انا فلان من الناس.. محكوم علي في قضيه سياسيه.. وانا ندمان واعترف اني استحق العقاب ومستعد اكفر عن خطئي بأي طريقه.. لي تقريباً 3 سنوات في سجن الحاير وقابلت سجناء أشكال وألوان.. منهم الارهابي والمجرم ومنهم المظلوم والمغرر به.. كالعاده مالنا في السجن يونس وحشتنا الا السوالف وتناقل قصص المساجين.. قصص كثيره مرت علي وأغلبها حزينه لكن فيه قصه تختلف عن بقية القصص.. هالقصه كانت لسجين اسمه مازن.. ابترككم مع القصه مثل ما قصها علينا مازن...
اسمي مازن.. بدأت قصتي بعد تخرجي من جامعة الملك سعود.. تخصص اعلام.. الحمدلله خلصت دراستي الجامعيه وجبت معدل حلو.. كانت فرحتي في ذاك اليوم ماتنوصف.. من جد كنت مستانس ومبسوط.. حتى اني غديت امي وابوي واختي سحر في مطعم كنا دايم نشتهي ناكل فيه بس مانقدر.. صحيح اني كنت مفلس وماعندي غير الفلوس اللي غديتهم فيها بس الفرحه تسوي أكثر واهلي يستاهلون.. ياما وقفوا معي وضحوا عشاني كثير ولازم احسسهم انه جاء الوقت اللي بيعتمدون علي فيه..
في نفس الليله خرجت مع صديقي الوفي مشعل وسهرنا وفليناها الى صلاة الفجر وصلينا ونمنا.. ومن اليوم اللي بعده خرجت بملفي تزينه وثيقة التخرج وبديت اقدم على وظيفه.. مريت على التلفزيون والاذاعه والصحافه ومريت على كل الشركات اللي لها علاقه بتخصصي من قريب او بعيد وقدمت لهم اوراقي..
مرت 3 أشهر وانا مازلت ادور على وظيفه وماحصلت.. والحمدلله ايماني بالله قوي وكل شي قسمه ونصيب.. بالاضافه ان ثقتي بوطني اللي رعاني من صغري مابينساني بعد مانجحت في دراستي.. ماخربت نفسيتي بالعكس انا مازن الضحوك راعي النكته والوجه البشوش..
مرت 3 أشهر ثانيه واهلي صبرهم بدا ينتهي.. صاروا يزعجوني يقولون اشتغل اي شغله!! وانا الملل بدا يتملكني وبديت فعلا افكر اشتغل اي شغله!!
مر على تخرجي 9 أشهر وانا مازلت ادور على شغل.. اهلي زعلوا علي وقالوا اني اتدلع ومابي اشتغل.. حتى صديقي مشعل صار يدقني بالكلام اني عاطل ودلني على معهد ونصحني فيه..
رحت للمعهد وطلبوا عشرة الاف ريال مقدما بالسنه.. من وين لي أنا؟!
وانا طالع من المعهد شفت في لوحة الاعلانات اعلان عن محاضره لدكتور معروف عن "كيفية استغلال الوقت".. قلت ياولد احضرها مابتخسر شي!! فعلا حضرتها وارتاحت نفسيتي واعجبت بالدكتور واسلوبه اعجاب كبير.. وبعد المحاضره رحت له وسلمت عليه وشكرته واظهرت له اعجابي.. فرح الدكتور باهتمامي وقالي ان الاسبوع الجاي فيه محاضره بعنوان "كيف تخلق النجاح من داخلك" ايضا حضرت المحاضره الثانيه وازداد اعجابي بالدكتور اكثر واكثر..
داومت على حضور كل محاضرات الدكتور وازدادت علاقتي فيه حتى اني اخذت رقم جواله وصرت اتصل عليه كل فتره وهو كان يظهر لي الود ويبادلني الاحترام.. والاهم من هذا انه ولّد داخلي طاقه كبيره للعمل.. حتى اهلي لاحظوا التغيير فيني.. وانا دائماً امدح الدكتور واشكر فيه واسولفلهم عن محاضراته ووصلت ثقتي فيه اني تركت عنوانه عند اهلي اذا لاقدر الله احتاجوا شي وماكنت موجود..
