عِندما يُغمِضُ الخرووووفُ عينيهِ
وقف على قوائمه الأر بع شامخا ...مرفوع الراس ... ومد عنقه للامام كمن يستعيد كبرياءه... واخذ نفسا عميقا ونظر الي وثم عاد ليحملق امامه وارتجل قائلا
انا الباكي على الماضي..
على الحاضر..
اوووبس ويـن رايح انا ...لا لا هذي اخر السالفه وفي اشياء كثيره فاتتنا... تعالواخلونا نرجع من اول الحكايه لاخرها حتى ابري ذمتي قدام هالخروف اللي احرجني وبيحرجكم وبيحرج الكثير بفكره العالي وفهمه لخبايا الامور اكثر من الكثير منا او بمعنى اصح اكثر من غالبيتنا السوداء
"عندما يغمض الخروف عينيه" ...اللي يشوف العنوان يقول هذي راائعه من رواائع نجيب محفوظ او فكتور هوجو لكن بمجرد التدقيق تلاحظ انه في كلمة الخرروف موجوده ولما يكون في العنوان الخروف تعرف انه كاتبها واحد ماعنده سالفه او زي مايقولون ماعنده ماعند جدتي فلو كان العنوان "عندما يغمض الصقرعينيه" مثلا هنا ممكن تقول والله هالادمي عليه عناوين مو بصاحيه ...او يكون" عندما يغلق الليث جفنيه" فلازم هنا انك تقف احتراما لهذا العنوان فقط لان كاتبه بيكون فكتور هوجو او اخوه بالرضاعه ...مع ان هوجو يخسي يكتب مثل هالكلام ...حده البؤساء وتخب عليه
ماعلينا..خلونا نرجع لسالفتنا اختصارا للوقت....وهي صارت ليلة العيد الاضحى الماضيه ...وبسم الله نبدا
في كل عيد اشتري لي خاروف زوين مليان لحم وشحم واضحي فيه وناخذ اقسامه الثلاث ونطبق فيها سنة الرسول صلى الله عليه وسلم ثلث لي وثلث للجار وثلث نوزعه للمحتاجين ...وكل شي الحمد لله تمام ...في هالعيد الاخير اللي راح,, رحت انا وجاري نشتري لنا اثنين خرفان من الحلقه قبل العيد بيوم واحد...وراح الجار شرا له واحد زوين.....وتعرفون حب الفشخره وياليتني ماتفشخرت...قلت ياولد خلنا نقلبها زعاطه قدام هالجار المسيكين واقوله ابي اشتري لي واحد عن اثنين ..المهم ومن خروف لخروف ومن راعي لراعي ولااني اشوف لك ذاك الخروف اللي عن عشره ماهو بعن اثنين واقول والله يبومحمد جاك ماتمنى هذا هو ضالتك المنشوده...واروح لراعيه واقول له بكم هذا ..قال لي والله انه زين مااخترت وولحمه طيب وشوف الشحم وووو..قلتله طيب اخلص علينا ...قال بثلاثه الف ..هو قال كذا والا تجيني الغصه بحلقي والدمعه ترفرف بعيني واشوف يميني والقى الجار يناظرني كانه يقول ايه خل فشخرة اهلك تنفعك الحين...اعاود اطالع بالخروف ولا القاه يناظرني كانه يتفحصني ويتمقلني ..!!! تقولون هو اللي بيشتريني ..ولاحظت في نظراته الحكمه اللي يكتبسها الشخص على مرررالسنين ولاحظت في خطواته الرزانه والسكينه لمن يمشي ..فقلت لنفسي يارجال وش عنده ذه يقول ثلاثه ..هي بالفين بشيله اما بثلاثه والله لو يطلع له اربع قرون...فقلت له هذي الفين مافي غيرها قال لي هات !! حسيت وقتها اني مخمه او مهطفه احسب اني منزل الف الحين والظاهران الرجال كان بيبيعه بخمسميه لو اني مكاسره ...لكن قلت يله وكل شي ولا الفشله قدام هالجار وزي مايقولون كل دقه بتعليمه ... ولما جيت احطه بالعراوي الا يجيني راعيه ويقول لي اسمع ...قلت ها وش عادك تبي (حاقد من البيعه) قال لي تراه يتكلم ...هو ماقال كذا والا كل انواع السب والشتم طلعت مني واشيل عجرا وابي اكسرها براسه...الحين مدفعني الفين وجاي يبي يتمسخر هو ووجهه...جاو الناس شالوني من فوقه وانا اسب والعن .. وركبت السياره ومشيت.
