عوده من جديد .. لكتابه الموقف الاكثر اثاره واحراجا .. وتوهيقا لي خلال هالاربع سنوات السابقه
موقف بصراحه اختبصت فيه !!
يعني ماادري شلون اتصرف !! لكن بالاخير ربي عطاني حسن تصرف ومشت الامور وصار موقف اذكره كل ماشفت خشة طلال ... هاللى مسوي قلق الله يصلحه وهو في بطن امه
طبعا شلنا كثير من النصوص .. وحطينا بعض البهارات الخفيفه .. وبااختصار بقولكم القصه :
هذا سلمكم الله في احدى الايام وكان الوقت العصر .. وكان يوم شتوي جميل كان طلال توه مابعد جاء ( في بطن امه ) في الشهر الاخير .. ولنا موعد بالمستشفى وكان اخر موعد له علشان تحديد الولاده وكموعد روتيني
طبعا اخر الايام كنت عزوبي يعني المعزبه عند اهلها واتفقت معهم اني امرهم بعد مااطلع من دوامي وكان الموعد الساعه 6 مساء في مستشفى الحمادي .. وبصراحه كان المشوار بعيد بين اقصى الشرق و الشمال .. و زحمه وكنت مداوم وقرفان واخذتهم ورحنا للمستشفى .. ويوم وصلنا( للفة )المستشفى .
. خلااااص مابقى شي وندخل .
. واوقف السياره .. الا ويصير ( الله يكرمكم ) استفراغ
وهذا شي طبيعي خصوصا هالوقت من الحمل وبعد ركوب سياره او بعد اكل ...
انا التفت عليها وقلت
( يعني سلطه ؟؟؟ ماصبرتي ؟؟؟) الشكوى لله
الحين وش الدبره ؟؟ العباة توصخت ؟!! السياره توصخت .. انا بعيد عن البيت .. المستشفى قريب .. اشووووووووفه ؟؟
.......... طبعا مااقدر اكنسل الموعد لاننا مفوتين كم موعد وخلاص ضروري هالموعد لانه راح يكون اخر موعد قبل الولاده .....؟؟؟ طيب وش الحل ؟!!
انا بصراحه عصبت
عصبت بقوه يعني
اول شي ناظرت ساعتي لقيت الموعد مابقى عليه شي .. ويقالي جاي بدري ... وقفت السياره وسويت نفسي امريكي وقلت ( انا هادي انا هادي ) هههههههههههههه ومادريت الا والمعزبه تقول اخلص وش نسوي !!
قلت انزلي لهالمشغل ... ووقفت عند بقاله .. واشتريت مويه ... يوم نزلت .. بهاالحاله المزيه .... قلت لها تعالي بس .. والتفت .. والقى بسيارتي ( بشت ) حقي شتوي بني اللون..
قلت اركبي ورى ... ورحنا لمواقف السيارات اللى بالمستشفى ... ووقفت السياره عرض وولبست البشت وركبت ورى وسيدا على اقرب مغسله ملابس واعطيهم العبات .. قلت بكم الغسيل المستعجل قال بهالقيمه ... قلت خلصها اسرع ولك بخشيش ..دبل هالقيمه ( وفيني الصيحه )
طبعا وانا عند المغسله المعزبه داخل السياره ورابكه ورى .. ولابسه بشت بني ومطرز باللون الذهبي .
. ومتغطيه باللون الاسود
.. بيني وبينكم .. ودي اخلص من هالموقف باي ثمن
قلت للهندي بالمغسله .. بروح وارجع ولاتبطي علينا .. قال اوكي
وكررت عليه سالفه البخشيش و وو
وانا امشي .. والعالم تطالع .. المره ورى لابسه بشت ؟؟ وانا قدام واسوق ؟؟ من يفسر هالظاهره ؟؟
المهم قلت بستفيد من هالوقت .. رجعت مره ثانيه لمواقف سيارات المستشفى .. ولقيت بنقاليه .. قلت تعالو كلكم في شغل
يحسبني ابيه يغسل السياره .. قلت لا ابيك نظف اسياره من داخل وخلال دقيقه فاهم ياكلب ( حطيت الحره فيه )
ونفس الشي كلمته بخصوص البخشيش
ما باليد حيله
دقيقه والا السياره انظف من الوكاله ... عطيتهم المقسوم وبخيت السياره معطر .. وركبت المره ورى .. لانه ورى ماتنشاف زي قدام ...
.. صار الموقف فيه ضحك وانقلب استهبال خصوصا بعد مااخذنا العباة ولبستها .. .. طبعا تاخرنا الحين عن الموعد .. ويوم جيت للاستقبال .. قلت له:سم هذا الموعد .
. قال ويييييييييييين متاخر يابووو .
.. قلت اسمع طيب وبعدين قل اللى تبيه .. سالفتي كيت كيت كيت .
. ووالله تونا ماخذين العباة
والموعد ظروري .. واللى تشوفه ابد حاضرين فيه .. ( عاد سعودي مايمديني ابخششه )
الرجال طلع طيب وبعد مامات من الضحك قال ادخل واخليك اول واحد بعد ؟؟ قلت له جزاك الله خير وماقصرت وانا خدودي حمراء
طبعا دخلنا على الدكتوره واخذنا ذاك اليوم اشعه لطلال وتطمنا عليه . اشعته مازالت عندي محتفظ فيها .. وكاتب عليها التاريخ علشان ذاك الموقف ...
وكل ماتذكرنا هالسالفه ضحكنا ...
وتوته توته خلصت الحتوته ...
انصحكم بالبشت لاي سبب طاريء ..
. وصحيح الموقف صعب لكن العصبيه تخلي الموقف اكثر صعوبه .. وبصراحه ماانسى ذاك اليوم .. يعني اعصب علي مين ؟؟
وسامحوني على الاطاله .. وانتظر تفاعلكم ومزيد من المواقف واستروا ماواجهتوا
