نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

&زعيم الجنوب& · #1 14/06/2007, 12:33 AM

سلا1111م

كيفكم حبايب قلـ

ـبي

من أول شنب

إلى آخر شباصه

إن شاء الله تكونون مرتاحين

_________________

نقدم لكم اولى حلقات برنامجنا المنوع

شطحاااااااااااااااااااات

يـــقــدم

====================

¸.•`¸.•`¨( حبل الكذب قصير )¨`•.¸`•.¸

شابين من شبابنا <-- إثنين شباب يعني

مثل غيرهم من الشباب الجامعي ..

حياتهم اليوميه بين النوم والسهر والطلعات والتمشيات ..

وأحيانا .. التكشخ بالأسواق ..

وطبعا ماحنا في مصر ولا الشام ..

عشان تشوف الولد ماسك كتبه ويذاكر عشان ينجح ويشوف مستقبله ..

طبعا لأن عندنا قاعده مبجله ..

( فلها وبعدين ربك يحلها )

.. ماعلينا ..

ابطال شطحتنا اليوم ..

كانوا ايام الإختبارات بالجامعه ..

طالعين من المحاضره .. ويسولفون مع شباب ..

قال واحد : ياشباب انا بعزمكم عندي اليوم ونذاكر سوا ..

قال بصوت واحد :

قداااااااااااااااام

تجمعوا الحبايب بالليل طبعا بعد نومة العصريه ..

وهاتك ياشاهي وقهوه وسوالف ..

وجاء وقت العشاء .. وتعشوا حبايبنا ..

طبعا مافي احلى من بيالة شاهي بعد العشاء ..

والشاهي يبيله سوالف والسوالف تجي مع صكة بلوت ( لعبة البلوت ) ..

وسِرى يردف سِرى .. وخمسين تنزل ..

وأرررررررررررررررررربعه ..

وراح الليل ..

فجأه <== مسوي أكشن الحين

أذن الفجر ..!!

قاموا كلهم عشان ابو الولد ماهي حلوه قدامه ..

يطلع للصلاه ويشوفهم باقي سهرانين ..

وليتهم يذاكرون ..

كل واحد راح بيتهم ..

إلا حبايبنا الإثنين ..!!

راحوا شقتهم <== عزاب ياعيني

الأول : وش رايك ياخوك ناخذ لنا نومه للساعه 7 ونصحى ونطلع للجامعه ..!

عشان مانروح مواصلين ولا نعرف نحل <= الولد فاهم ماشاء الله

الثاني : شورك وهداية الله .

وهات المخده وحط راسك ..

وعينك ماتشوف إلا النوووور ......

صحوا مفجوعين على الساعه 9 ...!!

ولبسوا بسرعه وراحوا للجامعه مسرعين ..

طبعا الإختبار فاتهم مايبيلها ..

راحوا للدكتور اللي يدرسهم هالماده ..

ودخلو عليه ..

الاول : طق طق .. ممكن ندخل يادكتور لو سمحت ..!

الدكتور : تفضلوا .

الأول : يادكتور إحنا ما أختبرنا اليوم الإختبار ..

الدكتور : وش أخركم ؟

الثاني : يادكتور احنا ذاكرنا وصحينا بدري وكل امورنا تمام ..بس

الدكتور : بس وشو ؟

الأول : حصل لنا شئ بالطريق ماكان في بالنا أبد ..!!

الدكتور : خير ان شاء الله .

الثاني : يادكتور حنا شباب على قد حالنا وإمكانياتنا قليله ..

الأول : ومتقاطين في سياره قرنبع ( قديمه ) وحالتها حاله ..

الدكتور : وش دخل السياره بالموضوع ..؟

الثاني : هي أساس المشكله يادكتور ..

الأول : وإحنا جايين للجامعه بنشر علينا كفر ( إطار أو تاير ) وأبتلشنا فيه ..!!

الثاني : وإحنا سكنا بعيد عشان الشقق اللي قريبه من الجامعه أجارها غالي ..

الدكتور : طيب ليش ما أخذتوا ليموزين (تاكسي ) ..؟

الأول : من وين ياحسره يادكتور . <== وجه يقطع القلب

الدكتور : خلاص أنا بعيد لكم الإختبار بكره ..عشان ظروفكم بس ..

الإثنين بصوت واحد :

الله يرحم والديك ويوفقك يادكتور مشكووور ..

وراحوا الإثنين .. يتباهون باللي سووه قدام زملائهم ..

وإنهم قدروا يمشونها ( كذبتهم ) على الدكتور ..

وفي اليوم الثاني ..

استدعاهم الدكتور إلى مكتبه ..

وطلب من كل واحد منهم ياخذ ورقة اجابه ..

ويختار واحد من المكاتب اللي قدام الدكتور ..

وطبعا المكاتب بينها عازل ...

جلس كل واحد منهم في مكتب بعيد من الثاني ..

وجاء الدكتور بورقة الأسأله ..

وكانت المفاجأه ..

سؤالين بس ...!!

الأول : (عادي ) سؤال سهل يتعلق بنفس الماده .. درجته (10% )

الثاني : أي كفر من كفرات السيارة بنشر عليكم أمس ..؟ (درجته 90% )

طبعاً أخوانا في الله .. كذبو كذبتهم بس ما أتفقوا عليها ..

ولا جاء فيبالهم أحد بيسألهم أي كفر بنشر ..!!

كل واحد كانت إجابته مختلفه ..

والثنين رسبوا في الإختبار ..

====================

أنتهت حلقتنا اليوم ..

على أمل اللقاء بكم في حلقات أخرى ..

وشطحات أحلى ..

ونقول لكم ..

ياشين حبل الكذب .. دايم قصير ..

_______________

أتمنى يعجبكم الموضوع00

ولكم مني أجمل 00

( `•.¸
`•.¸ )
( `•.
¸.• )
( .•`
×`¨) تــحــيــه (¨`×
¸.•`¸.•`¨) (¨`•.¸`•.¸

&زعيم الجنوب&