|
روّق بالك بشوارع الرياض !!
مساكم الله بالخيــــــــــــر .. والحمد لله على السلامه وعودة المنتدى للحياة
صحيح اني ارتحت منكم ومن مشاكلكم كم يوم  بس لكم وحشه توحش 
ما لكم بالطويله .. من فتره كنت اذا امتطيت سيارتي  وهجولت بشوارع الخبر وحاليا بالرياض
لا يوقف قدامي احد ولا يحدني احد ولا يجي احد قدامي يستهبل وما يفتح لي المسار الايسر الا
بعد ما اقدم له معروض وواسطه لاني احس بوقتها برعشه وانتفض وتثور مكامني الخفيه 
ووقتها ما اكون مسئول عن تصرفاتي والله يعين اللي راكب معي وعليه تحمل تبعات ركوبه
ضليت على هالحال فتره بعدها احسست بالتعب والارهاق فتوجهت لطبيب اعصاب وكليسترول
وجلديه وعظام في اكثر من مستشفى خرجت بعدها بتصور وليس علاج ان ( أروق المنقا )
لان العلاج غالي واوامر العلاج تحتاج واسطات فقلت المنقا مع انه غالي بس مقدور عليه
بصراحه ما قدرت اني اروق المنقا الا بجهد وكلفه ومثابره .. والحمد لله الحين لو اشوف واحد
وانا عند تقاطع وهو توه براس الشارع استناه حتى يعدي قبلي ومساري المفضل الان الايمن
والمواقف يستهويني البعيد منها ولو يسكر على سيارتي شخص استناه بكل اريحيه ...
الامور زينه حتى هذا اليوم فما ان اتيت من العمل الا و ( حاتم يستقبلني ) ( فام ) ( مين )
( رووح ) قلت وين نروح يا بابا بعز هالشموس ننام ويصير خير ..
قدر الله ان تنسكب القهوه عليه وتصيبه بحروق من الدرجه الاولى والثانيه .. انا مدري وش فيه
ابليس لعب بعقلي واحسب الكهرب لمسه فاسرعت به للمستشفى وفي الطريق كان امامي
سياره ( مروقه المنقا ) اجيه من هنا يجيني من هنا .. اروح من ( ناك ) يجيني من ( ناك )
بصراحه نرفزني فا اشرت له ( وقف وقف يا ابن الذين ) اوريك شغلك !!
الرجال ما صدق خبر وقف بالطريق العام قدامي وانا اللي انزل عليه ناوي اكمخه لين يعض الارض !
ما امداني اوصل لسيارته الا يوم نزل علي هذاك الجثه عريض المنكبين ( شلولخ ) ..
بعفويه وبسرعة بديهه وحسن تصرف قلت له ( مساء الخير الدعوى ما تسوى ) يالله انك تحييه
واحط رجلي ........ الرجال ابتسم وبادلني نفس المشاعر وعرف اني بتوهق وصرفت عمري
وانا بدوري عرفت ان الله حق
ما يستفندي من الموضوع :
والله شبابنا طيبين وحبيبين ابتسامه تنسيهم كل المشاكل فحاول ان تبتسم في الطريق افضل
لك من كم بنيه على وجهك
والحمد لله على السلامه .. واللي بيفزع لي ومسوي قوي ترى لوحة الرجال عندي
فمان الله  | 