وصلت البيت وحطيت الخارووف بكراكونه ورحت تغديت ...ورجعت جبت له برسيم وسطل فيه مويا وحطيتهم عند الخروف ورحت اخذت قيلولتي المعتاده ورجعت بعد المغرب اشوفه وش مسوي ولا اني القاه ما اكل شي ولا شرب شي... استغربت السالفه , وقلت خلني اقربله الاكل...يمكن انه غبي ومادرى وشو ذه... واحطه قدامه ومارضى ياكلل.. خبري انا لاجيت من بعيد تجيك الخرفان تبي تاكل اللي بايدك ولكن ذا حاله ثانيه ...قمت عنه بعد محاولاتي العديده وكلهن باءن بالفشل ... فقلت لنفسي يارووح مابعدك روح ..انا شاريه الحين بالفين ويطلع معلول...لايموت علي قبل العيد بس ...خلني اجل بكره الصبح اشيله لراعيه وارجع فلوسي بس ...ونشوف لنا واحد ثاني رخيص وحبيب ...
قمت بعدها انظف الحظيره وارتبهاعشان مايشغلني شي ثاني الصبح...وانا منهمك بالعمل الا واحد يقول لي (يالطيب) ...بسم الله الرحمن الرحيم مين هنا!!! قلت كذاوانا اتنافض ... واشوف وراي واشوف قدامي وانه مافي احد ابد ... قلت اعوذ بالله وش قاعد اتوهم انا لا يكون خرفت يبومحمد ...ورجعت اكمل التنظيف والا انه نفس الصوت مره ثانيه ويقول ( اقوول يالطيب ) وانه قلبي يقبضني ذيك الساعه واقول مين هنا ودقات قلبي بيسمعونها بالبحرين قبل اهل الخبر واصرخ مين هنا والصيحه ماسكها غصب ...والا انه الخروف يرفع راسه ويقول هذا انا ...واني التز على الجدار كني ادور بابانحاش منه والباب قدام وجهي اصلا بس القمطه وماتسوي ...وانا اتلزلز بالجدران الاانه يجيني يمشي وانا اصرخ الحقووووني ...الحقووووني ...لكن ماحولك احد ابد ,,, ويجيني الاسد ...اوووه ...قصدي الخروف بس اني كنت شايفه ذيك الساعه عن عشر اسوود ويقول وراك خايف تراني خروف لارحت ولا جيتوكلها مسكه منك ووراها عصره وضربة سكين والا اني منسدح هنيا ...وانا اصارخ وش تبي .....وش تبي .. !! لو تبي فلوس بعطيك ...هاه .. خذ هذي محفظتي فيها 30 ريال شيلها حلال عليك بس خلني اطلع... رد علي وقال اقوول انثبر مكانك...حمار انت ..وش بسوي بالفلوس ... انا برسيمي ومويتي وبس وهي احلى عيشه عندي ... ماني بمثلكم !! ..فقلتله ها وش تبي اجل ...سالتك باللي خلقك خلني امشي وراي عيال واللي يرحم والديك ...قال اقووول انت ماتفهم ..وش بسوي لك انا ...تراني ضعيف...لكن بقول لك وش ابي منك بس اول شي اجيب لك كاس مويا ولا كوب عصير ليمون ترووق اعصابك ..قلت ايه الله يرضى لي عليك ...قال شفت انك ثوور وشلون اجيب لك كاس مويا ولاكوب عصير...!!!! انت نسيت اني خروووف ويعطيني هالفيس 
