يتفرج

همسه اتمنى نشوف الدعم الجماهيري والرسمي وعلى جميع الاصعده لناديي الهلال والوحدة ونقارن بينهم ونطلع بحصيله لنعرف حقيقة اللي يتسمون بالوطنية..

قفلة للاداره على الرغم من كلامنا الا انها تظل الاداره اللي فرحتنا وجابت لنا البطولات المحليه كامله في احد المواسم لكن هذا هو نادي الهلال ان نجحت فستصل للسماء من المديح وان اخطئت.... اتمنى من المعنيين مراجعة انفسهم وبالتوفيق للزعماء.....

مشكور اخوي مره ثانيه على الموضوع واسمحولي على الاطالة

ورمضان كريم،،