عدت الايام بسرعه ومرت سنه وانا عاطل بعد تخرجي وبديت أفقد الامل بالوظيفه.. لكن اراد الله اني اروح سوبرماركت العثيم والقى اعلان عن طلب محاسبين سعوديين علشان يمسكونهم الكاشير.. قدمت اوراقي والحمدلله انقبلت.. صحيح ان الدوام 10 ساعات والراتب 2000 ريال بس مهيب مشكله احسن من الجلسه بالبيت واخذ الفلوس من الشايب اللي هو وامي واختي احق فيها.. بعدين مثل ماقال الدكتور: العظماء يبدأون من الصفر!!
استلمت الوظيفه وبديت العمل بحماس ونشاط.. وابشروا يارواد العثيم مابتلقون زحمه عند الكاشير بعد اليوم.. استمريت على راس العمل كم اسبوع بس حماسي بدا يفتر.. كنت أشوف تلاعب في الاسعار.. أشوفهم يسوون عرض تخفيض لبعض البضايع والبقية يزيدونها ريال او ريالين لكن دام الناس تشتري وهي راضيه بكيفهم! لكن اللي زادني قهر بعض هالمحاسبين الاجانب تلقاهم يزيدون ريالين او ثلاثه على الحساب ومحد يقولهم شي!! بلغت مديرنا بس للأسف كان من نفس جنسيتهم! لكن الشي اللي يقهر ويغبن اذا كان الزبون سعودي تشوفه يتهرب من المحاسب السعودي ويحاول يروح للاجنبي على انه اكثر أمانه!!
المهم.. استمريت في العمل الين جاء اخر الشهر ويوم جيت استلم الراتب لقيته مخصوم 1000 ريال!! قلت اكيد فيه غلط.. راجعت المدير وقال اني غايب يومين والنظام يقول اللي يغيب يومين نخصم نصف راتبه!! والغبنه اني كنت مستأذن منهم كنت اودي الوالده المستشفى عندها مراجعه والوالد صحته مهيب مثل اول.. شغل التاكسي حد حيله وألم العظام لعب فيه لعب..
تهاوشت مع المدير وطردني من الشغل..
اساسا انا كنت بستقيل والله لايبارك في الالفين ريال اذا بيذلوني او يستغلوني.. والله عالم بنيتي وبيعوضني خير ان شاء الله..
المهم.. بعد ما استقلت من العمل او بالاصح انطردت رجعت لجلسة البيت والبحث عن وظيفه.. صحيح ابوي كانت نفسه شينه علي بس تفهم الوضع وتقبل الامر الواقع..
استمريت على هالحال كم شهر الين جاء الفرج من رب العالمين بعد ماجاني اتصال من مشعل الله لايخليني منه يعلمني انه قدر يحدد موعد مع احد مسئولي التلفزيون السعودي في وزارة الاعلام عن طريق احد معارفه..
استعديت نفسيا للمقابله وتجهزت لها على أكمل وجه.. لبست احسن لبس عندي حتى اذكر ذاك اليوم اول مره اسوي تنظيف بشره.. والعجيز ماقصرت بدعواتها جعلني فدوة لرجولها.. والحمدلله رب العالمين ماخيب رجاها.. انقبلت في الوظيفه براتب وساعات عمل ماكنت احلم فيها..
استلمت الوظيفه كمعد برامج وبديت العمل بهمه عاليه وطموح يوصل حد السحاب.. يوم ورا يوم وانا اتقدم في عملي والمسئولين يزداد اعجابهم في حماسي واخلاصي وافكاري الجديده.. كنت مستعد اسوي اي شي ينطلب مني.. اذكر اكثر من مره مديري يطلب مني اداوم في ايام اجازتي وانا ماعندي شي كنت اداوم ازين من النوم وجلسة البيت..
استمريت في تقدمي الين قرروا انهم يكلفوني بتقديم احد البرامج لكنهم شرطوا علي اني اقدمه مع زميلتين بالتناوب.. هالشي ضيق صدري لانه ضد مبادئي بس ما أقدر ارفض توني ثبّت نفسي.. بعدين علاقتي فيهم ان شاء الله بتكون علاقة عمل وتنتهي بنهاية وقت البرنامج..