قلت بنفسي اااخخ ..خرفان اخر زمن ...اكيد ماتعلم هالفيس الا من كثر الشتشته .. الموهم ماقصر معاي الخرووف ورووق لي اعصابي وهداني ...وجلس معاي بمنتهى التواضع ..وجلسنا ساكتين نناظر بالجدران وبسقف الحظيره ..تقولون اثنين عرسان..ولا فيه احد منا قال كلمه وحده ..فقلت خلني اكسر هالصمت واناظر ساعتي واشوف له واقول له ماتبي نشوف اثنين طال عمرك ونسوي لنا تربيعة بالووت يحبها قلبك... واني اعطيه ذاك الفيس ..قال مالت عليك بس ..تستخف دمك اجل ..قلت احاول بس ...الا بالمناسبه وش اسمك..قال انا معروف بابوجلعوم ..قلت عاشت الاسامي يبوجلعوم واني اعطيه ذاك الفيس مره ثانيه ...قال وراك تستخف دمك ...قلتله ايش دعوه عاد ..ابوجلعوم ..مالقيتوا الا هذا الاسم ..تغير وجه الخرووف عفو اقصدي ابوجلعوم وقلتله لايكون مات جلعوم ..الا انه يضحك وقال لي ياحبي لكم بس ...اكيدانه مات ..مضحيين فيه السنه اللي راحت ولكن عندنا عادي وبالعكس نتفاخر بهالشي ...ويرجع ابوجلعوم ظهره للجدار ويتكي ويقول الله يذكرك بالخير يبوعفاضير ...قلت منهوابوعصافير ذا ...قال لي ابوعفاضير يابن الحلال..قلت طيب وش به..قال ابوعفاضيرهذا كان معاه 16ولد وكلهم راحو اضاحي ..قلت له بالله عليك واعطيه ذاك الفيس ...والا انه يجيني بذاك الحافر بوجهي ويقول لي كل شي ولا ابوعفاضير ...تتريق عليه انت ووجهك ..قلت لا والله ماقصدت بس وليه يعني زعلت عليه ... قالنعتبرهاسطوره عندنا ...ان يكون عندك 16 ولد ويروحون اضاحي يخلونك شيخ ... قلتله وانت كم راح عليك قال لي ااايييه... 4 يبومحمد بس والله كان ودي يروحون علي عشر وانا عايش ...لكن خلاص مابقى شي بالعمر ..كلها بكره الصبح واني مذبوح ...قلت له لوتبيني ارجعك بكره اني مرجعك وماني بمضحي هالسنه...قال لي مخبوول انت ..يروح دمي اضحيه ولا يروح في عزيمه من عزايمكم ذي..قلت ليه وش فيها عزايمنا ان شاء الله ...قال وش فيها هاا!! قلت ايه وش فيها ..قال وش اللي مافيها .. كل اسبوع ومسويين عزومه بنفس البيت ونفس الاشخاص وبدون مناسبه ..لا والمشكله كلهم 20 واحد وهم ذابحين ثلاث روس ومسويين مفطحات وبلاوي واخرتها ياكلون نص واحد والباقي تقطونه بالدرام...قلت له ايه بس لازم كذا...لوماكفى نتفشل قدام الخلق...قال اجل تبي تبذر واهتميت بفشلتك قدام الخلق ونسيت الخالق...قلت ايه صح يبوجلعوم ولكن حنا مانرمي الزايد ..لا حنا نشوف مساكين ونعطيهم اياها .. قال والله انت يبومحمد عليك حركات بعض الاحيان..قلت وشلون..قال يعني المساكين يبون مفاطيح اجل هاا..رح شف لهم اللي يكسيهم واللي يسكنهم ..وبعدين دور انك تعطيهم مفاااطيح...يبومحمد احكمها بعقلك انت....مسكين وش يبي ..قلت مدري عنه لكن انا زاد عندي الاكل ورحت عطيته...