السلام عليكم ورحمة الله وبركاته
مساكم الله بالخير اخواني اعضاء منتدى الزعيم
ابغا اخش في الموضوع بدون اي مقدمات
انا من سكان حي المصيف ولا فخر وهذا الحي من احياء شمال الرياض
الحي هذا ورغم انه يعتبر راقي نوعا ما الا انه يعتبر من اكثر الاحياء اللي تكثر فيها الجرائم
بياعة مخدرات+سرقات+تفحيط...الخ
مادعاني لكتابة هذا الموضوع هو ماحصل لابن اختي اللي عمرة حوالي 12 سنة في هذا اليوم
ولد اختي كان ماشي رايح البقالة قبل المغرب بلحالة وطلعله شباب معهم كامري وحاولوا اختطافة لكن الحمدلله
الولد هرب لخياط قريب من البيت وماقصر الخياط الله يجزاه خير رجعة للبيت
بعد مارجع البيت طلعت انا وياه ندور على ذا الشباب ورحنا نبلغ الدورية
راعي الدورية بصراحة ماقصر وسوا اللي عليه لكن قالي سالفة ماني قادر استوعبها الا الحين
قالي تخيل قبل كم يوم مسكنا شباب في ذا الحي يحاولون يخطفون ولد
المصيبه ان الولد كان راكب مع امه وابوه واخوانه في السيارة !!!!
تخيلوا ولد يتعرض لمحاولة اختطاف امام اهله ومن سيارتهم!!
اللي ابي افهمه كيف جتهم الجرأه انهم يسوون كذا!!
كيف يحاولون يخطفون واحد راكب مع اهله!!
يوم سمعت السالفة من العسكري هانت علي مصيبتي صراحه لان ولد اختي كان بلحالة رايح البقالة
لكن ذا الولد مسكين بغا ينخطف واهله معه!!
الله يكفينا الشر بس ياجماعه مابقا الا نسمع عن واحد انخطف من وسط بيتهم!!
ياجماعة ابي افهم من المسؤول عن هذي التصرفات
هل رجال الامن هم المسؤلون؟
ام هي الاسرة؟
ام المجتمع بالكامل؟
في الختام ياجماعه انتبهوا لاولادكم ترا ذا الوقت يخوف
حتى انت يالكبير تخاف تطلع لحالك بعض المرات فكيف الصغار
اسف على الاطالة ولكم خالص تحياتي،،،