بدأ عرض البرنامج وحقق سمعه طيبه ونسبة مشاهده ممتازه.. لكن بعد فتره صارت حلقات البرنامج تركز على موضوع واحد وتثيره!! اغلب حلقات البرنامج صارت عن حقوق المرأه!! وكل ماحاولت اتناقش مع المسئولين يقولون انت وظيفتك التقديم وبقية الامور مهيب من اختصاصك!!
اخذت على نفسي وسكت الين جات الطامه الكبرى واكتشفت ان الاتصالات اللي تصل للبرنامج غالبيتها من اصحاب الفكر المنفتح بينما اتصالات اصحاب الفكر المحافظ شبه مغيبه!! فوق هذا كان يحصل تلاعب بنتائج اي تصويت او استفتاء يطرح على المشاهدين!!
بعد اللي شفته من تلاعب وامور تخالف مبادئي واخلاقي قدمت استقالتي من الوظيفه!!
بعد الاستقاله رجعت حليمه لعادتها القديمه! بس الحمدلله هالمره مستانس ومبري ذمتي.. صحيح اني اخذت تهزيء من الوالد الله يطول بعمره ومن الوالده الله يحفظها لكن مهيب مشكله ربي بيعوضني خير..
فعلا ماكملت اسبوع الا وجاني اتصال من شخص يقول انه يعمل في اذاعة القران الكريم وانهم يطلبوني لوظيفه عندهم.. الظاهر انهم سمعوا باللي صار معي وانبسطوا او انهم يبون يعوضوني!! الله اعلم..
تمت المقابله والحمدلله قبلوني.. صحيح ان الراتب يعادل نص راتب الوظيفه الاوليه بس الحمدلله وش احلى من ان الواحد يشتغل بوظيفه تخدم كتاب الله وتحتك فيها بعلماء اجلاء وشيوخ افاضل..
مرت اسابيع وانا على رأس العمل ومرتاح نفسيا ولله الحمد.. تنقلت فيها بين تقديم برامج متنوعه واجراء حوارات مع بعض مشايخنا الكرام وتقديم برامج الافتاء.. صحيح فيه بعض المنغصات مثلا بعض المتصلين يتعامل معك بأسلوب غليظ والبعض الاخر يملي على الشيخ مايقول ومالا يقول!! لكن دائما التمس لهم العذر واقول يمكن غيرتهم على دينهم تخليهم يتصرفون بهالاسلوب!!
وفي محاوله مني لاثراء برامج الاذاعه استحدثت برنامج حواري مع المستمعين.. وفي احد الحلقات تحدثت عن الشيخ الجليل القرضاوي وعن بعض فتاواه.. وأحد هذه الفتاوي كان عن الحجاب وعدم وجوب تغطية الوجه.. تلقيت اتصال من احد المستمعين الشباب وبدأ في الحديث عن الشيخ القرضاوي وانه لايفقه في العلم شيئا وانه مضلل للناس ومخالف للكتاب والسنه ووصفه بأوصاف يخجل المرء عن ذكرها حتى كاد أن يخرجه من الدين!!!
حاولت مناقشته وان المساله خلافيه بين العلماء لكنه زاد في تشدده وعناده.. ثم جاء اتصال اخر على شاكلة الاتصال السابق ثم انقطع البث عن البرنامج!!
لم تمضي 24 ساعه على البرنامج حتى جائني اتصال من الاذاعه واخبروني بأنه تم ابعادي!! سألته عن السبب.. رد علي باجابه مفادها ان عندي افكار دخيله وغير سليمه بالاضافه اني ظهرت في برامج مع المتبرجات الفاسقات!!!
بصراحه نفسيتي كانت سيئه جدا بعد ما ابعدوني من الاذاعه لاني فعلا كنت مرتاح بالشغل.. يالله وش نقول غير عسى ان تكرهوا شيئا وهو خير لكم.. الحمد لله على الاقل صارت عندي خبره وصرت اعرف من أين تؤكل الكتف مثل مايقولون..
ابتديت اراسل احد الصحف واسلمهم مشاركات بسيطه وكانوا ينشرون بعضها في صفحة القراء.. بعد فتره بسيطه صارت مقالاتي مقننه اكثر وأغلبها ينشر.. وصارت لي سمعه في صفحة القراء.. بعد فتره جاني اتصال من الصحيفه وقدموا لي عرض بمبلغ 2000 ريال شهريا مقابل مقالتين اسبوعيا لكن بشرط ان المقال سينشر باسم شخص اخر!!