قال يبومحمد انا معاك اذا زاد عطهم ولكن كل اسبوع يزيد عندكم صحنين مفطح كاملين ...ماهو معقول ذا..رح شوفه وش ناقصه ...ياخي يمكن انه مريض بيموت يبي علاج ..رح شوفه يمكن الرجال بيموت من البرد هو وعياله ..رح شوفه يمكن بيارة بيتهم طافحه عليهم وجايبه لهم امراض وبلاوي ..وكل هذا اللي اكلمك فيه يبومحمد ما بيكلفك قيمة مفطح واحد ..اما المفطحين اللي تفشخرت فيهم قدام ضيووفك وانت عارف انهم بيزيدون وش فادوهم ..اكلوهم في 10دقايق وخلاص ... قلت والله يبوجلعوم منت بسيط اجل ..قال شف ذا ..الحين انا انصحك وانت تتمسخر ..قلت لا والله ما اتمسخر بس انك جايبها على الجرح من جد. بعد فترة صمت جديده التفت لي ابوجلعوم وقال كم الساعه الحين ...قلت الساعه الان عشره ونص بالليل ..قال ايه عشره ونص ولكن اما بالليل ذي مالها داعي تقولها ويعطينيذاك الفيس ...قلت والله انك منسم يبوجلعووم ... قال طيب وش اخر الاخبار ..قلت ابد امريكا اخذت العراق ومدري مين اللي بعدها...قام ضحك وقال لي وراك ماعطيتني هالفيس ....قلت افاا يبوجلعوم ماتوقعتها منك انك تبي تتريق على اوضاعنا ...ولما شاف اني اتكلم من جد قال لي انت صاج ولا تستخف دمك زي كل مره ...قلت لا والله اني صادق يبوجلعوم ...قا ل ياويلي ويلااااه ..وقام يناطح بالجدران وانا اقول له اركد اركد يبوجلعوم ..وبعد ما اخذ الجدران بالطول والعرض ...جا جنبي وانفاسه كنها صارت شكمان سياره..قال متى صار هذا ..قلت والله اللي صار انه ...وحكيت له السالفه كذا وكذا من طق طق للسلام عليكم... فقال لي ايه يبومحمد...اجل العراق محتله ها ..قلت أي والله ...قال و صدام حسين بالسجن الحين قلت له ايه ...قال ومحكوم عليه بالاعدام ..!! قلت ايه يبوجلعوم ...قال لكن لو اعدموه بحلقها ...قلت اخص وش عنده ابوجلعوم ومن زين لحيتك اللي بتحلقها... قام ابوجلعووم قال لي والله يبومحمد الوضع مااش ... صرتم تنساقون سوق ..قلت وش دعوه يبوجلعوم ..شايفنا خرفان عشان ننساق والا انه يناظرني نظره فيها حقد ويقول مايبي لها يبومحمد ..خبري فيك فهيم وعقلك اكبر من كذا وتفهمها وهي طايره...احرجني بهالكلمتين ولكن كابرت شوي وقلت له من ناحية الفهم فاهمين لكن مانتكلم اما انت خرووف لارحت ولاجيت واللي بتقوله محد بياخذه عليك ... قال طيب وانت وش بيسوون لك ...قلت له ابوجلعوووم تستهبل انت .!!! .ماسمعت بجوانتانامو..انا ماكملت نامو الا وانه مغير السالفه ابوجلعووم ... وعدنا في فترة صمت جديده ولكن كانت حلووه مررره لان ابوجلعوم غثني بهرجه الزايد وكنت محتاج لفترة راحه من سواليفه الماصخه...لكن ..!!
