هلا والله اخوي ريان في الرياض

صح اني ماني في الرياض بس ان شاء الله راح افيد شوي


اول شي

الوقت اللي انت جاي فيها حلووو بنسبه للبرد و الجو الحلو

يعني الجو هالايام جو طلعات و كشتات

يعني اذا نزل مطر في الرياض

دور اهلها كلهم في الثمامة

ثاني شي التمشية

التمشية في الرياض حلووه بنسبة لي

صح اني ما اطلع اتمشى الا يوم واحد او يومين في الاسبوع بس فيه اماكن حلوه تتمشى فيها بالسيارة

زي طريق التحلية و الضباب و الثلاثين و العليا و الستين و غيرها من الشوارع


بس دايما اختر الوقت المناسب

يعني لا تطلع بعد صلاة العشاء او بعد الساعه 9 الليل و تتمشى لانك راح تكره حياتك من الزحمات

غير كذا واحد جديد في الرياض يعني ما راح تعرف الطرق المختصره و الاسرع اللي توصلك للمكان اللي تبي

ثالث شي

الاسواق


طب و تخير

السوق جمب السوق

يعني خطوتين على رجولك و انت في السوق الثاني

الاسواق صراحه حلووووه مره و نظيفة

طبعا هينا عامل الوقت و العوائل يتدخلون في هذي المسئلة

يعني اذا انت عزوبي عندك الصبح

رح ادخل اي سوق يعجبك و ماحد يقولك لا

اما اذا انت مانت رايق تقوم الصبح عشان سوق

عندك العصر و ان شاء الله تدخل و تستانس الى تقول بس

طبعا هذا الكلام ينطبق خلال وسط الاسبوع

اما نهاية الاسبوع عندك من صلاة العصر الى المغرب بعدها برا و و اذا انت محظوظ الى صلاة العشا بعدين اوت

انا اذا كان معك اهلك فاهينا كلام ثاني

ادخل اي سوق و في اي وقت تبي محد يقولك لا



رابع شي

المفروض اذكره اول شي

المتاحف الوطني و قصر المصمك و ساحة الحكم و سوق الزل و الاثار في الدرعية

كلها اماكن حلوه و حلو انك تتعرف على تاريخ المملكة السعودية

عندك المتاحف الوطني و قصر المصمك و ساحة الحكم و سوق الزل كلها جمب بعض و يكفيها يوم واحد عشان تروح تتمشى فيها خاصه سوق الزل

فيه متعه و وناسة و انت تتمشى فيه ما تقدر تحس فيها في اي مكان ثاني

اما الاثار فعندك ساعتين عشان تقعد و تتمشى فيها الين تقول امين


خامس شي


عندك حي السفارات

حي راقي كل السفارات اللي تجي في بالك هيناك

حي محروس و امان فيه

داخل الحي عندك منتزهات و حدائق و ساحة الكندي و ساحة الكرازي ((اسمها كذا على ما اظن)) و غيرها من المطاعم الراقية

تروح هينا و تتمشى و تتعشى او تتغدى كيفك بس لا يفوتك الحي

تراه حي جميل و منسق


سادس شي


جسر المشاهدة في برج المملكه و مطعم و مقهى اللي في الفيصلية فووق

هيناك رح تتستمتع بمشاهدة الرياض كلها




هذا كل اللي اشوفه


و اذا بغيت تتستفسر عن اي حاجة في بالك عن الرياض اسئل

الكل في خدمتك يا اخوي





سلامـ