طبعا رفضت هالشي لانه يخالف مبادئي..
بعدها بيومين جاني اتصال من صحيفه منافسه للصحيفه اللي كنت اكتب لهم وقالوا بنعطيك 1500 ريال بالشهر مقابل مقاله أسبوعيه..
فعلا انتظمت معهم وكانت مقالاتي تنشر باسمي بس الغريب احيانا بعض الاسابيع ماينشرون مقالاتي واذا سألتهم يتعذرون بوجود اعلان او عدم وجود مساحه كافيه.. بكيفهم دامني اسوي المطلوب مني واستلم مكافأتي..
لكن طموحي ماوقف عند هالحد.. بديت اشخمط على الورق واحاول ارسم كريكتيرات خصوصا ان رسمي مهو بشين..وريت مشعل بعض الكاريكتيرات وضحك وقال حرام ماترسلها للجريده..
مشيت على شور مشعل وارسلتها وفعلا اعجبت مسئول التحرير.. وقال اذا عندك استعداد ترسم لنا كاريكتيرات بنعطيك مقابل كل كاريكتير 100 ريال بشرط مايقل عن 20 كاريكتير بالشهر وانت وشطارتك..
والله وناسه شوية شخابيط واخذ عليها فلوس.. بديت انتقد بعض المظاهر وغالبها كان على تصرفات الشعب.. وفي احد المرات كنت مع مسئول التحرير وطلب مني اركز على انتقاد المناهج والمراكز الصيفيه وحلقات التحفيظ وكل مراكز هالارهابيين!! هو قالها كذا!!
تلاقطت انا وياه وقلت اسمح لي مااقدر اسوي هالشي.. خذاها بنفسه والله يستر..واستمريت على رسوماتي الاوليه..
وفي يوم قلت بزيد العيار شوي.. ارسلت للجريده كاريكتير عن الخطوط السعوديه وشكله بيكون قوي..
اتصل فيني مسئول التحرير وقام ينافخ ويصارخ .. يقول: انت غبي ماتفهم!! من كنت تكتب مقالات وتنتقد المسئولين او الجهات الحكوميه ماكنا ننشر مقالاتك بس انت شكلك ماتفهم.. ياخي انتقد المواطنين ولا اكتب عن المشاكل الخارجيه ولا تدري ارسم عن الرياضه بس لاتقرب المؤسسات الحكوميه..
قلتله: بس هالشي ضد مبادئي وانا ماتعودت اطبل لاحد..
قال: اجل تعلم التطبيل والرقص في بيتكم بعدين تعال عندي وقفل الخط!!
قسما بالله شي يغبن.. يعني اذا الواحد يسوي الصح ويمشي على مبادئه السليمه اللي تربى عليها ينقطع رزقه واذا نافق وغش وضلل تمشي أموره!! مااقول الا حسبي الله ونعم الوكيل..
جلست بالبيت كم يوم بس شفت الشايب تعبان وحالته حاله ومايقدر يشتغل.. مسكت التاكسي بداله وقمت أكد عليه.. صحيح انه يضيق الصدر لكن المهم انه يغطي حاجتنا..
بس والله ياالشغل على هالتاكسي يبيله صبر.. اذكر مره وقفت عند حرمه سعوديه تبي تركب.. ولما شافتني سألتني الاخ سعودي؟ قلت:ايه! قالت: اجل انقلع!!
وفي احد المرات وقفت لبنات وركبوا وكشفوا وجيههم.. ويوم سألتهم وين يبون بالضبط.. صاحوا فيني ياقليل الحيا وياللي ماتستحي مهو بعيب عليك ماتعلمنا انك سعودي!! اجل عادي تكشفون للاجنبي والسعودي عيب!!!
لكن في مره حصل لي موقف مستحيل انساه.. وقفت لبنات خارجين من الفيصليه وركبوا معي.. بس من مشيت الا واكثر من خمس سيارات شباب تلاحقنا.. البنات يقولون ضيعهم.. لكنهم استمروا يطاردونا من شارع لشارع! صحيح البنات مو محتشمات بس والله شوي ويصيحون من الخوف وتأخروا على اهلهم.. حاولت انحاش من الشباب بس كل ماضيعت واحد جاني الثاني..الين حدني واحد ونزل بيعطيهم الرقم! انا قامت معي اباليس الدنيا ونزلت له وطقيته طق الين بلع العافيه.. جات الشرطه وسين وجيم واخذوني وحطوني بالحجز!!