صليت العشا يبومحمد ..ابوجلعوم يقول لي ...قلت لا والله الحين بطلع اصلي وبرجع لك ...قال ومتى ماابتغينا العزة بغيره اذلنا الله...والا اني اصير بنص هدوم يقدام ابوجلعوم ...خلاص هذا اني طالع اصلي وراجع لك...قال ابوجلعوم لا تقول لي خلاص...انت منت مصلي عشاني ...من ناحيتي ماعندي مشكله اذا صليت ولا ماصليت ...والااني اصير بنص نص هدومي ...قلت له يبوجلعوم انت شغلتني من اول وهرجك الفاضي والا اني طالع اصلي من اول ...قال اجل انا يبومحمد قلت له ايه انت قال اسالك سؤال وتجاوبني بصراااحه..قلت ابشر ..هات ماعندك...قال لي متى اخر مره صليت العشا بالمسجد ...قلت له امس ..قال طيب والفجر ...قلت والله يبوجلعوووم اني مااذكر متى اخر مره ...الا الا قبل يمكن ثلاث او اربع شهور ..قال لي ماشاء الله وشلون رحت تصلي بالمسجد الفجر...قلت له ابد ..مواعد الشباب بنفطر سوى بفواله وحلاتها بعد الفجر على طول فصلينا سوى بمسجد ورحنا فطرنا... فقال لي يعني لو ماكنت مواعد الشباب ماطلعت تصلي ...رديت عليه الصراحه ماظنيت يبوجلعوم...قال ايه وزعلان انت على امريكا ...قلت ايه ..قال الا والله زين مايسوون فيكم...قلت له يجي منك اكثر يبوجلعوم...
هلا ابوجلعوم…اقول له بعد ماصليت ورجعت له.. قال والله لو هي صلاة تراويح وقيام ماتاخرت بهالطريقه …قلت لا والله اني مصلي بس اني اشوف فيلم بالتلفزيون من حقون هوليوود واقعد له … قال لي وعسى الفيلم طيب ..قلت لا يفوتك يبوجلعوم ..توم كروووز …قال باللهِ …قلت اي والله …قال وصليت العشا بعد الفيلم ولاقبله قلت الصراحه يبوجلعوم اني صليت بعد الفيلم بس ترى الفيلم كان مرره مررره مرره رهيب وماقدرت اسيبه وامشي …رفع ابوجلعوم راسه وشاف لفوووق وعود يناظرني وقال من يوم ماشفت هالسكسوكه اللي بوجهك واني غاسل ايدي منك …عز الله راحت الامه لا هي معتمده عليك انت...قلت اجل تبيها تعتمدعلى خرووف انت ووجهك ...شوف لنا سالفه ثانيه يبوجلعوم ...قال من يوم ماسولفت معاك وانك زايد همومي ...والله اني كنت مرتاح قبل مااشوف خشتك واقوول الدنيا بخير ولكن شكلي بمووت وانا مقهوور منك ومن اخبارك....قمت انا وقلت اقوول يبوجلعووم جهز رقبتك بس الووقت قرب الحين الساعه 4 الفجر بصلي الفجر والعيد وبجيك وبسلخ والديك ...
وبعد صلاة العيد رحت البيت وسمعت الاخبار ...وارووح لابوجلعوم
هلا ابوجلعوم ..رد علي ها سنيت السكين تمام ... قلت أي سكين يبن الحلال والله ان اللي قلته كان مضبوط يبوجلعوم ..وشاف وجهي متغير وحالتي متكدره واستغرب عسى ماشر يبومحمد قلت الا انه الشر بعينه يبوجلعوم ...قال وش فيه خررعتني قلت روح احلق لحيتك يبوجلعوم... والدمعه بتنزل من عيني ... قال لاتقوووول ...قلت أي والله يبوجلعوم انا جاي اضحي فيك والامريكان سبقوني وضحوا قبلي ..وانسدحت على ظهري وحطيت يداتي تحت راسي وجا ابوجلعوم وقف جنبي وقلت له ..تصدق يبوجلعوم ماني بزعلان عليه...هو راح بخيره وبشره و جاه ما استحقه وحسابه عند ربه ...لكن يبوجلعوم وش معناها بيوم عيدنا وش معنا بيوم حجنا ... اخ يالقهر يبوجلعوم وصلنا لهالحاله ...وصلنا لهالذل ...
