| الحين وبعد ماهدأت الاعصاب وراح الغضب خلونا ياشباب نأخذ الأمور بعقلانية وصراحة
هزيمتنا من تشلسي كانت متوقعه من قبل ومايعتبر شي يزعل لأنها بالأخير ثلاث نقاط من السهل تعويضها وخاصة اننا لعبنا خارج ميداننا وتشلسي يعتبر فريق قوي ولاهو بالشي السهل انك تهزمه في كل مره تلعب على ارضه لكن الشيء اللي يحز بالنفس ويضيق الصدر وأقولها بكل صراحة من بداية الموسم ماشفنا البرشا اللي حنا عارفينه برشا الموسم الماضي
بداية بنجوم الفريق رونالدينهو وديكو واكزافي انتهاءً بالمدرب ريكارد
فيه شي متغير
ريكارد الى الآن مافهمت وش معنى تغيراته تخبط بكل ماتحمله الكلمة من معنى
تكتيك الشوط الأول كان ممتاز وكنا تقريبا ً نجاري تشلسي اذا لم نكن افضل منهم في فترات وكانت السيطرة لنا إلى ان اخرج ريكارد قودينسن وادخل جولي صار الفريق يلعب بدون راس حربه وصار في زحمة في الاطراف وفي الوسط
تشوف خمسين مناوله بين اللاعبين من اكزافي الى ديكو الى مسي الى رونالدينهو وبعدين وش اللي يصير تنقطع الكورة وتروح هجمه لفريق تشلسي اللي يلعب عكس برشلونة اي انه يصل الى المرمى بأقل عدد من المناولات وبأسرع وقت على طول عندهم تكتيك وحافظين الخطه ونازلين للملعب يطبقونها
لمسه لمستين الى انهم واصلين المرمي بعكس ربعنا اللي كل واحد يبلش بالكورة مايدري وش يسوي فيها
اخراج ريكارد لجيو وادخال انيستا كأنه يقول لمورينهو خل هجومك يستمتعون بالمباراة وصار الضغط علينا واي هجمه لتشلسي تكون خطيرة وعلى فكرة هذا اللي سبب اصابة لبويول وخلى المدرب يطلعه وليته دخل تورام لا دخل اوليقير انا مادري وش لاقي باوليقير هذا ياخي لاعب ماله مكان في البرشا الفريق اكبر من مستواه لكن وش نقول قناعة ريكارد اكبر من الجميع
اااااااااه يايتو صحيح وفي الليلة الضلماء يفتقد البدر
سافيولا مظلووووووووووم ان شاء الله يتخلى ريكارد عن عناده ويدخله في الكلاسيكو
في نقطه اخيره
ياجماعه خلونا صريحين رونالدينهو هذا مهب حقنا
تغير عن الأول
انا من الاول اسمع كلام الناس انه اصابه الغرور وهبط مستواه وكنت اقول هذولا حاقدين على الساحر ومايقدمه لكن بالفعل إذا جيت للواقع مستواه هابط عن اول كثييير من اول يعتبر احد الحلول اذا لم يكن عندك حلول وكان ينقذ الفريق الان صار مجرد لاعب مثل اي لاعب عادي وللأسف صارت الكورة تنقطع منه بسهوله وصاير يستسلم للرقابه على طول
اتمنى انه مايطول على هالحال ويرجع زي روني الاول رونالدينهو حق الموسم اللي فات
اعذروني على الاطاله ولكن شي بالقلب وحبيت اقوله
ملاحظة // الى اطفال منتدانا العزيز
اذا انت حاقد وشايل بقلبك شي على البرشا فأنا اقولك هذا ليس المكان الصحيح عشان تطلع اللي بقلبك رح لرابطتك وقل اللي بقبلك كله | 