ماراح اطول عليكم لاني عارف انكم تنتظرون ابداعاتي الفنيه ... اقصد ابداعاتي البطنيه


المهم قبل اسدحلكم طبختي بغيت اقولكم العذر والسموحه لكم على التاخير لكن كان تاخير مقصود

تدرون ليه؟؟؟؟؟؟؟؟ ماني بقايل كيفي




مدري ليش احس ودي اتكفخ من عادل

لا بقولكم ليه الحين

كنت ابي اسوي عنصر اثاره وتشويق اخس يامصدق نفسه

الشيف رمزي على غفله ...




المهم مانبي طولة كلام


من الاخر بعطيكم الزبده(بس تراها زبده مو دنماركيه مقاطعها وربي )


هذا يوم اناعزوبي تعرفون عاد العزوبيه وكانت السنين عجاف يعني يجيك لاوي ببطنك من كثر ماتاكل اكل مطاعم وبالذات يوم كنت عزابي بالكويت الله لا يوريكم كنت شهريا وربي 300دينار كويتي اكل بس قلت وربي لا تعلم الطبخ وكلمت امي ودلتني على طبخه سهله طعمه شيء يعجبكم


المهم جا وقت التنفيذ والله لايوريكم من الجروح وبلاستر جاي وبلاستر رايح وحقين الصيدليات حفظوا وجهي


طبعا من اسباب تنزيلي للطبخه هذي تحديدا انها خذتني النخوه وقلت اساعد العزابيه بالطبق لايجيهم مثل ماجاني


طبعا هو طبق ينفع تعزم اي احد عليه لان وجهك بيكون ابيض



المهم بعد هالمقدمه الطويله ادري تبون تعرفون وش عندي






اليوم بسويلكم شــــــــــــــــــــــــــــاورما بالفرن



يعني تكفي ل3اشخاص بس نصيحه لاتعزمون واحد جايع عشان ماتوهقون بالكميه مثل ماصارلي

وبعلمكم بسياق الحديث



المقادير مثل ماهو موضح قدامكم انا بعطيكم المقادير والطريقه مع بعضهم






1 صدر دجاج فليه كما هو موجود بالاعلى تروحون السوير ماركت وتقولونله عطنا وهو يعطيكم يعني بدون فلسفه

واحسن شي يكون بدون عظم وتقطعونه وهو بارد لمكعبات صغيره عشان ماتحوم تسبودكم منه وهو حار نكمل المقادير.
بصل+بزار+فلفل أسود ملعقه صغيره+ملح حسب الرغبه+مكعبات

نقطع البصل قطع صغيره طبعا اكثر التماسيح مايعرفون لتقطيع البصل مثل حالتي يوم استاجرت ابو طلال يقطعه لي تعرفون بايع بصل وخبره

بس والله ياشباب البصل خطير في اخراج مابك من مشاعر فياضه:sad:

المهم لاقطعتوا البصل نحطه بالطاوه او المقلى مع شوي زيت ونخليه حتى يصبح لونه ذهبي

بعد كذا نحط عليه قطع الدجاج المقطع مكعبات
ثم البهارات الموجوده
ونخليه يطبخ حتى يشرب مويته







2


ناخذ بطاطس يعني على حسب الحجم اذا كبير يكفي 4 واذا صغير 2 وبالموت تكفي

طبعا نقشره وننضفه ونقطعه لاصابع

طبعا طريقتي انا اقطعه دوائر ثم اقطعه اصابع عشان ماتكون اصابع طويله

انا كنت اتفنن لكم بالتقطيع بس كان عندي واحد نشبه اسمه ابو طلال
مو مخليني اقدر اسوي شي كل شوي يصيح على راسي ويقول جيعان

بعد كذا نحط زيت بالطاوه ونخليه حتى يغلي ونقلي فيه البطاطس حتى يستوي

ونحط عليه ملح ثم نحطه بالصينيه كطبقه اولى بعدين نحط الدجاج عليه كطبقه ثانيه















الصوره الي فوق بعد اضافة الدجاج طبعا مع البطاطس

3


يكون عندك مخلل خيار تقطعه قطع صغيره وتحطه على الوجه كطبقه 3












4


اخيرا وليس اخر يكون عنك قشطه طبعا من النوع الرخيص لانك منت ماكلها مع عسل هي للطبخ وقضينا

ويكون عندك جبنة كرافت طبعا السايله تاخذ منها ثلاث ملاعق وتحطها مع القشطه في الخلاط واخلطهم مع بعض حتى يصيرون مرق

المهم نحطها فوق الصينيه كطبقه اخيره وندخلها الفرن لمدة ربع اوثلث ساعه يعني باختصار الين تجمد

وبعدها طلعها من الفرن وبالهناء والعافيه












تراني كنت مسويلكم حركات فله وديكوريشن بس عندي 3 مصافيق طبعا كنت عازم ابو طلال وميسي بس الغدير طب علينا وخرب كل شي كسروا كاسات العصير وخربوا البيت علي وامي طردتني من البيت الله يستر مزح صعايده

والمشكله تعشوا وراحوا وانا انظف لحالي منهم لله


والله ياميسي انت وابو طلال ماعاد اعزمكم والغدير لاعاد تجي الا بعزيمه .


هاه صوتولي تراني مسويلكم طبخه جنان واكثر من كذا صارت حرب بييتي

يعني تراني كرفت بيديني ورجليني


المهم ترا لاجاكم خاش ولا خرباش انا خالي من المسؤليه لان بضاعتي كلها جايبها ابو طلال وخصوصا البصل

طبعا هذي الصوره النهائيه للطبخ وربي أشوف أكثر واحد بدع أنا كلكم مسوين حلا والي مسوي شاورما فجل والبنات ولا وحده طبخت كلهم حلا بالذات الايرانيه فترا الصوت أمانه وبكيفكم.