طلع هاللي طقيته ولد نعمه وقطوني بالحجز أسبوع!! وماطلعني الا مشعل الله لايخليني منه بعد مادبر لي واسطه!!
ركبت مع مشعل في سيارته وانا مغبون واقوله: بريء وادخل الحجز اول مره بحياتي وما أطلع الا بواسطه!!
قال مشعل: يارجال تكفير ذنوب ان شاء الله.. خل عنك بس عندي لك خبر بيفرحك.. عقب شهر ان الله راد ابطلع اكمل دراستي خارج المملكه..
وقع الخبر علي مثل الصاعقه.. معقوله حتى مشعل عزوتي بيسافر ويتركني.. وماقطع تفكيري الا صوت مشعل وهو يقول: مازن وشفيك ماسمعتني؟! حتى كلمة مبروك ماقلتها!
قمت احاول ارقع الموقف واباركله .. وحبيت ألطف الجو وقلتله: أجل ذاهب الى بلاد الفرنجه.. وانا كذلك..
قال مشعل: الى أي البلاد انت ذاهب؟!
قلت: لى بلاد الالعاب اللي بطريق الملك فهد خخخخخ
ضحكنا شوي وسكتنا.. صرت افكر كيف بتصير حياتي من دون مشعل.. يالله ماتخيلت في يوم اننا نبعد عن بعض بس الله يوفقه ويسهل دربه ويحقق أمانيه.. مشعل طيب وشهم وياما وقف معي.. الله يفتحله من من اوسع ابوابه..
رجعت لشغل التاكسي ومن خلاله تعرفت على شباب طيبين.. صرنا نجتمع مرتين او ثلاثه بالاسبوع نتدارس ونتعلم من بعض الكتب ونستفيد من وقتنا.. وفي احد المرات كانت معي في السياره مجموعة كتب لسيد قطب عليه رحمة الله ووقفت عند تفتيش وشافوا الكتب.. اخذوني والكتب للمركز!! قابلت الضابط وقال: ماتعرف ان هالكتب ممنوعه ومسحوبه من الاسواق؟!
قلت: بس هذي الكتب ابن باز وابن عثيمين الله يرحمهم كانوا يدرسونها ويدرسّونها بحياتهم!!
استمر النقاش وكلمه مني وكلمه منه وارتفعت اصواتنا.. وهذا اخر شي اذكره بعدين جابوني لهنا بتهمه الاشتباه بارتباطي بجماعات ارهابيه!!!
الى هنا انتهى كلام مازن بس باقي قصته ما انتهت!!
خرج مازن بعد سنه قضاها في الحاير عقب ماتأكدوا ان ماله اي علاقه او ارتباط باي جماعه ارهابيه!! خرج مازن بعد سنه كامله كان خلالها مايعرف أي شي عن أهله ولاهم يعرفون عنه شي!!
اخر الاخبار اللي وصلتنا عن مازن .. انه راح لأهله ومالقى احد!! سأل ودور عليهم وكانت الفاجعه.. أمه توفت بحسرتها وابوه جاه شلل وصار عاجز عن الحركه ودخلوه أهل الخير دار للمسنين.. اما اخته سحر.. آآه ياسحر.. بعد وفاة امها ومرض ابوها واختفاء اخوها مالقت احد تلجأ له الا الدكتور اللي عطاهم مازن عنوانه! لكن الواطي كان ظاهره غير باطنه وكان عديم المسئوليه والضمير وسلم سحر الى ابنه اللي طيحها بالممنوعات واستغلها ابشع استغلال..
اما اخر شي سمعنا عنه مازن.. انه اختفى بعد ما انتقم من الدكتور وابنه.. والان مانعرف وينه بالضبط.. ناس تقول راح العراق واستشهد .. وناس تقول طاح في يد الامريكان واقتلوه.. وناس تقول انه ماوصل العراق اساسا وامسكوه على الحدود!!
الشي الوحيد اللي اتفقوا عليه الناس ان مازن راح ضحية الارهاب!!
فعلاً ياساده مازن كان ضحية لارهاب مجتمع بأكمله!!
