اهــ على ذيك الليله

يامحلاها .. يازينها

كل كلمات الغزل شويه فيها

تعبتنا كثير .. ضيقت صدورنا بين الشوطين

فكرنا نغير القناهــ ... وننسى الكوره وقتها

كنت بالاستراحه مع 10 من الشباب تقريبا

وكان المجلس نصه ميلاني .. وانا ليفربولي والبقيه متعاطف مع ليفربول

استلمت كل التهزيء بين الشوطين .. وهذا ميلان يابابا

وش جايكم للنهائي .. الله يفشلكم والله يفضحكم ومن هالكلام

بدايه الشوط الثاني ومع التغيير المجنون بدخول هامان ( اللي حط كاكا بكرتون ) وخروج فينان

انقلبت الموازين .. وصار فيه 6 دقايق مجنونه ( وهي الظاهر سبب جنون انشلوتي الحالي وتصريحاته العجيبه:p )

هدف في كل دقيقتين ... لقيت نفسي اطامر واقول اندوووومي اندوووومي .. في دقيقتين

والعيال تمزعو من الضحك

وصلت البلنتيات ووقتها عرفت اننا نبي نفوز لأنه دوديك مميز فيها

وفعلا هذا اللي صار

طبعا يوم طلعت من الاستراحه تعيجزت الف كل الشارع فعاكست . ومادريت الا السفتي بوجهي وجو بيعطوني مخالفه

وقصيت لهم السالفه ... ومشوني