السلام عليكم ورحمة الله وبركاته
مساء الخير لجميع الموجودين في هالمنتدى الغالي على قلوبنا بوجود هالأعضاء المميزين
مشاركتي اليوم معكم هي عبارة عن قصيدة تتكلم عن العوانس والعوانس للي ما يعرف هم البنات اللي لم يكتب لهم التوفيق ولم يتزوجوا وطبعا تختلف وجهات النظر في مسألة كم العمر اللي يقال فيه للبنت عانس لكن ما أبغى أتعمق في ذا المسأله لكني ألاحظ بعض الناس يقولون للبنات اللي في عمر 26 و 27 عانس وهذا مو صحيح أتوقع .. خصوصا في ذا الوقت اللي البنت تبي تخلص دراستها والولد بيخلص دراسته ومن هالخرابيط !!
نرجع للقصيدة .. القصيدة من معانيها تدل على أنه بنت تقدم لها شاب ورفضته فقالوا لها لو ما تزوجتيه بيقولون عنك الناس عانس ومن ذا الكلام .. فقيلت ذا القصيدة .. وفيها عزاء للبنات اللي وصلوا لهذا الأمر ..
وبالنسبة للشاعر أنا جبت لكم القصيدة من أحد الأشرطة ولا أدري هو شاعر قايلها على لسان حال ذا البنت أو شاعرة اللي قايلتها ..
تقول القصيدة ::
أضحك وأنا أسمع سيرتي بالمجالس
وأعرف عيون الناس ما ترحم الحال
حالي مثل منهو على الباب حارس
يحفظ كنوز(ن) ما تقدر بالأموال
صعبة يجي إنسان ماهوب فارس
وياخذ بنيّة ينضرب فيها الأمثال
ولا يجي طايش وجاهل مدارس
أكبر طموحه خط بيجر وجوال
صدره من أمراض الدخاخين تارس
زود(ن) على التنباك منحط الآمال
النفس في خشمه ودايم يعاكس
يقول أنا لي شارب(ن) وألبس عقال
خبرني كيف أحيا مع إنسان لاقس
وشلون أجاري لعبة إنسان دجال
إيه أفتخر لا قالوا الناس عانس
ما دام من يطلبن ماهوب رجال
أتمنى تكون مشاركتي أعجبتكم .. تهمني ردودكم .. وألقاكم في مواضيع أخرى إن شاء الله
تحياتي ،،،