ونزلت دمعه من عين ابوجلعوم فقلت له وشو ذا يبوجلعوم تبكي على حالنا ؟؟؟مين انت يبوجلعوووم؟؟
فوقف على قوائمه الأربع شامخا ...مرفوع الراس ... ومد عنقه للامام كمن يستعيد كبرياءه... واخذ نفسا عميقا ونظر الي وثم عاد ليحملق امامه وارتجل قائلا:
انا البَاكي على المَاضي..
على الحَاضر..
انا البَاكي على تاريخِ أُمتِنا التليد
لا تاسى على دمعِ عيني...
فدمعُ القلبِ قدْ سالَ من زمنٍ بعيد
اسال عن دموعِ الثكالى...والارامِل..
اسال عن دمعةٍ...
على خدِ طاعنٍ يبكي الحفيد
انفطرَ الفؤادُ بماراى..
و اعتصرَ مني الحَشا..
حتى كاد ان ينفجرَ في يديَّ الوريد..
فاصبر..
فالفجرآت..والنصر آت..
وماياتي اليسرُ
الا من بعدِ ان ياتي ضيقٌ شديد
فطلعتني الحميه ورديت على ابوجلعووم وقلت:
أيُّ نصرٍ ..أيُّ فجرٍ..
دَعِ الاحلامَ اني ارى ليلاً طويل
لو كان شعرا.
.لنظمتُ مليونَ قافيةً..
وتغنيتُ بإحلى المواويل
ذُبحنا ..
نُحرنا..
حتى ارتوتِ الضفافُ مِن دمِنا النبيل
بكينا سيولاً..
وذرفنا دمُوعُاً...
تصنع من بعدِ النيلِ عشرينَ نيل
متى نعزفُ الالحان..
و نُغردُ في هذا الزمان..
متى تعودُ ايامُ ماضينا الجميل
متى يستيقظُ جسدُ أُمَّتيَّ العليل
من يعيد لنا الامجاد
ويعيد زمن الاجداد
ويرفع عن كاهِلِنا الحملُ الثقيل
يكفي بكاء.....يكفي نواح....
يكفي صراخ
فقد..
ادماني حزنُ الصوتِ في هذا العويل
فقال ابوجلعوم...
اما ان الاوان لابوجلعوم ان يرتاح ... الموت اعز لي من هذه الحياه ... ان اعيش في ذل وان كرامتي تهان ...الحمدلله اني خروف وذبحي حلال ...فعجل علي بسكينك... فقلت لا والله لن المسك يبوجلعوم فقد اصبحت من اعز اصدقائي فقال اضرب بسكينك واسل دمي فقلت لا والف لا اذهب فانت حرٌ يا ابوجلعوم فقال الثور ثور وين حر يابن الحلال وبعدين وش اللي قلبتها الزير السالم ...اخلص علينا وضحي فيني بس ..قلت له والله عليك حركات يبوجلعووم الحين شايفنا خاشين جو وبدينا نستعيد التراث العربي بهالجملتين وتجي انت وتخربها ...
ونام ابوجلعوم على جنبه وأرجع راسه للوراء وابرز عنقه ونظر ألي والدموع في عينيه ...فرحمت حاله ووضعت سكيني عليه وانا متردد فقال لي هيا!! فقلت بسم الله والله اكبر ..ولكني لم استطع ان اذبحه فسحبت السكين من عنقه ولكن كان ابوجلعووم اسرع مني و قد ذبح رقبته بسكيني.... فنظرت اليه وقلت :
لماذا يبوجلعوم ...والدموع تذرف من عيوني فقال وهو ينازع الم اقل لك آن الاوان لابوجلعوم ان يرتاح من قرفكم وقرف اللي يعايشكم ..وعندها اغمض ابوجلعوم عينيه...
النـــــــهــــــــايــــــــــــــه
____________________________________________________
في الاخير الشكر لكل من وصل لهذا السطر واللي ما وصل له مااقول له شي لانه ما وصله ولا بيقراه ...واعتذر عن طول السالفه والقرق الواااجد ..واعتذر عن عدم تدعيم الموضوع بصورة ابوجلعووم لانه باختصار من نسج الخيال... والسلاااااام 